13-19 KA ABRIL WA 2026
LISIMU 52 Kutinyikela ka Jehovha
Wa zvi zwisisa ku a kubhabhatiswa ka wena ku wula yini?
‘Mahani vapizani . . . , mu va bhabhatisa’. — MAT. 28:19.
LEZVI HI TO GONDZA
Hi ta wona ku zvi wula yini a ku bhabhatiswa, hikuyini ku nga ka lisima niku zvini zvi patsekako.
1. Cini ci kombako ku a kubhabhatisa i gondzo ya lisima ya Bhibhiliya?
A HO ku tsaka a cikhati leci ku bhabhatiswako a vapizani vaswa. U wa zvi tiva ku a litsako lelo li fana ni leli a maKristu yo sangula ma nga lizwa a cikhati leci ma nga wona a vanhu vo tala na va bhabhatiswa hi Pentekosta wa 33 Nguveni ya Hina? Ka cikhati leco, mupostoli Pedro i vekile kanelo a tlhamusela lezvaku zva lisima a ku bhabhatiswa. (Miti. 2:38, 40, 41) Mupostoli Pawule i tsalile ku a “zvigondzo zvo sangula xungetano hi Kristu” zvi patsa a “gondzo ya kubhabhatisa”. (Mah. 6:1, 2) Hambu lezvi a kubhabhatisa ku nga wonekisako ku khwatsi i gondzo-tshinya ya Bhibhiliya, hi fanele ku ku zwisisa khwatsi. Hikuyini?
2. Hikuyini hi faneleko ku yi zwisisa khwatsi a gondzo ya Bhibhiliya ya kubhabhatisa?
2 A ku khwatsi hi lezvi a ciseketelo co tiya ci nga mahako ku a yindlu yi tiya, a ku zwisisa khwatsi lezvi a kubhabhatisa ku wulako zvona ku nga hi vhuna ku hiva ni kukholwa ko tiya. Kani hi lomu ka ku kula hi tlhelo ga moya kasi hi bhabhatiswa kutani hi na ni malembe na hi bhabhatisilwe, hi fanele ku yi zwisisa khwatsi a gondzo leyi. Hikwalaho, ka ndzima leyi, hi ta hlamula a zviwutiso lezvi: Zvi wula yini a kubhabhatisa? Kasi a munhu ava muKristu, i fanele ku bhabhatisiswa kuyini? Kona hikuyini hi bhabhatiswako hi vito ga Papayi, ni ga N’wana, ni ga moya wo basa?
LEZVI A KUBHABHATISWA KA WENA KU WULAKO ZVONA
3. A cikhati leci a munhu a bhabhatiswako i komba yini?
3 A cikhati leci a munhu a bhabhatiswako i komba kubaseni lezvaku i vhumele a lisine xungetano hi Jehovha Nungungulu na Kristu Jesu, niku i ti solile ka zviwonho zvakwe a cica wutomi gakwe kasi a tirela Jehovha, niku wa vhumela ku Jesu hi yena a tirisiwako hi Nungungulu kasi hi hanyiswa, niku i tsumbisile Nungungulu hi mukhongelo lezvaku i lava ku maha kurandza Kakwe na a hi zvin’we ni hlengeletano Yakwe. Neti a maha citsumbiso leco kutani ku ti nyikela a tlhela a bhabhatiswa, i sangula ku famba hi ndlela yi yisako wutomini ga pindzukelwa.
4. A ku petiwa miri wontlhe lomu matini zvi yimela yini? (Wona ni mufota.)
4 A cikhati leci u bhabhatiswako, u petiwa miri wa wena wontlhe lomu matini u gumesa u humesiwa.a Lezvo zvi fananisiwa ni loku a munhu afa a lahliwa a gumesa a vhuxiwa. (Fananisa na Va Le Kolosi 2:12.) A kubhabhatiswa cikombiso ca ku u cicile zvahombe wutomini ga wena. Hi ndlela muni? A cikhati leci u pelako matini, u komba lezvaku u fularele a mahanyela ya wena ya kale. Niku a cikhati leci u humako matini, u sangula wutomi giswa gi seketelwako ka ku maha kurandza ka Nungungulu.
