Ebbaruha Kuruga h’Akatebe Akalemi

Ab’Oruganda na Banyaanya Itwe Abagonzebwa:

Omu butumwa bwe hali ekitibe kya Sumuna, Yesu akagamba ati: “Otatiina ebintu ebibi ebiri haihi kukuhikaho.” (Kus. 2:10) Ebigambo bye binu ebirukwekambisa ab’omu kitebe eki kutatiina, na itwe abarukwikara omu kasumi ‘k’ekiro kya Mukama waitu’ nibitwekambisa. (Kus. 1:10) Tuli omu busumi “obw’akabi kaingi kandi obugumangaine,” kandi nitukwatwaho muno habw’okurora abantu ba Ruhanga omu nsi yoona nibalinda obwesigwa bwabo, obu bahikwaho enyikara ezirukulenga okwikiriza kwabo n’obumanzi!—2 Tim. 3:1-5.

Hati, itwena nitusobora tuta kwikara tuli beesigwa, kandi bamanzi? (Baheb. 10:39) Nikisobora kutatwanguhira kuba beesigwa kandi bamanzi buli kiro, habwokuba tuhikwaho okuhakanizibwa n’okuhiiganizibwa. Baitu nitwija kwikaraga twine encwamu ey’okukora omu nsonga enu. Katube tuli bantu abaine ensoni, rundi bamanzi, nikiija kutwetaagisa kukora encwamu ey’okusagika Yahwe n’obumanzi obu nitukora ekihikire. Kiki ekisobora kutukoonyera?

Ekigambo kya Ruhanga ekyatereekereziibwe omwoyo ogurukwera nikisobora kukukoonyera kutunga obumanzi. Kirumu ebyokurorraho eby’abasaija n’abakazi abaayolekere obumanzi. Ekitabu kinu kiteekaniziibwe kutukoonyera kwetegereza kurungi ebyokurorraho byabo n’okubyecumiitirizaaho. Obu oraaba noosoma ebirukubakwataho, saba Yahwe akukoonyere kurora omulingo ebyokurorraho byabo bisobora kukukoonyera omu bizibu byawe, n’omu bwomeezi bwawe kasumi kanu. Teekerezaaho omulingo Yahwe asobora kukukoonyera kuba mumanzi. Kandi teekerezaaho n’omulingo obumanzi abasaija n’abakazi banu obu baayolekere, busobora kukukoonyera omu nyikara zinu:

Kukora empindahinduka. (Yak. 3:17) Yahwe obu yayangire Saulo kandi yakoma Daudi kuba mukama arukuhonderaho, Yonasaani akooleka obwesigwa n’obumanzi yasagika encwamu ya Yahwe n’omutima gwe gwona.

Kurwanirra emisingi ya Yahwe ey’okuhikirra. (Baheb. 11:32-34) Hananiya, Misaheeri, na Azaliya bakanga kwinamira ekisisani kandi bakaba beehaireyo kufa omu murro gw’etanuuru, kusobora kwikara bali beesigwa hali Yahwe.

Kugambiraho abandi amananu agarukukwata hali Yahwe hamu na Yesu. (Mat. 22:16) Teekerezaaho Saulo owa Taruso, ayatebiize amananu agarukukwata hali Yesu, hali abantu abakaba nibamunihirramu kubakoonyera kuhiiganiza abahondezi ba Yesu.

Nitunihira ngu ekitabu kinu nikiija kukukoonyera kugumya okwikiriza kwawe n’okutunga obumanzi. (Zab. 27:14) Leka Yahwe akuhe omugisa obu oraaba nookoonyera ab’omu ka yaawe n’ab’omu kitebe kusagika Obukama bwa Ruhanga n’obumanzi!