Strongim Bel na Stap Gut Long God Olsem Benaia

Benaia em wanpela strongpela man bilong pait na em i bin stap wokman bilong King Devit na King Solomon. Benaia em pikinini man bilong wanpela pris na ol pris na ol Livai i no save insait long pait, tasol Benaia i insait long ol pait bilong Jehova na em i gat strongpela bel. Olsem, em i kilim i dai wanpela laion insait long hulwara na em i kilim i dai wanpela traipela soldia bilong ol birua. Devit i trastim tru Benaia na makim em long bosim ol bodi gad bilong em.—2 Sml. 23:​20-23.

Benaia i stap gut yet long Devit long taim Apsalom na Adoniya i bikhet long king. (2 Sml. 8:18; 15:18; 1 Kin. 1:8) Long taim Devit i kamap lapun tru, Benaia i sapotim wok bilong mekim Solomon i kamap king. (1 Kin. 1:​32-40) Yes, Benaia i stap gut long Jehova na man Em i makim taim ol narapela i no mekim olsem.

Yumi tu i mas strongim bel bilong sakim dispela strongpela birua em Satan na ol man i sapotim em. Na yumi mas tingting strong long wok yet long bihainim ol lo bilong Jehova. (Efe. 6:11; 1 Pita 5:​8, 9) Maski sampela i makim olsem ol bai lusim Jehova, yumi stap gut yet long em bikos yumi bilip tru olsem em bai givim gutpela pe long yumi.—2 Sml. 22:26.