Strongim Pasin Pren Bilong Yumi Wantaim Ol Wanbilip

1. Yumi inap painim ol pren tru long we?

“LAIP bai hatwok sapos yumi stap wanpis long dispela taim bilong las de. Jehova i save olsem yumi nidim ol pren bilong helpim yumi long laip bilong yumi.” Yu pilim tru ol tok bilong dispela orijinel singsing “True Friends”? Yumi gat gutpela blesing tru long painim ol pren tru namel long lain bilong Jehova! (Sng. 119:63) Yumi insait long bikpela lain famili i lotuim Jehova na pasin laikim i mekim na yumi pas gut wantaim narapela narapela.

2. Yumi laik i gat wanem kain pasin pren wantaim ol wanbilip Kristen?

² Pasin pren yumi laik i gat wantaim ol wanbilip Kristen em i no giaman pasin pren o pasin pren bilong sotpela taim tasol, nogat. Em kain pasin pren we yumi pas gut wantaim na stap gut long narapela narapela. Yumi insait long bikpela lain bratasista em ol i laikim Jehova na Jisas, na dispela pasin laikim i bungim yumi olgeta wantaim. (Jon 13:35) Tasol kain pasin pren i no kamap nating. Yumi wok hat long i gat dispela kain pasin pren. Maski i olsem, ol hevi i save kamap insait long pasin pren namel long ol wanbilip bikos yumi olgeta i no gutpela olgeta.

3. Wai na i hatwok long strongim pasin pren wantaim ol narapela?

³ Yumi inap pilim olsem yumi pas gut moa wantaim sampela wanbilip winim ol narapela wanbilip. Wai na i olsem? Ating yumi laikim ol wankain samting, o pasin bilong yumi i wankain. Maski i olsem, yumi inap pilim hatwok long strongim pasin pren bilong yumi wantaim ol narapela bratasista. Sampela taim, ating yumi no wanbel long wanpela samting, na dispela i mekim na yumi no pas gut wantaim. Ating tingting na pasin bilong yumi i no wankain so yumi pilim hatwok long mekim ol samting wantaim ol. Na sampela taim, ol wanbilip i gat bikpela sik o ol i bel hevi tru, na dispela i putim presa long pasin pren bilong yumi. Long dispela atikol, yumi bai stori long hau eksampel bilong Jisas i ken helpim yumi long strongim pasin pren bilong yumi taim yumi bungim ol hatwok. Tasol pastaim, yumi bai skelim hau ol pasin Kristen i ken helpim yumi long strongim pasin pren bilong yumi wantaim ol wanbilip.

OL PASIN KRISTEN I STRONGIM PASIN PREN BILONG YUMI

4. Long wanem rot yumi ken strongim pasin pren bilong yumi wantaim ol wanbilip?

⁴ Bilong strongim pasin pren bilong yumi wantaim ol wanbilip, yumi mas tingim ol gutpela pasin bilong ol. Taim yumi spendim taim wantaim ol wanbilip, yumi bai tingim ol gutpela pasin bilong ol. Aposel Pol i laik tru long bung wantaim ol narapela Kristen. Em i raitim pas long ol Kristen long Tesalonaika na em i tok: “Mipela i bin wok strong tru . . . long lukim yupela.” (1 Tes. 2:17) Planti i luksave olsem pasin bilong bung na stori wantaim em gutpela rot bilong strongim pasin pren bilong ol. Yumi ken mekim olsem long taim yumi autim tok, go long ol miting, ol kibung sekit, na ol rijinel kibung tu. Tasol taim yumi gat hevi wantaim ol wanbilip, i gat sampela samting moa em yumi mas mekim bilong stretim dispela hevi na i no long rot bilong bung tasol wantaim ol.

