As na Yumi Nidim Pe Bilong Baim Bek Man

1-2. Wai na yumi nidim wanpela long kisim bek yumi? (Rom 7:​22-24) (Lukim tu piksa.)

PIKSAIM dispela samting long tingting. Wanpela bilding i bruk na pundaun na wanpela man i trap i stap insait long dispela bikpela hip pipia. Em i stap laip yet, tasol em i no inap long rausim em yet long dispela bikpela hip pipia. Samting em i ken mekim em long singaut long kisim helpim na bilip olsem wanpela bai seivim em.

² Yumi olgeta wan wan i stap long wankain hevi olsem. Long wanem rot? Taim Adam i bin sakim tok bilong Krieta bilong em, em i kamap sinman. Na bihain em i givim dispela sin long olgeta pikinini bilong em. Em as na i olsem yumi olgeta manmeri bilong graun i trap i stap insait long dispela bikpela hip pipia em sin, na yumi no inap rausim ol samting nogut em sin i kamapim long yumi. Aposel Pol i stori long samting sin i mekim long yumi long pas em i raitim long ol Rom. (Ritim Rom 7:​22-24.) Em i askim God long kisim bek em long “dispela bodi em bilong i dai.” I olsem Pol i stap insait long trap bilong sin em i kisim long Adam we i bringim man i go long dai na i no gat rot bilong abrusim. (Rom 6:23) Yumi tu i stap insait long dispela trap bilong sin. Na yumi mas i gat wanpela bilong kisim bek yumi!

3. Long wanem ol rot pe bilong baim bek man inap kisim bek yumi?

³ Pol i no stori tasol long ol samting nogut sin i kamapim, em i stori tu long ol gutpela samting yumi ken bilip na wet long en. Em i askim olsem: “Husat bai kisim bek mi long dispela bodi em bilong i dai?” Na bihain em i bekim dispela askim na i tok: “Mi tenkyu long God long rot bilong Jisas Krais, Bikpela bilong yumi!” (Rom 7:25) Pol i tok long ofa bilong baim bek ol man em Jisas i bin givim.a Long rot bilong dispela pe bilong baim bek man, God inap (1) fogivim ol sin bilong yumi, (2) mekim yumi kamap gutpela olgeta long rot bilong tekewe ol sin bilong yumi, na (3) mekim yumi kamap wanbel wantaim Krieta bilong yumi. Taim yumi skelim ol dispela poin, dispela bai strongim pasin bilong yumi long laikim Jehova em God husat “i as bilong ol gutpela samting yumi bilip na wetim.” (Rom 15:13) Na tu, yumi bai tenkyu tru long Jisas, long wanem, “long rot bilong pe bilong baim bek man . . . em i mekim yumi i kamap fri.”—Kol. 1:14.

PE BILONG BAIM BEK MAN I OPIM ROT LONG GOD I FOGIVIM YUMI

4-5. Wai na yumi olgeta i nidim pe bilong baim bek man? (Eklisiastis 7:20)

⁴ Yumi nidim pe bilong baim bek man na bai God i ken fogivim ol sin bilong yumi. Yumi olgeta i no gutpela tumas, olsem na yumi save mekim sin long toktok na pasin bilong yumi. (Ritim Eklisiastis 7:20.) Sampela sin em ol i bikpela sin. Olsem, pasin adaltri na pasin bilong kilim i dai narapela man em ol bikpela sin we Lo Bilong Moses i tok long ol i mas kilim i dai ol man i mekim ol dispela sin. (Wkp. 20:10; Nam. 35:​30, 31) Tasol planti sin em ol i no bikpela sin tumas, maski i olsem, ol i sin. Olsem, man bilong raitim song em Devit, em i tok: “Mi bai was gut long wokabaut bilong mi na long dispela rot, mi bai no ken mekim sin long toktok bilong mi.” (Sng. 39:1) Yes, sampela taim yumi inap mekim sin long toktok bilong yumi.—Jems 3:2.

