EKICWEKA KY’OKWEGA 30
EKIZINA 97 Obwomeezi Nibusigikirra ha Kigambo kya Ruhanga
Gumizaamu Nooyegera ha Nyegesa za Baibuli Ezirukubandizibwaho
“Nukwo ndaikaraga bwona nyetekaniize okubaijukya ebigambo ebi, nobumuraba mubimanyire, kandi mugumiibwe omu mazima agali nainywe.”—2 PET. 1:12.
EBI TURAYEGA
Nitwija kurora omulingo ebintu wayegere obu okaba okyatandikire kwega Baibuli bisobora kukukonyera n’omu kasumi kanu.
1. Enyegesa za Baibuli ezirukubandizibwaho zikakukwataho zita obu watandikire kwega amananu?
ENYEGESA za Baibuli ezirukubandizibwaho zikahindura obwomeezi bwaitu. Ekyokurorraho, obu twayegere ngu ibara lya Ruhanga niryo Yahwe, tukateera orutambu orw’okubanza orw’okufooka banywani be. (Is. 42:8) Obu twayegere ekibaho omuntu obu afa, tukaleka kwekaguza abantu baitu abaafiire obu baraaba nibabonabona kandi titukyatiina abafu. (Mug. 9:10) Kandi obu twayegere ha murago gwa Ruhanga ogw’okufoora ensi Orugonjo Orurungi, tukaleka kutiina omulingo obusumi bwaitu obw’omumaiso buraaba. Tukakigumya ngu obwomeezi bwaitu tibuli bw’akacu kake kugarukira ha myaka 70 rundi 80, baitu nitwija kwomeera ebiro n’ebiro.—Zab. 37:29; 90:10.
2. Ekyahandiikirwe ekiri omu 2 Petero 1:12, 13, nikyoleka kita ngu n’Abakristaayo abakuzire omu by’omwoyo nibasobora kugasirwa omu nyegesa eza Baibuli ezirukubandizibwaho?
2 Titusemeriire kuteekereza ngu enyegesa za Baibuli ezirukubandizibwaho tizikyaine mugaso. Omu bbaruha ye eya kabiri, omukwenda Petero akaba naahandiikira Abakristaayo abakaba ‘bagumiibwe omu mazima.’ (Soma 2 Petero 1:12, 13.) Baitu omu kasumi ako, hakaba haroho abantu ababi omu kitebe abakaba nibagonza kuhabya ab’oruganda kuruga omu mananu. (2 Pet. 2:1-3) Petero akaba naagonza kugumya ab’oruganda na banyaanya itwe nukwo basobole kwerinda hali ebisuba abantu ababi ebi bakaba nibeegesa. Kusobora kuhikiriza eki, akabaijukya ebintu ebimu ebi bakaba bamazire kwega. Enyegesa zinu zikaba niziija kubakonyera kulinda obwesigwa bwabo kuhikira kimu ha mpero.
3. Soborra ensonga habwaki Abakristaayo boona basemeriire kugumizaamu nibeecumiitirizaaho enyegesa za Baibui ezirukubandizibwaho.
3 Noobu twakuba tumazire emyaka nyingi omu mananu, nitusobora kwega amasomo amahyaka kuruga omu nyegesa za Baibuli ezirukubandizibwaho. Ekyokurorraho, omucumbi omukugu hamu n’omucumbi ow’ataine bukugu, boona nibasobora kukozesa ebirungo nibyo bimu obu barukuba nibateekaniza ekiihuro. Baitu habw’okuba omucumbi omukugu amazire obwire bwingi naakora omulimo gwe, ayegere kukozesa ebirungo nibyo bimu omu miringo erukwahukana kusobora kwihamu ekiihuro ekihyaka kandi ekinuzire. Omu mulingo nugwo gumu, abaheereza ba Yahwe abamazire akasumi nibamuheereza hamu n’abeegi ba Baibuli abahyaka nibasobora kurora enyegesa za Baibuli ezirukubandizibwaho omu miringo ey’erukwahukana. Enyikara zaitu rundi obujunaanizibwa obu twine omu buheereza bwaitu hali Yahwe nibisobora kuba bihindukire kuruga tubatizibwa. Kakuba enyegesa ezi twayegere kara tuzita omu nkora omu nyikara ezi turumu kasumi kanu, nitusobora kuzoora amasomo amahyaka agasobora kutugasira omu bwomeezi bwaitu. Leka turole amasomo Abakristaayo abakuzire omu by’omwoyo basobora kwegera ha nyegesa isatu eza Baibuli ezirukubandizibwaho.
