9 Eki Eky’oli

NIKIMANYISA KI?

Eki eky’oli tikirukugarukira ha ibara lyawe n’enzooka. Nikitwarramu engeso zaawe, enyikiriza zaawe, n’emiringo yaawe. Mali, eki eky’oli nikitwarramu buli kimu kyona ekirukukukwataho—omunda n’aheeru.

HABWAKI KIKURU?

Obwomanya eki eky’oli, nikiija kukukonyera kugumira ha bintu eby’orukwikiririzaamu omu kiikaro ky’okumara gatwalirizibwa abanywani ab’emyaka yawe.

“Abantu baingi bali nk’ebidole ebibajweka engoye ez’okutunda omu duuka. Tibyekomeramu engoye ezibirajwara; abantu abandi nibo babikomeramu.”—Adrian.

“Nyegere kugumira ha kintu ekihikire n’obukiba kigumire. Ninsobora kumanya abanywani bange ab’amananu kusigikirra ha nyetwaza yabo n’omu mulingo nyetwazaamu obumba ndi nabo.”—Courtney.

OMUSINGI GWA BAIBULI: “Mutasisanizibwa nkobusinge bunu: baitu muhindurwe omu magezi banyu amahyaka.”​—Abarumi 12:2

EKY’OSOBORA KUKORA

Manya eki eky’oli hati n’ekiwakugondeze kufooka kuraba omu kumanya ebintu ebyokora kurungi, obuceke bwawe, n’ebintu eby’oikiririzaamu. Kusobora kukora eki, wekaguze ebikaguzo binu.

Ebintu ebyokora kurungi: Bisembo ki n’obukugu ebinyine? Bintu ki ebimpikiriza kurungi? (Ekyokurorraho: Ndinda obwire? nyine okwetanga? nkora n’amaani? ndi mugabi?) Bintu ki ebirungi ebinkora?

AMAGEZI AGASOBORA KUKONYERA: Nikikugumira kumanya ebintu ebirungi ebyokora? Kaguza omuzaire wawe rundi munywani ow’orukwesiga akugambire ebintu ebirungi ebyakukuroramu, kandi habwaki.

OMUSINGI GWA BAIBULI: “Omuntu wena ayerengere omulimogwe wenka, kandi nukwo abe nokwenyumizakwe habwe wenka, kunu tihali habwondi.”—Abagaratiya 6:4.

Obuceke bwawe: Ninkaha nambere nsemeriire kusemezaamu omu nyetwaza yange? Nidi obukisobora kunyanguhira kugwa omu kwohebwa? Nyikara ki nambere nsemeriire kwoleka okwetanga kw’amaani?

OMUSINGI GWA BAIBULI: “Obutugamba ngu titunyina bibi twebihabiha.”—1 Yohana 1:8.

Ebintu eby’orukwikiririzaamu: Ngeso za mulingo ki ezimpondera, kandi habwaki? Nyikiririza omuli Ruhanga? Bwakaiso ki oburukungumya ngu aroho kwo? Bikorwa bya mulingo ki ebintwara kuba bitali by’obwinganiza, kandi habwaki? Bintu ki ebinkwikiririzaamu ngu nibiija kubaho kwo omu kasumi ak’omu maiso?

OMUSINGI GWA BAIBULI: “Obusobozi bw’okutekereza kurungi bulikulinda, n’okwetegereza kulikulinda.”—Enfumo 2:11, NWT.