Akarolerra Kurungi ab’Omu Ka Ye

NIKYETAAGISA obumanzi kusobora kuba taata omurungi. Baitu Yusufu omubaizi wa Nazaleesi, obumanzi bwe bukalengwa atakafookere na taata. Akakimanya ngu Malyamu, omwisiki ow’akaba ali haihi kutaaha na uwe obuswere, akaba aine enda. Baitu enda ekaba etali ye. Malyamu akamusoborra omulingo yatwairemu enda. Baitu, kinu kikagumira muno Yusufu kukyetegereza n’okukiikiriza. Kiki Yusufu eki yaakukozere?

Baibuli egamba ngu Yusufu akaba ali musaija “ahikiriire.” Omusaija ogu ow’ahikiriire, yayoroberaga ebiragiro bya Yahwe, akaba aine embabazi, kandi yasaalirirwaga abandi. Yusufu akateekerezaaho muno ensonga egi. Akagonza kuleka Malyamu omu nsita nukwo atamuswaza. (Omu kasumi ako, abantu abaabaga bajumbiirengana baabarwaga nk’abataahire obuswere.) Baitu Yahwe akataaha omu nsonga. Akatuma malaika kubaza na Yusufu omu kirooto. Malaika akagambira Yusufu ati: “Otatiina kutwara mukazi waawe Malyamu omu ka.” Malaika akagumya Yusufu ngu Malyamu ebi akaba amugambiire gakaba mananu. Omwana akaba ali wa Ruhanga, kandi yaakubaire Masiya!

Yusufu “yakora nkooku malaika wa Yahwe yamugambiire.” Akaba ali muntu mumanzi; akaba aine kurolerra mukazi we n’omwana wa Ruhanga ow’akaba naagenda kuzaarwa. Yusufu akaba naayetaaga obumanzi obw’amaani.

Hanyuma y’emyezi nke kurabaho, Kaisaali Agusto akarabyaho ekiragiro ekirukuragira abantu boona kugenda omu biikaro nambere baazaliirwe, kubarwa. Nahabweki, Yusufu akaba aine kugenda Beterehemu ayehandiikise. Noobu kiraaba ngu ekiragiro kikaba nikyetaagisa Malyamu kugenda rundi kutagenda, Yusufu naasobora kuba yateekeriize ngu kirungi kugenda na uwe, nukwo amulinde. Nahabweki, bakagenda orugendo oruraihire muno, noobu kiraaba ngu Malyamu akaba “ali haihi kuzaara.” Obu bakaba bali Beterehemu, Malyamu akakwatwa ebisa kandi yazarra Yesu omu kiju ky’ebisoro.

Noobu kiraaba ngu Yusufu akaba ataine sente nyingi, akakora n’amaani kurolerra ab’omu ka ye. Yusufu na Malyamu obu batwaire omwana wabo ha yekaru omu Yerusaalemu, bakahayo ekihongwa ekyaheebwayoga abanaku. Hanyuma y’obwire, obu bakaba bali Beterehemu omu nju, bakabungirwa abarukuraguza enyunyuuzi, abasobora kuba bakaba nibaruga Bbabburooni kandi abakaba beebembiirwe ekintu ekirukusisana ‘nk’enyunyuuzi.’ Bakaha omwana ebisembo bingi eby’omuhendo. Hanyuma, malaika wa Yahwe akagambira Yusufu ngu omukama omubi muno arukwetwa Herodi akaba naagonza kwita omwana omuto Yesu! Malaika akagambira Yusufu kwirukira Misiri hamu n’eka ye.

Yusufu akatunga obumanzi yarahuka uwe na mukazi n’omwana baaruga Beterehemu omu bwire bw’ekiro, baagenda omu ihanga erindi. Yaakusoboire ata kubarolerra omu ihanga lya Misiri? Hataroho kugurukyagurukya, ebisembo abaraguzi b’enyunyuuzi ebi baamuhaire bikamukoonyera kuhikyaho ab’omu ka ye ebyetaago byabo. Hanyuma, Yahwe akaragira Yusufu kugarra eka ye omu Isaleeri. Baitu Beterehemu ekaba neeremwa omulemi omubi, nahabweki, Yusufu akoorobera oburagirizi kuruga hali Ruhanga, yatwara eka ye omu Nazaleesi.

