Stap Gut Yet Long Jehova Taim Ol Traim i Painim Yumi

1-2. Wanem samting i kamap taim Jisas i skulim ol manmeri long Kaperneam?

“EM I MEKIM wanem kain tok? Husat inap putim yau long dispela tok?” (Jon 6:60) Planti disaipel bilong Jisas i bin mekim dispela tok taim Jisas i skulim ol manmeri long Kaperneam. Jisas i bin tok: “Sapos yupela i no kaikai bodi bilong Pikinini bilong man na dringim blut bilong em, orait yupela bai i no gat laip i stap long yupela.” Na em i tok moa olsem: “Man i kaikai bodi bilong mi na dringim blut bilong mi, em i gat laip i stap oltaim, na mi bai kirapim em bek long las de.”—Jon 6:​53, 54.

² Ol disaipel bilong Jisas em ol i bel hevi long dispela tok em i mekim, ol i stop long bihainim em. Yu ting ol i no gat bilip long em? Paslain long dispela samting i kamap, ol disaipel bilong Jisas na sampela narapela tu i bin amamas tru long ol tok Jisas i mekim na ol i tok: “Tru tumas, em i dispela Profet i mas i kam long ol manmeri bilong dispela graun.” (Jon 6:14) So em i klia tru olsem ol dispela disaipel bilong Jisas i bin bilip long em. Tasol taim Jisas i mekim ol tok em ol i kirap nogut long en, dispela i traim bilip bilong ol na ol i no stap gut moa long em.

3. Ol aposel i mekim wanem long tok Jisas i mekim, na bilong wanem? (Lukim tu piksa.)

³ Ol aposel i stap gut yet long Jisas maski em i mekim dispela tok. Taim Jisas i askim ol sapos ol i laik lusim em tu, Pita i tok: “Bikpela, bai mipela i go long husat? Ol tok bilong yu i bringim man i go long laip oltaim. Mipela i bilip na kisim save olsem yu Man i holi na God i bin salim yu i kam.” (Jon 6:​68, 69) Yu ken luksave olsem Pita i no tok em na ol narapela aposel i kliagut long mining bilong tok Jisas i mekim olsem ol i mas kaikai bodi bilong em na dring blut bilong em. Maski ol i kliagut long dispela tok long dispela taim o nogat, ol i makim olsem ol i laik stap gut yet long Jisas. Bilong wanem? Long wanem, ol i bilip long wanpela bikpela tok i tru bilong Baibel olsem Jisas em i “dispela Krais God i salim i kam.”—Luk 9:​20, 35.

4. Wanem sampela traim inap painim yumi?

⁴ Planti samting inap traim pasin bilong yumi long stap gut long Jehova. Olsem, yumi save mekim wanem taim senis i kamap long save yumi holim pinis long wanpela ves bilong Baibel o senis i kamap long pasin bilong yumi long oganaisim wok autim tok? O yumi save mekim wanem taim yumi hatwok long kliagut long risen na Jehova i larim yumi karim wanpela bikpela hevi? Narapela samting inap traim bilip bilong yumi em taim pasin bilong wanpela Kristen pren bilong yumi i bagarapim bel bilong yumi o wanpela yumi save rispektim i mekim pasin i no stret long yumi.

5. Wai na bilip bilong yumi i mas i gat strongpela faundesen? Stori long tok piksa. (Kolosi 1:23)

⁵ Wai na em i bikpela samting long bilip bilong yumi i mas i gat strongpela faundesen bilong en? Tingim dispela tok piksa: Bilip bilong yumi i wankain olsem wanpela bilding ol i wokim long hap em planti taim graun i save guria. Kain bilding olsem i mas i gat strongpela faundesen na bai em i ken sanap strong. Olsem tasol, bilip bilong yumi i mas i gat strongpela faundesen na bai yumi ken sanap strong taim ol samting i kamap na i traim bilip bilong yumi, olsem yumi stori long paragraf i go pinis. Taim yumi wok yet long mekim ol samting bilong strongim faundesen bilong bilip bilong yumi, yumi bai stap strong na stap gut yet long Jehova taim ol traim i painim yumi.—1 Kor. 15:58; ritim Kolosi 1:23.

