Rahabu Akateeka Obwesige Bwe omu Yahwe

Ka tugambe ngu tuli omu rubuga rwa Yeriko. Orubuga runu rusangwa omu nsi ya Kanani, nambere abantu bataikiririza omu Yahwe. Baitu haliyo omukazi ou beeta Rahabu.

Rahabu obu yaali muto akahu’ra omulingo Musa y’acwanganiizemu enyanja erukutukura y’ayebemberamu Abaisareri kuruga omu Misiri. Kandi akahu’ra n’omulingo Yahwe y’abakonyeraga kusingura abanyanzigwa baabu omu bulemu. Kyonka hati ahu’ra ngu Abaisareri batemere enkande haihi na Yeriko!

Kiro kimu entasi ibiri ziija omu Yeriko kubega orubuga oru. Bahikira ha nju ya Rahabu, nauwe abaikiriza kutahamu. Baitu omu kiro omukama wa Yeriko akimanya ngu haroho entasi ibiri ezizire omu rubuga rwe ngu kandi ziri omwa Rahabu. Asindika abasaija be bagende babakwate. Baitu Rahabu asereka entasi ha rusu rw’enju ye. Ensu zaabu zaali ziterekerire. Abasaija b’omukama obu bahika abagambira ngu: ‘Entasi zibaire hanu, baitu zigenzere, n’omurubuga ziturukiremu. Kakuba mubahoondera, musobora kubakwata.’ Omanyire habwaki Rahabu aserekere entasi zinu?— Akikozire habwokuba n’ayesiga Yahwe kandi akimanyire ngu Yahwe aija kuheereza Abaisareri ensi ya Kanani.

Entansi zitakagenzere zigambira Rahabu ngu orubuga rwa Yeriko obu ruraaba niruhwerekerezibwa, uwe n’ab’enju ye tibarukwija kuhwerekerezibwa. Omanyire eki bamugambire akole?— Bamugamba: ‘Twara omuguha gunu ogurukutukura ogusibe ha idirisa lyaawe aheeru. Obw’orakikora, boona abali omu nju yaawe tibarukwija kuhwerekerezebwa.’ Rahabu nauwe akakorra kimu nkoku bamugambire. Omanyire ekyahondiireho?—

Harabireho ebiro bitaito Abaisareri batandika kwehinguliriza orubuga rwa Yeriko. Bakiko’ra ebiro mukaaga, omurundi gumu gumu buli kiro. Baitu omurundi ogw’omusanju, behinguliriza orubuga emirundi musanju. Batandika kutokera haiguru. Ebisiika byoona bitandika kugwa hansi, baitu enju ina omuguha ogurukutukura omw’idirisa esigaraho eyemerire! N’ogirora omu kisisani?— Tiharoho n’omu ayafiire hali ababaire omu nju ya Rahabu.

Kiki eky’orukusobora kwegera hali Rahabu?— Rahabu akaikiririza muli Yahwe habw’ebintu ebirungi yamwegereho. Naiwe n’oyega ebintu ebirungi biingi hali Yahwe. N’omwikiririzaamu nka Rahabu?— Nitukigumya ngu n’omwikiririzaamu!