Omu Nazaleesi, Yusufu akakora n’amaani nk’omubaizi kuhikyaho Malyamu, Yesu, hamu n’abaana abandi nka mukaaga, ebyetaago byabo. Ekirukukirayo obukuru, akarolerra eka ye omu by’omwoyo. Butoosa baagendaga ha isorrokaniro kwega ebirukukwata hali Yahwe, kandi baagendaga n’omu Yerusaalemu kuramya Yahwe ha bijaguzo ebirukwera. Omurundi ogw’okumalirra Yusufu uwe nk’omuntu kubazibwaho omu Baibuli, nubwo obu akaba ayeraliikiriire naateekereza ngu Yesu abuzire, obu bakaba bagenzere Yerusaalemu ha kijaguzo, Yesu aine emyaka 12. Mali, Yusufu akaba ali taata omurungi! Yesu akaba aine obulinzi, kandi ‘yagumizaamu naayorobera’ bazaire be.

Baibuli tebazaaho akasumi Yusufu obu yafiire, baitu obu akaba atakafiire, naasobora kuba yatendekere omwana we ou yakulize. Yesu atagarukire ha kumanywa nka “mutabani w’omubaizi,” baitu akamanywa ‘nk’omubaizi.’ Nahabweki, ise akaba amwegeseze omulimo ogu yakoraga ogw’okubaija. Yusufu akateekaho ekyokurorraho, ekirukwoleka kiki Yahwe eki arukugonza baisebaana kuba. Nka Yusufu, naagonza balinde ab’omu maka gaabo, babarolerre, kandi babeegese hali Yahwe.

Soma Ebyahandiikirwe ebirukumubazaaho:

• Matayo 1:18-25; 2:1-23; 13:55

• Marako 6:3

• Luka 2:1-7, 22-24, 41-51

Kuleeta hamu ebiteekerezo:

Miringo ki Yusufu ei yayolekeremu obumanzi?

Yega Ebirukukiraho

1. 1. Nkooku Malyamu akaba ali muhara wa Heri, habwaki Luka 3:23 eyoleka ngu Yusufu akaba ali “mutabani wa Heri”? (w17.08 32 ¶4)

   Eky’okugarukamu kyawe

2. 2. Nsonga ki, eyaleetiire Yusufu kutateerana na Malyamu, Yesu atakazairwe? (w03 12/15 5 ¶5-wcgr)

   Eky’okugarukamu kyawe

3. 3. Kiki ekirukwoleka ngu Yusufu akaba ali musaija ayakoraga n’amaani? (ia 166-167 ¶15-18-wcgr) A

   Eky’okugarukamu kyawe

   

4. 4. Habwaki nitusobora kugamba ngu Yusufu naasobora kuba yafiire Yesu akyali muto? (w17.07 11 ¶8, obugambo obuli hansi)

   Eky’okugarukamu kyawe

Ebikaguzo eby’Okwecumiitirizaaho

• Kiki banyineeka eki basobora kwegera hali Yusufu, obukirukuhika ha kworobera oburagirizi bwa Yahwe noobukirukuba nikyetaagisa kwefeereza? (Mat. 1:20, 24; 2:13-15, 19-21)

  Eky’okugarukamu kyawe

• Kiki ekiturukwegera hali Yusufu obukirukuhika ha kwebembeza Yahwe omu maka gaitu? (Luk. 2:41) B

  Eky’okugarukamu kyawe

  

• Miringo ki endi ei osobora kwegera ha bumanzi bwa Yusufu?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Yusufu obu alihumbuuka?

  Eky’okugarukamu kyawe

Manya na Binu

Omu vidiyo enu, rora omulingo Yusufu yakozere Yahwe ebi yamugambiire kukora.

“Akakora Nkooku Malaika wa Yahwe Yamugambiire” (4:39)

Nitusobora tuta kwegera ha kyokurorraho kya Yusufu kakuba gavumenti erabyaho ekiragiro ekirukuzooka nk’ekiraagumanganiza obwomeezi bwaitu rundi nk’ekitali ky’obwinganiza?

Oyetekaniize Kuba ‘Muhulizi’? (w23.10 8-10 ¶9-14)