Jehova i Ken Helpim Yu Long Daunim Bel Hevi na Wari

1-2. (a) Sampela taim aposel Pol i pilim olsem wanem? (b) Wai na yumi inap kliagut long ol samting em i pilim? (Rom 7:​21-24)

YU TINGIM wanem samting taim yu harim nem bilong aposel Pol? Ating yu tingim em olsem wanpela misineri i gat strongpela bel, wanpela tisa i save gut long mekim wok, o wanpela man i bin raitim Baibel. I stret long yu tingim em olsem. Tasol Pol em wanpela man bilong pilim tru ol samting long bel. Wankain olsem samting i save painim planti bilong yumi, sampela taim Pol i save pilim hatwok long daunim ol bel hevi na wari bilong em.

² Ritim Rom 7:​21-24. Long pas Pol i raitim i go long ol Rom, em i stori long ol samting em i pilim long bel we planti bilong yumi inap kliagut long en. Maski em i wanpela strongpela Kristen, em i bungim ol hatwok long bel na tingting bilong em. Em i pilim hatwok long mekim laik bilong God na long wankain taim daunim ol laik nogut bilong mekim ol pasin i no stret. Em i bungim ol dispela hatwok, na tu, em i bel hevi long ol samting em i bin mekim long bipo na long wanpela hevi em i karim na i no bin pinis hariap.

3. Yumi bai stori long wanem samting long dispela atikol?

³ Sampela taim Pol i save tingting planti na bel hevi, tasol em i no larim ol dispela samting em i pilim long bela i bosim tingting bilong em. Long dispela atikol, yumi bai stori long ol dispela askim: Wanem samting i mekim na sampela taim Pol i “pilim nogut tru”? Em i mekim wanem bilong daunim bel hevi na wari bilong em? Na yumi ken mekim wanem bilong daunim bel hevi na ol wari bilong yumi?

WANEM SAMTING I MEKIM POL I BEL HEVI NA WARI?

4. Wanem samting i mekim na Pol i bel hevi?

⁴ Ol samting em i bin mekim long bipo. Pol em nem bilong em Sol, paslain long em i kamap Kristen em i bin mekim ol samting we bihain em i bel hevi long en. Olsem, em i orait long ol i stonim Stiven na kilim em i dai na em i lukluk i stap taim ol i mekim olsem. (Apo. 7:58; 8:1) Na tu, Sol i go pas long mekim nogut tru long ol Kristen.—Apo. 8:3; 26:​9-11.

5. Pol i pilim olsem wanem long ol samting em i mekim long bipo?

⁵ Bihain long aposel Pol i kamap wanpela Kristen, inap sampela haptaim em i bel hevi yet long ol samting em i bin mekim long bipo. Insait long ol yia i kam na i go, ating bel bilong em i wok yet long kotim em long ol pasin nogut tru em i bin mekim long ol Kristen. Olsem, taim em i raitim namba 1 pas bilong em i go long ol Korin long 55 C.E. samting, em i tok: “Mi no gutpela man inap long ol i kolim mi wanpela aposel, long wanem, mi bin mekim nogut long kongrigesen bilong God.” (1 Kor. 15:9) Na inap olsem 5-pela yia bihain long em i raitim pas i go long ol Efesus, em i tok long em yet olsem mi “no winim man i liklik tru long ol arapela insait long lain holi.” (Efe. 3:8) Taim Pol i raitim pas i go long Timoti, em i tok long em yet olsem: “Bipo mi bin tok nogut long God na mekim nogut long ol lain bilong em na mi man bilong mekim pasin bikhet.” (1 Tim. 1:13) Piksaim long tingting hau Pol i pilim taim em i go visitim ol kongrigesen na em i bungim ol lain em bipo em i bin mekim nogut tru long ol, o ol wanfamili bilong ol lain em i mekim nogut tru long ol.

