Okusandaara Kw’amaizi Okw’amaani

AHERU y’eryato, abantu bakaba mubwomezi bwabu obwabuli kiro. Tibaraikirize ngu okusandaara kw’amaizi kukaba nikwija kubaho. Nikisoboka kuba bakeyongera kusekereza n’okukiraho kara. Baitu mu kasumi kake, enseko zabu zikaculeera.

Obu bakaba bakyali aho, enjura ekatandika kugwa. Ekagwa muno kuruga haiguru nkoku oseesa amaizi kuruga munsoha. Nuha akaba ahikire! Hati kikaba kitarukusoboka omuntu weena okutaaha mu ryato. Yahwe nuwe akaba akingiireho kimu orwigi.

Mukaanya kake, obwerre bwona bwali buswekerwe amaizi agali nigasisana nk’ebisaru ebikooto. Gakacwa emiti n’okutwara amabale amakooto n’okuhirra kwago kwali kw’amaani. Abantu bakatiina muno. Bakatemba ha nsozi. Bambi, kakuba baali bahulirize Nuha n’okutaaha muryato obwire obu bwali bukyaroho! Baitu hati kyali kitakyasoboka.

Amaizi gakeyongerra kimu. Enjura ekamara ebiro 40, nyamusana n’ekiro n’egwa. Amaizi gakaswekera kimu obusozi bwona hamu n’ensozi ezikaba ziraihire muno. Abantu n’ebisoro byona ebyabaire aheru bikafa nkoku Ruhanga akaba agambire. Kwihaho abo abaali omunda y’eryato.

Nuha n’abatabani be baali bakozeere omulimu murungi muno ogw’okwombeka eryato. Amaizi gakaimukya eryato lyatandika kuseeyeya ha maizi. Hanyuma enjura ekalekeraho kugwa. Omusana gukajwa. Kakikaba nikihuniriza kurora! Hoona ekaba nyanja emu enkooto. Ekintu kimu kyonka ekikaba nikirorwa likaba ryato erikaba niriseyeeya h’amaizi.

Agantu goona gaali gatakyaroho. Gaali tigakyabonesabonesa abantu. Boona baali bafiire hamu n’abanyinabo, n’abantu ababi boona. Baitu kiki ekyabaireho ha baisebo?

Baise b’agantu ganu bakaba batali bantu nkaitwe. Bakaba bamaraika abaali barugiire omu iguru kwija kwikara omu nsi. Okusandaara kw’amaizi obu kwaizire batafe n’abantu abandi. Bakeejuura emibiri y’abantu ei baali bekoliire, bagarukayo omu iguru nk’abamaraika. Kyonka bataikirizibwe kugaruka kuba bamu h’abamaraika ba Ruhanga. Hati bakafooka bamaraika ba Setani. Omu Baibuli nibeetwa amasitani.

Ruhanga akaleeta ihunga lyamani eryakendiize amaizi. Hanyuma y’emyezi etaano, eryato likahumurra ha rusozi. Ebiro bingi obu byahingwireho, abo abaali omu ryato bakatandika kurora ensozi zonka. Amaizi gakeyongera kukeha.

Nuha akalekera ekinyonyi kimu ekirukwiragura ekirukwetwa ekingoora kuruga omuryato. Kyahurrukaga habwa kaanya kake baitu kigaruka habwokuba kitasobole kutunga h’okwemerra. Kikeyongera kukora kiti emirundi nyingi baitu nikigaruka kwemerra haiguru y’eryato.

Nuha akagonza kumanya obu amaizi garaba gomiire kimu. Nahabwekyo akatuma eriba kuruga omuryato. N’eriba nalyo likagaruka litarukusobora kutunga h’okwemerra. Nuha akagaruka yalituma omurundi ogw’akabiri, baitu hati likagaruka n’akataagi k’omuzeituni mu kanwa kalyo. Nahabwekyo Nuha akamanya ngu amaizi gakehere. Nuha yagaruka yasindika eriba omurundi ogw’akasatu. Likatunga h’okwemerra n’okwikara.

Ruhanga akagambira Nuha ati: ‘Turuka omu ryato. Twara amaka gawe goona hamu n’ebisoro.’ Omuryato baali bamaziremu obwire oburukukira ha mwaka gumu. Kitekerezeho omuhimbo ogu baali baine okugaruka okuba aheru n’okuba boomezi!