Иблиснең тышкы кыяфәте нинди?

Изге Язмалар нигезендә җавап

Иблис — рухи шәхес, шуңа күрә аның без күрә алган физик тәне юк (Эфеслеләргә 6:11, 12).

Киң таралган Иблис рәсеме; ул кулында сәнәк тота; аның койрыгы һәм мөгезләре бар.

Еш кына Иблисне мөгезләре, койрыгы булган, кулында сәнәк тоткан кәҗәгә охшаш җәнлек итеп сурәтлиләр. Кайберәүләр уйлавынча, андый караш урта гасырлардагы рәссамнардан килә. Бу рәссамнарга фольклор һәм борынгы мифология тәэсир иткән.

Изге Язмаларда Иблис ничек итеп тасвирлана?

Изге Язмаларда, Иблисне тасвирлар өчен, төрле метафоралар кулланыла. Бу безгә аның тышкы кыяфәтен түгел, ә нинди шәхес икәнлеген аңларга ярдәм итә. Менә кайбер метафоралар:

Яктылык фәрештәсе. Кешеләр Аллаһы өйрәтүләре буенча түгел, ә аныкы буенча эш итсен өчен, Иблис нәрсәдер яхшыны тәкъдим иткәндәй кылана (2 Көринтлеләргә 11:14).
Үкерүче арыслан. Иблис Аллаһының хезмәтчеләренә ярсу белән һөҗүм итә (1 Петер 5:8).
Зур аждаһа. Иблис куркыныч һәм көчле, ул күп зыян китерә (Ачылыш 12:9).

Изге Язмалардагы Иблис турындагы шигырьләр

2 Көринтлеләргә 11:14: «Шайтан үзе яктылык фәрештәсе булып кылана».

Мәгънәсе: Шайтан, кешеләр Аллаһы өйрәтүләре буенча түгел, ә аныкы буенча яшәсен өчен, яхшы булып кылана.
Эфеслеләргә 6:11: «Иблиснең мәкерле эшләренә каршы тора алыр өчен, Аллаһы биргән бөтен хәрби киемне киеп, коралларны алыгыз».

Мәгънәсе: Шайтан, кешеләр Аллаһыны тыңламасын өчен, мәкерле планнар кора.
Ягъкуб 4:7: «Аллаһыга буйсыныгыз, ә Иблискә каршы торыгыз, һәм ул сездән качар».

Мәгънәсе: Кеше, Аллаһыны тыңлап, Иблискә каршы тора ала.
1 Петер 5:8: «Дошманыгыз Иблис, үкерүче арыслан кебек, кемне йотарга дип эзләнеп йөри».

Мәгънәсе: Иблис Аллаһыга тыңлаучан кешеләрне нәфрәт итә һәм аларның Аллаһы белән мөнәсәбәтләрен бозарга тели.