6. Wanem narapela samting i mekim na Pol i bel hevi? (Lukim tu futnot.)

⁶ Wanpela nil i sutim skin bilong em. Pol i tok long samting i mekim em i bel hevi tru na dispela i olsem “wanpela nil i sutim skin bilong [em].” (2 Kor. 12:7) Em i no stori long as tru bilong dispela, tasol dispela tok piksa em i yusim i soim olsem ating em i gat wanpela sik, o bel na tingting bilong em i bagarap, o ating narapela samting i mekim na em i pilim pen.b

7. Pol i pilim olsem wanem long ol pasin kranki bilong em? (Rom 7:​18, 19)

⁷ Ol pasin kranki bilong em. Pol i hatwok long daunim ol pasin kranki bilong em. (Ritim Rom 7:​18, 19.) Maski em i laik mekim ol samting i stret, ol pasin kranki bilong em i mekim na em i hatwok long mekim ol samting em i tingting long mekim. Em i bin tokaut olsem oltaim laik bilong em yet i pait wantaim laik bilong God. Maski i olsem, Pol i wok strong tru long bihainim stretpela pasin. (1 Kor. 9:27) Ating em i save bel hevi tru taim em i kirap gen long mekim ol pasin kranki we em i wok strong long lusim!

OL SAMTING POL I MEKIM BILONG DAUNIM BEL HEVI

8. Wanem samting i helpim Pol long daunim ol pasin kranki bilong em?

⁸ Ol pas Pol i raitim i soim olsem em yet na ol wanbilip i kisim helpim long holi spirit bilong God long wok strong na daunim laik bilong mekim ol pasin nogut. (Rom 8:13; Gal. 5:​16, 17) Planti taim Pol i stori long ol pasin nogut na ol laik nogut em ol Kristen i mas wok strong long daunim. (Gal. 5:​19-21, 26) I luk olsem Pol i tingim tingim long bel ol pasin kranki bilong em yet, em i kisim helpim long ol tok bilong Rait Holi, na em i luksave long ol samting em inap mekim bilong daunim ol pasin kranki bilong em. Yumi ken save tru olsem em yet i save bihainim ol edvais em i givim long ol narapela.

9-10. Wanem samting i helpim Pol long daunim bel hevi na wari bilong em? (Efesus 1:7) (Lukim tu piksa.)

⁹ Sampela taim Pol i bel hevi, tasol i gat planti samting i mekim na em i amamas. Olsem, em i amamas taim em i harim ol gutpela ripot i kam long ol wanwok bilong em. (2 Kor. 7:​6, 7) Em i amamas long pasin pren bilong em wantaim ol wanbilip. (2 Tim. 1:4) Na em i save olsem Jehova i amamas long em. Pol i amamas bikos em inap mekim wok bilong God “wantaim klinpela maus bilong bel.” (2 Tim. 1:3) Na maski Pol i stap kalabus long Rom, em i kirapim ol wanbilip bilong em long “amamas oltaim long Bikpela.” (Fili. 4:4) Ol tok bilong em i soim olsem em i no larim ol bel hevi em i pilim i daunim em. Taim tingting kranki i kam insait long tingting bilong Pol, em i wok strong long daunim ol dispela tingting na tingim ol gutpela samting.

¹⁰ Pol inap daunim tu ol bel hevi em i pilim bikos em i bilip olsem pe bilong baim bek man em presen God i givim long em. (Gal. 2:20; ritim Efesus 1:7.) Olsem na em i trastim tru Jehova olsem em inap fogivim em long rot bilong Jisas Krais. (Rom 7:​24, 25) Maski Pol i bin mekim ol rong long bipo na em i gat ol pasin kranki, em inap “mekim wok bilong” God wantaim amamas.—Hib. 9:​12-14.

11. Olsem wanem stori bilong Pol i strongim yumi?

¹¹ Olsem Pol, sampela taim yumi inap pilim olsem laik bilong yumi long mekim stretpela pasin i pait wantaim laik bilong mekim pasin nogut. Ating em ol samting yumi tingting long en, ol samting yumi mekim, o ol tok yumi mekim. Yumi tu inap pilim olsem yumi laik tok, ‘Mi pilim nogut tru!’ Wanpela sista em i gat 26 krismas samting, nem bilong em Elizac, em i stori long ol hatwok em i bungim na em i tok: “Taim mi tingim ol hevi Pol i karim, dispela i strongim mi. Na mi belgut long save olsem i no mi wanpela tasol i pilim olsem. Dispela em narapela rot Jehova i helpim mi long save olsem em i save long ol hevi ol manmeri bilong em i wok long karim.” Olsem Pol, yumi ken mekim wanem na bai maus bilong bel bilong yumi i stap klin na yumi stap amamas maski yumi bel hevi?

