Jehovha wa ndzi gondzisa kusukela wun’wananeni

Kanilezvi na ndzi nga seya kule, nyimani ndzi mu hlawutela matimu ya mina. Ndzi pswalilwe Calgary, a Canadá, cikhatini ca Yimpi ya Wumbiri ya misava yontlhe. Kumbheleni ka va 1940, a jaha go kari ga phayona ga ku hi Donald Fraser gi nota laha kaya gi ta bhula na mamani niku i no vhumela ku sangula ku gondza Bhibhiliya. Mamani i no li tsakela nguvhu lisine, kanilezvi kota lezvi a nga hi ni mababyi ya hombe, a nga zvi kotangi ku maha zvotala laha bandleni. Hambulezvo, i no kula hi tlhelo ga moya, a bhabhatisiwa hi 1950. Kanilezvi, a ya hava hi ku i nofa na ku nga se hundza malembe mambiri na a bhabhatisilwe. Ka cikhati leco, papayi i wa nga hi Kustumunyu wa Jehovha, kanilezvi i vhumele ku a Vakustumunyu va rangela marilo.

Andzhako ka masiku yo kari na hi lahlile mamani, a makabye wo kari wo khosalaha a totilweko wa ku hi Alice i no ndzi ramba ku ndziya mutlhanganweni wa bandla. I wa ndzi tiva hakuva ndzi waya ka mitlhangano ya kumbhela ka vhiki na mamani loku a zvi kota. Ndzi no wutisa papayi lezvaku ndzi nga famba ke. I no vhumela a tlhela a ku i ta famba na mina “khati gin’we basi” kasi a ya bonga makabye gayani a nga vekile kanelo ka marilo ya mamani. Ka gambo lego, ku no mahiwa Cikola ca Wutireli ga Nungungulu ni Mutlhangano wa Ntiro. Wu vile mutlhangano wo sangula ni wo tsakisa ka papayi wa mina. I wa susile kurso ya ku wulawula mahlweni ka vanhu, niku zvi mu tsakisile nguvhu lezvi a tikanelo ti nga vekisiwa zvona. Kusukela kwalaho, papayi i no boha kuya mitlhanganweni vhiki ni vhiki. Hi kutsongwani-kutsongwani, i no sangula kuya ka mitlhangano leyi yin’wani.

Ka cikhati leco, a makabye loyi a nga rangela a Cikola ca Wutireli ga Nungungulu i wa sangula mutlhangano hi ku vitanela mavito ya vamakabye lava va nga hi ni zvipandze, niku a mun’we ni mun’wani i wa fanele ku hlamula, aku: “Ndzi kona.” Ka wusiku go kari, ndzi no kombela lezvaku minawu va ndzi vitana ka mutlhangano wu to landzela. A makabye loye i no ndzi dzundza nguvhu, kanilezvi a nga ndzi wutisangi lezvaku ndza zvi tiva zvontlhe zvi nga patseka ke.

Ne ndzi wa nga zvi pimisi ku ndzi wo tinyikela kasi ku veka tikanelo ka cikola leco, kanilezvi mina ndzi wo lava ku va vitana a vito ga mina basi! Ka mutlhangano wu nga landzela, va no vitana vito ga mina niku ndzi no tekela ku hlamula na ndzi tsakile ndziku: “Ndzi kona.” Andzhako ka mutlhangano lowo, a vamakabye va no ndzi dzundza nguvhu, niku andzhako ka mavhiki yo tala ndzi no nyikiwa ciavelo leci ndzi nga ci kumbuka kusanguleni.

Ndzi no karateka nguvhu. Ka cikhati leco, ku wa rindzelwa lezvaku a zvigondzani zvi veka kanelo ya 6 kuya ka 8 minuto. Ku wa nga hi na ciavelo ca kulera ka Bhibhiliya. Papayi i no ndzi vhuna ku longisela kanelo leyo niku i ndzi vhuxetisile 20 wa makhati. Andzhako ka kanelo leyo, ndzi no nyikiwa wusungukati ga lisima. Hi malembe yo tala, Jehovha i kari a ndzi gondzisa hi ku tirisa papayi, ni vamakabye vo buvha, ni hlengeletano yakwe.