6. Wanem samting i helpim ol aposel long stap gut yet long Jisas?

⁶ Wanem samting i helpim ol aposel long stap gut yet long Jisas taim ol narapela i lusim em? Ol aposel i bilip tru olsem i stret yumi mas lotuim Jehova wanpela tasol bikos em i Man Bilong Wokim olgeta samting, na Jisas em i Pikinini Bilong God, na em i gat ‘ol tok bilong bringim man i go long laip oltaim,’ na Jehova i sapotim Jisas. Yumi no laik stori long olgeta samting we inap traim bilip bilong yumi, tasol yumi laik stori long tripela tok i tru we inap helpim yumi long stap strong yet long bilip maski wanem hevi i painim yumi. Ol dispela tok i tru em: (1) Jehova em i Krieta bilong olgeta samting. (2) Jehova i kamapim ol tok bilong Baibel. (3) Jehova i yusim oganaisesen bilong em long nau. Sapos yumi bilip tru long dispela tripela tok i tru bilong Baibel, yumi bai stap gut yet long God, maski wanem ol samting i kamap na i traim bilip bilong yumi.

JEHOVA EM I KRIETA

7. (a) Revelesen 4:11 i tok wanem long Jehova? (b) Olsem wanem dispela inap helpim yumi taim ol traim i painim yumi?

⁷ Ritim Revelesen 4:11. Dispela ves i kirapim yumi long tingim olsem Jehova i wokim olgeta samting. Dispela tok i tru i ken kirapim yumi long lotuim Jehova wanpela tasol. Na taim yumi tingim tingim long bel bikpela strong bilong em, yumi ken bilip tru olsem em inap kisim bek yumi long wanem wanem hevi i painim yumi. Tasol Satan i bosim dispela graun na em i kirapim ol man long kamapim kain kain tingting olsem God i no stap tru. Ol saientis i tok olsem ol samting i gat laip i kamap nating. Sapos yumi no gat strongpela bilip olsem Jehova em i Krieta na em i laikim yumi tru, isi isi yumi inap kisim tupela tingting olsem em i no stap tru na em i no inap helpim yumi taim ol traim i painim yumi.—Hib. 11:6.

8-9. Yu mas mekim wanem sapos yu gat tupela tingting olsem Jehova em i no Krieta? (Lukim tu piksa.)

⁸ Sapos yu kirap long kisim tupela tingting olsem Jehova em i no Krieta, orait kirap hariap long mekim sampela samting. Mekim gutpela wok painimaut long ol infomesen i stap long ol pablikesen bilong yumi we i soim klia olsem Jehova i wokim olgeta samting. Yu inap painim sampela moa save bilong strongim bilip long dispela topik long buklet Was Life Created? na buklet The Origin of Life—Five Questions Worth Asking. Na yu inap kisim sampela save moa long vidio siris “Yu Ting Wanpela i Bin Wokim?” long jw.org. Jessica em wanpela yangpela sista long Amerika, em i tok: “Bihain long mi ritim buklet The Origin of Life, mi bilip tru olsem ol tok mi ritim i kamapim klia olsem i gat wanpela Man i gat bikpela save i disainim na wokim ol samting. Mi save pinis long dispela, tasol bihain long mi riviu long ol tok i stap long buklet, mi pruvim long mi yet olsem i gat Krieta i stap.” Na tu, planti i bin kisim gutpela helpim taim ol i ritim buk Is There a Creator Who Cares About You? Ating yu bin ritim pinis dispela buk. Tasol i gutpela long yu ritim gen.

