As na Yu Ken Amamas Taim Ol Man i Heitim Yu

1. Jisas i tok wanem long pasin bilong ol man long heitim yumi?

LONG Bikpela Tok Long Maunten em Jisas i bin mekim, em i tok: “Yupela i ken amamas taim ol man i heitim yupela.” (Luk 6:22) Ating ol man i putim yau long tok bilong em, ol i kirap nogut long dispela tok em i mekim. Tingim, i no gat wanpela man i save amamas taim ol narapela i heitim em. So wai na Jisas i mekim dispela tok? Em wanpela gutpela askim yumi ken skelim, long wanem, planti man i wok long heitim ol disaipel bilong Jisas long nau. Yumi bai stori long wai na ol man i save heitim yumi na as na yumi ken stap amamas taim ol man i heitim yumi.

AS NA OL MAN I HEITIM YUMI

2-3. (a) Wanem wanpela risen na ol man i mekim nogut long ol Kristen tru? (b) Dispela inap mekim wanem long tingting yumi gat long ol man i birua long yumi? (Jon 16:​2, 3)

² Ol man i heitim yumi bikos yumi lotuim Jehova. Jisas i tok long ol man i birua long ol disaipel bilong em na kilim sampela i dai olsem: “Ol i no save long Papa na ol i no save long mi tu.” (Ritim Jon 16:​2, 3.) So husat i as bilong pasin birua i wok long painim lain bilong God long nau? Satan i as bilong dispela samting. Satan em i “god bilong dispela graun.” (2 Kor. 4:​3, 4) Em i pasim tingting bilong ol manmeri na bai ol i no inap kisim save long tok i tru bilong Jehova na em i kirapim ol manmeri long birua long ol manmeri husat i laikim God na i kisim save long em. (Jon 8:​42-44) So dispela i ken helpim yumi long holim wanem tingting long ol man i birua long yumi? Wanpela samting em olsem, taim yumi luksave olsem Satan i bin giamanim ol dispela manmeri, dispela bai helpim yumi long sakim pasin bilong bekim pasin nogut bilong ol.

³ Skelim stori bilong Pavel,a em i stap long kantri we i gat tambu long wok bilong yumi. Em i wok yet long lotuim Jehova na stap gut long em, olsem na ol i arestim em, paitim em nogut tru, na putim em long soliteri konfainmen inap planti mun. Pavel i tok: “I klia tru olsem ol spirit nogut i laik pasim yumi long mekim wok bilong Jehova. I luk olsem planti man em ol i wok olsem woda o wok insait long haus kalabus, ol i no gat tingting nogut long yumi o heitim yumi. Ol i mekim tasol wok bilong ol.” Wanpela brata long Kroesia em papamama bilong em i no Witnes na ol i mekim nogut tru long em, em i tok: “Mi luksave olsem Satan em i birua tru bilong mi, na i no papamama bilong mi.”—Efe. 6:12.

4. Yumi inap kisim wanem skul long eksampel bilong Jisas na bilong disaipel Stiven? (Lukim tu piksa.)

⁴ Yumi no save heitim ol man i birua long yumi. Yumi save beten bilong helpim ol. (Mat. 5:44) Tingim samting i painim Jisas na disaipel Stiven. Taim ol soldia bilong Rom i nilim Jisas long diwai pos na hangamapim em, Jisas i beten olsem: “Papa, fogivim ol.” (Luk 23:34) Jisas i beten na askim Jehova long fogivim ol dispela soldia em ol i bin kilim em i dai. Ating em i bin tingim tu bikpela lain manmeri em ol i bin singaut long ol man i mas kilim em i dai bikos ol hetman bilong lotu i bin kirapim ol long mekim olsem. Jisas i luksave olsem ol dispela manmeri i no save long samting ol i mekim. Olsem tasol, disaipel Stiven tu i bin beten askim God long fogivim ol man i bin kilim em i dai. (Apo. 7:​58-60) Yu ting Jehova i bin bekim beten bilong Jisas na Stiven? Yes. Planti manmeri em ol i bin insait long dispela bikpela lain manmeri em ol i bin kotim Jisas na kilim em i dai, bihain ol i tanim bel na ol i bilip long Jisas na ol i kisim baptais. (Apo. 2:​36-41) Na wanpela bilong ol man husat i bin givim tok orait long ol man i kilim i dai Stiven, em Sol bilong Tarsus, bihain em i kamap Kristen na em i bel hevi tru long ol samting nogut em i bin mekim taim em i no gat stretpela save.—1 Tim. 1:13.

