Ti karatele a ku chava Nungungulu — Obhadhiya

Obhadhiya i wa hi muwoneleli wa yindlu ya hosi yo biha Ahabhi, a mufumeli loyi a nga vhumelela ku a wukhozeli go biha ga Bhaali gi tata tiko ga Izrayeli. Hambulezvo, Obhadhiya i no gondza a ku chava Jehovha kusukela ‘wun’wananeni gakwe’. (1 Tih. 18:1-13) Hikwalaho, a cikhati leci Muzindza Jezebheli a nga laya lezvaku ku dawa a vaphrofeti vontlhe va Jehovha, Obhadhiya i no wona lezvaku i wa fanele ku tiya hlanha a va vhikela ka khombo lego. A ku fihla muphrofeti mun’we basi zvi wa hi ni mhango nguvhu; hambulezvo, Obhadhiya i no fihla a 100 wa vona a tlhela a va nyika zvakuga ndzeni ka cikhati leci ku nga hi ni ndlala ya hombe! Hi nga alakanyela lezvi zvi nga mu karatelisa zvona a ku a nga poliwi hi vaphrofeti lava van’wani vo tala va nga tirela hosi ni muzindza. — 1 Tih. 18:19.

Hi gondza yini ka wanuna loyi wo chava Nungungulu? Hambu lezvi Obhadhiya a nga chava Ahabhi, i wa chava nguvhu Nungungulu. A kuchava Jehovha ku mu nyikile hlanha wa ku veka wutomi gakwe mhangweni kasi ku vhikela a vamakabye vakwe. Loku a wukhozeli ga lisine gi betelwa lomu hi tshamako kona, hi fanele ku gondza ku chava Jehovha kasi hi tiya hlanha. A kuchava Jehovha ku ta hi nyika ntamu wa ku seketela vamakabye va hina lava va xanisiwako.