Rahabu Akasereka Entasi

Entasi za Isareri obu zagiire Yeriko, bakaikara omu nju y’omukazi arukwetwa Rahabu. Omukama wa Yeriko obu yakyetegeriize, akatuma abaserikale bagende kukebera enju ya Rahabu. Omukazi onu akasereka entasi zinu ibiri ha ruguru y’enju ye hanyuma yabihabiha abaserikale bakwata omuhanda ogundi. Akagambira entasi zinu ati: ‘Ninyija kubakonyera habwokuba manyire ngu Yahwe ali hamu nainywe kandi nimwijwa kusingura orubuga runu. Caali mundaganize ngu nimwija kujuna eka yange.’

Entasi zinu zikagambira Rahabu ziti: ‘Nitukuraganiza ngu busaho omuntu weena ow’aliba omu nju yaawe alihikwaho akabi.’ Bakamugambira bati: ‘Obw’orasiba ha idirisa lyawe omuguha ogurukutukura, eka yaawe terukwija kuhikwaho akabi.’

Rahabu akakonyera entasi kuraba omu idirisa nibakozesa omuguha. Bakagenda omu nsozi bayesereka kumara ebiro bisatu, hanyuma bagarukayo hali Yosuha. Hanyuma Abaisareri bakacwanganiza Ekyambu Yorudani bayetekaniza kutwara ensi egi. Yeriko nurwo orubuga orw’okubanza oru basingwire. Yahwe akabaragira kwetoroora orubuga buli kiro omurundi gumu habw’ebiro mukaaga. Ha kiro ekya musanju, baketoroora orubuga emirundi musanju. Hanyuma banyakatagara bakatera engwara kandi abaserikale batokera haiguru muno. Ebisiika by’orubuga bikaseseka byagwa hansi! Baitu enju ya Rahabu ey’ekaba eri ha kisiika ebi etagwe. Rahabu n’ab’omuka ye bakakira habw’okuba akesiga Yahwe.