5. Yu kisim wanem skul long stori bilong César?

⁵ Jehova i wok yet long bekim beten bilong ol wokman bilong em husat i beten long ol man i birua long ol long nau. Skelim ekspiriens bilong César, em i save stap long Veneswela. Papa bilong em i birua nogut tru long em bikos long tok i tru. César i tok: “Mama bilong mi em i gat ol gutpela pasin tru olsem wanpela meri marit na wanpela mama. Oltaim em i save putim ol samting bilong Kingdom i stap nambawan samting, tasol em i no save givim baksait long papa bilong mi. Em i skulim mi na ol bratasista bilong mi long rispektim papa bilong mipela. Na em i skulim mipela long bihainim olgeta tok bilong em, tasol mipela i no ken mekim olsem taim em i tokim mipela long mekim ol samting i agensim laik bilong God.” Insait long ol yia i kam na i go, pasin bilong papa bilong em i wok long kamap gutpela. César i tok: “Wanpela taim mi beten na mi kamapim bel bilong mi long Jehova, na bihain mi askim papa bilong mi sapos mi inap stadi long Baibel wantaim em. I hatwok long eksplenim ol samting mi pilim long bel taim Papa i tok yes.” I no longtaim, papa bilong César i kisim baptais. Tru i no olgeta man husat i birua long yumi i save mekim ol kain senis olsem, tasol sampela i save senisim tingting ol i gat long yumi bihain long ol i lukim yumi mekim ol tok long pasin rispek na mekim gutpela pasin. Yumi amamas tru olsem ol inap mekim ol kain senis olsem! Yumi wet long lukim hau Jehova, em God bilong marimari na “Jas bilong graun olgeta,” i kirapim ol kain man i save birua long yumi long kam long em.—Stt. 18:25.

6. Olsem Mak 13:13 i kamapim, wanem narapela risen na ol man i save heitim yumi?

⁶ Ol man i heitim yumi bikos yumi rispektim Jisas. Jisas i tok olsem ol manmeri bai heitim ol Kristen tru “long wanem, nem bilong [em] i stap long [ol].” (Ritim Mak 13:13.) “Nem” bilong Jisas i makim wanem samting? Nem bilong Jisas i makim gutnem bilong em na namba em i gat olsem King bilong Kingdom Bilong God. Ol manmeri i heitim yumi bikos ol i trastim ol lida bilong dispela graun, na ol i no trastim man em Jehova i makim bilong stap King bilong yunives, em Jisas Krais. Jisas i bin mekim wok King long Kingdom kirap long 1914. Klostu nau, em bai rausim olgeta gavman bilong dispela graun em ol i sakim wok bos bilong em.

7-8. Wai na ol man i save tok bilas long sampela wokman bilong Jehova? (Jon 15:​18-20) (Lukim tu ol piksa.)

⁷ Ol man i heitim yumi bikos yumi sakim ol samting bilong dispela graun em Satan i bosim. Jisas i tok olsem ol man bai heitim ol disaipel bilong em bikos ol “i no insait long ol samting bilong dispela graun.” (Ritim Jon 15:​18-20.) Wankain olsem ol Kristen long taim bilong ol aposel, yumi sakim ol samting bilong dispela graun, olsem ol pasin na toktok bilong dispela graun. Em as na planti taim long ples wok o long skul, ol man i save tok bilas long ol bratasista bilong yumi. (1 Pita 4:​3, 4) Tasol yumi amamas olsem sampela bilong ol dispela man i save birua long yumi, bihain ol i senisim pasin bilong ol na ol i save amamas long pasin bilong yumi long sanap strong.

