Akasagika Yahwe omu Kiikaro ky’Okusagika Abantu Be

OMU nju ey’ekaba eyombekerwe ha kisiika kya Yeriko, haikaramuga omukazi malaaya arukwetwa Rahabbu. Obu yabaga ali omu idirisa lye, yaroraga “orubuga orwemikindo” n’omulingo aheeru y’orubuga hasemiire. (Bir. 34:3) Baitu omu nda y’orubuga, yaroraga abantu abatiinire muno, kandi abataine kunihira kwona. Abantu ba Yeriko baali bakimanyire ngu Yahwe akaba naija kukoonyera abantu ba Isaleeri kusingura orubuga, kandi bo bahwerekerezebwe. Kandi mali nikyo kikaba kisemeriire kubahikaho.

Ihanga lya Isaleeri likaba litaire enkambi haihi na Yeriko. Emyaka nka makumi ana enyuma, Yahwe akaba ajunire abantu be obu naahwerekereza Faraaho n’ihe rye, naabanaga omu Nyanja Erukutukura. Enyumaho, Yahwe akaba akoonyiire abantu be kusingura abakama ab’amaani ab’Abamooli, aba Sihoni na Ogi. Hati bakaba nibaija omu Yeriko, hansi y’oburagirizi bwa Yahwe kuhwerekereza abantu ab’omu rubuga oru, habw’ebintu ebibi ebi bakaba nibakora!

Rahabbu akaba akimanyire ngu abantu ab’omu rubuga rw’owabu bakaba bali babi muno. Habwokuba akaba ali malaaya, naasobora kuba akaba naagonza kuba n’obwomeezi oburungi. Ebintu ebi akaba ahuliire hali Yahwe bitamutiinise, baitu bikamuha okunihira. Akakyetegereza ngu Yahwe akaba ali Ruhanga ayalinzire abantu be kandi yabatwaza omu mulingo ogw’ekitiinisa, kwahukanaho na baruhanga ba Kanaani. Akaba naagonza kwirra haihi na Yahwe Ruhanga ow’arukwera, ow’obwinganiza, kandi ow’alinda abantu be.

Kiro kimu, omu bwire bw’ekiro, abantu babiri abaakaba atamanyire bakaija ha nju ye nibaserra oburaaro. Ahonaaho, Rahabbu akakyetegereza ngu bakaba bali ntasi kuruga omu Baisaleeri! Kandi Rahabbu tali nuwe wenka ayamanyire ha kintu eki. Omukama wa Yeriko na uwe akakimanya, kandi yatuma abasaija be ha nju ya Rahabbu kubatabarra. Nahabweki, Rahabbu akaba aine kukora encwamu eyaakuhindwire obwomeezi bwe. Yaakurwaniriire abantu ababi ab’omu rubuga rwe rundi yaakusagikire Yahwe?

N’obumanzi, Rahabbu akacwamu kusagika Yahwe. Akasereka entasi ha rusu rw’enju kandi yagambira abasaija b’omukama ngu bakaba bagenzere. Hanyuma y’abasaija b’omukama kugenda, akagambira entasi za Isaleeri ensonga habwaki yabajunire. Akabagambira ati: “Manyire nti [Yahwe] abahaire ensi.” Akaba ataire okwikiriza kwe omuli Ruhanga w’abasaija abo! Hanyuma akabagambira ekintu ekisobora kuba kyabagarwiremu amaani: Akabagambira ngu abasaija ba Yeriko nibatiina muno Abaisaleeri. Akabasaba kumulinda, Yahwe obu aliba naakozesa Abaisaleeri kuhwerekeereza orubuga.

Rahabbu akaba ajunire entasi, kandi bakakirora ngu akaba asagikire Yahwe. Bakaikiriza kukora eki yabasabire. Rahabbu n’ab’omu ka ye bakaba batarukwija kwitwa. Abasaija abakaba nibakora nk’entasi bakamugambira kutagambira muntu weena ngu bakaba bali omu nju ye, ahanike omuguha ogurukutukura omu idirisa ly’enju ye, kandi aikale omu nju ye obulemu obu buraatandika. Kandi obu yaakuhondiire obuhabuzi bunu, uwe n’ab’omu nju ye tibaakuhwerekeriire.