5. Wanem samting i ken helpim yumi long lukautim pasin pren bilong yumi taim hevi i kamap? Stori long tok piksa. (Kolosi 3:12)

⁵ Ol pasin Kristen i ken helpim yumi long lukautim pasin pren bilong yumi taim hevi i kamap. (Ritim Kolosi 3:12.) Taim yumi kisim pasin daun, pasin bilong i no les kwik, gutpela pasin, na pasin sori, yumi inap daunim ol hevi na strongim pasin pren bilong yumi. Tingim dispela tok piksa. Oil i save mekim ensin bilong kar i ron gut. Olsem tasol, ol pasin Kristen yumi bihainim i helpim yumi long pas gut wantaim ol wanbilip. Yumi ken stori long tripela hatwok we inap pasim yumi long pas gut wantaim ol wanbilip. Yumi bai stori tu long hau yumi inap stap yet olsem ol pren tru bilong ol narapela taim yumi bihainim ol pasin bilong Jisas, olsem pasin daun, pasin bilong i no les kwik, gutpela pasin, na pasin sori.

TAIM YUPELA I NO WANBEL

6. Olsem wanem ol samting yumi no wanbel long en inap putim hevi long pasin pren bilong yumi?

⁶ Wai na i hatwok? Taim yumi no wanbel long sampela samting, yumi wan wan inap pilim olsem tingting bilong yumi i stret. Tingim olsem tupela brata i gat narapela narapela tingting long wanem gutpela rot bilong autim tok long teritori. Tupela wantaim i pilim olsem tingting bilong ol i stret. Ol i no holim wankain tingting, so em isi tru long ol i larim dispela i kamap bikpela hevi na i bagarapim pasin pren bilong tupela. Pasin antap inap pasim ol long stretim dispela hevi. Sapos tupela i no toktok gut na stretim hevi hariap, ol inap stat long bel nogut long narapela narapela. Na bihain long sampela haptaim i lus, ating ol i no inap pas gut moa olsem long bipo. Lukim hau liklik samting olsem inap kamapim bikpela hevi tru.

7. Hau Jisas i skulim ol disaipel bilong em olsem pasin daun em i bikpela samting long helpim ol long daunim ol tok pait?

⁷ Kisim skul long pasin daun bilong Jisas. Em i skulim ol disaipel olsem pasin daun em i bikpela samting long helpim ol long daunim ol tok pait. Inap sampela haptaim, ol disaipel i wok long tok pait long husat namel long ol i nambawan tru. Bilong helpim ol long daunim dispela pasin i pas strong tru long bel bilong ol, Jisas i tokim ol long tingim olsem ol narapela i winim ol. (Mat. 20:​25-28) Yes, em i skulim ol long mekim pasin daun. Maski em nait paslain long Jisas i dai, em i “soim pasin” long ol disaipel taim em i daunim em yet na wasim lek bilong ol, em wok bilong ol wokboi nating. (Jon 13:​3-5, 12-16) Taim em i mekim olsem, em i soim ol long rot bilong lukautim pasin pren i stap namel long ol. Sapos ol i tingim olsem ol narapela i winim ol, ol bai redi long bihainim tingting bilong ol maski ol i no wanbel long dispela tingting. Em bai isi moa long ol i stap yet olsem ol gutpela pren maski ol i no holim wankain tingting.

8. Hau pasin daun i ken helpim yu long strongim pasin pren bilong yu wantaim ol wanbilip maski yupela i no wanbel long sampela samting? (Kolosi 3:13) (Lukim tu ol piksa.)

⁸ Hau yu ken strongim pasin pren bilong yupela? Pasin daun bai helpim yu long no ken tingim ol samting em yupela i no wanbel long en na amamas long fogivim ol narapela. (Ritim Kolosi 3:13.) Sapos yu gat pasin daun, yu no inap kros o belhat hariap, na long dispela rot yu bai lukautim pasin pren bilong yupela. (Sng. 4:4) Maski sapos yumi mekim sampela tok i no stret, tingim olsem yumi olgeta i save mekim ol tok em bihain yumi rigret long en. (Ekl. 7:​21, 22) Askim yu yet, ‘Pasin bilong mi long strong olsem tingting bilong mi i stret, dispela i bikpela samting moa winim pasin pren bilong mipela?’ Yu ken wokim disisen long bihainim tingting bilong ol narapela. Abrusim pasin bilong tingim tingim o toktok yet long samting em yupela i no bin wanbel long en, na bai yu ken putim tingting long ol narapela bikpela samting.