⁸ Skelim ekspiriens bilong Ignacio long Sentral Amerika. Em i go long wanpela skul we wanpela tisa i bin tok bilas long em inap planti yia bikos long pasin bilong em long bihainim ol stretpela lo bilong God. Tasol paslain long Ignacio i grediuet long dispela skul, dispela tisa i kam na i askim em olsem hau na em i wok long bihainim ol stiatok bilong Baibel long hap we planti man i no rispektim pasin bilong em long bihainim tok bilong Baibel. Ignacio i stori gut long em olsem em i tingim ol lo bilong God olsem samting bilong lukautim em. Na bihain em i singautim dispela tisa i kam long wanpela miting bilong kongrigesen. Na Ignacio i kirap nogut olsem tisa i kam long miting! Na tisa i pilim tru pasin laikim bilong ol bratasista long kongrigesen na em i wok yet long kam long olgeta miting. Bihain, ol man i wok long birua long em bikos em i wok long stadi long Baibel. Tasol em i wok yet long strongim pasin pren bilong em wantaim Jehova na bihain em i kisim baptais.

9-10. (a) Wanem narapela samting i mekim na ol Kristen i no wankain long ol manmeri bilong dispela graun em Satan i bosim? (b) Yumi inap kisim wanem skul long eksampel bilong aposel Pol?

⁹ Yumi stap narapela kain long ol manmeri bilong dispela graun em Satan i bosim, long wanem, yumi no save insait long ol wok politik na ol woa. (Jon 18:36) Yumi bihainim tok i stap long Rom 13:​1, na yumi wok strong long bihainim ol lo em gavman i putim. Maski i olsem, yumi ol Kristen i no save insait long ol wok politik, na yumi no save ron long ileksen bilong kamap memba o votim ol kendidet. Bilong wanem? Long wanem, yumi stap gut long Jehova na Kingdom bilong em aninit long wok king bilong Krais. Ol man i kalabusim planti ol Witnes Bilong Jehova bikos long bilip Kristen bilong ol. Maski i olsem, ol bratasista i stap long kalabus i wok yet long autim tok. Ol i bihainim pasin bilong aposel Pol husat i bin stap long kalabus na bihain em i kalabus long haus bilong em yet inap planti yia. (Apo. 24:27; 28:​16, 30) Em i wok yet long autim gutnius long olgeta manmeri husat inap putim yau, dispela i makim ol gad bilong haus kalabus, ol kot ofisa, ol gavana, ol king, na tu, ol ofisa bilong Empera Bilong Rom, em Nero.—Apo. 9:15.

¹⁰ Wankain olsem Pol, ol bratasista bilong yumi long nau em ol i stap long kalabus, ol i save autim tok long olgeta manmeri husat inap putim yau, olsem ol jas, ol ofisa bilong gavman, na ol gad. Wanpela brata husat i bin stap long kalabus winim 6-pela yia bikos em i no laik insait long wok politik, em i tok em i tingim dispela haptaim em i stap long kalabus i no olsem wanpela panismen, tasol olsem wanpela asainmen Jehova i givim long em bilong painim ol man i olsem ol sipsip. Yumi amamas tru olsem Jehova i ken yusim yumi long painim ol kain manmeri na autim gutnius long ol! (Kol. 4:3) Nau yumi ken stori long ol narapela risen na yumi ken stap amamas yet, maski ol man i heitim yumi bikos yumi mekim wok bilong Jehova.

AS NA YUMI KEN AMAMAS TAIM OL MAN I HEITIM YUMI

11. Taim ol man i mekim nogut long yumi, olsem wanem dispela i ken strongim bilip bilong yumi? Stori long wanpela eksampel.