Rahabbu akakoonyera entasi kutoroka obu naakozesa omuguha ogu yarabize omu idirisa lye. Kandi hanyuma akakora eki kyonyini eki bakaba bamugambiire. Akahanika omuguha ogurukutukura omu idirisa lye. Kandi atagambire omuntu weena ha kigendererwa ky’entasi. Eki kikaba kikorwa ky’obumanzi habwokuba kakuba abasaija ab’omu rubuga baakimanyire, bakaba nibaija kumwita. Akoorobera oburagirizi bw’entasi kandi uwe n’ab’omu ka ye baikara omu nju. Yahwe obu yayemeriize amaizi g’Ekyambu Yorudaani nukwo Abaisaleeri barabemu, hataroho kugurukyagurukya Rahabbu akakyetegereza ngu akaba akozere encwamu ey’ehikire. Ihe rya Isaleeri obu lyayetooroire orubuga kumara ebiro musanju, abantu ab’omu rubuga baine kuba baatiinire muno. Kandi ha kiro kya musanju obu baahuuhire amahembe, kandi Abaisaleeri baatokera haiguru, Rahabbu n’ab’omu ka ye bakaikara omu nju baine obulinzi ebisiika obu byagwire!

Hanyuma y’obulemu, entasi bakakoonyera Rahabbu n’ab’omu ka ye kuruga omu rubuga. Enju ye ekaba eri ha rubaju rumu orwasigaireho orw’ekisiika. Nkooku Yosuha akaba aragiire, Rahabbu n’ab’omu ka ye bataitwe. Hanyuma y’obwire, Rahabbu akeeteeranizaaho ihanga lya Isaleeri. Akaswerwa omusaija Omunyaisaleeri kandi yazaara abaana. Hanyuma y’emyaka nyingi kurabaho, omu h’abaijukuru be kandi ogu nuwe Yesu, akafooka musaija ow’akyakizireyo obumanzi omu nsi. (Mat. 1:5, 16) Yahwe akaha Rahabbu omugisa habw’okwikiriza kwe n’obumanzi.

Soma Ebyahandiikirwe ebirukumubazaaho:

• Yosuha 2:1-24; 5:1; 6:14-25

• Abahebburaniya 11:30, 31

• Yakobbo 2:24, 25

Kuleeta hamu ebiteekerezo:

Miringo ki Rahabbu ei yayolekeremu obumanzi?

Yega Ebirukukiraho

1. 1. Bazaaho omulingo obwomeezi bwa Rahabbu bukaba buli omu Yeriko. (w13 11/1 12 ¶4–13 ¶1-wcgr)

   Eky’okugarukamu kyawe

2. 2. Nitukimanya tuta ngu entasi batagende omu nju ya Rahabbu n’ekigendererwa ky’okusiihana na uwe? (it “Malaaya” ¶16-wcgr)

   Eky’okugarukamu kyawe

3. 3. Habwaki obugoigo bwali butairwe ha rusu rw’enju ya Rahabbu, kandi bukaba bwine mugaso ki? (it “Obugoigo” ¶2-4-wcgr) A

   Eky’okugarukamu kyawe

   

   Thanks for your interest in my photos/Moment Open via Getty Images

4. 4. Habwaki kikaba kitali kibi Rahabbu kuhabisa abasaija b’omukama? (w04 12/1 9 ¶1-wcgr) B

   Eky’okugarukamu kyawe

   

Ebikaguzo eby’Okwecumiitirizaaho

• Habwaki kikaba nikyetaagisa obumanzi Rahabbu kuleka obwamalaaya, akatandika kuramya Yahwe? Kiki abeegi ba Baibuli eki basobora kumwegeraho?

  Eky’okugarukamu kyawe

• Noosobora ota kwegera ha bumanzi bwa Rahabbu?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Rahabbu obu alihumbuuka?

  Eky’okugarukamu kyawe

Manya na Binu

Ekyokurorraho kya Rahabbu nikitwegesa ki ha mulingo tusobora kukira ekiro kya Yahwe obu kirihika?

“Osemeriire Kuba Oli Nkaha Empero obu Eraahika?” (w09 5/15 6-8-wcgr)

Kozesa ekyokurorraho kinu kukoonyera abaana baawe kuteeramu akasisani nibarora ebintu ebi nibibaho.

“Rahabbu Ahondera Oburagirizi” (ijwis ekicweka 11-wcgr)