9 SIFIRA, PUHA, AMURAMU, YOKEBBEDI, NA MIRYAMU
Bakooleka Okwikiriza Baasereka Musa
YUSUFU akaba amazire emyaka erukuhingura omu 60 afiire. Abamisiri bakaba beeberwe ira omusaija ogu omwesigwa Yahwe ou akaba akozeseze kubajuna enjara. Omu kasumi ako, hakaba haroho Faraaho omuhyaka ow’akaba naalema ihanga lya Misiri. Akaba anobere Abaisaleeri kandi naabatiina, habwokuba Yahwe akaba abahaire omugisa kandi bagumizaamu nibakanya. Ekyarugiremu, Abamisiri bakafoora Abaisaleeri abairu kandi baabatwaza kubi. Baitu nabwo, abairu bakagumizaamu nibakanya.
Faraaho akalengaho kukora ekintu ekindi eky’obwisi. Akaragira ngu bamuleetere Abahebburaniya babiri abaakoraga nk’abazaalisa, kandi abo nubo Sifira, na Puha. Teekerezaaho okutiina oku baatungire, omulemi onu ow’amaani obu yabaragiire kwita abaana ab’obwojo abaazaarwaga. Baitu abakazi abo ababiri abamanzi, ‘baatiinaga Ruhanga ow’amananu.’ Baali bakimanyire ngu busaho muntu n’omu, kaabe w’amaani kwingana nkaha, ow’akaba aine obusobozi obw’okubaleetera kujeemera Yahwe omulemi ow’iguru n’ensi. Okutiina oku bakaba bainiire Ruhanga kukabaleetera kukora ekintu ekikaba nikyetaagisa obumanzi obw’amaani. “Batakole nkomukama wa Misiri okuyabaragiire.” Oihireho, bakakora ekirukwahukana n’eki akaba abaragiire: Bakalinda kandi baajuna abaana baingi muno. Kinu kikaleetera Faraaho kubiihirwa muno, baitu nabwo, batamugambire ekibaakoraga. Yahwe akaba naarora eki bakaba nibakora. Ekyarugiremu, Ruhanga akaha abazaalisa banu omugisa. Hanyuma, bakatunga amaka agaabo habwabo.
Kiki ekyakuhikire hali Musa ow’akaba ali nkerembe kakuba abazaalisa, bazaire be, hamu na mugenzi we omwisiki, batarayolekere obumanzi?
Faraaho obu yarozere ngu amagezi ge galemere kukora, akateekaniza kukora ekintu eky’akabi muno. Akaragira Abamisiri kunaga abaana boona ab’obwojo abaakuzairwe Abaisaleeri, omu Kyambu Niro. Omu kasumi ako akagumangaine, hakaba haroho abaswerangaine babiri, Amuramu na Yokebbedi abakaba baine kukora encwamu ey’egumire. Bakaba baine abaana babiri, Miryamu na Aroni. Baitu Yokebbedi obu yatwaire enda ye eya kasatu, uwe na musaija we bakaba bakimanyire ngu obu araaba ali mwojo, naija kuba ali omu kabi k’amaani. Obu bazaire omwana w’obwojo bakakora kyona ekirukusoboka kumusereka. Baitu kikaba kitanguhire kusereka enkerembe. Omwana obu yahikize emyezi esatu, Yokebbedi akamuta omu kigega ekisiigirwe enkwasi kandi yagenda yakisereka omu rufunjo ha musa gw’Ekyambu Niro. Muhara we omuto Miryamu akeesereka haihi n’ekyambu nukwo arole ekiraahika hali mugenzi we omwojo.
