8 Ekyokurorraho

NIKIMANYISA KI?

Abazaire abateekaho ekyokurorraho ekirungi bateeka omu nkora ebibeegesa. Ekyokurorraho, kakuba oba otarukugonza kubaza n’omuntu ow’aizire omu ka yanyu, tosobora kunihirramu omwana waawe kubaza amananu kakuba omuragira kugamba ati: “Mugambe ngu omu ka tindiyo.”

“Kikira kugambwa ngu ‘Kora kindukukugambira hatali ekindukukora.’ Baitu ebigambo ebi tibiri birungi hali abaana. Bali nk’omufaalisi ogurukunyunyuuta buli kimu ekitubaza n’ekitukora kandi nibaija kutugambira ekyokurorraho kyaitu obukiraaba kitarukuhikaana n’ebiturukulengaho kubeegesa.”—David.

OMUSINGI GWA BAIBULI: “Iwe anyakutebeza ngu otaliiba, oiba?”—Abarumi 2:21.

HABWAKI KIKURU?

Abaana abato otwaliiremu n’ensinganto bakira muno kukwatwaho ebikorwa by’abazaire baabo kukira omuntu ondi wena—kababe banywani baabo. Eki nikimanyisa ngu abazaire ninywe musemeriire kuteekaho ekyokurorraho ekirukukirayo obukirukuhika ha kuhabura abaana banyu omu mulingo oguhikire—kandi eki nikitwarramu kuteeka omu nkora ebimurukubeegesa.

“Nitusobora kugambira omwana waitu ekintu emirundi nyingi muno kandi nitwekaguza obwaraaba n’ahuliiriza, baitu ekiro tutakora ekitumugambiire kukora, omwana waitu akitugambira. Abaana bateeka omutima ha buli kimu kyona ekitukora, n’obutuba tutarukubanihirramu kukikora.”—Nicole.

OMUSINGI GWA BAIBULI: “Amagezi aganyakuruga haiguru okubanza gaba . . . agatanyina obugobya.”—Yakobo 3:17.

EKY’OSOBORA KUKORA

Wekebiije endengo zaawe. By’okwesemeza bya mulingo ki eby’orora? Otwaza ota ow’oli nauwe omu buswere n’abaana baawe? Banywani ba mulingo ki ab’oine? Ofaaho abandi? Omu bugufu, oli kika ky’omuntu ekiwakugondeze abaana baawe babe?

“Nyowe na iba nyowe tituteeraho abaana baitu endengo ezitutahondera.”—Christine.

Saba ekiganyiro obw’osobya. Abaana baawe bakimanyire ngu tohikiriire. Obwogamba “Nganyira” obworukuba osobiize ow’oli nauwe omu buswere rundi abaana—noija kubeegesa isomo erikuru erirukukwata ha bwesigwa n’obwebundaazi.

“Abaana baitu basemeriire kutuhurra nitwatura ensobi zaitu, kandi basemeriire kuhurra nitusaba ekiganyiro obuturukuba tukozere ensobi. Kakuba tutakikora, nibaija kwega kusereka ensobi zaabo.”—Robin.