9. Olsem wanem pasin daun bai helpim yu sapos hevi i stap yet namel long yu na pren bilong yu? (Provep 17:9)

⁹ Pasin daun i ken helpim yu long taim hevi i stap yet namel long yu na pren bilong yu. No ken tok pait bilong pruvim olsem yu rait. (Ritim Provep 17:9; 1 Kor. 6:7) Samting yu laik mekim em long lukautim pasin pren bilong yupela. Planti bratasista i bin mekim olsem long rot bilong bihainim gutpela pasin long stretim tok taim tok pait i kamap. (Sng. 34:14) Yu ken tokim pren bilong yu olsem: ‘Yumi stap pren inap longpela taim. Yu ting yumi ken stori long samting i kamap?’ Redi long tokaut olsem yu tu i gat asua long hevi i kamap, na tokim pren bilong yu olsem yu klia long bel hevi em i pilim na tok sori long em. Na sapos em i tok sori long yu, orait daunim yu yet na ekseptim sori bilong em. (Luk 17:​3, 4) Tingim olsem yu laik stretim hevi i kamap na bai yupela i ken stap yet olsem ol pren, na yu no laik pruvim olsem husat i rait na husat i rong.—Prov. 18:24.

TAIM PASIN BILONG YUPELA I NO WANKAIN

10. Wanem samting i ken mekim na i hatwok long yupela i stap yet olsem ol pren?

¹⁰ Wai na i hatwok? Yumi inap pilim hatwok long kamap gutpela pren bilong ol wanbilip em pasin bilong ol i no wankain long pasin bilong yumi. Sampela i gat ol pasin i save sikirapim bel bilong yumi. Na ating ol narapela i no save long wanem pasin i stret long mekim bikos ol narapela i bin mekim pasin i no fea long ol, o ating ol i kam long kalsa we ol man i save sem long toktok o ol i save toktok planti. O ating pasin bilong yumi i no wankain; yumi sampela i save amamas long bung na stori wantaim ol narapela, na sampela narapela nogat.

11. Olsem wanem Jisas i strongim pasin pren bilong em wantaim ol man em pasin bilong ol i no wankain long pasin bilong em?

¹¹ Kisim skul long pasin bilong Jisas long i no les kwik. Em i strongim pasin pren bilong em wantaim ol man em pasin bilong ol i no wankain long pasin bilong em. Olsem, aposel Jems na Jon i soim olsem ol i laik kisim biknem na namba taim ol i askim Jisas long larim tupela i sindaun long rait sait na left sait bilong em long Kingdom. (Mak 10:​35-37) Tasol Jisas i no gat dispela pasin, em i bin daunim em yet na lusim bikpela namba na wok em i mekim long heven bilong i kam daun long graun. (Fili. 2:​5-8) Yumi inap luksave olsem pasin bilong Jems na Jon i no wankain long pasin bilong Jisas. Maski i olsem, Jisas i no les kwik long tupela na ol narapela tu.

12. Wanem samting i helpim Jisas long no ken les kwik long ol pren bilong em?

¹² Jisas i no ekspektim ol pren bilong em long mekim olgeta samting i gutpela olgeta. Em i save olsem planti disaipel bilong em i gat laik long kisim biknem na namba, wankain olsem Jems na Jon i mekim. (Mak 9:34) Jisas i kamap bikpela long wankain kalsa em ol disaipel i kamap bikpela long en. Kalsa bilong ol i skulim ol olsem biknem na namba em i bikpela samting, so Jisas i kliagut long tingting bilong ol disaipel. Maski i olsem, Jisas i no les kwik long ol, em i larim haptaim i lus long ol i ken wok strong long daunim pasin antap na laik bilong kisim biknem na namba, em ol pasin ol i lain long en inap planti yia.—Mak 10:​42-45.

