Zviwutiso zva vagondzi

Hi rini a matiko ma to huwelela ku “ku rulile, a matiko ma etlele”?

Kota lezvi hi zvi wonileko ka “Zviwutiso zva vagondzi” zvi humesilweko ka A Murindzelia wa zvezvanyana, na ku nga hi kale Jehovha i ta chela “maalakanyo” yakwe timbilwini ta “10 wa timhondzo” (ku nga mifumo yontlhe ya politika) lezvi zvi wulako ku yi ta nyikela ntamu ni wuhosi ga yona ka “civandza co pswhuka” — ku nga Nações Unidas. A civandza leco ci vitaniwa kambe ku “cifananiso ca civandza”. (Kuv. 13:14, 15; 17:3, 16, 17) Andzhako ka lezvo, a “10 wa timhondzo” zvin’we ni civandza leci ci to ngha ca ha hi ku amukela ntamu zvi ta fuvisa wukhongeli ga mawunwa misaveni yontlhe. A ku a matiko ma ta huwelela ku “ku rulile, a matiko ma etlele”b mahlweni kutani andzhako ka ku loviswa ka wukhongeli ga mawunwa? — 1 Tes. 5:3.

Hi ku tsema, a hi zvi tivi hi kukongoma a ku hi rini ku to huwelelwa lezvaku “ku rulile, a matiko ma etlele”. Loku hi wa zvi tiva zvontlhe lezvi zvi to mahekisa zvona, zvi wa nga ta lava ku hi tshama na hi ma vhulile. Hambulezvo, hi ku phindaphinda, Jesu i byelile valandzeli vakwe lezvaku va ‘tshama na va rindzele’. (Mat. 24:42; 25:13; 26:41) A hi kambisiseni khwatsanyana a ciphrofeto ci pimiselweko leci mupostoli Pawule a tsalileko ka papilo gakwe ka va le Tesalonika.

Pawule i tsalile lezvi: “Laha va to ngha vaku: ‘Ku rulile, a matiko ma etlele!’ zvalezvo a kuloviswa kabye ku ta va chikelela hi citshuketi”. (1 Tes. 5:2, 3) A mabhuku ya hina ma tala ku tlhamusela a magezu ya Pawule hi ndlela leyi: A magezu lawa yaku “ku rulile, a matiko ma etlele” ma ta huwelelwa na ku kiyela kutsongwani kasi ku sangula a kuxaniseka ka hombe, loku ku to sangula hi kuloviswa ka Bhabhuloni wa Hombe, ku nga mufumo wa misava yontlhe wa wukhongeli ga mawunwa. A kuhuwelelwa loko ku wuliwa ku ku tava cikombiso co gumesa ca lezvaku a kuxaniseka ka hombe ku lava ku sangula.

Hambulezvo, andzhako ka ku hlolisisa khwatsi a mhaka leyi, zvi wonekisa ku khwatsi ku ngava ni mazwisisela man’wani. Kuzvilava a magezu yaku “ku rulile, a matiko ma etlele” ma ta huwelelwa andzhako ka kulovisiwa ka wukhongeli ga mawunwa. Hikuyini hi wulako lezvo? Ehleketa hi zviwutiso zvi landzelako.

A wukhongeli ga mawunwa gi patsekisa kuyini ka tiyimpi ta matiko? A Bhibhiliya gi wula lezvi: “Ku kumilwe ka yena [“mamani wa zvibhayi” kutani Bhabhuloni wa hombe] a nkhata wa . . . vontlhe lava va delweko laha misaveni”. (Kuv. 17:1, 5; 18:24) Matin’wini ya vanhu, a mamani wa zvibhayi i kari a vhuvhumisa tiyimpi cikari ka matiko niku a kutala ka zvikhati hi yena a vhuvhumisako tihanyi ni ku dawa ka timiliyoni ta vanhu. Hikwalaho, a wukhongeli ga mawunwa hi gona gi mahako lezvaku kuva ni tiyimpi ni tihanyi, ku ngavi ni kurula. Lezvo zvi vhuxa a ciwutiso leci: A ku a matiko ma ta huwelela ku “ku rulile, a matiko ma etlele” ntsena andzhako ka kuva ma lovisile Bhabhuloni wa Hombe? Zva koteka, kanilezvi a hi nge wuli hi kutiya.

