Noosobora Kweyongera Kuba Mumanzi!

1-3. Kiki ekyaleetiire ebigambo bya Yesu “mwimuke tugende,” kuba by’obumanzi?

“MWIMUKE tugende.” Hataroho kugurukyagurukya, ebigambo binu nibyo bikyakizireyo kuba by’obumanzi, omuntu ebi yabalize. Ebigambo ebi nibyoleka bita obumanzi? Nitusobora kutunga eky’okugarukamu kakuba tuteekerezaaho omuntu ayabibalize, n’ensonga habwaki yabibalize.—Mat. 26:46.

² Ebigambo ebi, Yesu akabigambira abahondezi be abeesigwa. Kandi akasangwa abibalizeeho kara. (Yoh. 14:31) Baitu ha murundi gunu, enyikara ekaba egumangaine muno. Akaba ali omu musiri Gesesemane, aheeru y’orubuga rwa Yerusaalemu. Bukaba bwire bw’itumbi, okwezi nikwaka, kandi Yesu akaba akimanyire ngu ekitebe eky’abantu abaine eby’okurwanisa, kikaba kiiriire haihi. Akaba amanyire eki bakaba nibagenda kumukora. Akaba ali haihi kuhikwaho ekirengo eky’amaani, ekitakahikahoga omuntu ondi weena. Kandi akaba akimanyire ngu naija kuhikwaho ekirengo eki wenka.

³ Yesu atalengeho kwiruka. Noobu kiraaba ngu akaba naasobora kweta bamalaika ab’amaani kumulinda, atakikole. (Mat. 26:53) Oihireho, akagamba ati: “Mwimuke tugende.” Kiki ekikaba nikigenda kuhika hali Yesu? Bakaba nibagenda kumukwata, abonabonesebwe, kandi aitwe. Habwaki akaba ayehaireyo kubonabonesebwa, kandi hanyuma aitwe? Habwokuba akaba naagonza Ise hamu n’abahondezi be.

4-5. Bumanzi bwa mulingo ki Yesu obu yayolekere, kandi habwaki na itwe nitubwetaaga?

⁴ Hataroho kugurukyagurukya, Yesu Kristo nuwe musaija akyakizireyo kwoleka obumanzi. Oli omu h’abahondezi be? Na iwe oli mumanzi. Abakristaayo ab’amananu basemeriire kuba bamanzi. Kasumi kanu, nitwikara omu busumi obugumangaine kandi obw’akabi muno. Nahabweki, nitwetaaga obumanzi kukira na kara.

⁵ Nikimanyisa ki kwoleka obumanzi nk’obwa Yesu? Obumanzi bwonyini, tikirukumanyisa kuba muntu atarukutiina ekintu kyona, kweteeka omu kabi nambere kitarukwetaagisa, rundi kukora ekintu nooteekereza ngu busaho kabi akarukwija kukuhikaho. Kandi tikirukumanyisa kukora ebintu eby’okurwana nukwo osobole kwoleka ngu oli w’amaani. (Zab. 11:5) Obumanzi Yesu Kristo yayolekere, bukaba butarukusisana nk’obu. Obumanzi bwonyini, gaba maani agatusobozesa kugumizaamu nitukora ekihikire omu maiso ga Ruhanga, n’omu nyikara ey’egumire.

Noosobora Kwegera ha Bumanzi bwa Yesu!

6. Kakuba twehurra ngu tituli bamanzi, omulingo Yesu yatwaizeemu abeegeswa be nigusobora guta kutuhuumuza?

⁶ Obundi, noosobora kwekaguza obu oraaba noosobora kwoleka obumanzi obu orukuba noolengwa nka Yesu. Obu kiraaba nukwo kiri, ijuka kinu: Yesu ali muntu arukwetegereza. Kusisana na Ise, Yesu tarukutunihirramu kukora ebintu ebi tutarukusobora. (Zab. 103:14; Yoh. 14:9) Ekyokurorraho, obu bakaba bali omu musiri Gesesemane omu bwire bw’itumbi, Yesu akagambira abahondezi be kwikara nibarora hamu na uwe, baitu bakagwijagira. Omu mulingo gw’embabazi, akabagambira ati: “Ky’amananu ngu omwoyo nigugonza, baitu omubiri muceke.” (Mat. 26:41) Akeetegereza obuceke bwabo, kandi n’obwawe naabwetegereza.

