Tiya hlanha u tlhela u tsumbeka — Bhenaya

Bhenaya i wa hi musochwa wo tiya hlanha wa butho ga Dhavhidha niku hi ndzhako ka cikhati i tirile ka butho ga Solomoni. Bhenaya i wa hi n’wana wa mupristi. A vapristi ni vaLevhi wa va ngalwi tiyimpi kutani ku tirisa matlhari. Kanilezvi, Bhenaya i lwile a tiyimpi ta Jehovha a tlhela a kombisa kutiya-hlanha ka hombe. Hi cikombiso, i no daya a nghala lomu hloweni ya mati a tlhela a daya zvihotlovila zvimbiri zvi nga hi ni matlhari. Dhavhidha i no mu tsumba nguvhu Bhenaya laha ka kuza a mu yimisa kota murangeli wa vagadhi vakwe. — 2 Sam. 23:20-23.

A cikhati leci Absalome na Adhonija va nga hluwukela Dhavhidha, Bhenaya i no simama a tsumbekile kakwe. (2 Sam. 8:18; 15:18; 1 Tih. 1:8) Laha makunu Dhavhidha a nga khosahele, Bhenaya i tlhelile a seketela Solomoni a cikhati leci a nga yimisiwa kota hosi. (1 Tih. 1:32-40) Kunene, Bhenaya i no tsumbeka ka Jehovha ni ka vatotilweko Vakwe hambu a cikhati leci a van’wani va nga kala kutsumbeka.

Hinawu zvi lava ku hi tiya hlanha hilwa ni nala wa hina wa hombe Sathani ni lava va mu seketelako. Niku hi fanele ku ti yimisela ku simama hi hanya hi milayo ya Jehovha. (Efe. 6:11; 1 Ped. 5:8, 9) Hambu loku a van’wani va hlawula ku tsika Jehovha, hina hi fanele ku simama hi tsumbeka kakwe na hi tiyiseka lezvaku i ta hi chachazela. — 2 Sam. 22:26.