Zvini zvi to humelela hi kulandzela andzhako ka kuhuwelelwa ka magezu yaku “ku rulile, a matiko ma etlele”? Pawule i te: “Zvalezvo a kuloviswa kabye ku ta va chikelela hi citshuketi”. (1 Tes. 5:3) A nota ya cigondzo laha ka vhesi legi yi wula lezvi: “Laha, Pawule i komba ku ku tava ni cikhati citsongwani kutani ci nga tava kona futsi cikari ka kuhuwelelwa ka magezu yaku “ku rulile, a matiko ma etlele” ni kuloviswa loku ku to chikelela lava va huwelelako a magezu lawo. Va ta lovisiwa hi citshuketi niku va nga ta pona.” Loku ku hi ku a matiko ma ta huwelela ku “ku rulile, a matiko ma etlele” mahlweni ka kuloviswa ka wukhongeli ga mawunwa, a ku sangula ku wa ta laveka cikhati kasi a wukhongeli ga mawunwa gi lovisiwa, ku gumesa ku landzela kulovisiwa ka matiko lawo. Kanilezvi kota lezvi Pawule a wulako ku “zvalezvo” a matiko ma ta lovisiwa hi “citshuketi”, zva koteka ku a matiko ma huwelela ku “ku rulile, a matiko ma etlele” andzhako ka loku ma lovisile a wukhongeli ga mawunwa.

Zvini lezvi a vanhu va Jehovha va to maha laha va to wona zvilo lezvi? Pawule i te: “Vamakabye, a mu lomu munyameni ko kala a siku lego gi mu juma a ku fana ni lezvi a kuwonekela ku jumako khamba”. (1 Tes. 5:4) Ehleketa hi lezvi: Loku ku hi ku a kuhuwelelwa ka magezu “ku rulile, a matiko ma etlele” ku ta maheka andzhako ka ku lovisiwa ka wukhongeli ga mawunwa, a vanhu va Jehovha va ta zvi tiva lezvaku a kulovisiwa ka matiko ku laha kusuhani nguvhu. A kuhambana ni lezvo, a matiko lawa ma to huwelela ku “ku rulile, a matiko ma etlele” ma ta tizwa ma hi kuruleni niku ma ta ngha ma nga rindzeli ku lovisiwa. Hikwalaho, a kulovisiwa ka wona ku ta tisa ku khwatsi i khamba — hi citshuketi na ma nga zvi rindzelangi.

Zvini hi nga zvi rindzelako? Zvezvanyana, a “10 wa timhondzo” ni “civandza co pswhuka” zvi ta lovisa a wukhongeli ga mawunwa. Lawo ma tava masangulo ya kuxaniseka ka hombe. Ha zvi tiva ku hi cikhati cokari, a matiko ma ta huwelela lezvaku “ku rulile, a matiko ma etlele”. Zvi ta maheka rini lezvo? Hi wulawulile hi zvikhati zvimbiri kuzvilava zvi to maheka hi zvona. Co sangula: A magezu lawo ma ta huwelelwa mahlweni ka ku lovisiwa ka wukhongeli ga mawunwa. Ca wumbiri: A kuhuwelelwa ka magezu lawo ku ta maheka andzhako ka kuva a mifumo ya politika yi lovisile Bhabhuloni wa Hombe hi kumbhelela. Zvi ta lava ku hi rindzela kasi hi wona lezvi zvi to maheka. A kutala ka zvikhati a zviphrofeto zva Bhibhiliya zvi zwisiseka khwatsi loku zvi kari zvi tatiseka kutani andzhako ka loku zvi tatisekile. — Fananisa na Johani 12:16.

Kanilezvi leci ci nga ca lisima nguvhu ka hina a hi cikhati leci ku to huwelelwa hi cona lezvaku “ku rulile, a matiko ma etlele” kanilezvi kuva hi simama hi tsumbekile ka Nungungulu. Hi fanele ku ‘tshama na hi khindlimukile, hi hi ni kupima ku nene’ kasi hi tshama na hi longile na ku nga khataliseki lezvi a zvilo zvi to mahekisa zvona. — 1 Tes. 5:6.