Rebeka Akagonza Kusemeza Yahwe

Rebeka yagonzaga Yahwe. Iba bamwetaaga Isaaka. Nauwe yagonzaga muno Yahwe. Rebeka akafooka ata mukazi wa Isaaka? Akakyoleka ata ngu n’agonza kusemeza Yahwe? Leka twege ebirukukwata hali Rebeka.

Bazaire ba Isaaka baali, Iburahimu na Sara. Baikaraga omu Kanani nambere abantu bataramyaaga Yahwe. Baitu Iburahimu akaba n’agonza omwana we aswere omukazi arukutiina Yahwe. Nahabwekyo, akatuma omwiru we Eryeza agende omu nsi ya Harani nambere ab’enganda za Iburahimu baali, nuho aseru’re Isaaka omukazi.

Eryeza akagenda n’abairu ba Iburahimu abandi. Orugendo rwali rwa hara muno. Bakatwara engamiya ikumi zetwekere ebyokulya n’ebisembo. Hati obu, Eryeza yakusoboire ata kukomera Isaaka omukazi omurungi? Obu bahikire omu nsi ya Harani, bakahuumurra ha iziba. Eryeza akaba akimanyire ngu abantu baija kwija kutaha amaizi ha iziba. Akasaba Yahwe yagamba ati: ‘Omukazi ou ndasaba amaizi akagampa kandi akanywesa n’engamiya zaange, ndamanya ngu nuwe mukazi ow’okomiire Isaaka.’

Hatarabeho kasumi Rebeka yahika. Baibuli egamba ngu akaba asemiire muno. Eryeza obu yamusabire amaizi akamugarukamu ati: ‘Ni nyija kukuheereza amaizi hamu n’engamiya zaawe.’ Gutabe mulimu mwangu habwokuba engamiya zinywa amaizi maingi muno. Ekyo kyaali nikimanyisa ngu akaba aina kutaha amaizi omw’iziba emirundi nyingi. N’omurora omu kisisani n’aheereza engamiya amaizi?— Eryeza akahuniira omulingo Yahwe y’agarukiremu okusaba kwe.

Eryeza akaheereza Rebeka ebisembo biingi ebirungi. Rebeka nauwe akabatangiirra omuka owaabu. Eryeza akabasoborra ensonga eyaali emulesire n’omulingo Yahwe yaali agarukiremu okusaba kwe. Ab’enganda za Rebeka bakasemererwa kandi bakaikiriza Rebeka agende aswerwe Isaaka.

Baitu n’oteekereza Rebeka akaba n’agonza kugenda aswerwe Isaaka?— Rebeka akaba amazire ira kukyetegereza ngu Yahwe nuwe akaba asindikire Eryeza. Nahabwekyo ab’enganda ze obu bamukagwiize obwaraaba n’agonza kugenda Kanani kuswerwa Isaaka, akabagarukamu ngu: ‘Ego, ningonza.’ Akagenda na Eryeza. Obu bahikire omu Kanani, akaswerwa Isaaka.

Yahwe akaheereza Rebeka emigisa habwokuba akamusemeza. Rebeka akatunga omugisa ogw’okuba omu ha banyinenkuru Yesu. Naiwe Yahwe asobora kukuheereza emigisa obw’oraakora ebimusemeza.