⁵ Tingim ol toktok na pasin yu bin mekim long bipo. Olsem wanem? Yu bin mekim sampela tok long ol narapela em bihain yu skelim na pilim olsem i gutpela yu no bin mekim ol dispela tok? Yu bin mekim sampela popaia na bihain yu rigret long en? Sapos olsem, orait yu bai tok yes long dispela tupela askim wantaim. Baibel i tok: “Sapos yumi tok, ‘Yumi no gat sin,’ orait yumi giamanim yumi yet na tok i tru i no stap long yumi.”—1 Jon 1:8.

6-7. Wanem samting i stap olsem as na Jehova inap fogivim ol sin bilong yumi? (Lukim tu piksa.)

⁶ Pe bilong baim bek man i stap olsem as na Jehova inap fogivim ol sin bilong yumi. (Efe. 1:7) Tasol dispela i no makim olsem Jehova i save lukim na lusim tingting tasol long ol sin yumi mekim, i olsem ol sin bilong yumi i no bikpela samting long em, nogat. Long ai bilong Jehova, sin em samting i nogut tru na em i no save amamas taim yumi mekim sin. (Ais. 59:2) Jehova i save mekim stretpela kot, olsem na i mas i gat as bilong em i ken fogivim ol sin bilong yumi.

⁷ Lo Bilong Moses i makim olsem lain Israel i mas givim ol animal olsem ofa bilong karamapim ol sin bilong ol na kamap wanbel wantaim God. (Wkp. 4:​27-31; 17:11) Ol dispela ofa ol i bin mekim bipo i olsem piksa na i makim wanpela ofa i gutpela moa em ofa bilong Jisas na ol gutpela samting dispela ofa i kamapim. Ofa bilong Jisas i stap olsem as na Jehova inap fogivim ol sin bilong yumi. Pol i kliagut long bikpela samting long ofa bilong Jisas, na dispela i stap ples klia long ol tok em i raitim long ol Kristen long Korin. Long pas em i kolim lista bilong ol pasin nogut ol i bin mekim bipo, na bihain em i tokim ol: “God i mekim yupela i kamap klin pinis, na i mekim yupela i kamap holi, na i kolim yupela stretpela man long rot bilong holi spirit bilong em na long nem bilong Bikpela Jisas Krais.”—1 Kor. 6:​9-11.

8. Yu ken tingim wanem samting taim yu redi long i go long Memorial bilong dispela yia?

⁸ Taim yu redi long go long Memorial bilong dispela yia, lusim haptaim long tingim ol gutpela samting i painim yu bikos long pasin bilong Jehova long fogivim yu. Olsem, pe bilong baim bek man i mekim na i no gat wok long yu pilim gilti o bel hevi long ol sin yu bin mekim long bipo em yu tanim bel pinis long en. Tasol olsem wanem sapos yu pilim hatwok long bilip olsem Jehova i fogivim yu? Ating yu tokim yu yet olsem, ‘Mi kliagut olsem Jehova inap fogivim mi, tasol mi no inap long fogivim mi yet.’ Sapos yu pilim olsem, orait tingim dispela: Jehova em Man husat inap fogivim sin bilong yumi olgeta manmeri, na em i givim namba long Pikinini bilong em long mekim wok jas. Jehova i no givim yu o narapela man o meri dispela namba bilong makim olsem God bai marimari long yu o nogat. Baibel i tok: “Sapos yumi wokabaut yet long lait olsem [Jehova] yet i stap long lait, . . . blut bilong Jisas, Pikinini bilong em, i rausim olgeta sin bilong yumi na mekim yumi i kamap klin.” (1 Jon 1:​6, 7) Yumi ken bilip tru long dispela tok Baibel i mekim, wankain olsem yumi bilip long ol narapela tok Baibel i skulim yumi long en. Pe bilong baim bek man i stap olsem as na Jehova inap marimari long yumi, na Baibel i tok em i “redi long fogivim ol sin” bilong yumi.—Sng. 86:5.

