“Bakaba Bahikiriire omu Maiso ga Ruhanga”

ZAAKALIYA akaba ali omu ha banyakatagara abaingi, abaarugaga omu baijukuru ba Aroni. Kiro kimu, Zaakaliya akaba aine kukora ekintu ekikuru muno. Akasumi ke ak’okuhayo emigaju ha kyoto eky’ezaabbu omu yekaru, kakaba kahikire. Gunu gukaba mugisa ogw’embaganiza muno hali uwe habwokuba nyakatagara akaba naasobora kuhayo emigaju ha yekaru, omurundi gumu gwonka omu bwomeezi bwe. Hataroho kugurukyagurukya, Zaakaliya na mukazi we Erizabbeesi, ou akaba naagonza muno, baine kuba baarozere ekiro kinu nk’ekiro eky’embaganiza muno omu bwomeezi bwabo.

Zaakaliya na Erizabbeesi bakaba bamazire emyaka nyingi bali hamu omu buswere kandi baali beegondiize omu migisa nyingi. Haroho ekintu eki bakaba nibagonza muno baitu bakaba batakakitungire. Bakaba nibagonza kuzaara abaana. Kasumi ako, hali abantu ba Ruhanga, kikaba kiri kikuru muno kuzaara. Zaakaliya na Erizabbeesi “bakaba bakuzire muno omu myaka.” Baitu Baibuli ebabazaaho ngu “bakaba bahikiriire omu maiso ga Ruhanga.” Nahabweki bakaikara nibasaba Ruhanga wabo, kandi nibakigumiza kimu ngu naija kuhurra okusaba kwabo, noobu kiraaba ngu kikaba nikizooka nk’ekitarukusoboka kuzaara.

Zaakaliya akataaha omu yekaru, obu abantu baingi bali aheeru nibasaba. Obu akaba ali wenka omu yekaru, malaika wa Yahwe akamubonekera kandi akaba ayemeriire ha rubaju rw’ekyoto eky’okwoterraho emigaju! Malaika akagambira Zaakaliya ngu Ruhanga akaba ahuliire okusaba kwe, kandi ngu akaba naija kusobozesa Erizabbeesi kumuzarra omwana. Omwana ogu yaakurukirwe Yohaana, kandi akaba naija kukura naatunga “omwoyo n’amaani nka Eriya ebi akaba aine.” Akaba naija kukora omulimo ogw’embaganiza, ogw’okuteekaniza abantu kugaruka hali Yahwe.

Habwokuba Zaakaliya akaba naagurukyagurukya, akasaba malaika akokurorraho kugumya ngu ebigambo ebi akaba amugambiire gaali mananu. Malaika akamuhabura naamugambira ati: “Niinyowe Gabulyeri ow’ayemerra omu maiso ga Ruhanga.” Akaba atasemeriire kugurukyagurukya malaika wa Yahwe. Malaika akagambira Zaakaliya ngu akaba naija kufa omunwa aleke kubaza, kuhikya Ruhanga eki araganiize kihikiriire. Nahabweki, Zaakaliya obu yarugire omu yekaru, akaba naakozesa obwokurorraho bwonka kubamanyisa ekikaba kibaireho.

Zaakaliya aine kuba yatungire omulingo ogw’okusoborra Erizabbeesi ekikaba kibaireho. Kandi, “hanyuma y’ebiro bike,” Erizabbeesi akatwara enda. Akamara emyezi etaano atarukugenda omu bantu, baitu omunyabuzaale we arukwetwa Malyamu, muhara wa Heri akaruga Yerusaalemu yaija kumubungira. Ahonaaho, Malyamu obu yataahire omu nju, omwana ow’akaba ali omu nda ya Erizabbeesi yagurukaguruka habw’okusemererwa. Erizabbeesi akaijura omwoyo ogurukwera kandi gwamuleetera kweta Malyamu “nyina Mukama wange.” Akaba akimanyire ngu Malyamu aine enda y’ogu, ayaakufookere Masiya. Omu kiikaro ky’okukwatirwa Malyamu ihali, Erizabbeesi akamugarramu amaani kandi yamusagika kuhikiiriza obujunaanizibwa obu akaba ahairwe.

Hanyuma ya Erizabbeesi kuzaara omwana, abanyabuzaale hamu n’abanywani be, bakeesorooleza omuka ye kandi baalengaho kumusoonasoona ngu amuruke ibara lya ise. Baitu akaba akimanyire nkooku malaika akaba agambiire iba ati: “Oli muruka ibara lye Yohaana.” Nahabweki Erizabbeesi akanga kukora eki baamugambiire. Yabagambira ati: “Nangwa! naija kurukwa Yohaana.” Baitu habwokuba batamarwe Erizabbeesi eki akaba abagambiire, baakaguza Zaakaliya. Nkooku akaba atarukusobora kubaza, akasaba ekyokuhandiikaho, yahandiika ati: “Ibara lye nuwe Yohaana.” Ahonaaho yayongera yabaza.