A cikhati leci u bhabhatiswako, u tsika a mahanyela ya wena ya kale u sangula wutomi giswa gi khegelako ka ku maha kurandza ka Nungungulu (Wona paragrafo 4)
5. Lezvi u mahako kasi u ti longisela a ku u ringanelwa hi ku bhabhatiswa zvi fanisa kuyini ni ntiro lowu Nowa a wu mahileko wa ku aka taru? (1 Pedro 3:18-21)
5 Lera 1 Pedro 3:18-21. Hi nga fananisa lezvi u zvi mahako kasi u ringanelwa hi ku bhabhatiswa ni ntiro lowu Nowa a wu mahileko kasi a aka taru. Loku ku hi ku wo ho sangula a ku gondza hi Jehovha, u nga tshuka u zvi wonisa ku khwatsi lezvi zvi lavekako kasi u ringanelwa hi ku bhabhatiswa zva karata a ku fana ni ntiro wa hombe wa ku aka taru ga Nowa. A ku hakunene a kutikarata loko ka laveka? Ina. Hikuyini hi wulako lezvo? Ehleketa hi cikombiso ca Nowa. Nungungulu i byelile Nowa lezvi a nga fanele ku gi akisa zvona taru niku Nowa i landzele hi kumbhelela a zvileletelo lezvo kasi a pona ndambi. Hi kukholwa ni ku vhuniwa hi Nungungulu, Nowa i no ingisa a aka taru. A ku fana na Nowa, wenawu u nga zvi kota a ku ‘maha zvontlhe lezvi Nungungulu a leleteleko’. — Gen. 6:22.
6. A kubhabhatisa ku ku ponisisa kuyini?
6 Ka vhesi 21, mupostoli Pedro i tsalile lezvaku a kubhabhatisa “ka mu ponisa”. Lisine ku a ku petiwa lomu matini ha koce a ku ponisi ne a ku hlazvi a zviwonho zva wena hi ndlela yo kari. Ntsena a nkhata wa Jesu hi wona wu nga ku basisako ka ciwonho. (1 Joh. 1:7) Hambulezvo, a ku bhabhatiswa zva lisima nguvhu hakuva Jehovha i leletele lezvaku hi bhabhatiswa niku loku hi maha lezvo hi ndlela yo kari ho “kombela a livhalo li nene ka Nungungulu”. Jehovha i ta tsaka hi ku ku nyika lezvi u kombelako. Hi ndlela leyo, a kubhabhatisa “ka [ku] ponisa” kutani ka ku yisa kuhanyisweni.
A MUNHU I FANELE KU BHABHATISISWA KUYINI KASI A MAHA MUKRISTU?
7. Zvileletelo muni lezvi a Bhibhiliya gi nyikako xungetano hi kubhabhatisa?
7 A Bhibhiliya gi wula lezvaku a cikhati leci a munhu a bhabhatiswako i fanele ku petiwa a miri wakwe wontlhe lomu matini, kanilezvi a gi wuli zvotala xungetano hi lezvi a munhu a faneleko ku bhabhatisiswa zvona. Kanilezvi ga hi vhuna ku tiva lezvi zvi faneleko ku mahiwa laha a munhu a bhabhatiswako. Hi cikombiso, a matshinya ya milayo ya Bhibhiliya ma vhuna lava va yako kubhabhatisweni a ku tiva lezvi va faneleko ku bohisa zvona ma tlhela ma vhuna lava va cuwukelako a ku tiva lezvi va faneleko ku ti khomisa zvona. (1 Kor. 14:40; 1 Tim. 2:9) Masikwini ya hina, hi tolovelo i dhota gi bhabhatisako niku hi ti wonela ku nga va kombisi cichavo co hundzelela lava va nga ni thomo legi. (1 Kor. 1:14, 15) Kani a ku bhabhatisa loko ku woniwa hi vanhu vo tala kutani ahihi, ka tira. — Miti. 8:36.