⁹ Long neks pesenel stadi projek bilong yu, skelim sampela save i pruvim olsem God i stap tru. Dispela wok painimaut bilong yu bai helpim yu long luksave olsem Jehova i stap tru na em bai helpim yu long save long ol gutpela pasin bilong Jehova. (Rom 1:20) Na tu, yu ken yusim save yu kisim bilong helpim ol narapela na bai ol i no ken i gat tupela tingting olsem God i no stap tru. So bikpela poin em olsem: Jehova i givim yumi planti samting bilong soim olsem em i Krieta bilong yumi.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

JEHOVA I KAMAPIM OL TOK BILONG BAIBEL

10. Yumi gat wanem tingting long Baibel? (2 Timoti 3:​16, 17)

¹⁰ Ritim 2 Timoti 3:​16, 17. Baibel i gat ol tok em Jehova i givim long yumi ol manmeri. Em i bekim ol bikpela askim bilong laip na em i tokim yumi long laik bilong Jehova na ol samting em i laik yumi mas mekim. Yumi bilip olsem Jehova em Man i kamapim ol tok bilong Baibel, dispela i mekim na Baibel em i bikpela samting long laip bilong yumi. Yumi laik kliagut long ol tok bilong Baibel na wok strong long bihainim ol dispela tok long laip bilong yumi.

11. Wanem samting i kirapim yu long bilip tru olsem Jehova i kamapim ol tok bilong Baibel?

¹¹ Wai na yumi bilip tru olsem Jehova i kamapim ol tok bilong Baibel? I gat sampela risen na yumi bilip olsem. Tok Baibel i mekim long ol samting i kamap long bipo ol i tru. (Luk 3:​1, 2) Na tu, ol tok Baibel i mekim long dispela graun na ol samting i gat laip em i tru. (Jop 26:7) Baibel em wanpela buk we ol i tilim long planti hap bilong graun winim ol narapela buk, maski Satan i wok strong long bagarapim na pinisim dispela buk. Na inap 40 narapela narapela man i raitim Baibel insait long 1,600 yia, tasol ol tok bilong ol i wanbel wantaim. Na tu, Baibel i gat ol edvais we i helpim planti milion manmeri long ol samting ol i save mekim long olgeta de long laip bilong ol. (Prov. 13:20; 15:21; Mat. 7:12) Na planti tok profet bilong Baibel i kamap tru pinis na dispela i kamapim klia olsem yumi ken bilip tru long ol tok bilong Baibel. (Jos. 23:14) Tru tumas, God i kamapim olgeta tok i stap long Baibel!

12. Yumi mas mekim wanem sapos yumi kirap long holim tupela tingting olsem God i no kamapim ol tok bilong Baibel?

¹² Yumi mas mekim wanem sapos yumi kirap long holim tupela tingting olsem God i no kamapim ol tok bilong Baibel? Yumi mas beten long dispela samting na mekim samting i stret wantaim beten bilong yumi. Lukim tok em Jordan i mekim, em wanpela yangpela brata husat i kamap bikpela olsem wanpela Witnes, em i tok: “Mi no save bilipim hariap olgeta tok em ol narapela i tokim mi long en. Mi save lusim sampela haptaim long tingim gut ol dispela tok. Na mi mas tokaut stret olsem sampela taim mi save i gat tupela tingting. Tasol long kain taim olsem, mi save wok strong long mekim wok painimaut long ol pablikesen bilong yumi na bekim ol askim mi gat, na long dispela rot mi ken daunim tupela tingting mi gat.” Taim yumi wok yet long strongim bilip bilong yumi olsem Jehova i kamapim ol tok bilong Baibel, yumi bai strongim faundesen bilong bilip bilong yumi.—1 Kor. 3:​12, 13.

JEHOVA I YUSIM OGANAISESEN BILONG EM LONG NAU

13. Yumi mas mekim wanem sapos yumi kirap long holim tupela tingting long husat tru i lain bilong God long nau?

¹³ Sapos yumi kirap long holim tupela tingting olsem ol Witnes Bilong Jehova em i no oganaisesen God i yusim long nau, orait yumi mas hariap long daunim kain tingting olsem. Yumi ken daunim tupela tingting long rot bilong givim ol kain askim long yumi yet olsem: ‘Husat lain long nau i wok strong tru long mekim ol senis long laip bilong ol bambai ol i ken bihainim ol lo bilong Baibel? Husat lain i tingim tok bilong Baibel i bikpela samting tru long olgeta samting ol i mekim?’ (2 Tim. 4:​3, 4) ‘Husat lain i mekim wok bilong Jehova long nau?’—Mat. 7:​20, 21.

