Akahondera Oburagirizi Obutali bwa Buli Kiro

YOSUHA akeemerra aroleriire Yeriko, orubuga Ruhanga oru akaba amuragiire kutaahirra kandi ahwerekereze. Akaijuka Yahwe eki akaba amugambiire Musa obu akaba ali haihi kufa. Akamugambira ati: “Foka wamani, ogume omutima.” (Bir. 31:23) Enyumaho, Yahwe akaba agambiire Yosuha ebigambo nibyo bimu. Akamugambira ati: “Ofoke wamani, noguma muno omutima.” (Yos. 1:7) Nahabweki, Yosuha akaba naayetaaga obumanzi obw’amaani. Habwaki?

Noobu kiraaba ngu Yeriko rukaba rutali rubuga orw’amaani muno, rukaba rwetooroirwe ekisiika eky’amaani ekyaruhaga obulinzi. Runu nurwo rubuga rw’okubanza Abaisaleeri oru bakaba baine kutaahirra, nukwo bataahe omu Nsi ey’Ekaba Eraganiziibwe. Abantu abakaba bali omu rubuga oru, bakaba nibakora ebintu ebibi muno. Emyaka nyingi enyuma, Yahwe akaba agambiire Ibburahimu ha ‘kutahikirra okw’Abamooli,’ obu naamanyisa abantu boona ab’omu Kanaani. Akagamba ngu akasumi kaakuhikire abahwerekereze habw’ebintu bingi ebibi ebi bakaba nibakora. (Kub. 15:16) Kandi akasumi ako kakaba kahikire. Abantu baayejumbiraga omu kuramya ebisisani, omu bikorwa eby’obusiihani ha yekaru nk’obukuuhya, kuteerana n’abanyabuzaale baabo, kuteerana n’ebisoro, otwaliiremu n’okuhonga abaana baabo hali baruhanga ab’ebisuba. Abakanaani bakaba nibakora ebintu ebibi muno kuhika ha rulengo ngu bakaba batakyaikirizibwa kwikara omu nsi egi! (Lev. 18:3, 6, 21-27) Eki kyakusobokere kita?

Ruhanga akaba naija kukozesa Yosuha hamu n’ihe ery’abasaija abeesigwa. Abaserikale abo bakaba beeteekaniize kuhondera oburagirizi bwa Yahwe. Yahwe akakomamu Yeriko kuba ekiikaro eky’okubanza nambere yaakutandikiire kuhwerekereza abantu ababi abakaba nibaikara omu Nsi ey’Ekaba Eraganiziibwe. Baitu nabwo, oburagirizi Yahwe yahaire Yosuha bukaba butali bwa buli kiro! Yahwe akabagambira kutataahirra orubuga ahonaaho rundi kurugota, baitu barwetoroole kyonka. Bakaba baine kurwetoroora omurundi gumu buli kiro kumara ebiro mukaaga. Banyakatagara na bo bakaba basemeriire kurwetoroora bahimbire esanduuko y’ekiragaano kandi nibahuuha amahembe. Ha kiro ekya musanju, boona bakaba basemeriire kurwetoroora emirundi musanju, kandi nibatokera haiguru.

Yosuha akaba aine obukugu nk’omurwani. Kusigikirra ha bukugu bwe nk’omuserikale, ekintu eki baamugambiire kukora kikazooka nk’ekitarukukora makuru. Kiki ekyakubaireho kakuba Abaisaleeri baasingwirwe? Kyakuleetiire ab’embuga ezindi eza Kanaani kwehurra ngu b’amaani kukira Abaisaleeri kandi bakabataahirra.

Baitu Yahwe akaba akozere ebintu bingi ebyaleetiire Yosuha kumwesiga. Yosuha obu yasindikire entasi ibiri omu rubuga rwa Yeriko, bakakyetegereza ngu abasaija ba Yeriko bakaba batiinire Abaisaleeri. Omu mulingo gw’ekyamahano, Yahwe akaba abaganizeemu amaizi g’Ekyambu Yorudaani, ekyakoonyiire Abaisaleeri kwambuka.

Yosuha aine kuba yateekeriizeeho ebintu binu byona, ekyamuleetiire kweyongera kwikiririza omuli Ruhanga we. Okwikiriza kwe kukamukoonyera kuba muhulizi. Nahabweki, akeebembera ihe rye baagenda kwetoroora Yeriko. Banyakatagara bakahuuha amahembe gaabo. Baitu, busaho n’omu ayarugire omu rubuga habwokuba boona bakaba batiinire. Ekiro ekyahondiireho, bakongera baayetoroora orubuga, nkooku Yahwe akaba abaragiire. Bakakora ekintu nikyo kimu kumara ebiro mukaaga. Hanyuma, ekiro ekya musanju kikahika.