8. Zviwutiso muni zvi mahiwako lava va yako kubhabhatisweni niku hikuyini? (Mitiro 2:38-42) (Wona ni mufota.)
8 A Bhibhiliya gi wula lezvaku hi fanele ku “vhumela hi nomu mahlweni ka vanhu kasi [hi] hanyiswa” lezvi zvi wulako ku hi fanele ku huwelela kukholwa ka hina. (Rom. 10:9, 10; wona nota ya cigondzo laha ka ku “declaração pública”.) Zva fanela a ku hi maha lezvo a cikhati leci hi bhabhatiswako hakuva a cimaho leco ca lisima nguvhu kasi hi hanyiswa! Hi cigelo leco, lava va yako kubhabhatisweni va mahiwa zviwutiso zvimbiri. A co sangula hi leci: “U ti solile zviwonhweni zva wena, u ti nyikela ka Jehovha u tlhela u vhumela lezvaku i hanyisa ha Jesu Kristu ke?” A ciwutiso leci ci yisa kupima ka lezvi a munhu a nga ti longiselisa zvona kasi a ringanelwa hi ku bhabhatiswa niku ca yelana ni lezvi Pedro a nga kuca a citshungu a ku ci maha hi Pentekosta. A ca wumbiri hi leci: “Wa zvi zwisisa lezvaku a kubhabhatiswa ka wena ku ku tivekisa kota Kustumunyu wa Jehovha a hlengelako ni hlengeletano ya Jehovha ke?” A ciwutiso leci ci hi alakanyisa ku hi fanele ku hanya hi kuyelana ni kutinyikela ka hina hi ku landzela zvileletelo hi nyikiwako hi hlengeletano ya Jehovha ni ku mu tirela na hi hi zvin’we ni maKristu-kulori a ku fana ni lezvi a vapizani va zana ga malembe go sangula va mahileko. (Lera Mitiro 2:38-42.) Lava va hlamulako a zviwutiso lezvi zva zvimbiri hi mbilu yontlhe vaku ina va ringanelwa hi ku bhabhatiswa.
A kubhabhatiswa ka wena ku patsa a ku “vhumela hi nomu mahlweni ka vanhu kasi [u] hanyiswa” (Wona paragrafo 8)d
9. Zvini lezvi hontlheni hi faneleko ku maha kasi hi tsakelwa hi Nungungulu?
9 Hambu ka cikhati leci u nga kala u nga se sangula ku gondza Bhibhiliya, kuzvilava u wa hanya hi ndlela ya yinene niku a wu tshukangi u maha zviwonho zva hombe. Kutani kuzvilava u wundlilwe hi vapswali va nga maKristu lava va nga ku vhuna ku u randza Jehovha. Loku zvi hi lezvo, a ku zva ha lava ku u ti sola u tlhela u bhabhatiswa kasi u tsakelwa hi Nungungulu? Ina. Kani hi wundlisilwe kuyini, hontlheni hi fanele ku vhumela ku hi pswalilwe ni ciwonho leci ci hi hambanisileko na Nungungulu. (Lis. 51:5) Hambulezvo, laha hi yako hi tiva Jehovha hi hlawula ku rangisa a kurandza kakwe. Andzhako ka ku maha lezvo, hi nga ti sola ka mahanyela ya hina ya kale hi tlhela hi hundzuluka — hi sangula ku hanya wutomi gi tsakisako a Papayi wa hina wa le tilweni. Makunu hi nga bhabhatiswa. — Miti. 3:19.
10. Zvini lezvi u faneleko ku maha loku ku hi ku u wa bhabhatisilwe ka gin’wani wukhongeli?
10 Hambu loku ku hi ku u wa bhabhatisilwe ka gin’wani wukhongeli zva ha lava ku u bhabhatiswa kasi uva Kustumunyu wa Jehovha. Hikuyini? Hakuva ka cikhati leco, u wa nga li zwisisi hi kumbhelela a lisine xungetano hi Jehovha na Jesu. Niku hambu loku ku hi ku u wa ti nyikele ka Nungungulu hi mukhongelo, a citsumbiso ca wena ci wa nga seketelwi ka ku zwisisa ka lisine xungetano hi kurandza kakwe. A cikhati leci mupostoli Pawule a nga kumana ni vanhu vo kari le Efesusi va nga sina va bhabhatisilwe na va nga hi na wutivi gi ringanako ku va bhabhatiswa, i no maha malulamiselo ya ku va bhabhatiswa kambe.b (Miti. 19:1-5) Hi kufanana nyamutlha, Jehovha i amukela a kubhabhatiswa ka munhu loku a munhu loye a hi ni wutivi ga lisine xungetano hi kurandza Kakwe.
