Akabazaaho Ruhanga We n’Obumanzi

IBARA lye titulimanyire, baitu tumanyire ekintu ekikuru eki yakozere. Akaba ali mwisiki omuto ayaikaraga omu Isaleeri omu kasumi ak’Omukama Yehoramu. Omukama Yehoramu n’abantu aba akaba naayebembera bakaba bali bajeemu, nahabweki, Yahwe akaikiriza Abasiriya kwikara nibabataahirra kandi nibanyaga itaka lyabo. Kiro kimu, Abasiriya bakakwata omwisiki omuto baamutwara Siriya.

Omwisiki onu, naasobora kuba akaba atiinire muno, n’ab’omu ka ye nibasobora kuba bakaba beeraliikiriire muno kandi nibasaasa. Akafooka muzaana w’omusaija arukwetwa Namani hamu na mukazi we. Namani nuwe akaba ali mukuru w’ihe lya Siriya. Omwisiki onu akakora kyona ekirukusoboka kumanyiira kwikara omu kiikaro eki ekihyaka. Naasobora kuba yakyetegeriize ngu abantu ab’omu ka ya Namani tibaine okusemererwa. Namani akaba arwairwe oburwaire obw’amaani obw’ebigenge. Oburwaire bunu bwaramazaaga abantu kandi obwire obumu tibwakiraga.

Omwisiki onu omuto akaba aine embabazi enyingi muno. Akaba akimanyire ngu Namani akaba ali munyanzigwa wa Isaleeri, baitu akamusaalirirwa, uwe n’amukazi we. Kandi akaba akimanyire ngu Namani naasobora kukizibwa. Abazaire be nibasobora kuba baamugambiire ebintu ebirukuhuniiriza Yahwe ebi yasobozeseze nabbi Erisa kukora. Baitu akaba atamanyire Erisa, obu araaba akaba yaakakizaaga omuntu ow’arwaire ebigenge. Baitu omwiski onu omuto akaba naakigumya ngu Ruhanga we naasobora kusobozesa nabbi we kukiza Namani.

Omwisiki naasobora kuba yayekagwize obu kiraaba kisemeriire kugambira ab’omuka enu ebirukukwata hali Yahwe. Akaba akimanyire ngu kakuba akikora, nikisobora kumurugiramu akabi. Namani yaramyaga ruhanga w’Abasiriya arukwetwa Rimooni. Kandi yakiraga kutwara Omukama wa Siriya ha yekaru ya Rimooni kuramya. Nikizooka ngu Abasiriya baaroraga ruhanga onu nk’ow’amaani, habwokuba baikirizaaga ngu nuwe yaleetaga ihunga n’enkuba. Omwisiki onu omuto akaba atamanyire omulingo Namani yaakwetwaizeemu obu yaakumugambiire ebirukukwata hali Yahwe Ruhanga. Namani yaakubihiirwe ngu Yahwe naasobora kukora ekintu ruhanga we Rimooni eki atasobora kukora? Omwisiki onu naasobora kuba yasabire Yahwe kumuha obumanzi obw’okubaza. Hanyuma, akabaza na muka Namani ati: “Kuba mukama wange agenda hali nabbi anyakuli omu Samaliya, naija kumukiza ebigenge.” “NWT.”

Ebi nibyo ebigambo by’omwisiki ogu ebyahandiikirwe omu Baibuli, atabaze ebigambo bingi. Baitu ebigambo ebi ebike, bikarugamu ebintu ebirungi ebirukuhuniiriza. Omu rukarra orurukwongeraho niturora ngu Namani agenda hali mukama we arukwetwa Benihadaadi, kumugambira omwisiki ebi amugambiire. Hanyuma, omukama atuma Namani kugenda Isaleeri aine ebbaruha ey’erukwoleka ngu naasaba Omukama Yehoramu aikirize Namani arole nabbi nukwo akizibwe ebigenge.

Hanyuma ya Namani kugenda, ab’omu ka ye bakaba balindiriire kurora ekiraamubaho. Hataroho kugurukyagurukya, omwisiki ogu omuto akaikara naasaba emirundi nyingi, naayesengereza Yahwe kugira eki yakoraho kwoleka Namani nkooku nuwe Ruhanga ow’amananu. Naasabora kuba yamazire omu Isaleeri ebiro bingi rundi wiiki nyingi. Kiro kimu, Namani akagaruka omuka. Teekerezaaho omulingo ab’omu ka ye baasemeriirwe obu baamurozere. Omubiri gwe gukaba gukizire niguzooka nk’ogw’omusigazi.