SAMTING YUMI KEN MEKIM BILONG DAUNIM BEL HEVI

12. Olsem wanem gutpela sediul bilong mekim ol samting bilong lotu inap helpim yumi long daunim bel hevi?

¹² Bihainim gutpela sediul bilong mekim ol samting bilong lotu. Taim yumi kisim pasin bilong bihainim gutpela sediul bilong mekim ol samting bilong lotu, yumi inap putim tingting long ol gutpela samting. Yumi ken tok dispela i wankain long ol samting yumi mekim bilong lukautim helt bilong yumi. Taim yumi kaikai gut, eksasais planti, na yumi slip gut, yumi save pilim amamas. Olsem tasol, yumi save pilim amamas taim yumi ritim Tok Bilong God long olgeta de, redim ol hap bilong miting, go long miting, insait long bekim tok, na insait long wok autim tok. Ol dispela gutpela wok yumi mekim i save helpim yumi long daunim ol bel hevi na wari bilong yumi.—Rom 12:​11, 12.

13-14. Olsem wanem sampela Kristen i kisim helpim taim ol i bihainim gutpela sediul bilong mekim ol samting bilong lotu?

¹³ Tingim stori bilong John, em i kisim sik kensa taim em i gat 39 krismas. Pastaim, em i hatwok long daunim bel hevi em i pilim. Em i tok: ‘Hau na mi kisim dispela sik taim mi yangpela yet?’ Long dispela taim, pikinini man bilong em i gat 3-pela krismas tasol. Wanem samting i helpim John long daunim bel hevi bilong em? Em i tok: “Maski mi taiet tru, mi wok strong na bai oltaim famili bilong mi i bihainim yet gutpela sediul bilong mekim ol samting bilong lotu. Mipela i save go long olgeta miting, insait long autim tok long olgeta wik, na oltaim mipela i mekim famili lotu maski i hatwok long mekim olsem.” John i tingim i go bek, na em i tok: “Taim yu karim bikpela hevi na yu pilim hatwok tru, pastaim yu inap kirap nogut na bel hevi, tasol mi lainim olsem isi isi long strong na pasin laikim bilong Jehova yu inap karim ol dispela hevi. Jehova inap givim strong long yu, wankain olsem em i bin strongim mi.”

¹⁴ Eliza, em yumi stori pinis long em, em i tok: “Long olgeta taim mi go long miting Kristen na mekim stadi bilong mi yet, dispela i helpim mi long tingim olsem Jehova i save harim ol beten bilong mi na em i laikim mi tru. Na dispela i mekim mi amamas.” Nolan, em wanpela wasman sekit long Afrika, em i stori long em yet na meri bilong em Diane, na em i tok: “Mipela i save bihainim sediul bilong mipela long mekim ol samting bilong lotu, na mipela i save mekim olsem tu long taim mipela i bel hevi. Oltaim Jehova i save kamapim klia long mipela olsem em i helpim mipela long holim stretpela tingting. Mipela i save wok strong long tingim olsem Jehova bai helpim mipela na blesim mipela, na mipela i no save hau em bai mekim olsem, tasol mipela i save em bai mekim.”

15. Yumi inap mekim wanem bilong daunim ol bel hevi na wari bilong yumi? Stori long tok piksa.

¹⁵ Sapos yumi luksave olsem yumi pilim hatwok yet long daunim ol bel hevi na wari bilong yumi, orait dispela i makim olsem i gat sampela samting moa yumi mas mekim. Tingim dispela tok piksa, yu pilim olsem baksait bilong yu i pen. Bilong pinisim dispela pen, ating yu wokabaut long olgeta de, tasol yu mas mekim sampela samting moa. Bilong luksave long wanem samting tru i kamapim dispela pen, ating yu mas mekim sampela wok painimaut, na tu, go lukim wanpela dokta. Olsem tasol, ating yumi mas mekim wok painimaut long Baibel na long ol pablikesen bilong yumi, na tu, toktok long wanpela Kristen i strong long bilip bilong painimaut hau yumi ken daunim ol bel hevi yumi pilim. Skelim sampela moa rot we inap helpim yu long mekim olsem.

16. Wanem samting i ken helpim yu long luksave long ol samting i mekim yu bel hevi na wari? (Buk Song 139:​1-4, 23, 24)

¹⁶ Beten na luksave long ol samting em yu nidim helpim long en. King Devit i save olsem Jehova i save gut long em. Olsem na em i askim Jehova long helpim em long luksave long ol samting i mekim na em i “tingting planti.” (Ritim Buk Song 139:​1-4, 23, 24.) Yu tu i ken askim Jehova long helpim yu long luksave long ol samting i mekim na yu bel hevi na wari na askim em long helpim yu long kliagut long hau yu inap daunim ol dispela hevi. Na tu, yu ken givim kain askim long yu yet olsem: ‘Wanem samting i mekim na mi tingting planti na bel hevi? I gat sampela samting i kirapim mi long bel hevi na wari? Taim mi bel hevi na wari, mi save larim dispela i daunim mi o mi save hariap long rausim long tingting?’