PE BILONG BAIM BEK MAN I OPIM ROT LONG GOD I MEKIM YUMI I KAMAP GUTPELA OLGETA

9. Sin inap makim ol pasin nogut na wanem narapela samting? (Buk Song 51:5)

⁹ Long Baibel, dispela tok “sin” i makim pasin nogut, na tu, em i makim samting yumi kisim taim yumi kamap long bel bilong mama. (Ritim Buk Song 51:5.) Dispela sin yumi kisim i save kirapim yumi long mekim rong, na tu, em i mekim na bodi bilong yumi i no gat strong na yumi save kisim sik, go lapun, na dai. Em as na ol bebi em ol i no bin mekim sin, ol inap sik na dai. Na dispela i eksplenim tu risen na ol gutpela man na ol man nogut wantaim i save karim pen na hevi na bihain ol i dai. Yumi olgeta tumbuna pikinini bilong Adam i bin kisim sin long em.

10. Adam na Iv i bin pilim olsem wanem taim ol i mekim sin?

¹⁰ Tingim samting Adam na Iv i bin pilim taim ol i mekim sin na ol i kamap olsem man na meri i no gutpela olgeta. Sin i mekim na long bel ol i pilim nogut tru. Bihain long ol i bikhet, Adam na Iv i kirap long lukim ol samting nogut em pasin bilong brukim lo bilong God i kamapim, em wanpela lo “i stap long bel bilong ol.” (Rom 2:15) Ol i pilim olsem sampela senis i kamap long ol na em i no ol gutpela senis. Ol i pilim sem na ol i luksave olsem ol i mas karamapim sampela hap bilong bodi bilong ol na ol i hait olsem ol kriminal long ai bilong Krieta bilong ol. (Stt. 3:​7, 8) Em fes taim long laip bilong Adam na Iv long pilim gilti, tingting planti, wari long bihain, pilim pen, na pilim sem. Sori tru olsem ol dispela samting ol i pilim long bel em ol bai pilim inap long laip olgeta bilong ol i go inap long ol i dai.—Stt. 3:​16-19.

11. Sin i stap long skin bilong yumi i mekim wanem long yumi?

¹¹ Samting sin i kamapim long yumi i wankain long samting i bin painim namba 1 man na meri. Sin i stap long skin i mekim na yumi save karim ol hevi na bel na tingting bilong yumi i save bagarap. Maski yumi wok strong tru long daunim ol dispela hevi, i gat sampela samting em yumi no inap stretim long strong bilong yumi yet. Wai? Bikos Baibel i tok olsem yumi stap nogut na yumi bilong bagarap tasol. (Rom 8:20) Dispela em tru long yumi wan wan na long olgeta manmeri i stap laip long dispela graun. Olsem, tingim ol hatwok ol man i mekim bilong stretim envairomen, daunim pasin raskol, pinisim pasin bilong stap rabis, na kamapim bel isi namel long ol kantri. Maski ol man i bin mekim planti liklik hatwok na i luk olsem wok i kamap gut, tasol olgeta dispela hatwok bilong ol i lus nating. So olsem wanem pe bilong baim bek man i ken kisim bek yumi long ol samting nogut sin i kamapim?

12. Pe bilong baim bek man inap helpim yumi long wetim wanem gutpela samting i kamap bihain?

¹² Pe bilong baim bek man i helpim yumi long wetim gutpela samting bai kamap bihain, em taim we “olgeta samting God i bin wokim bai lusim dispela kalabus bilong bagarap.” (Rom 8:21) Taim pe bilong baim bek man i mekim yumi i kamap gutpela olgeta long nupela taim God bai kamapim, yumi no inap pilim pen moa long bodi, long bel na tingting, i gat sik bilong tingting, pilim gilti long ol rong yumi bin mekim bipo, tingting planti, wari long wanem samting bai painim yumi bihain, pilim pen, o pilim sem, nogat. Na tu, ol hatwok yumi mekim bilong lukautim graun na stap bel isi wantaim ol narapela bai i no lus nating, ol bai kamapim gutpela samting, long wanem, yumi bai stap aninit long wok bos bilong man husat i bin baim bek yumi em “Prins Bilong Bel Isi,” Jisas Krais.—Ais. 9:​6, 7.