JEHOVHA I NO SIMAMA KU NDZI GONDZISA

Makabye Alice, loyi ndzi mu kumbukileko, i ndzi gondzisile a cikhati leci ndzi nga sangula kuchumayela. Cikhatini leco, hi wa kuciwa ku lerela n’winyi wa muti a mitsalo yinharu hi gumesa hi mu nyika bhuku. Loku ku hi khati ga mina ga ku wulawula ka muti lowo, makabye Alice i wa wula a vito gakwe, a sangula mabhulo, a gumesa a ndzi kombela ku ndzi lera mutsalo wo sangula. Andzhako ka ku lera mutsalo lowo, ndzi wa simama ni mabhulo, ndzi lera mutsalo wa wumbiri ni wa wunharu, ndzi gumesa ndzi nyikela bhuku. Hi kufamba ka cikhati, ndzi no gondza kusangula mabhulo. Andzhako ka kubhabhatisiwa ka papayi kumbheleni ka 1954, i no simama ku ndzi gondzisa kuchumayela. Hambu lezvi a nga hi yece, papayi i no maha zvontlhe a nga zvi kota kasi ku ndzi wundla lisineni. I wa yi nyika nguvhu lisima mitlhangano ni ntiro wa kuchumayela. Contlhe cikhati ndzi wa zvi tiva ku kumbheleni ka vhiki hi wa fanele kuya mitlhanganweni ni sin’wini.

Cikoleni ndzi wa hi cigondzani co fana ni zvin’wani, kanilezvi ka 12 wa malembe lawa ndzi ngaya cikoleni, ndzi gondzile zvilo zvotala zvi ndzi vhunako wutomini ga mina. Hi cikombiso, ndzi gondzile zvotala xungetano hi Matematika ni gramatika ya ciNgiza. A tikurso ta ciNgiza leti ndzi nga susa ni zvigondzo zva kutsala matimu, zva ndzi vhuna nguvhu ka ciavelo ca mina zvezvi laha ndzi tirako ni Dhepartamento ya Kutsala.

A kutala ka zvikhati a vanhu va wa ndzi wutisa ku hikuyini ndzi randzako a muzka. A vapswali va mina va wa wu randza muzka. A cikhati leci ndzi nga hi ni 7 wa malembe, ndzi no gondza ku chaya piyano, kanilezvi a mugondzisi wa mina i wa alakanya ku a ndzi tivi nchumu hi ta piyano. A mugondzisi wa mina i no bhula na papayi, a mu byela ku i chukwana ndzi nyima ku gondza. Lezvo zvi wa zwala, hakuva ka cikhati leco zvi wa nga ndzi tsakisi.

Andzhako ka tihwetana to kari, papayi i no ndzi lavela mugondzisi mun’wani. Ka khati legi ndzi wa gondza ku chaya piyano ni ku yimbelela niku zvi wa famba khwatsi. Na ndza ha hi cifanyana ndzi wa hi ni gezu go saseka niku ndzi ganyile mapalisana yo kari. A cikhati leci ndzi nga gondza muzka, a kungo ga mina ku wa hi ku ndzi zvi kota ku yimbelela ni ku chaya khwatsi kasi ndzi gondzisa van’wani a ku chaya ni ku yimbelela, lezvaku ndzi kuma mali ya ku khatalela zvilaveko zva mina na ndzi phayona. Kanilezvi, laha ndzi nga hi kusuhani ni ku gradhuwara, ndzi no pola lezvaku zvi wa ta lava ku ndzi mbheta cikhati co tala nguvhu na ndzi gondza muzka ni ku ti longisela ku maha tiizame. Hikwalaho, hi 1963 ndzi no zvi chokola, ndzi maha phayona ga cikhati contlhe.