Zaakaliya akaijura omwoyo ogurukwera kandi gwamusobozesa kubaza obunabbi. Omwoyo ogurukwera gukamuleetera kubaza obutumwa obw’okunihira, obw’okujuna, kandi oburukwoleka ngu Ruhanga akaba naija kwoleka abantu be embabazi. Akongera yabaza obunabbi oburukukwataho mutabani we Yohaana, oburukugamba ngu: “Olyebembera Yahwe kumuteekaniriza emihanda ye.” Kandi obunabbi obu, bukamara bwahikirra. Yesu obu akaba atakatandikire kutebeza obutumwa oburukukwata ha Bukama bwa Ruhanga, Yohaana Omubatizi akakoonyera abantu kweteekaniza kubuhuliiriza n’okubwikiriza.

Okwija kwa Masiya kwakuleesereho empindahinduka z’amaani ha mulingo abantu ba Ruhanga bakutwaizeemu abantu abatarukuramya Yahwe hamu n’abo abarukubahakaniza. Emyaka nyingi ey’ekaba erabireho, abaheereza ba Ruhanga baingi bakooleka obumanzi obu nibarwanisa abanyanzigwa ba Yahwe ab’omu nsi kuraba omu kurwana omu bulemu. Baitu hati ebintu bikaba nibigenda kuhinduka. Yahwe akaba atakyayetaagisa abaheereza be kwejumbira omu kurwana obulemu obwa mulingo ogu. Baitu nabwo, bakaba nibeetaaga obumanzi. Abo abaakwikiriize Masiya, kyakubeetaagisize kukozesa ekisembo kyabo eky’omuhendo, eky’okubaza, kukugiza Yahwe Ruhanga, n’okugambira abandi amakuru amarungi agarukukwata hali Yesu Kristo, nkooku Zaakaliya na Erizabbeesi baakozere.

Soma Ebyahandiikirwe ebirukubabazaaho:

• Luka 1:5-25, 36-45, 57-80

Kuleeta hamu ebiteekerezo:

Miringo ki Zaakaliya na Erizabbeesi ei baayolekeremu obumanzi?

Yega Ebirukukiraho

1. 1. Noobu kiraaba ngu Zaakaliya na Erizabbeesi bakaba bali bantu abatahikiriire, habwaki Baibuli ebabazaaho nkabakaba “bataine eki barukujunaanwa”? (Luk. 1:6; it “Kutaba n’Omusango” ¶2-wcgr)

   Eky’okugarukamu kyawe

1. 3. Malaika Gabulyeri akagambira Zaakaliya kuruka mutabani we, ibara, Yohaana. Ibara Yohaana nirimanyisa ki? (it “Yohaana” ¶1-wcgr)

   Eky’okugarukamu kyawe

2. 4. Zaakaliya akafa omunwa n’amatu? (w08 3/15 30 ¶6-wcgr)

   Eky’okugarukamu kyawe

Ebikaguzo eby’Okwecumiitirizaaho

• Abeegesa ab’ediini ey’Ekiyudaaya ab’omu kasumi ka Zaakaliya baikirizaaga omusaija kubinga mukazi we obu yabaga atasoboire kumuzarra abaana, baitu Zaakaliya uwe akaikara na mukazi we. Kiki baanyineeka eki basobora kwegera hali Zaakaliya? B

  Eky’okugarukamu kyawe

  

• Erizabbeesi n’obwesigwa akasagika encwamu ya iba noobu kiraaba ngu akatunga okusindikirizibwa kuruga hali abanywani hamu n’abanyabuzaale be. (Luk. 1:58-61) Kiki banyinabwenge eki basobora kwegera hali Erizabbeesi?

  Eky’okugarukamu kyawe

• Noosobora ota kwegera ha bumanzi bwa Zaakaliya na Erizabbeesi?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Zaakaliya na Erizabbeesi obu balihumbuuka omu nsi?a

  Eky’okugarukamu kyawe

Manya na Binu

Rora ekyabaireho Zaakaliya obu yayongiire yatandika kubaza kandi yakugiza Ruhanga.

“Ibara lye Nuwe Yohaana” (6:59)

Malyamu akatunga ata amaani kuruga hali Yahwe, obu yabungiire Erizabbeesi, kandi eki nikitwegesa ki?

“Yahwe Arakuha Ata Amaani?” (w23.10 14-15 ¶10-14)