Yahwe Akakoma Yosuha

Musa akebembera ihanga lya Isareri kumara emyaka nyingi, kandi akaba ali haihi kufa. Yahwe akamugambira ati: ‘Tali niiwe arukwija kutahya Abaisareri omu Nsi Eyaraganizibwe. Baitu ninyija kukwikiriza kugirora burora.’ Musa nukwo kusaba Yahwe kukoma omuntu omuhyaka arayebembera abantu. Yahwe akamugarukamu ati: ‘Genda hali Yosuha omugambire ngu nuwe akomerwe.’

Musa akagambira ihanga lyona ngu akaba nagenda kufa kandi ngu Yahwe akomere Yosuha kubebembera kubatwara omu Nsi Eyaraganizibwe. Musa akagambira Yosuha ati: ‘Otatiina. Yahwe naija kukukonyera.’ Hanyuma y’ebi, Musa akagenda ha Rusozi Nebo, nambere Yahwe yamwolekiire ensi ei yaraganize Iburahimu, Isaka, na Yakobo. Musa akafa ahikize emyaka 120.

Yahwe akagambira Yosuha ati: ‘Yambuka Ekyambu Yorudani, ogende Kanani. Ninyija kukukonyera nk’oku nakonyiire Musa. Oine kusomaga Ebiragiro byange buli kiro. Otatiina, ba mumanzi. Genda okole nk’oku nkuragiire.’

Yosuha akatuma entasi ibiri kugenda omu rubuga rwa Yeriko. Omu suura erukwongeraho, nitwiija kurora ebyabaireyo. Obu bagarukire, bakamugambira ngu kakaba kaire karungi k’okutaaha Kanani. Ekiro ekyayongiireho, Yosuha akagambira ihanga lyona kwetekaniza. Hanyuma y’aragira banyakatagara abaali bahimbire esanduuko y’ekiragaano kwebembera abantu kugenda omu Kyambu Yorudani. Ekyambu kyali kisandaire. Baitu ebigere by’abanyakatagara obu byarubasire ha maizi, ekyambu kikaleka kugera amaizi gayoma! Banyakatagara bakarubata bahika hagati kandi bayemerra nukwo abantu boona basobole kwambuka kuhika nseri. Notekereza ngu ekyamahano kinu kikabaijukya eki Yahwe akaba akozere ha Enyanja Erukutukura omu busumi bwa kara?

Hanyuma y’emyaka egi yoona, Abaisareri bakahika omu Ensi ey’Ekaba Eraganizibwe. Bakaba nibasobora kwombeka amaju hamu n’embuga. Bakaba nibasobora kubyara emisiri, engonjo z’emizabibu, hamu n’emiti y’ebijuma. Ekaba nsi erukugera amata n’obwoki.