A KUPHAYONA ZVA NYIKA LITSAKO

Andzhako ka ku phayona lembe gin’we, ndzi no yimisiwa kuva phayona go hlawuleka le Kapuskasing, a Ontário. A makabye loyi ndzi nga hi naye ka ciavelo leco, wa ku hi Daniel Skinner, i wa hi wa hombe nguvhu ku hundza mina. I ndzi gondzisile zvotala xungetano hi lezvi a bandla gi tirisako zvona. Laha ndzi nga hi ni 20 wa malembe ndzi no yimisiwa ku tira ka Kometi ya Ntiro ya Bandla niku ndzi wa ha fanele ku gondza zvotala. Zva ndzi tsakisa lezvi a hlengeletano yi tlhelako yi khanyisa lisima la ku gondzisa majaha. Phela loku a majaha ma ti karata, ma nga tirisiwa nguvhu hlengeletanweni ya Jehovha hambu loku ma haya!

Ka zvikhati zvo kari zvi wa karata ku hanya le Kapuskasing. Hi nguva ya cirami, a temperatura yi wa tshuka yiva hasi ka 0 grawu (yi waba -44 grawu) niku ka zvikhati zvokari ku wa hisa nguvhu kuba ma 33 grawu. Mina na Daniel hi wa fambafamba kontlhe. A cin’we ca zvikhati zvo tsakisa ka ciavelo ca mina, ku vile cikhati leci ndzi nga tivana na Linda Cole, loyi hi ndzhako ka cikhati a ngava Linda Splane.

Linda i wa hi muhuweleli wo hiseka niku i wa hi ni marevhizita yo tala. I wa hana, i wa hi munhu wa munene niku i wa randza ku tshama ni van’wani. A mamani wakwe, Goldie, i wa hi makabye wo tsumbeka. Allen, a papayi wa Linda, kusanguleni i wa vhukela lisine. Hambu lezvi Allen a nga vhukela lisine, Goldie i wata mitlhanganweni hi kukhandzakanya na Linda ni vamakabye vakwe, John na Gordon a tlhela a va gondzisa kuchumayela. Hi cikhati co kari, Goldie, na Linda, na John, na Gordon, vontlhe va nova maphayona. Hi ndzhako ka malembe, Allen i no maha Kustumunyu wa Jehovha niku i no tira hi ku hiseka lomu bandleni.

Hi 1965, ndzi no rambiwa ka Cikola ca Wutireli ga Mufumo le Bheteli ya Canadá kasi ndzi kuma gondziselelo yo engeteleka. A cikola leci ci tekile hweti. Na ndzi hi cikoleni, ndzi no kombeliwa ku prenxera a petisawu ga Cikola ca Gileyadhe. Ndzi wa nga se tshuka ndzi ehleketa hi ntiro wa wurumiwa, ndzi wa nga zvi tivi zvontlhe zvi nga patseka ka ntiro lowu, kanilezvi ndzi no prenxera a petisawu. Ndzi no rambiwa ku gondza ka turma ya wu 42. Le Gileyadhe, a vagondzisi va hina va wa hi byela lezvi a cikola ci nga fambisa zvona niku kusukela kusanguleni, va no ndzi kuca a ku gondza zvotala hi laha zvi kotekako hi kona xungetano hi hlengeletano. A ndzova ni 21 wa malembe basi, hikwalaho legi gi wa hi wusungukati ga ginene nguvhu.

A cin’we ca zvilo hi gondzileko le Gileyadhe ku tirisana ni zvitichi zva radhio, zvitichi zva televhizawu ni vahaxi va mahungu. Lezvo zvi wa ndzi tsakisa nguvhu hambu lezvi ndzi nga kala ndzi nga zvi tivi ku a zvigondzo lezvo zvi wa ta ndzi vhuna hi ku famba ka cikhati. Ndza ha mu hlawutela.

NDZI RUMELWA SENEGAL

Andzhako ka masikwana yo kari na hi gradhuwarile, mina na Michael Höhle, loyi ndzi nga avelwe kuya tira naye ka ntiro wa wurumiwa, hi no suka hiya ciavelweni ca hina le África, a Senegal. Ka cikhati leco, tikweni gontlhe ga Senegal ku wova ni vahuweleli va kwalomu ka 100.