“HI VITO GA PAPAYI NI GA N’WANA NI GA MOYA WO BASA”
11. Zvi wula yini a ku bhabhatiswa “hi vito ga Papayi ni ga N’wana ni ga moya wo basa”? (Matewu 28:18-20)
11 Jesu i layile lezvaku a vapizani vaswa va fanele ku bhabhatiswa “hi vito ga Papayi ni ga N’wana ni ga moya wo basa”. (Lera Matewu 28:18-20.) I wa lava ku wula yini? A kutala ka zvikhati lomu ka Bhibhiliya a gezu “vito” gi wula wumunhu ga wokari. Ka zvikhati zvin’wani gi nga wula cikhundla ni wuhosi legi a munhu loye a nga nago. Hikwalaho, loku hi maha zvilo “hi vito ga” munhu wo kari kutani nchumu wo kari hi kombisa ku ha vhumela a cikhundla ci yimelwako hi munhu loye kutani nchumu. (Fananisa na Matewu 10:41; wona nota ya cigondzo laha ka ku “por ele ser um profeta”.) Wona lezvi u nga kombisako zvona ku wa vhumela a cikhundla ni wuhosi ga Papayi, ni ga N’wana zvin’we ni ntiro wa moya wo basa wa Nungungulu.
12. Hi bhabhatiswa hi vito ga Papayi hi ndlela muni? (Kuvhululelwa 4:11) (Wona ni mufota.)
12 Hi vito ga Papayi. Ha vhumela ku Jehovha i Papayi wa hina wa le tilweni, kutani Munyiki wa wutomi. Hi yena Nungungulu wa ntamu wontlhe, a Muvangi wa zvilo zvontlhe. (Lera Kuvhululelwa 4:11.) Ha vhumela kambe lezvaku hi yena a Muzwi wa mikhongelo niku hi tirisa a vito gakwe hi kutlhatlheka kanilezvi hi ndlela ya cichavo a cikhati leci hi khongelako kakwe ni ku wulawula hi yena ni van’wani. (Lis. 65:2) Hambulezvo, a ku bhabhatiswa hi vito ga Papayi zvi patsa zvotala. Lava va ngazwa a kanelo ya Pedro hi Pentekosta va wa sina va tiva zvokari hi Jehovha, kanilezvi va wa fanele ku zwisisa ku Jehovha i nyika a wutomi ga pindzukelwa ntsena hi ku tirisa Jesu Kristu. — Rom. 5:8.
Andzhako ka kuva u bhabhatisilwe, simama ku vhumela a cikhundla ni wuhosi ga Papayi (Wona paragrafo 12)
13. Hi bhabhatiswa hi vito ga N’wana hi ndlela muni? (Wona ni mufota.)
13 Hi vito ga N’wana. Ha vhumela ku Jesu i N’wana a pswalilweko yece wa Nungungulu. Jesu i “ndlela”, lezvi zvi wulako ku zvi koteka ha yena ntsena a ku hiva ni wunghana ga ginene na Jehovha. (Joh. 14:6) Jesu Mutlhatlhisi wa hina kambe, loyi a nga hi fela kasi hi kuma wutomi. A ku tiva lezvo zvi hi kuca ku landzela cikombiso cakwe siku ni siku wutomini ga hina, na ku nga hi ka siku legi hi bhabhatiswako hi gona basi. (1 Joh. 2:6) Hikwalaho, a ku fana na Jesu hi chumayela hi kuhiseka niku a hi tsiki nchumu wu hi vhalela ku maha lezvo. (Luka 4:43) A cin’wani kambe, hi ti yimisela ku timisela tixanisa hi kota ya ku tirela Nungungulu hi kutsumbeka. (2 Tim. 3:12) Ha kombisa cichavo hi Jesu kota “hloko ya bandla”, hikwalaho, ha ti koramisa hi mbilu yontlhe ka lava a va yimisileko kasi ku rangela ni ku khatalela a valandzeli vakwe. — Efe. 4:8, 11, 12; 5:23.
