1 Kugumirahongana

NIKIMANYISA KI?

Banyineeka na banyinabwenge abagumirahongana batwara obuswere bwabo kuba bw’orutekerro kandi eki kibaleetera kuhurra baine obulinzi. Buli omu aba n’akigumya ngu ow’ali nauwe omu buswere naija kwikara ali mwesigwa n’omu nyikara ezigumangaine.

Abaswerangaine abamu behurra ngu baine kwikara hamu habwokuba abanyabuzaale n’abanywani baabo nibabahambiriza kwikara hamu. Baitu ekirungi kiri ngu, kugumirahongana kiri kintu ekisigikirra ha kugonza n’okutekamungana ekitiinisa.

OMUSINGI GWA BAIBULI: “Omusaija atalireka mukaziwe.”—1 Abakolinso 7:11.

“Obworukuba ogumiire ha buswere bwawe, oba oli muntu atarukurahuka kubiihirwa bwangu. Oyanguha kuganyira n’okusaba ekiganyiro. Ebizibu obirora nk’ebintu ebirukutabaijura hatali nk’eby’orasigikirraho kugaitururwa.”—Mika.

HABWAKI KIKURU?

Abaswerangaine abatagumiirehongana obubahikwahwo ebizibu nikisobora kubanguhira kugamba ngu, ‘Tukaba tutasemeriirengana’ kandi baserra emiringo ey’okugaitururwa.

“Abantu baingi bataaha obuswere bakimanyire ngu ebintu ebubiraalema nibaija kugaitururwa. Abantu obubataaha obuswere baine entekereza ey’okugaitururwa, baba bataine ekigendererwa ky’okugumirahongana kuruga ha kubanza.”—Jean.

EKY’OSOBORA KUKORA

WERENGESE

Obumutunga obutetegerezangana . . .

• Oyesanga n’oyeijukya habwaki wataahire obuswere n’omuntu ow’oli nauwe?

• Oikara n’oteekereza ngu kakuba oli n’omuntu ondi?

• Okira kubaza ebintu nka binu “Ninyija kukulekaho” rundi “Ninyija kutunga omuntu ondi ow’arukuntwaza kurungi”?

Eky’okugarukamu kyawe obukiraaba kiri ego ha bikaguzo ebi, kanu nuko akasumi ak’okweyongera kugumirahongana.

MUBAZEEHO HAMU ENSONGA

• Titukyagumirahongana omu buswere bwaitu nka kara? Obukiraaba nukwo kiri, habwaki?

• Biki ebitusobora kukora hati kusobora kweyongera kugumirahongana?

AMAGEZI AGASOBORA KUKONYERA

• Ikara n’ohandiikira ow’oli nauwe omu buswere obutumwa obw’okugonza

• Yoleka ngu n’ogumiraho ow’oli nauwe omu buswere obu n’oteeka ebisisani bye ha meeza yaawe ha mulimo

• Ikara n’oterra esimu ow’oli nauwe omu buswere obworukuba oli ha mulimo rundi ogenzere omu kiikaro ekindi

OMUSINGI GWA BAIBULI: “Ruhanga ekiyateraniize ahamu, omuntu atalikibaganizamu.”—Matayo 19:6.