Andzhako ka loku ndzi tirile tihweti to tala ciavelweni ca mina ca wurumiwa, ndzi no rambiwa ku ya tira Bheteli khati gin’we hi vhiki. A Bheteli leyo yi wova ni hofisa yin’we basi mutini wa varumiwa. Hambu lezvi a Bheteli leyo yi nga hi yitsongwani, makabye Emmanuel Paterakis, a nga hi muwoneleli wa Bheteli, i wa tala ku ndzi alakanyisa lezvaku a Bheteli leyo yi wa yimela a hlengeletano ya Jehovha tikweni ga Senegal. Ka khati go kari, makabye Paterakis i no boha lezvaku hi tsala papilo ga ku tiyisa a varumiwa vontlhe. Cikhatini leco, zvi wa nga olovi niku zvi wa dhura a ku maha tikopiya; hikwalaho, zvi wa lava ku a papilo ni papilo gi tsaliwa hi muchini wa manuwali. Lowo wu wa hi ntiro wa hombe, nguvhunguvhu lezvi ka ku hi wa nga faneli ku phazama nchumu.

Ka gambo lego, a cikhati leci ndzi nga ti longisela kasi ku tlhela mutini wa mina wa wurumiwa, makabye Paterakis i no ndzi nyika a envhelope. I te: “David, a hlengeletano yi ku rumelele a papilo.” Hi ndzhako ka cikhati, laha ndzi nga vhula envhelope leyo, ndzi no kuma a gin’we ga mapapilo lawa ndzi nga tsele! Lezvo zvi ndzi gondzisile a ku yi kombisa cichavo hlengeletano na ndzi nga cuwuki ku a Bheteli ya kona ya hombe kutani yitsongwani.

Ndzi no maha wunghana ni vahuweleli vo tala laha bandleni niku hi milongiso hi wa mbheta cikhati co tala na hi hi zvin’we. Lezvo zvi wa hi zvikhati zvo tsakisa! Kala nyamutlha ndza ha simama ku bhula ni vahuweleli lavo. Ndzi gondzile a Francês kota lezvi li nga lona lirimi-tshinya la Senegal niku ndza li tirisa a cikhati leci ndzi endzelako tiBheteli misaveni yontlhe.

Hi 1968, mina na Linda hi no noivhara. Andzhako ka noivhadho, ndzi mbhetile tihweti to tala na ndzi lavetela ntiro wa ku ndzi nga tiri masiku wontlhe, kasi mina na Linda hi kuma cikhati ca ku phayona zvin’we le Senegal. Kanilezvi a vapatrawu va seyo va wa nga zvi randzi ku thola munhu wa tiko gin’wani, va wa thola vanhu va seyo basi. Hi kugumesa, a cikhati leci ndzi nga tlhela Canadá hi no chadha. Hi no nyikiwa ciavelo ca ku tira kota maphayona yo hlawuleka le Edmundston, Nova Brunswick, ku nga cidhoropana ci kumekako mbhinganweni wa provhinsia ya Quebec.

HI PHAYONA ZVIN’WE LE NOVA BRUNSWICK NI QUEBEC

Le dhoropeni ku wa nga hi na vahuweleli niku ku wa hi ni zvigondzani zvitsongwani zva Bhibhiliya. Ka wutshamu lego, a vanhu vo tala va wa khongela Katolika. Ka muti ni muti va wa tsalile ku: “A hi lavi Kustumunyu wa Jehovha.” Ka cikhati leco, zvi wa nga hi cikolokolo a ku ingisa magezu lawo a kufana ni nyamutlha. Hikwalaho, hi wa nghena ka mimiti yontlhe, hambu loku yi tsalilwe magezu lawo. Vhiki ni vhiki a chichi ya Katolika yi wa tsala citlharihiso leci lomu ka jornali: “A hi hlongoleni Vakustumunyu va Jehovha, hakuva va hutsutsa vanhu.” Va wa wula lezvaku ku na ni mune wa “vahutsutsi”, makunu lezvi mina na Linda, na Victor na Velda Norberg hi nga hi lomu dhoropeni lego hi no tekela ku zvi pola ku va wula hina.