Teekerezaaho omulingo omwisiki onu omuto yategere amatu n’obwegendereza, kuhuliiriza ebyabaireho: nkooku Erisa akaba atangiriire Namani omu nju ye, baitu oburagirizi obu yamuhaire bwamubiihiza; nkooku abaheereza ba Namani baamwesengeriize kuhondera oburagirizi bwa Erisa kandi n’omulingo Namani yakyetegeriize nkooku asemeriire kwebundaaza; hamu n’omulingo yakiriire kimu hanyuma y’okweibika omu Kyambu Yorudaani emirundi musanju. Baitu ekisobora kuba kyakizireyo kusemeza omwisiki ogu, nikyo eki ekyabaireho hanyuma ya Namani kukizibwa. Kuruga kasumi ako, Namani akeeteranizaaho omwisiki ogu omu kuramya Yahwe Ruhanga.

Ebintu binu byona ebirukuhuniiriza bikabaho habwokuba omwisiki onu omuto akooleka obumanzi, kandi yabazaaho Ruhanga we hamu na nabbi wa Ruhanga. Ky’amananu ngu titumanyire ibara ly’omwisiki onu, baitu Yahwe alimanyire. Kandi kakuba twegera ha bumanzi bw’omwana ogu, nitwija kumurora omu nsi empyaka, Yahwe obu alimuhumbuura. Teekerezaaho okusemererwa oku tulitunga obu tulimutangatangana, tukamanya ibara lye, kandi tukamanya ebirukukiraho ebirukukwata ha bwomeezi bwe!

Soma Ebyahandiikirwe ebirukumubazaaho:

• 2 Ekyabakama 5:1-19

Kuleeta hamu ebiteekerezo:

Omwisiki Omunyaisaleeri omuto, akooleka ata obumanzi?

Yega Ebirukukiraho

1. 1. Habwaki omwisiki onu omuto naasobora kuba yatiinire abantu ba Siriya, habw’okurora ebintu ebi baakoraga? (w96 5/15 8 ¶3-wcgr) A

   Eky’okugarukamu kyawe

   

   Courtesy of Musée du Louvre, Paris

2. 2. Soborra omulingo oburwaire bw’ebigenge busobora kusiisa omubiri gw’omuntu. (it “Ebigenge” ¶3-5-wcgr)

   Eky’okugarukamu kyawe

3. 3. Habwaki Erisa ataraikiriize ekisembo kya Namani? (w05 8/1 9 ¶2-wcgr)

   Eky’okugarukamu kyawe

4. 4. Habwaki Erisa akaba naakigumya ngu Yahwe naija kuganyira Namani habw’okwinamira ruhanga arukwetwa Rimooni? (2 Bakam. 5:18, 19; w05 8/1 9 ¶3-wcgr) B

   Eky’okugarukamu kyawe

   

Ebikaguzo eby’Okwecumiitirizaaho

• Namani akaba ali mukuru w’ihe ly’Abasiriya ayataahiriire kurwanisa Isaleeri. Baitu Yahwe akamukiza. Kinu nikikwegesa ki obukirukuhika ha mbabazi za Yahwe n’okutasoroora kwe? C

  Eky’okugarukamu kyawe

  

• Ekyokurorraho ky’omwisiki onu omuto nikikwekambisa kita kuha obwakaiso obu orukuba otiinire?

  Eky’okugarukamu kyawe

• Miringo ki endi ei osobora kwegera ha bumanzi bw’omwisiki onu omuto Omunyaisaleeri?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza omwisiki onu Omunyaisaleeri obu alihumbuuka?a

  Eky’okugarukamu kyawe

Manya na Binu

Ibara ly’omwisiki onu omuto kutaba omu Baibuli, nikimanyisa ngu akaba tali w’omugaso omu maiso ga Yahwe?

“Habwaki Amabara g’Abantu Abamu, Tigarukubaziibwaho omu Baibuli?” (w13 8/1 10-wcgr)

Manya omulingo abato kasumi kanu, basobora kuba bamanzi nk’omwisiki Omunyaisaleeri.

Yahwe Naija Kukukoonyera Kuba Mumanzi (11:59)