13. Wanem narapela samting yu ken tingim taim yu redi long go long Memorial bilong dispela yia?

¹³ Tingim laip bai olsem wanem taim yu kamap gutpela olgeta na yu no gat sin moa. Piksaim long tingting olsem yu kirap long olgeta moning na yu pilim nais tru, na long olgeta de yu no pret olsem yu yet o ol famili o ol pren bilong yu bai stap hangre, sik, o dai. Long nau tu, yu ken stap bel isi taim yu “holim strong . . . dispela samting yumi bilip na wet long en i stap olsem anka bilong laip bilong yumi. Em i stap strong na i no inap surik liklik.” (Hib. 6:​18, 19) Wankain olsem wanpela anka i save holim bot i stap stret long ples bilong en, ol gutpela samting yumi bilip na wetim bai kamap bihain inap strongim bilip bilong yumi na helpim yumi long stap strong na karim wanem ol hevi i painim yu. Tru tumas, yu ken bilip tru olsem Jehova “i save givim gutpela pe long ol man i wok strong long painim em.” (Hib. 11:6) Pe bilong baim bek man tasol i opim rot long yu inap stap belgut long nau na wetim ol gutpela samting i kamap bihain.

PE BILONG BAIM BEK MAN I OPIM ROT LONG YUMI KAMAP WANBEL WANTAIM GOD

14. Sin i mekim wanem long pasin pren bilong yumi wantaim Krieta, na bilong wanem?

¹⁴ Kirap long taim Adam na Iv i bin mekim sin, olgeta manmeri i stap longwe long God. Baibel i tok tu olsem ol manmeri i stap olsem birua bilong Krieta. (Rom 8:​7, 8; Kol. 1:21) Bilong wanem? Long wanem, Jehova em Man bilong mekim stretpela pasin na em i no inap orait liklik long sin. Baibel i tok long Jehova olsem: “Ai bilong yu i klin tumas long lukim samting nogut, na yu no save laikim pasin nogut.” (Hab. 1:13) Sin i mekim na yumi ol man i stap longwe long God. I no gat wanpela bilong yumi inap pas gut wantaim Jehova, inap long em yet i mekim samting bilong helpim yumi long kamap wanbel wantaim em. Pe bilong baim bek man tasol i opim rot long yumi inap kamap wanbel wantaim God.

15. Olsem wanem pe bilong baim bek man i opim rot long yumi inap pas gut gen wantaim Jehova?

¹⁵ Baibel i tok olsem Jisas “em i wanpela sakrifais i mekim yumi i kamap wanbel wantaim God, na i . . . karamapim ol sin bilong yumi.” (1 Jon 2:2) Tok Grik ol i tanim long hia olsem “sakrifais i mekim yumi i kamap wanbel wantaim God” inap makim tu “amamasim God.” Olsem wanem pe bilong baim bek man i amamasim Jehova? Yumi no ken ting olsem Jehova i amamas long lukim Pikinini bilong em i dai, nogat. Dispela pe bilong baim bek man i amamasim o inapim tru stretpela lo bilong Jehova long mekim stretpela pasin. Nau Em i gat rot long stretim bek pasin pren bilong em wantaim ol manmeri. (Rom 3:​23-26) Na ol manmeri em ol i bin stap gut long God na lotuim em paslain long Krais i bin dai, i stret long God i ken kolim ol stretpela manmeri. (Stt. 15:​1, 6) Long wanem rot God i kolim ol stretpela man? Long rot bilong pe bilong baim bek man em Jehova i bin givim long bihain. Jehova i save tru olsem Pikinini bilong em Jisas bai givim dispela pe bilong baim bek man. (Ais. 46:10) Pe bilong baim bek man i opim rot long ol manmeri inap kamap wanbel wantaim God.