Ndzi nga ta tshuka ndzi li rivala a liendzo lo sangula la muwoneleli wa cipandze. Andzhako ka ku tshama vhiki na hina, i no wula lezvi: “Kuzvilava a nchumu wa ku mu nga maha loku ma ha hi lomu, ku vhuna vanhu lezvaku va ngavi ni cihlawulela ca hombe hi Vakustumunyu va Jehovha.” Kusukela ka siku lego hi no zama ku maha lezvo, niku zvi vhunile! Hi kutsongwani-kutsongwani a vanhu va no sangula ku wona kuhambana cikari va Vakustumunyu va Jehovha vo ti koramisa ni varangeli va chichi ya Katolika va matshandza. Zvezvi ku na ni bandla ga gitsongwani seyo.

Andzhako ka ku tshama lembe ciavelweni ca hina ka wutshamu ga le kule, hi no rambiwa ku ya seketela bandla ga hombe dhoropeni ga Quebec. Hi mbhetile 6 wa tihweti to tsakisa ni vamakabye vo randza ku amukela vapfhumba hi gumesa hi nyikiwa ciavelo ca ku endzela mabandla.

Ka 14 wa malembe lawa ma nga landzela, ndzi tirile kota muwoneleli wa cipandze ni sati wa mina ka provhinsia ya Quebec. Lezvo zvi vile zvikhati zvo tsakisa! Le Quebec a ntiro wu wa hi wa hombe nguvhu niku zvi wa tolovelekile ku wona mingango yo tala laha bandleni na yi gondza Bhibhiliya kasi yi bhabhatisiwa!

HA VA ALAKANYA A VAMAKABYE VO TSUMBEKA LAVA VA TIRILEKO HI KUTIKARATA

A vamakabye va le Canadá lava va nga hanya ka cipandze ku nga wulawuliwa Francês va wa hi ni lirandzo nguvhu. Va wa nga wuli ku famba ndzi ta sala ndzi wula, va wa hi va kutsaka ni ku hiseka. Hambulezvo, a hi contlhe cikhati zvi nga kari zvi va olovela ku gondza lisine niku va wa vhukelwa nguvhu hi maxaka yabye. A vaswa vo kari va waza va hlawulisiwa hi vapswali vabye vo kala va nga hi vakustumunyu, vaku: “Hlawula nchumu wun’we, ku nyima ku gondza ni Vakustumunyu va Jehovha kutani ku rura laha kaya!” Ndzi nga wula ku vatsongwani, loku ndzi nga lavi ku wula ku i hava a nga vhumela ku tsika ku gondza Bhibhiliya. Handle ko kanakana, Jehovha i ti zwile matshandza hi vona!

Ndzi lava ku wulawula kambe hi ntlawa wa maphayona ya cikhati contlhe ni yo hlawuleka yo tsumbeka ma tirileko le Quebec a cikhati leci ndzi nga hi seyo. A kutala kabye va wata hi ka zvipandze zvin’wani zva Canadá. Ahandle ka ku gondza lirimi la Francês basi, zvi wa lava ku va tlhela va ti zwananisa ni mahanyela ni mapimisela ya seyo, lezvi zvi nga gohilwe nguvhu hi chichi ya Katolika.