YAHWE NUWE OMUHANGI
4. Kukimanya ngu Yahwe nuwe Omuhangi kikwasireho kita obwomeezi bwaitu?
4 Omu Abaheburaniya 3:4, hooleka ngu “ayayombekere byona ni Ruhanga.” Tukimanyire ngu ensi yaitu hamu n’ebintu ebyomeezi ebigirumu, bikakorwa Omuhangi ow’arukukirayo amagezi n’amaani. Habwokuba nuwe yatuhangire, atumanyiire kimu kurungi. Ekirukukirayo obukuru, atufaaho kandi amanyire ekirukukirayo oburungi hali itwe. Nahabweki, kukimanya ngu Yahwe nuwe Muhangi waitu, kihindwire obwomeezi bwaitu omu miringo nyingi kandi ey’erukuhuniiriza, kandi kituhaire obwomeezi obwine ekigendererwa.
5. Kiki ekisobora kutukonyera kukurakuraniza obwebundaazi? (Isaya 45:9-12)
5 Ekindi, kukimanya ngu Yahwe nuwe Omuhangi nikitwegesa kuba bebundaazi. Ekyokurorraho, hanyuma ya Yobbu kwetaho omutima n’okuguta h’abantu abandi, Yahwe akamwijukya ngu nuwe Omuhangi ow’obusobozi bwona. (Yob 38:1-4) Okwijukibwa kunu kukakoonyera Yobbu kukirora ngu omulingo Yahwe akoramu ebintu nigukirra hara ogw’abantu. Egi niyo ensonga habwaki nabbi Isaaya yahandiikire ati: “Ibumba ligambira ogu arukulibumba liti Nokora ki?’”—Soma Isaya 45:9-12.
6. Ni di obu tusemeriire kukira muno kutekeerezaaho omulingo Omuhangi waitu aine amagezi n’amaani? (Rora n’ebisisani.)
6 Omukristaayo obu amara akasumi naaheereza Yahwe, naasobora kuta muno omutima ha nteekereza ze, omu kiikaro ky’okuserra oburagirizi kuruga hali Yahwe n’omu Kigambo kye Baibuli. (Yob. 37:23, 24) Baitu omuntu agasirwa ata obu ateekerezaaho muno Omuhangi we Yahwe, amagezi ge hamu n’amaani ge? (Is. 40:22; 55:8, 9) Amananu ganu gamukoonyera kukyetegereza ngu enteekereza ya Yahwe neekirra hara eye, kandi kinu kimukoonyera kuba mwebundaazi.
Kiki ekisobora kutukoonyera kwikara twine enteekereza ey’ehikire obukirukuhika ha nteekereza zaitu? (Rora akacweka 6)d
7. Kiki Rahela eki yakozere kusobora kwikiriza oburagirizi obuhyaka?
7 Rahela, arukwikara omu Slovenia, akyetegeriize ngu kuteekerezaaho Omuhangi we, kimukoonyiire kwikiriza empindahinduka z’ekitebe. Naagamba ati: “Obwire obumu kingumira kwikiriza encwamu eziba zikozerwe abo abarukwebembera ekitebe. Ekyokurorraho, na hanyuma y’okurora Ripooti eya Munaana Kuruga h’Akatebe Akalemi ey’Omwaka 2023, kikampuniiriza muno obu nababandize kurora ow’oruganda ow’akulize omuleju naaha orubazo. Nahabweki nkasaba Yahwe kunkoonyera kusobora kwikiriza empindahinduka enu.” Rahela akakyetegereza ngu Yahwe anyakuli Omuhangi w’iguru n’ensi, amanyire omulingo ogurukukirayo oburungi ogw’okwebembera ekitebe kye. Obu kiraaba nikikugumira kwikiriza enyetegereza empyaka rundi oburagirizi obuhyaka, tunga obwire oteekerezeeho muno amagezi amaingi muno hamu n’amaani ag’Omuhangi waitu.—Bar. 11:33-36.