7-8. Yesu agumize ata abahondezi be?

⁷ Ekindi, Yesu akooleka ngu akaba naayesiga abahondezi be. Teekerezaaho omulingo yabahuumwize n’iraka lye, obu yabagambiire ati: “Mugume! Nyowe nsingwire ensi.” (Yoh. 16:33) Akaba akimanyire ngu nibaija kurubatira omu bigere bye, kandi bakakikora. Emirundi nyingi, Yesu akakozesa ekigambo “mugume.” Nikyo yabandize kugambira omusaija ow’akaba asaraire, atakamugambiire ngu ebibi bye bimuganyiirwe. (Mat. 9:2) Na hanyuma y’okukiza omukazi ow’akaba arwaire ekyejwiso ky’esagama, Yesu akamugambira ekigambo nikyo kimu. (Mat. 9:22) Akakigambira n’abeegeswa be naabagumya obu bakaba batiiniire habw’omuyaga ogw’amaani. (Mat. 14:27) Kandi obu akaba ali omu iguru, akagambira Paulo ekintu nikyo kimu obu yakizire kwitwa abanyanzigwa be.—Ebik. 23:9-11.

⁸ Omu mulingo nugwo gumu, Yesu, Omukama waawe omumanzi, naakugambira ekintu nikyo kimu. Naagonza ‘ogume’! Kandi akimanyire ngu noosobora. Ise, Yahwe, akuhaire eki kyonyini eki orukwetaaga kusobora kukikora.

Baibuli Neesobora Eta Kutukoonyera Kwongera ha Bumanzi Bwaitu?

9. Baibuli neesobora eta kutukoonyera kwongera ha bumanzi bwaitu?

⁹ Omu Baibuli, Yahwe akatamu ebyokurorraho bingi ebisobora kutukoonyera kwongera ha bumanzi bwaitu. Harumu ebyokurorraho eby’abasaija n’abakazi baingi, abato n’abakuru, abaarabire omu nyikara ezirukwahukana. Boona bakaba baine “enyehurra nk’ezaitu,” nka nabbi Eriya. (Yak. 5:17) Bakaba batahikiriire, baine obuceke, baine okutiina, nka itwe itwena. Kusisana na itwe, na bo bakahikwaho ebizibu ebya buli mulingo, n’enyikara ez’akabi. Baitu bakabisingura nkooku Yesu yakozere. Ebyokurorraho byabo eby’obumanzi nibitugarramu amaani kasumi kanu.

10-11. Ekitabu kinu nikisobora kukukoonyera kukora ki, kandi noosobora ota kukikozesa? (Rora akasanduuko “Omulingo Osobora Kukozesa Ekitabu Kinu omu Kwesomesa Hamu n’Omu Kuramya okw’Eka.”)

¹⁰ Ekitabu kinu kiteekaniiziibwe kukukoonyera kweyongera kuba mumanzi. Esuura 54 ez’ekitabu kinu, nizooleka omulingo Yahwe yakoonyiire abantu abatahikiriire nka itwe, kutunga obumanzi obu bakaba nibeetaaga. Nahabweki, soma buli suura kandi hanyuma oseruliirize nukwo omanye ebirukukwata ha buli muntu arukubazibwaho. Obu orakikora, noija kweyongera kubamanya kurungi.

¹¹ Leka ebyokurorraho byabo bikukoonyere kweyongera kuba mumanzi, nukwo osobole kugumiisiriza omu “biro ebya ha mpero.” (2 Tim. 3:1) Nibiija kukukoonyera kwikara noijuka omurago gwa Yahwe, ogurukugamba guti: “Tindikulekaho, kandi tindikusigaho.” Nkooku Paulo yahandiikire, ebigambo ebi nibisobora kutukoonyera “kuba bamanzi kandi tugambe tuti: ‘Yahwe nuwe mukoonyezi wange; tinditiina.’”—Baheb. 13:5, 6.