16. Wanem ol narapela samting yu ken tingim taim yu redi long go long Memorial bilong dispela yia? (Lukim tu piksa.)

¹⁶ Tingim ol gutpela samting i painim long yu nau bikos long yu kamap wanbel gen wantaim God. Olsem, nau yu inap kolim Jehova olsem “Papa,” olsem Jisas i bin tok long mekim. (Mat. 6:9) Sampela taim, yu inap kolim Jehova olsem “Pren.” Taim yu kolim Jehova olsem “Papa” o “Pren,” yu mas mekim long pasin rispek na long pasin daun. Bilong wanem? Long wanem, yumi stap yet olsem ol sinman na pasin bilong yumi long pas gut wantaim Jehova i no kamap bikos yumi stretpela man, nogat. Pe bilong baim bek man tasol i opim rot long yumi inap pas gut wantaim Jehova. Long rot bilong Jisas, Jehova “i mekim olgeta arapela samting i kamap wanbel wantaim em yet . . . Dispela pasin wanbel i kamap long rot bilong blut em dispela man i bin kapsaitim long diwai pos.” (Kol. 1:​19, 20) Em as na yumi olgeta inap pas gut wantaim Jehova na long nau tu taim yumi stap yet olsem ol sinman.

PE BILONG BAIM BEK MAN I SOIM PASIN MARIMARI BILONG JEHOVA

17. Olsem wanem pe bilong baim bek man i kamapim klia pasin marimari bilong Jehova? (Efesus 2:​4, 5)

¹⁷ Pe bilong baim bek man i kamapim klia olsem pasin “marimari i pulap tru” long Jehova. “Em i mekim yumi kisim laip . . . maski yumi stap olsem daiman long ol rong bilong yumi.” (Ritim Efesus 2:​4, 5.) Olgeta manmeri “em bel bilong ol i gutpela long kisim laip oltaim” ol i singaut long kisim helpim, long wanem, ol i luksave olsem ol i stap long trap bilong sin wankain olsem man i trap i stap aninit long hip pipia bilong bilding i bin pundaun na i mas i gat wanpela bilong seivim ol. (Apo. 13:48) Jehova i harim singaut bilong ol na helpim ol long rot bilong gutnius bilong Kingdom, na bai ol inap kisim save long em na long Pikinini bilong em Jisas. (Jon 17:3) Sapos Satan i bin ting olsem em i kirapim Adam na Iv long pundaun na nau em i bagarapim pinis samting God i tingting pinis long mekim, orait em i popaia tru.

18. Taim yumi tingim tingim long bel pe bilong baim bek man, wanem narapela samting yumi mas tingim?

¹⁸ Taim yumi tingim tingim long bel ol gutpela samting em pe bilong baim bek man i opim rot long yumi inap kisim, i gat wanpela bikpela samting em yumi mas tingim tu. Yumi no ken ting dispela pe bilong baim bek man em bilong helpim yumi tasol, nogat. Yumi mas tingim olsem Jehova i yusim dispela pe long bekim tok em Satan i bin sutim long em long gaden Iden. (Stt. 3:​1-5, 15) Long rot bilong pe bilong baim bek man, Jehova i mekim holi nem bilong em na em i kamapim klia olsem olgeta tok giaman Satan i bin sutim long em ol i no tru. Na tu, em i yusim dispela pe long kisim bek yumi long sin na dai, na long dispela rot em i kamapim long ples klia olsem em i God bilong pasin laikim. Long bikpela pasin helpim bilong em, Jehova i larim yumi ol man i gat sin i mekim ol samting bilong bekim tok em Satan i bin sutim long em. (Prov. 27:11) So yu ken mekim wanem bilong soim olsem yu tenkyu tru long dispela pe bilong baim bek man? Yumi bai kisim bekim bilong dispela askim long atikol i kamap bihain.