ENSONGA HABWAKI RUHANGA AIKIRIZA OKUBONABONA
8. Kumanya ensonga habwaki Ruhanga aikiriza okubonabona kikugasiire kita?
8 Habwaki Ruhanga aikiriza okubonabona kubaho? Abantu abamu abatamanyire eky’okugarukamu eky’ekikaguzo eki, bakwatiirwe Ruhanga ekiniga kandi abamu baamalirra nibagamba ngu taroho! (Nfu. 19:3) Kwahukanaho nabo, iwe oyegere ngu Yahwe tali nuwe arukutuleetera okubonabona, baitu nitubonabona habw’ekibi ekitwagwetiirwe n’obutahikirra. Ekindi, oyegere ngu okugumiisiriza kwa Yahwe kuleetiire obukaikuru n’obukaikuru bw’abantu kumumanya n’okwerorra omulingo alimarraho kimu okubonabona. (2 Pet. 3:9, 15) Kumanya ebintu binu kisoboire kukuhuumuza kandi kyakuleetera kumwirra haihi.
9. Ni di obu tusemeriire kukira muno kwijuka ensonga habwaki Yahwe aikiriza okubonabona?
9 Tusemeriire kugumiisiriza obu nitulindirra Yahwe kumaraho okubonabona. Baitu obwire obumu, omuntu ou turukugonza obu afa, rundi itwe n’eka yaitu obu tuhikwaho ebizibu, rundi tukatwazibwa omu mulingo ogutali gw’obwinganiza, nitusobora kwekaguza habwaki Yahwe atagira eki yakoraho omu bwangu. (Hab. 1:2, 3) Omu busumi nk’obu, kirungi kuteekerezaaho ensonga habwaki Yahwe aikiriza abantu abahikiriire kubonabona.a (Zab. 34:19) Nitusobora nookuteekerezaaho ekigendererwa kye eky’okumarraho kimu okubonabona.
10. Kiki ekikonyiire Anne kutunga okuhuumuzibwa hanyuma y’okufeerwa nyina?
10 Kumanya ensonga habwaki Yahwe aikiriza okubonabana kitukonyera kugumiisiriza. Anne, ow’arukwikara ha kizinga kya Mayotte, ekiri ha nyanja ya Indian Ocean, naagamba ati: “Nkasaalirirwa muno obu naferiirwe nyina nyowe emyaka nke enyuma. Baitu nyikara ninyijuka ngu Yahwe tali nuwe arukuleetaho okubonabona. Aine ekihika ky’okumarraho kimu okubonabana kwona n’okuhumbuura abantu baitu abaafiire. Obu nyecumitirizaaho ebintu ebi, kindeetera obusinge omu biteekerezo kandi eki kimpuniiriza muno.”
11. Kumanya ensonga habwaki Yahwe aikiriize okubonabona, kitukoonyera kita kugumizaamu nitutebeza?
11 Kumanya ensonga habwaki Yahwe aikiriza okubonabona, nikitwekambisa kugumizaamu nitutebeza. Hanyuma ya Petero kusoborra ngu Yahwe agumiisiriza habwokuba naagonza abantu beegarukemu kandi bajunwe, akongera yahandiika ati: “Musemeriire kuba abantu abaine engeso ezirukwera kandi abarukukora ebikorwa ebirukwoleka ngu mwemaliire hali Ruhanga.” (2 Pet. 3:11, NWT) Bimu ha bikorwa ebirukwoleka ngu twemaliire hali Ruhanga nukwo kutebeza. Kusisanaho na Isiitwe ow’omu iguru, na itwe tugonza abantu. Nitugonza na bo baikale omu nsi ya Ruhanga empyaka. N’okugumiisiriza, Yahwe ahaire abantu ab’omu kiikaro kyanyu omugisa ogw’okumuramya. Mali oine omugisa ogw’amaani ogw’okukorra hamu na Ruhanga kukoonyera abantu baingi kumwegaho empero etakahikire!—1 Kol. 3:9.
TULI OMU BIRO “EBYA HA MPERO”
12. Kukimanya ngu tuli omu biro ebya ha mpero kitugasiire kita?
12 Baibuli ebazaaho omulingo abantu baakwetwaizeemu omu biro “ebya ha mpero.” (2 Tim. 3:1-5) Obu turora omulingo abantu abatwetoroire kasumi kanu barukwetwazaamu, kyolekera kimu ngu obunabbi bunu buliyo nibuhikirra. Obu turora enteekereza n’enyetwaza y’abantu nibyeyongerra kimu kusiisikara, tweyongerra kimu kukigumya ngu Ekigambo kya Ruhanga nikyesigwa.—2 Tim. 3:13-15.