Hanyuma y’obwire buke, muhara wa Faraaho akaija ha kyambu kwoga. Akarora ekigega kandi yatuma omuzaana we kukimuleetera. Obu yakifundukwire, akarora omwana w’obwojo narra kandi yamukwatirwa embabazi. Akacwamu kumukuza nk’omwana we, baitu akaba naija kwetaaga obukoonyezi bw’omukazi ondi ow’aralera omwana. Ahonaaho Miryamu akaba amanyire eky’okukora, akairuka yagambira muhara wa Faraaho ngu naasobora kumutungira omukazi ow’aralera omwana, kandi muhara wa Faraaho akaikiriza. Miryamu akaleeta nyina. Teekerezaaho okusemererwa Yokebbedi oku yatungire obu yakyetegeriize ngu hati naasobora kurolerra omwana we, atarukutiina ngu Abamisiri nibaija kumuhikyaho akabi. Kandi muhara wa Faraaho akaba naija n’okumusasura habw’okulera omwana! Hataroho kugurukyagurukya, Yokebbedi na musaija we Amuramu, bakakora kyona ekirukusoboka kwegesa omwojo ogu omuto ebirukukwata hali Yahwe. Baitu omwojo obu yagenzere naakura, bakaba baine kumugarurra muhara wa Faraaho. Muhara wa Faraaho akamuruka ibara Musa.
Yahwe akaha Amuramu, Yokebbedi, na Miryamu omugisa habw’okwikiriza n’obumanzi ebi baayolekere? Ego, Amuramu na Yokebbedi baakeegesa Miryamu na Aroni hali Yahwe, kandi baabarora nibafooka abaheereza ba Yahwe abeesigwa. Kandi bakakirora ngu Yahwe akaba naalinda mutabani wabo Musa. Baibuli tetugambira obu baraaba baayomiire kurora emiringo enungi Musa ei akaba aine n’omulingo Yahwe yamukozesezeemu. (Kurug. 6:20) Baitu Miryamu na Aroni bakarora emiringo enungi eya Musa n’omulingo Yahwe yamukozeseze kukora ebintu ebirukuhuniiriza. Kandi boona basatu bakooleka okwikiriza okw’amaani n’obumanzi obu nibaheereza hamu Yahwe. Omu suura erukuhonderaho, nitwija kurora omulingo Musa yakuziremu kandi yacwamu kuheereza Yahwe.
Soma Ebyahandiikirwe ebirukubabazaaho:
Okuruga 1:6–2:10
Abahebburaniya 11:23
Kuleeta hamu ebiteekerezo:
Miringo ki abazaalisa hamu n’eka ya Musa ei baayolekeremu obumanzi?
Yega Ebirukukiraho
1. Ebintu ebya kara ebyazoirwe, nibyoleka bita ngu ebintu ebi tubalizeeho bikabaho kwo? (g04 4/8 4 ¶4–5 ¶1-wcgr)
2. Bwakaiso ki oburukugumya ngu Baibuli ebi ebazaaho ebirukukwata ha kigega ky’ebijuza hamu n’ekiragiro kya Faraaho eky’okwita enkerembe z’Abayudaaya bihikire? (g04 4/8 6 ¶1-2-wcgr) A
Christine Osborne Pictures/Alamy Stock Photo
Ekisisani A: N’akasumi kanu, ebijuza nibikyakozesebwa kukora amaato
3. Kiki eki tumanyire ekirukukwata h’abazaalisa Abahebburaniya, n’omulingo baahairwe omugisa? (w03 11/1 8 ¶3-4-wcgr; it “Omuzaalisa”-wcgr) B
Ekisisani B
4. Miryamu akooleka ata okwikiriza okw’amaani noobu akaba akuzire? (ijwia ekicweka 7 ¶14-18-wcgr)
Ebikaguzo eby’Okwecumiitirizaaho
Kiki abazaire eki barukwegera ha kyokurorraho kya Amuramu na Yokebbedi?
Kiki abaana abazairwe hamu, eki basobora kwegera hali Miryamu obu akaba akyali muto? C
Ekisisani C
Noosobora ota kwegera ha bumanzi bwa Sifira na Puha?
Eki Birukunyegesa Hali Yahwe n’Ekigendererwa Kye
Isomo linu nirikwegesa ki hali Yahwe?
Ekyokurorraho kinu nikihikaana kita n’ebigendererwa bya Yahwe?
Kiki eki waakugondeze kukaguza abantu ababaziibweho omu suura enu, obu balihumbuuka?
Manya na Binu
Rora omulingo tusobora kugasirwa omu kyokurorraho ky’abakazi abaayangire kworobera ekiragiro ky’omukama.
“Abakazi Abaasemiize Omutima gwa Yahwe” (w03 11/1 8-9 ¶3-5-wcgr)
N’akasumi kanu, Yahwe naakyafaaho abantu abooleka obumanzi kumworobera nk’omulemi wabo kukira abantu?