13. Olsem wanem pasin bilong i no les kwik bai helpim yumi long lukautim pasin pren bilong yumi wantaim ol narapela? (Efesus 4:2)

¹³ Hau yu ken strongim pasin pren bilong yupela? Wok yet long soim pasin bilong i no les kwik long ol man em pasin bilong ol i sikirapim bel bilong yu. (Prov. 14:29) Yumi olgeta i gat ol pasin bilong yumi yet, na planti bilong ol dispela pasin em i no ol pasin kranki. So yumi save amamas taim ol narapela i no les kwik long yumi. (Ritim Efesus 4:2.) Na tu, em i bikpela samting long yumi mas holim stretpela tingting na yumi no ken strong long ol narapela i mas senisim pasin bilong ol. Olsem, tingim hatwok wanpela inap pilim long bung na stori wantaim ol narapela sapos em i gat pasin bilong sem long toktok wantaim ol narapela. Tasol long wankain taim, yumi no ken les kwik long wanpela husat i save amamas long bung wantaim ol narapela na em i save toktok planti. Yumi no inap stap bes pren bilong olgeta wanbilip, tasol yumi mas tingim olsem maski yumi gat wan wan pasin bilong yumi yet, yumi olgeta i ken stap wanbel na wok gut wantaim.

14. Pasin bilong i no les kwik bai helpim yumi long tingim wanem samting?

¹⁴ Pasin bilong i no les kwik bai helpim yumi long tingim ol gutpela pasin bilong ol bratasista. Taim yumi mekim olsem, yumi no inap larim ol pasin bilong yumi we i no wankain i pasim yumi long kamap ol gutpela pren. Tingim Jems na Jon, tupela i tingim ol yet tasol na ol i laik kisim biknem na namba. Maski i olsem, pasin bilong tupela i soim olsem ol i bilip strong long Kingdom. Jisas i luksave long bilip bilong ol na em i amamas long dispela. Yumi soim olsem yumi bihainim pasin bilong Jisas na Papa bilong em, Jehova, taim yumi tingim ol gutpela pasin bilong ol pren bilong yumi.

15. Husat inap helpim yumi long strongim pasin pren bilong yumi wantaim ol man em pasin bilong ol i no wankain long yumi?

¹⁵ Bikpela samting moa em olsem, yumi ken beten askim Jehova long helpim yumi long strongim pasin pren bilong yumi wantaim ol man em pasin bilong ol i no wankain long pasin bilong yumi. Traim long tingim wanem ol samting inap kamap na i sikirapim bel bilong yu, na beten paslain long dispela samting i kamap na bai yu ken abrusim pasin bilong belhat kwik. Tingim olsem Jehova em i Krieta bilong yumi, olsem na em i save olsem yumi wan wan i gat ol pasin bilong yumi yet. So taim yu beten, yu ken bilip tru olsem Jehova i save gut long yu na em bai helpim yu long sanap strong yet na karim ol hevi. Na sapos yu pilim hatwok long soim pasin bilong i no les kwik, orait beten askim Jehova long givim yu holi spirit bilong em bilong helpim yu long bosim gut bel.—Luk 11:13; Gal. 5:​22, 23.