17. Yu ken mekim pesenel stadi long wanem ol topik na dispela i ken helpim yu long putim tingting long ol samting inap strongim yu? (Lukim tu piksa.)

¹⁷ Mekim pesenel Baibel stadi long ol topik em yu nidim helpim long en. Sampela taim, yu inap luksave olsem gutpela samting inap kamap taim yu mekim stadi long ol pasin bilong Jehova. Olsem, aposel Pol i kisim helpim taim em i tingim pe bilong baim bek man na pasin bilong Jehova long lusim rong. Yu ken mekim olsem tu. Yusim Risets Gaid Bilong Ol Witnes Bilong Jehova, Stadi Indeks Bilong Ol Witnes Bilong Jehova, o ol narapela tul i stap long tokples bilong yu long mekim sampela moa wok painimaut long ol topik olsem pasin marimari bilong God, pasin bilong em long lusim rong, na gutpela pasin laikim bilong em. Painim ol atikol we inap helpim yu na mekim wanpela lista bilong ol. Putim dispela lista long hap we yu ken lukim, na mekim stadi long ol atikol i stap long lista taim yu bel hevi na wari. Traim long bihainim ol tok yu ritim long ol samting yu nidim helpim long en.—Fili. 4:8.

18. Wanem sampela stadi projek i bin helpim sampela Kristen?

¹⁸ Eliza, em yumi stori pinis long em, em i mekim pesenel stadi projek bilong em long stori bilong Jop long Baibel. Em i tok: “Mi pilim tru stori bilong Jop. Em i bungim planti hevi. Tasol taim Jop i bel hevi tru, em i wok yet long trastim Jehova, maski em i no save long risen na em i karim ol dispela hevi.” (Jop 42:​1-6) Diane, em yumi stori pinis long em, em i tok: “Mi na man bilong mi i yusim buk Go Klostu Long Jehova long mekim stadi projek bilong mipela. Mipela i amamas olsem Jehova i save stretim yumi wankain olsem man bilong wokim sospen graun i save stretim graun malumalum. Mipela i no putim tingting long ol bel hevi mipela i pilim long ol rong mipela i bin mekim long bipo, nogat. Mipela i traim long piksaim olsem Jehova i wok long stretim stretim mipela olsem graun malumalum na helpim mipela long kamap gutpela man na meri. Dispela i strongim pasin pren bilong mipela wantaim em.”—Ais. 64:8.

AMAMAS LONG WETIM GUTPELA SAMTING I KAMAP BIHAIN

19. Yumi mas holim wanem stretpela tingting long yumi yet?

¹⁹ Em tru olsem yumi gat gutpela sediul bilong mekim ol wok lotu na gutpela stadi program bilong helpim yumi long ol samting yumi nidim helpim long en, tasol yumi no ken ting olsem ol tingting kranki i kamap long tingting bilong yumi ol bai lus nating, nogat. I gat sampela taim we yumi bai pilim nogut tru! Tasol Jehova i ken helpim yumi long daunim ol tingting kranki na bel hevi yumi pilim. Na yumi ken bilip tru olsem long dispela taim, yumi bai amamas olsem maus bilong bel bilong yumi i stap klin na i gat planti samting yumi ken amamas long en long laip bilong yumi na ol samting yumi mekim bilong lotuim Jehova.

20. Yu tingting strong long mekim wanem?

²⁰ Yumi olgeta i ken tingting strong long no ken larim ol wari o bel hevi yumi pilim long ol samting yumi mekim long bipo, ol popaia yumi bin mekim, na ol pasin kranki bilong yumi i daunim yumi. Jehova i ken helpim yumi long holim stretpela tingting na mekim isi bel bilong yumi. (Sng. 143:10) Yumi ken luk fowed long laip long nupela taim, long dispela taim olgeta tingting yumi gat bai mekim yumi amamas tasol. Yumi bai kirap long olgeta moning na yumi no inap tingting planti o wari long wanpela samting, na yumi bai amamas long mekim wok bilong gutpela God bilong yumi, Jehova!