A kutala ka zvikhati, a maphayona yo hlawuleka ma wa yimisiwa ku tira ka zvipandze zva le kule lomu ku nga kala ku nga hi na vahuweleli. Hi kota ya cihlawulela, zvi wa karata ku kuma yindlu ya ku tshama ka yona, a ndza ha wuli hi ku kuma ntiro wo kala u nga tiri siku ni siku. Hambu lava va nga ha hi ku chadha, zvi wa boha ku va hlengela yindlu na va hi mune, 6 kutani 8 wa vanhu kasi va vhunana ku hakhela. Va wa nga ta zvi kota ku hakhela yindlu na va hi voce. A maphayona lawo ma wa hi vatiri va zvigingi. Loku maza ma sangula ku gondza ni munhu, ma wa maha zvontlhe ma nga zvi kota kasi ku mu vhuna ku kula hi tlhelo ga moya. Zvezvi, le Quebec ku na ni vahuweleli vo tala, hikwalaho a kutala ka maphayona lawa ma nga kari ma vhunetela seyo ma rurile maya ka matshamu man’wani lomu ku nga ni cilaveko ca hombe.

A cikhati leci hi nga hi ka ntiro wa ku endzela mabandla, hi milongiso ni mixo hi wa tolovela ku tira ni vaswa. Lezvo zvi wa hi vhuna ku tiva ku zvikarato muni va kumanako nazvo. A vaswa vo kari hi tirileko navo zvezvi va tira ka matiko man’wani kota varumiwa kutani ka zvin’wani zviavelo.

Cikhatini leco, a mabandla yo kari ma wa nga zvi koti ku hi tlhelisela mali hi gaxtarileko ka liendzo, hikwalaho ka zvikhati zvo kari a hweti yi wa mbhela na hi conile. Ka zviyimo lezvo, hi wa tsumba Jehovha hi kumbhelela hakuva hi yena yece a nga ci tiva a ciyimo ca hina. A nga tshukangi a hi tsika. Contlhe cikhati zvi nga lava ku hi suka ka bandla gin’we hiya ka gin’wani, hi wa zvi kota.

LEZVI HI GONDZILEKO KA VAMAKABYE VO TSUMBEKA

Ndzi sina ndzi wulile ku ndzi vhunekile hi kugondza ku tirisana ni zvitichi zvo kari le Gileyadhe. Ka cikhati leci hi nga hi le Quebec hi wa tolovela ku kuma mole wa ku chumayela hi ku tirisa radhio, televhizawu ni majornal. A kutala ka zvikhati ndzi wa tira zvin’we na makabye Léonce Crépeault, a nga hi muwoneleli-kuloni a nga zvi tiva khwatsi ku tirisana ni zvihaxa-mahungu. A cikhati leci a nga wulawula ni tihosana ta zvihaxa-mahungu, i wa nga zvi kombisi lezvaku wa wu tiva khwatsi a ntiro lowu, i waku: “Bava, mina ni munghana wa mina hi vachumayeli. A hi tivi zvotala xungetano hi ku haxa mahungu. Kanilezvi, a hlengeletano ya hina yi hi kombelile ku hi tivisa vanhu xungetano hi gotsovanyano wa hombe lowu a Vakustumunyu va Jehovha va to wu maha. Loku mu hi vhuna hi ta tsaka nguvhu.” A kutikoramisa loko ku mahile ku a zvitichi zvo tala zvi vhumela ku haxa mahungu ya hina, a zvilo zva ku loku hi wa nga ti koramisangi kuzvilava na zvi nga kotekangi.

Hi ndzhako ka cikhati, a Bheteli yi no ndzi kombela ku tira zvin’we na makabye Glen How, a nga mun’we wa vaadhivhogadho va hina, ka timhaka ta wukheta leti ti nga wa ta koka kupima ka vahaxi va mahungu. Lezvi ndzi nga gondza le Gileyadhe ni lezvi ndzi nga gondza ka makabye Léonce zvi ndzi vhunile nguvhu. Gi vile thomo ga hombe nguvhu a ku tira na makabye How. I wa wulawula hi ta milayo na a nga chavi nchumu niku a ca lisima ka zvontlhe, i wa mu randza nguvhu Nungungulu.

