Йәһвә Шаһитләре — сектамы?

Юк, Йәһвә Шаһитләре секта түгел. Без мәсихчеләр һәм Гайсә Мәсихнең үрнәгенә иярергә һәм аның тәгълиматлары буенча яшәргә тырышабыз.

Нәрсә ул секта?

«Секта» дигән сүзне төрле кешеләр төрлечә аңлый. Әйдәгез, бу сүзнең мәгънәсе белән бәйле ике фикерне карап чыгыйк һәм алар безгә кагыламы, юкмы икәнен белик.

• Кайберәүләр секта — ул яңа яки гомум кабул ителмәгән дин дип уйлый. Йәһвә Шаһитләре яңа динне уйлап чыгармады. Киресенчә, без Аллаһыга беренче гасыр мәсихчеләренең үрнәге буенча табынабыз, ә аларның үрнәге һәм өйрәтүләре турында Изге Язмаларда язылган (2 Тимутигә 3:16, 17). Моннан тыш, без, гыйбадәт кылу турында әйткәндә, нәрсәне дә булса кабул итәр өчен, Изге Язмаларны тикшерергә кирәк дип саныйбыз.

• Кайберәүләр секта — ул берәр кеше җитәкчелегендәге куркыныч дин дип уйлый. Йәһвә Шаһитләре бернинди кешене дә үз җитәкчесе дип санамый. Гайсә: «Сезнең бердәнбер Җитәкчегез — Мәсих»,— дип әйткән (Маттай 23:10). Шуңа күрә без, аның шәкертләре буларак, аны җитәкче дип саныйбыз.

Йәһвә Шаһитләре куркыныч секта түгел, киресенчә, аларның эше үзләренә дә, башкаларга да файда китерә. Мәсәлән, безнең хезмәтебез күп кенә кешегә начар гадәтләрен ташларга, әйтик, наркотик кулланудан һәм чиктән тыш күп исерткеч эчемлекләр эчүдән тыелырга ярдәм итте. Моннан тыш, без дөнья буйлап курслар үткәреп, меңләгән кешене укырга һәм язарга өйрәтәбез. Без шулай ук афәтләр булган җирләрдә ярдәм күрсәтәбез. Гайсә үз шәкертләренә кушканча, без башкаларга яхшы яктан тәэсир итәргә тырышабыз (Маттай 5:13—16).