Ha kiro eki, Yosuha n’ihe rye bakeetoroora Yeriko emirundi musanju. Ha murundi ogwa musanju, bakakora ekintu ekirukwahukana. Yosuha akatokera haiguru naagamba ati: “Mutoke; baitu [Yahwe] abahaire orubuga!” Akasumi kakaba kahikire. Baibuli egamba eti: “Abantu obu baahuliire . . . batoka nobwogo bwingi, na muhuruzi yagwa hansi.”

Yosuha hamu n’abasaija be bakataaha omu rubuga kandi bahwerekereza buli kyomeezi kyona, nkooku Yahwe akaba abaragiire. Habw’obukoonyezi bwa Yahwe, Yosuha n’ihe rye bakasingura embuga nyingi, n’amahanga maingi. Ha kumalirra, Yahwe akasemeza ensi yaihamu abantu ababi, kandi yagyeza ‘habw’okutahikirra okw’Abamooli’!

Baitu haroho ekisiika ekitaito ekya Yeriko ekitaraagwire. Habwaki? Habwokuba hakaba haroho omukazi ayayolekere obumanzi n’okwikiriza okw’amaani omuli Ruhanga. Nitwija kwega ebirukumukwataho omu suura erukuhonderaho.

Soma Ebyahandiikirwe ebirukumubazaaho:

• Ekyebiragiro 20:16-18

• Yosuha 2:1, 9-11, 24; 3:14-17; 5:1; 6:1-21, 24

Kuleeta hamu ebiteekerezo:

Miringo ki Yosuha ei yayolekeremu obumanzi?

Yega Ebirukukiraho

1. 1. Bitabu ki ebya Baibuli ebikaba biroho kasumi ako, Yosuha ebi asobora kuba yasomere? (w09 12/1 17 ¶4, obugambo obuli hansi-wcgr) A

   Eky’okugarukamu kyawe

   

2. 2. Abaisaleeri obu bakaba batakeetoroire orubuga rwa Yeriko, kiki Yahwe eki yagambiire Yosuha kukora? Habwaki oburagirizi Yahwe yamuhaire bukaba nibuzooka nk’obutarukukora makuru? (Yos. 5:2-8; w18.10 17 ¶5-7)

   Eky’okugarukamu kyawe

3. 3. Bwakaiso ki oburukugumya ngu Yeriko ekasingurwa hanyuma y’okugotwa habw’akacu kake? (w15 11/15 13-wcgr) B

   Eky’okugarukamu kyawe

   

   Kennedy, Titus (2023). The Bronze Age Destruction of Jericho, Archaeology, and the Book of Joshua. Accessed via researchgate.net. Licensed under CC BY 4.0

4. 4. Obunabbi oburukukwata hali Yeriko oburukusangwa omu Yosuha 6:26 bukahikiirizibwa buta? (w98 9/15 21 ¶8-wcgr)

   Eky’okugarukamu kyawe

Ebikaguzo eby’Okwecumiitirizaaho

• Kiki ekyakoonyiire Yosuha kwesiga emirago ya Yahwe? (Yos. 23:14) Nitusobora tuta kuba n’obwesige nk’obu omu kasumi kanu?

  Eky’okugarukamu kyawe

• Ekyokurorraho kya Yosuha nikitukoonyera kita kuhondera oburagirizi obu tutunga kuruga omu kitebe kya Yahwe? C

  Eky’okugarukamu kyawe

  

• Noosobora ota kwegera ha bumanzi bwa Yosuha?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Yosuha obu alihumbuuka?

  Eky’okugarukamu kyawe

Manya na Binu

Ekyokurorraho kya Yosuha nikitukoonyera kita kwegera hali abakuzire omu myaka, kwesiga emirago ya Yahwe, n’okwikara tuli beesigwa noobu Abakristaayo bagenzi baitu batutwaza kubi?

“Yosuha Eki Yaijukire” (w02 12/1 9-12-wcgr)

Koonyera abaana baawe kwega ebintu ebikuru ebyabaireho omu bwomeezi bwa Yosuha.

“Yosuha” (Ekicweka ekiri ha mukura ekirukubazaaho omuntu ow’omu Baibuli-E)