Hi 1985 hi no yimisiwa ku tira ka cipandze ci nga gamekene ni le kaya, le mupela-gambo wa Canadá, lezvi zvi nga maha ku hi zvi kota ku khatalela papayi. I nofa andzhako ka tihweti tinharu. Hi no simama ku tira ka cipandze ca mupela-gambo wa Canadá kala hi 1989, a cikhati leci hi nga amukela cirambo co kala hi nga ci rindzelangi ca ku hiva zviro zva ngango wa Bheteli wa Estados Unidos. Hikwalaho, zvi lavile ku hi tsika a ntiro wa ku endzela mabandla hi wu mahileko hi cipimo ca 19 wa malembe. Ka malembe wontlhe lawo, hi tshamile ka mimiti yo tala hi tlhela higa zvakuga zvo hambanahambana ni vamakabye vo tala vo hana. Ha va bonga nguvhu a vamakabye vontlhe lava va hi amukeleko mimitini yabye va tlhela va hi nyika zvakuga!

HI RURA HIYA ESTADOS UNIDOS

A cikhati leci hi nga chikela Brooklyn, ndzi no yimisiwa ku tira ka Dhepartamento ya Ntiro. Ndza bonga nguvhu hi gondziselelo ndzi yi kumileko ka dhepartamento leyi. A cin’we ca lezvi ndzi nga gondza seyo ku nga ti byeli ku ndza wu tiva nchumu wo kari na ndzi se gondza zvontlhe zvi patsekako. Andzhako ka lezvo, hi 1998 ndzi no yimisiwa ku tira ka Dhepartamento ya Kutsala, lomu ndza ha gondzako ku tsala kala lezvi. Hi malembe yo tala, ndzi vile ni thomo ga ku vhunetela makabye John Barr, a nga hi mutlhanganisi wa Kometi ya Kutsala. Ndza bonga nguvhu hi gondziselelo leyi a ndzi nyikileko, ni cikhati leci hi ci mbhetileko zvin’we. I wa hi ni matshamela ya manene nguvhu.

I thomo ga hombe nguvhu a ku tira ni vamakabye va kutikoramisa lava va tirako ka Dhepartamento ya Kutsala. Contlhe cikhati va kombela Jehovha lezvaku a va vhuna ciavelweni cabye niku va zvi tiva ku ni cihi va ci kotako ku maha, ci koteka hi kota ya moya wa Jehovha na ku nga hi wutlhari gabye.

I thomo ga hombe nguvhu kambe ka mina na Linda a kuva hi endzele vamakabye vo tsumbeka ka 110 wa matiko. Hi zvi wonile hi lawa ya hina lezvi a varumiwa, ni zviro zva Kometi ya Ravi, ni van’wani vamakabye va nga ntirweni wa cikhati contlhe va hi randzisako zvona. Makatekwa ya hombe kambe a ku wona vamakabye vo tala na va tiyile va tlhela va hiseka — va rangisa Mufumo wutshan’wini ga zvilaveko zvabye — hambu lezvi va kumanako ni tiyimpi, wusiwana ni ku kuvhukelwa. Jehovha i va randza nguvhu!

Ka malembe wontlhe lawa, Linda wa ndzi vhuna nguvhu laha ndzi zamako ku tatisa a zviavelo zva mina. I va randza nguvhu van’wani niku contlhe cikhati i hlota tindlela ta ku va vhuna. A ngo ku zvi kota ku sangula mabhulo hi citshuketi kuchumayeleni. Wa vhuna vanhu vo tala a ku tiva Jehovha a ku patsa ni lava va holileko a ku vhuxa wunghana gabye na Jehovha. Linda cinyikiwo co hlawuleka leci Jehovha a ndzi nyikileko! Laha hi yako khosahala, ha va bonga nguvhu a vaswa lava va hi vhunako hi tindlela to hambanahambana. — Mar. 10:29, 30.

Laha ndzi ehleketako hi malembe lawa ya 80 ma hundzileko ndzo bonga basi. Ndza yima ni mutsali wa Tisimu, loyi a nga tsala aku: “O Nungungulu, u ndzi gondzisile kusukela wusweni ga mina, kala lezvi ndza ha hlawutela a mitiro ya wena yo hlamalisa.” (Lis. 71:17) Ndzi ti yimisele ku simama ndzi maha lezvo wutomini ga mina gontlhe.