Nuha Yayombeka Eryato

NUHA akaba aine omukazi hamu n’abatabani basatu. Amabara gabu nigo Semu, Hamu, na Yafesi. Batabani be banu, buli omu akaba aine omukazi we. Nahabwekyo abantu baali munaana ab’omu maka ga Nuha.

Ruhanga akagambira Nuha kukora ekintu ekyokuhuniriza. Akamugamba kwombeka eryato erikooto muno. Eryato linu lyali likooto nk’emeeri baitu likaba nirisisana nk’ekisanduuko ekikooto kandi ekigazi. Ruhanga akamugambira ati: ‘Okikole kya kaina isatu, kandi ocwemu ebisiika.’ Binu ebisiika byaali bya Nuha n’amaka ge, n’ebisoro hamu n’ebyokulya ebi bakwetagire.

Ruhanga akagamba Nuha okusiiga eryato lyona nukwo lireke kutonywamu amaizi. Ruhanga akagamba: ‘Ndireta okusandaara kw’amaizi hansi nokuhwerekereza ensi yoona. Weena owakaba atali mu ryato yakufire.’

Nuha n’abatabani be bakahurra Yahwe, batandika kwombeka, baitu abantu abandi baali nibabasekerra. Bakeyongera kukora ebibi bingi. Busaho nomu ayahulirize Nuha, obu yabagambire eki Ruhanga akaba nagenda kukora.

Kikatwara omwanya mwingi okwombeka eryato habwokuba lyali likooto muno. Hanyuma y’akasumi likamalirizibwa. Ruhanga akagambira Nuha okutahya ebisoro muryato. Ruhanga akamugambira atahyemu bibiri bibiri, ekisaija n’ekikazi. Baitu ebisoro ebindi Ruhanga akagambira Nuha okutahyamu musanju. Ruhanga akagambira Nuha n’okutahyamu ebinyonyi ebya buli mulingo. Nuha akakorra kimu Ruhanga nkoku yamuragiire.

Hanyuma Nuha n’amaka ge bakataaha omu ryato. Hanyuma Ruhanga yakingaho orwigi. Obu bakaba bali munda y’eryato, Nuha n’amaka ge baali baine kulindirra. Kicumutirizeho oli munda y’eryato hamu nabo nolindirra. Baitu okusandaara kw’amaizi kwali nikugenda kubaho nkoku Ruhanga akaba agambire?