¹¹ Yumi save olsem taim ol man i heitim yumi, dispela i truim tok profet bilong Baibel. Long namba wan tok profet i stap long Baibel, Jehova i bin tok olsem Satan na lain bilong em—em ol manmeri husat i bihainim em—ol bai heitim ol manmeri husat i laikim na mekim wok bilong Jehova. (Stt. 3:15) Planti taim Jisas i tok olsem ol manmeri bai heitim ol man husat i mekim wok bilong Jehova, na yumi lukim ol dispela tok i stap long olgeta fopela Gutnius. (Mat. 10:22; Mak 13:​9-12; Luk 6:​22, 23; Jon 15:20) Na yumi lukim ol wankain tok tu i stap long ol narapela hap bilong Baibel em ol Kristen i bin raitim. (2 Tim. 3:12; Jems 1:2; 1 Pita 4:​12-14; Jut 3, 17-19) So taim ol man i mekim nogut long yumi, yumi no kirap nogut long dispela samting, nogat. Yumi amamas olsem tok profet bilong Baibel i kamap tru. Dispela i helpim yumi long bilip olsem yumi mekim wok bilong God tru. Wanpela sista husat i stap long wanpela kantri we i gat tambu long wok bilong yumi, em i tok: “Taim mi dediket long Jehova, mi save olsem ol man bai mekim nogut long mi. So ol hevi i painim mi i no pretim mi na mi no kirap nogut long ol.” Ol narapela i birua long em na man bilong em tu em wanpela bilong ol. Em i mekim nogut tru long em na em i kukim Baibel na ol buk na nius bilong Baibel em i gat. Tasol dispela sista i no surik na pret, dispela samting i mekim na bilip bilong em i kamap strong moa. (Hib. 10:39) Em i tok: “Baibel i tok profet olsem ol man bai mekim nogut long yumi, so mi save olsem dispela samting i mas kamap. So taim dispela samting i painim mi, mi bilip tru olsem dispela em i lotu i tru.”

12. Wanem samting i helpim wanpela brata long karim hevi bilong pasin birua?

¹² Maski yumi save olsem ol man bai mekim nogut long yumi, sampela taim yumi inap pilim hatwok long karim dispela hevi. Wanpela brata i raitim pas na em i mekim dispela tok taim em i stap long kalabus, olsem: “Sampela taim mi save pilim bel hevi tru, na mi save krai.” Wanem samting i helpim dispela brata long karim hevi? Em i tok: “Oltaim mi save beten. Long olgeta moning mi save beten. Long de taim mi save beten, na mi save beten long olgeta taim wanpela hevi o wanpela samting i kamap na i givim hatwok long mi. Na taim pasin i no stret i mekim mi bel hevi, mi save lokim mi yet insait long batrum na mi save beten.” Dispela brata bilong yumi i wok long tingim tingim long bel stori bilong ol man em ol i bin sanap strong na stap gut long Jehova long bipo na long nau tu. Dispela i bin helpim em long karim hevi bilong pasin birua na kisim bel isi em Jisas i bin promis olsem ol disaipel bilong em bai i gat.—Jon 14:27; 16:33.

13. Wanem samting inap helpim yumi long daunim pasin bilong ol narapela long heitim yumi?

¹³ Yumi gat pasin laikim em i strong moa winim pasin bilong heitim ol narapela. Jisas i save laikim tru Papa bilong em, na em i laikim em i go inap long em i pulim laspela win bilong em paslain long em i dai. Jisas i laikim tu ol pren bilong em. (Jon 13:1; 15:13) Taim yumi kisim kain pasin laikim olsem, em pasin bilong laikim Jehova na pasin bilong laikim ol bratasista bilong yumi, yumi bai sanap strong taim ol man i heitim yumi. Hau yumi ken mekim olsem? Bilong bekim dispela askim, yumi ken skelim eksampel bilong aposel Pol.