Andzhako ka kuva u bhabhatisilwe, simama ku vhumela a cikhundla ni wuhosi ga N’wana (Wona paragrafo 13)
14. a) Hi bhabhatiswa hi vito ga moya wo basa hi ndlela muni? (Wona ni mufota.) b) Hi kwihi kubhabhatiswa kun’wani loku a vatotilweko va bhabhatiswako hi kona? (Wona kwadru: “Kubhabhatiswa loku a vatotilweko va bhabhatiswako hi kona.“)
14 Hi vito ga moya wo basa. Ha vhumela lisine xungetano hi moya wo basa. A moya wo basa a hi munhu ne a wu mahi cipandze ca vanhu vanharu kwalaha ka kun’we, kanilezvi i ntamu lowu Nungungulu a wu tirisako. Ha kholwa ku a moya wo basa wu rangele a vaphrofeti ni vatsali va Bhibhiliya, hikwalaho hi lera Bhibhiliya hi kukhandzakanya hi tlhela hi hanya hi tigondzo ta gona. (2 Ped. 1:20, 21) Niku ha potsa ku maha zviwonho zva hombe, hakuva a ku maha lezvo a zvi vhaleli basi ku a moya wo basa wu tira ka hina kanilezvi zvi tlhela zvi maha ku wu nga tiri khwatsi lomu bandleni gontlhe. — Efe. 4:30.
Andzhako ka kuva u bhabhatisilwe, simama ku vhumela a ntiro wa moya wo basa (Wona paragrafo 14)
15. Zvini u faneleko ku ti yimisela ku maha?
15 Loku u hi muKristu a bhabhatisilweko, ti yimisele ku zwisisa zvipandze zvontlhe zva “gondzo ya kubhabhatisa” ni ku hanya hi lezvi u nga tsumbisa Jehovha a cikhati leci u nga ti nyikela u tlhela u bhabhatiswa.c Kanilezvi, ahati loku u nga se bhabhatiswa kota muKristu? A ku ci kona ci ku vhalelako? A ndzima yi landzelako yi ta tlhamusela ku zvini u nga mahako kasi u ringanelwa hi ku bhabhatiswa.
LISIMU 161 Ndza tsaka hi ku maha kurandza ka wena
a A gezu ga ciGreki gaku ba’pti-sma, gi hundzuluselwako giku “kubhabhatisa,” gi wula “ku peta,” kutani “ku nyupeta.” Hikwalaho, a ku bhabhatisa zvi wula ku peta a miri wontlhe wa munhu lomu matini, na ku nga hi ku mu n’watsekela matana a ku khwatsi hi lezvi a wukhongeli go kari gi gondzisako.
b A vanhu lavo va le Efesusi va wa bhabhatisilwe hi “kubhabhatisa ka Johani.” (Miti. 19:3) Johani Mubhabhatisi i kucile vaJudha lezvaku va ti sola ka zviwonho zvabye zvi nga koniwa hi Nayo wa Mosi niku Johani i no bhabhatisa lava va nga ti sola. (Mar. 1:4, 5) Kanilezvi, a cikhati leci a Nayo wa Mosi wu nga nyima ku tira Jehovha i no sangula ku nga ha amukeli a kubhabhatisa ka Johani. Kusukela ka cikhati leco zviya mahlweni, Nungungulu i amukela a “kubhabhatisa kun’we” ntsena loku ku yisako kuhanyisweni. — Efe. 4:5.
c Wona ndzima yi nge: “O que é o batismo?” yi nga ka jw.org ni ka JW Library® ka cipandze “Perguntas Bíblicas Respondidas.”
d TLHAMUSELO WA MUFOTA: Vanhu va lavako ku bhabhatiswa va nga ka mutlhangano wa cipandze, va yimileko kasi va kombisa kukholwa kabye hi ku vhumela hi nomu mahlweni ka vanhu.