TAIM OL BRATASISTA I KARIM HEVI

16. Yumi inap bungim wanem ol hatwok taim ol bratasista i karim ol hevi?

¹⁶ Wai na i hatwok? Taim ol bratasista bilong yumi i gat sampela kain sik long bodi o ol i bel hevi tru long sampela samting, pasin ol i mekim inap mekim yumi belhat o bel hevi. Olsem, ating ol i laik stap wanpis, o tok na pasin bilong ol i sikirapim bel bilong yumi, o ol i mekim ol samting em yumi kirap nogut long en. Ating ol bai mekim ol tok o pasin i bagarapim bel bilong yumi. (Jop 6:​2, 3) Ating sampela wanbilip i karim ol hevi em yumi no save long en, so ol bai mekim ol samting em yumi no ekspektim ol long mekim.

17. Yu kisim wanem skul long pasin Jisas i mekim long aipas man Bartimeus?

¹⁷ Kisim skul long gutpela pasin na pasin sori bilong Jisas. Em i mekim gutpela pasin na pasin sori long ol man i karim hevi na ol man em i no save long ol. Olsem, skelim pasin em i mekim long dispela aipas man, em Bartimeus. Taim Bartimeus i harim olsem Jisas i kam, em i kirap singaut na bai Jisas i ken lukim em. Planti manmeri i bung i stap klostu na ol i tokim em long pasim maus. Tasol em i laik tru long Jisas i oraitim em, so em i wok long singaut moa yet. Yu ting sampela manmeri i stap long dispela taim i belhat long samting Bartimeus i mekim? Ating i olsem. Tasol Jisas i “sori tru” long em, dispela i makim olsem em i pilim bikpela sori tru long bel bilong em taim em i lukim Bartimeus. (Mat. 20:34; Mak 10:​46-52) Jisas i toktok gut long em na em i tok amamas long Bartimeus long bilip bilong em. Na Jisas i wokim mirakel na oraitim em, na wantu em inap lukluk gen.

18. Yu mas mekim wanem kain pasin long ol pren bilong yu i karim hevi? (1 Tesalonaika 5:14)

¹⁸ Hau yu ken strongim pasin pren bilong yupela? Mekim gutpela pasin na pasin sori long ol wanbilip. Ol dispela pasin bai helpim yu long “mekim gut bel” bilong ol bratasista em ol i sik o bel hevi tru. (Ritim 1 Tesalonaika 5:14.) Tingim olsem ol pren tru i save redi long givim helpim, na moa yet long “taim bilong hevi.” (Prov. 17:17) Kain pren olsem i pilim hevi bilong ol man i karim hevi, na tu, em i mekim ol samting bilong mekim gut bel bilong ol, mekim ol tok bilong strongim ol, na helpim ol long ol samting ol i nidim.

19. Hau yumi ken mekim gutpela pasin na pasin sori? (Lukim tu ol piksa.)

¹⁹ Hau yu ken mekim gutpela pasin na pasin sori long ol narapela? Em tru olsem yu no inap pinisim sik o bel hevi bilong wanpela wanbilip. Tasol yu ken traim long pilim hevi bilong em na kliagut long hau em i pilim. (Mat. 7:12; 1 Pita 3:8) Putim gut yau taim em i stori long hevi bilong em. Sapos i stret long mekim, kolim ol tok bilong mekim isi bel bilong em. (Prov. 12:25) Was gut na no ken ting olsem yu save long olgeta samting i kamap long em. (Prov. 18:13) Wok strong long no ken les kwik long em, na holim stretpela tingting long ol samting em inap mekim na i no inap mekim.—Efe. 4:32.

20. Yu laik stap wanem kain pren?

²⁰ Yumi olgeta i amamas long stap gutpela pren bilong ol bratasista Kristen bilong yumi. Tasol yumi tingim tu olsem yumi no gutpela olgeta, so sampela taim yumi bai mekim pasin em yumi no laik mekim. Ol samting i kamap long laip bilong yumi i stiaim ol tingting na pasin bilong yumi. Em as na yumi amamas long ol bratasista em ol i strongim pasin pren bilong ol wantaim yumi long rot bilong mekim pasin daun, pasin bilong i no les kwik, gutpela pasin, na pasin sori. Yumi olgeta i ken wok strong long stap kain gutpela pren olsem.