13. Kusigikirra ha kyokurorraho kya Yesu ekiri omu Luka 12:15-21, bikaguzo ki ebi tusobora kwekaguza?
13 Kukimanya ngu tuli omu biro ebya ha mpero, kitukoonyera kuta omutima ha bintu ebikuru. Wetegereze eki turukwegera ha kyokurorraho kya Yesu ekirukusangwa omu Luka 12:15-21. (Soma.) obukirukuhika ha kwebembeza ebintu ebirukukira obukuru. Habwaki Yesu yayesere omusaija omuguuda, “omudoma”? Tikiri ngu habwokuba akaba ali muguuda, baitu akaba naayembeza ebintu ebitali bikuru. Omusaija onu ‘akeeyahurra itungo baitu akaba atali muguuda omu maiso ga Ruhanga.’ Kukozesa obwire bwe omu mulingo ogutali gw’amagezi ekaba eri nsobi y’amaani habw’okuba akaba asigaizeeyo obwire buke kwomeera. Ruhanga akamugambira ati: “Kiro kinu omu bwire bw’ekiro nibaija kukwihaho obwomeezi bwawe.” Kasumi kanu nkooku empero y’obusinge bunu iriire haihi, na itwe tusemeriire kwekaguza: ‘Ebigendererwa byange nibyoleka ngu nkozesa obwire bwange omu mulingo ogw’amagezi? Nkoonyera abaana bange kweteeraho ebigendererwa bya mulingo ki? Nkozesa maani gange, obwire bwange, hamu na sente zange kweyahurra itungo hanu omu nsi, rundi omu iguru?’
14. Kusigikirra ha kyokurorraho kya Miki, habwaki kyamagezi kwecumiitirizaaho obwakaiso oburukusigikirra ha Byahandiikirwe oburukwoleka ngu tuli omu biro ebya ha mpero?
14 Obu tukimanya ngu tuli omu biro ebya ha mpero kandi tukakyecumiitirizaaho muno, kitukonyera kukora encwamu enungi n’okukozesa kurungi obwomeezi bwaitu. Kinu nikyo kyahikire hali munyaanya itwe arukwetwa Miki. Naagamba ati: “Obu namazire siniya, nkaba ningonza kweyongerayo nsomeho ebisoro. Baitu ha murundi nugwo gumu, nkaba ningonza kufooka payoniya nukwo mpeereze nambere hali obwetaago. Ab’oruganda na banyaanya itwe abamu bakangambira kuteekerezaaho omulimo ogu nkaba ningonza kutunga obu guraaba gukaba nigwija kunsobozesa kuhikiiriza ebigendererwa byange eby’omwoyo. Bakanyijukya ngu omu kasumi akatali ka hara, ensi enu embi niija kuhwaho. Baitu ha rubaju orundi, bakanyijukya ngu omu nsi empyaka ninyija kumanya bingi ebirukukwata ha bisoro habw’ebiro n’ebiro. Nahabweki nkacwamu kusomerra omulimo ogukaba gutarukwija kutwara obwire bwingi. Kinu kikankoonyera kutunga omulimo ogwansagikire omu kuheereza nka payoniya, kandi hanyuma nkagenda omu ihanga lya Ecuador, kuheereza nambere hali obwetaago.” Miki na musaija we hati nibaheereza omu mulimo gw’okubungira ebitebe omu ihanga eri.