14. Wanem samting i helpim Pol long sanap strong maski em inap i dai?

¹⁴ Paslain liklik long ol i kilim i dai aposel Pol, em i raitim pas i go long gutpela pren bilong em Timoti, na em i tok: “Holi spirit God i save givim yumi i no save kamapim pasin bilong pret, nogat. Em i save givim strong long yumi na kamapim pasin laikim.” (2 Tim. 1:7) Wanem insait bilong dispela tok Pol i mekim? Tok bilong Pol i makim olsem pasin bilong laikim tru Jehova inap kirapim wanpela Kristen long redi long karim ol bikpela hevi. (2 Tim. 1:8) So i klia tru olsem pasin bilong Pol long laikim Jehova i bin helpim em long strongim bel maski em inap dai, na em i no lusim lotu i tru.—Apo. 20:​22-24.

15. Olsem wanem ol bratasista long taim bilong yumi i soim olsem ol i laikim tru narapela narapela? (Lukim tu piksa.)

¹⁵ Yumi laikim tru ol wanbilip bilong yumi em ol i sanap strong long taim ol man i mekim nogut long ol. Sampela bratasista long nau i redi long karim hevi bilong pasin birua bilong soim pasin laikim long ol brata na sista bilong ol, olsem taim Akwila na Prisila i redi long lusim laip bilong ol yet bilong lukautim Pol. (Rom 16:​3, 4) Olsem, long Rasia planti bratasista i bin go long ol kot haus bilong strongim ol bratasista em gavman i bin arestim ol. Taim wanpela sista husat em ol i bin arestim em i lukim planti bratasista tru i kam long kot haus, em i pilim tru pasin laikim bilong ol na em i hatwok long toktok. Pasin bilong ol bratasista long soim em olsem ol i tingim em tru na laikim em, dispela i strongim tru dispela sista long taim stret em i nidim. Yumi ken amamas olsem yumi gat pasin laikim we i strong moa winim pasin bilong ol man long heitim yumi!

16. Wai na aposel Pita i tok olsem ol manmeri em ol narapela i mekim nogut long ol bikos ol i mekim wok bilong God, ol i ken amamas? (1 Pita 4:14)

¹⁶ Yumi save olsem pasin bilong yumi long sanap strong taim ol man i heitim yumi, dispela i save mekim God i amamas long yumi. (Ritim 1 Pita 4:14.) Aposel Pita i tok olsem ol manmeri em ol i sanap strong taim ol man i mekim nogut long ol bikos ol i mekim wok bilong God, ol i ken amamas. Olsem wanem ol i ken amamas? Taim ol man i mekim nogut long ol, dispela i makim olsem holi spirit bilong God “i stap long [ol].” Pita yet i bin sanap strong na God i bin orait long em, so em i save long dispela samting. Bihain long Pentikos 33 C.E., ol hetman bilong lotu i salim ol polis bilong tempel long Juda i go bilong arestim Pita na ol arapela aposel em ol i wok long autim tok. Tasol Pita i sanap strong na i sambai long bilip bilong em. (Apo. 5:​24-29) Maski ol i bin wipim em na ol narapela aposel, ol i no stop long autim tok. Ol i amamas long “God i ting ol i gutpela inap long ol i ken kisim sem long nem bilong Jisas.” Yumi tu i ken amamas taim yumi sanap strong na karim ol hevi.—Apo. 5:​40-42.

17. Jisas i tok wanem long ol disaipel bilong em long nait paslain long em i dai?

¹⁷ Long nait paslain long Jisas i dai, em i tokim ol disaipel bilong em olsem: “Man i laikim mi, Papa bilong mi bai laikim em, na mi bai laikim em.” (Jon 14:21) Tru tumas, yumi luk fowed long dispela taim we olgeta manmeri bai laikim yumi—na i no gat man bai heitim yumi—long yumi mekim wok bilong Jehova! (2 Tes. 1:​6-8) Tasol long nau yet, yumi ken stap belgut na stap strong yet bikos yumi gat planti risen long stap amamas taim ol man i heitim yumi.