14. Long wanem rot God i yusim ol Witnes Bilong Jehova long truim tok bilong Matyu 24:14?

¹⁴ God i laik bai ol manmeri long olgeta hap i mas harim gutnius paslain long em i pinisim ol man nogut, so yumi ken askim yumi yet olsem, ‘Husat lain i mekim wok autim tok olsem Jisas i bin tok profet long em bai kamap long taim bilong las de?’ (Mat. 24:14) Yumi save long bekim bilong dispela askim. God i yusim lain bilong em—em ol Witnes Bilong Jehova—long mekim wok autim tok long nau. Yumi tasol i autim gutnius bilong Kingdom Bilong God long winim 240 kantri. Yumi mekim dispela wok winim 100 yia nau aninit long wok bos bilong Kingdom. Yes, yumi wok yet long givim bel tru long sapotim dispela bikpela wok bilong autim tok na skulim ol manmeri.—Mat. 28:​19, 20.

15. Olsem wanem ol Witnes Bilong Jehova i insait long wok bilong mekim holi nem bilong God long nau? (Matyu 6:9; Aisaia 43:10)

¹⁵ Ritim Matyu 6:9 na Aisaia 43:10. Ol manmeri i save olsem yumi holim nem bilong God, em Jehova, na yumi amamas long ol manmeri i kolim yumi olsem ol Witnes Bilong Jehova. Long taim bilong yumi long nau, ol man i no save long nem bilong God, tasol yumi bin putim bek dispela nem long ples stret bilong en long Baibel. Nem bilong God i stap winim 7,000 taim long Baibel Nupela Taim Trenslesen Bilong Ol Skripsa Holi.

16. Wai na yumi ken tok ol Witnes Bilong Jehova i bihainim lo i stap long Jon 13:​34, 35? (Lukim tu piksa.)

¹⁶ Ritim Jon 13:​34, 35. Bikpela lain bratasista bilong yumi long olgeta hap i gat pasin laikim na ol i stap wanbel wantaim na dispela em wanpela mirakel, bikos ol manmeri bilong dispela graun i pait na brukim lain na ol i no stap wanbel. Yumi kam long narapela narapela hap bilong graun, na yumi gat kain kain bekgraun na sindaun. Maski i olsem, yumi wok strong long stap bel isi na laikim tru narapela narapela. Taim yu raun i go long narapela hap, yu bin visitim wanpela narapela kongrigesen? Long neks taim yu raun, tingim pasin laikim na pasin wanbel i stap namel long ol bratasista bilong yumi. Dispela bai helpim yu long bilip tru olsem Jehova i yusim ol Witnes bilong em long mekim laik bilong em long nau. Taim yumi holim dispela tingting, dispela i ken helpim yumi long stap gut yet long Jehova taim kain kain traim i kamap bilong traim bilip bilong yumi.

NO KEN LUSIM JEHOVA

17-18. Yumi inap bungim wanem ol hevi, tasol yumi ken bilip tru na tok wanem?

¹⁷ Yumi stap long las de em wanpela taim nogut tru na dispela inap givim planti hatwok tru long yumi. (2 Tim. 3:​1, 13) Yumi inap bungim ol narapela hatwok tu. Oganaisesen bilong God inap mekim sampela disisen we yumi no kliagut tumas long en. O yumi inap pilim olsem wanpela brata o sista i no kliagut long samting yumi mekim o ol i mekim tok i bagarapim bel bilong yumi. Ating i hatwok long painim rot bilong stretim ol hevi bilong yumi, o ating yumi no kisim bekim em yumi laikim long ol hevi yumi wok long karim.

¹⁸ Taim kain samting i kamap, dispela inap mekim yumi wari na tingting planti tru. Maski i olsem, yumi ken stap gut yet long Jehova sapos yumi bilip olsem em i Krieta, na em i kamapim ol tok bilong Baibel, na ol Witnes Bilong Jehova ol i lain bilong em. Olsem Pita i bin tokim Jisas, yumi tu i ken tokim Jehova olsem: “Bai mipela i go long husat? Ol tok bilong yu i bringim man i go long laip oltaim.”