2 Kukorra Hamu

NIKIMANYISA KI?

Obuhabaho kukorra hamu omu buswere, omusaija na mukazi we basisana nk’omuvugi w’enyonyi n’omukonyezi we abaine ekigendererwa kimu. N’obuhabaho ebizibu, buli omu h’abaswerangaine tasemeriire kwetekerezaaho wenka baitu atekerezeeho n’ogu ow’ali nauwe omu buswere.

OMUSINGI GWA BAIBULI: “Tibakiri babiri, baitu omubiri gumu.”—Matayo 19:6.

“Kusobora kuba n’okusemererwa, omusaija n’omukazi basemeriire kukorra hamu.”—Christopher.

HABWAKI KIKURU?

Obuhabaho obutetegerezangana, omusaija na mukazi we abatarukukorra hamu barwanisangana omu kiikaro ky’okurwanisa ekizibu. Obusonga obutaito babufoora ensonga ey’amaani.

“Kukorra hamu kiri kintu ekikuru muno omu buswere. Kakuba nyowe na iba nyowe twali tutarukukorra hamu, titwakubaire nk’abaswerangaine baitu twakubaire nk’abantu babiri abarukwikara hamu abatarukwataniza hamu obukihika ha kukora encwamu enkuru.”—Alexandra.

EKY’OSOBORA KUKORA

WERENGESE

• Sente ezintunga nzitwara kuba zange nyenka?

• Kusobora kuhumuraho, nikinyetaagisa kutaba n’omuntu oundi nauwe omu buswere?

• Nyetantara abanyabuzaale b’ogu oundi nauwe omu buswere n’obukiraaba ngu uwe abatwara kuba b’omuhendo?

MUBAZEEHO HAMU ENSONGA

• Nidi omu buswere bwaitu obutukorra hamu kurungi?

• Ninkaha nambere tusobora kusemezaamu?

• Biki ebitusobora kukora kusemezaamu omulingo tukorra hamu?

AMAGEZI AGASOBORA KUKONYERA

• Tekerezaaho inywe babiri nimuzaana omuzaano ogwa tenesi, kandi muli ha mbaju ezirukwahukana. Bintu ki ebimusobora kukora kusobora kweteranizaaho ogu ow’oli nauwe omu buswere nukwo musobole kuba ha tiimu emu?

• Omu kiikaro ky’okuteekereza ngu, ‘Ninsobora nta kusinga?’ gamba oti, ‘itwena nitusobora tuta kusingira hamu?’

“Otateeka omutima hali oha ahikire kandi nooha agwire. Eki tikiri kikuru nk’okuba n’obusinge hamu n’obumu omu buswere bwanyu.”—Ethan.

OMUSINGI GWA BAIBULI: “Mutarora omu omu ha bigambo byanyu inywenka, baitu inywena murole nebyabandi.”—Abafiripi 2:3, 4.