15. Abantu nibasobora kwetwaza bata hanyuma y’okubatebeza amakuru amarungi? Bazaaho ekyokurorraho. (Rora n’ebisisani.)
15 Titusemeriire kuhwamu amaani kakuba abantu ha kubanza banga amakuru amarungi. Abantu nibasobora kuhinduka. Teekerezaaho ekyokurorraho kya mugenzi wa Yesu, Yakobbo. Akarora Yesu naakura, naafooka Masiya, kandi naayegesa kurungi kukira omuntu ondi weena. Baitu nabwo Yakobbo akamara emyaka nyingi muno atakafookere muhondezi wa Yesu. Hanyuma ya Yesu kuhumbuuka, nubwo Yakobbo yafookere mwegeswa we kandi omwekambi!b (Yoh. 7:5; Bag. 2:9) Otaleka kutebeza abanyabuzaale baawe noobu baarayooleka ngu tibarukugonza kwega amananu rundi kuleka kugarukira abo abaayolekere kara ngu tibarukugonza kukuhuliiriza. Ijuka ngu tuli omu biro ebya ha mpero nahabweki omulimo gw’okutebeza gwine kukorwa omu bwangu. Ebintu ebi tubatebeza kasumi kanu nibisobora kubakwataho omu kasumi ak’omumaiso, obundi na hanyuma y’okutandika kw’omuhito omwingi.c
Kiki ekisobora kutukoonyera kutajwaha obu turukuba nitutebeza abanyabuzaale baitu? (Rora akacweka 15)e
IKARA NOOSIIMA OKWIJUKIBWA KWA YAHWE
16. Okwijukibwa kwa Yahwe kukugasiire kuta? (Rora n’akasanduuko “Bikozese Kukonyera Abandi.”)
16 Ebyokulya eby’omwoyo ebimu ebi tutunga, biba biteekaniziibwe kukoonyera abo abamanyire bike ha Baibuli. Ekyokurorraho, orubazo rwa boona, ebicweka ebimu hamu na vidiyo ebiri ha jw.org, otwaliiremu na magaziini ez’okugaba omu buheereza biteekaniziibwe n’ekigendererwa eky’okukoonyera abantu abatali Bakaiso ba Yahwe. Baitu eki noobu kiraaba nukwo kiri, obutumwa obuba burumu na itwe butugasira. Butukoonyera kweyongera kugonza Yahwe, kugumya okwikiriza kwaitu omu Kigambo kye kandi butukoonyera kuba beegesa ba Baibuli abarungi.—Zab. 19:7.
17. Nyikara ki ezisobora kutuleetera kuteekerezaaho enyegesa za Baibuli ezirukubandizibwaho?
17 Nk’Abakaiso ba Yahwe, tusemererwa muno obu tutunga enyetegereza empyaka ey’enyegesa ezirukusigikirra ha Baibuli. Baitu nabwo nitusiima muno habw’enyegesa za Baibuli ezirukubandizibwaho ezi twayegere kandi zaatukonyera kutandika kwirra haihi na Yahwe. Kakuba tutunga oburagirizi kuruga omu kitebe baitu tukateekereza ngu enteekereza zaitu rundi omulingo tukoramu ebintu nugwo guhikire, tusemeriire kukiijuka ngu Yahwe, Omuhangi ow’amagezi kandi ow’amaani nuwe arukwebembera ekitebe. Kakuba tuhikwaho ekirengo rundi kikahika ha muntu ou turukugonza, tusemeriire kugumiisiriza kandi tuteekerezeeho ensonga habwaki Yahwe aikiriza okubonabona. Kandi obu turaaba nituteekerezaaho omulingo turaakozesaamu obwire bwaitu hamu n’ebintu byaitu, tusemeriire kwijuka ngu tuli omu biro ebya ha mpero kandi ngu tusigaizeeyo obwire buke. Leka okwijukibwa kwa Yahwe kugumizeemu nikutugumya, nikutwekambisa kandi nikutufoora ab’amagezi.
EKIZINA 95 Ekyererezi Nikyeyongera
a Rora ekicweka ekiine omutwe “Ensonga Habwaki Okubonabona Kwona Kuli Haihi Kuhwaho” ekiri omu Watchtower eya Maayi 15, 2007, rup. 21-25.
c Rora ekicweka ekiine omutwe “Biki Ebitumanyire ha Mulingo Yahwe Arukwija Kucwa Omusango omu Kasumi ak’Omu Maiso?” ekiri omu Omunaara gw’Omulinzi ogwa Maayi 2024, rup. 8-13.
d KUSOBORRA EBISISANI: Orupapura 15: Omugurusi omu ahayo enteekereza ye baitu abagurusi abandi tibaikiraniza nayo. Kandi hanyuma y’okurora iguru eriijwire enyunyuuzi, acwamu kuba n’enteekereza ey’ehikire.
e KUSOBORRA EKISISANI: Omu h’Abakaiso ba Yahwe aliyo naayesomesa Baibuli, kandi naayekebiija obwakaiso oburukwoleka ngu tuli omu biro ebya ha mpero. Kinu kimuleetera kuterra mugenzi we esimu kumutebeza.