Ebikaguzo Kuruga omu Basomi Baitu

‘Kiteekerezo’ ki Yahwe eki alita omu mitima y’amahanga omu kasumi akatali ka hara?

Ekyahandiikirwe ekiri omu Okusuukururwa 17:16, 17 kibazaaho okutandika okw’omuhito omwingi kiti: “Amahembe ikumi agoorozerege hamu n’ekisoro, binu birinoba malaaya kandi birimuhwerekereza, bimujweke busa, birirya enyama ye kandi birimwokya n’omurro ahwereho kimu. Habwokuba Ruhanga akakita omu mitima yabyo kuhikiiriza ekiteekerezo kye, ego, kukora ekiteekerezo kyabo kimu eky’okuha obukama bwabo hali ekisoro.” Ebitabu byaitu biikaire nibigamba ngu “ekiteekerezo” Yahwe eki alita omu mitima y’amahanga nikyo eky’okuhwerekereza amadiini ag’ebisuba.

Baitu turozere ngu tusemeriire kuhinduramu enyetegereza yaitu. “Ekiteekerezo” Yahwe eki alita omu mitima y’amahanga agarukukiikirra abakama ikumi, nikyo ngu balihayo “obukama bwabo hali ekisoro.” Kusobora kwetegereza omulingo kinu kirihikiirizibwa, teekerezaaho ebikaguzo binu.

Nibaha abarukubazibwaho omu bunabbi bunu? “Malaaya” ibara lye erindi niryo “Baburooni Orukooto”; naakikirra amadiini goona ag’ebisuba. “Ekisoro” nikikiikirra ekitongole ekyokuleetaho obusinge ekyatandikirweho omu 1919 kandi omu kasumi ako kikaba nikyetwa League of Nations baitu hati nikyetwa Ekitongole eky’Amahanga Ageteraine rundi United Nations. (Kus. 17:3-5) “Amahembe ikumi” nigakiikirra gavumenti zoona ezirukusagika ekisoro.

Nkoragana ki ey’eri hagati ya malaaya n’ekisoro? Malaaya aikaire “aikaliire” ha kisoro, ekirukumanyisa ngu naakisagika kandi naalengaho kukireetera kukora ebi arukugonza.

Kiki ekirukwija kuhika hali malaaya? Ekisoro hamu n’amahembe ikumi agarukukisagika, “birinoba malaaya.” Birimunoba muno kuhika ha rulengo ngu birimutwaraho buli kimu kyona eki aine kandi byoleke buli omu weena nkooku ali mubi muno. Hanyuma birimuhwerekereza nkooku Yahwe yagambire. (Kus. 17:1; 18:8) Kandi egi niyo eriba empero y’amadiini goona ag’ebisuba. Baitu eki kitakabaireho, Yahwe naija kuleetera amahanga kukora ekintu ekitakabahoga omu byafaayo by’obulemi bw’abantu.

Kiki Yahwe eki alireetera amahanga kukora? Naija kuta “ekiteekerezo kye” omu mitima y’amahembe ikumi kandi eki nikyo ‘kuha amaani gaabo n’obusobozi bwabo ekisoro ekirukutukura,’—kandi ekisoro nikikiikirra Ekitongole ky’Amahanga Ageteraine. (Kus. 17:13) Kinu nikimanyisa ki? Nootekereza ngu gavumenti z’abantu niziija kwecweramu kuhayo obusobozi bwazo hali ekisoro? Nangwa! Obunabbi nibwoleka ngu Ruhanga nuwe alibaleetera kukikora. (Nfu. 21:1; lengesaniza na Isaaya 44:28.) Ekintu kinu nikiija kubaho mpora mpora? Nangwa! Nikiija kubaho ahonaaho. Ekisoro, ekirukwija kuba kitungire obusobozi bwingi, nikiija kuhwerekereza amadiini goona ag’ebisuba kandi tigalyongera kubaho obundi.

Kiki eki tulindiriire kubaho omu kasumi ak’omumaiso? Titusemeriire kunihira kurora amakuru agarukwoleka ngu gavumenti z’abantu ziriyo nizihayo obusobozi bwazo hali Ekitongole ky’Amahanga Ageteraine. Baitu eki tusemeriire kunihira nikyo ngu: Ahonaaho, Yahwe naija kuta ekiteekerezo kye omu mitima y’amahanga nukwo gaheyo obusobozi bwago hali ekisoro. Eki obu kiraabaho, nitwija kumanya ngu omuhito omwingi guli haihi kutandika. Baitu eki kitakabaireho, “leka twikale niturora kandi twikale nitwetegereza kurungi” habwokuba ebintu biri haihi kuhinduka!—1 Bas. 5:6.