Askim Bilong Ol Rida

Wanem taim ol kantri bai tokaut olsem “nau em i taim bilong bel isi na gutpela sindaun”?

Olsem yumi bin stori pinis long atikol “Askim Bilong Ol Rida” long wanpela Wastauaa i no longtaim i go pinis, klostu nau Jehova bai putim “tingting” bilong em long bel bilong “10-pela kom” (em olgeta strongpela gavman bilong graun) na ol bai givim strong na namba bilong ol long “retpela wel animal” em Yunaitet Nesen. Ol i kolim dispela wel animal tu olsem “piksa bilong dispela wel animal.” (Rev. 13:​14, 15; 17:​3, 16, 17) Orait dispela “10-pela kom” na dispela wel animal i kisim nupela strong bai rausim lotu giaman i stap long olgeta hap bilong graun. Yu ting ol kantri bai tokaut olsem “nau em i taim bilong bel isi na gutpela sindaun”b paslain o bihain long lotu giaman i bagarap na pinis olgeta?—1 Tes. 5:3.

Tru tru yumi no save long wanem taim stret long bihain ol kantri bai tokaut olsem “nau em i taim bilong bel isi na gutpela sindaun!” Sapos yumi save long olgeta dispela infomesen, orait yumi bai pilim olsem i no gat wok long yumi redi na was i stap. Maski i olsem, inap planti taim Jisas i tokim ol disaipel bilong em long “was i stap.” (Mat. 24:42; 25:13; 26:41) Orait nau yumi ken skelim gut tok profet em holi spirit i bin kirapim aposel Pol long raitim long pas em i raitim i go long ol Tesalonaika.

Pol i tok: “Taim ol manmeri i tok olsem: ‘Nau em i taim bilong bel isi na gutpela sindaun!’ orait bagarap bai kamap long ol wantu tasol.” (1 Tes. 5:​2, 3) Planti taim ol pablikesen bilong yumi i stori long tok bilong Pol olsem: Ol kantri bai mekim tokaut olsem “nau em i taim bilong bel isi na gutpela sindaun!” paslain tasol long traipela hevi tru i kirap. Traipela hevi tru bai kirap bihain tasol long Bikpela Babilon—em olgeta lotu giaman—i bagarap na pinis olgeta. Dispela tokaut bai kamap, em bai stap olsem laspela sain i soim olsem traipela hevi tru bai kirap nau.

Tasol taim mipela i mekim sampela moa wok painimaut, mipela i luksave olsem i gat nupela save yumi kisim long dispela. Ating dispela tokaut bilong “nau em i taim bilong bel isi na gutpela sindaun!” bai kamap bihain long olgeta lotu giaman i bagarap na pinis olgeta. Bilong wanem yumi mekim dispela senis? Skelim ol dispela askim.

Lotu giaman i mekim wanem wok bilong sapotim ol woa i kamap namel long ol kantri? Baibel i tok: “Blut bilong ol profet na bilong ol manmeri holi na bilong olgeta manmeri em ol birua i bin kilim ol i dai long graun, blut bilong ol i stap insait long dispela taun” em Bikpela Babilon na mama bilong olgeta pamukmeri. (Rev. 17:​1, 5; 18:24) Insait long planti handret yia, dispela pamukmeri i bin kirapim ol kantri long insait long woa na em i kirapim ol manmeri long mekim pasin teroris. So em i stap olsem as bilong ol woa na ol pait i kamap insait long ol kantri, na em i no kamapim bel isi na gutpela sindaun long ol manmeri. Olsem na dispela askim i kamap: Yu ting ol kantri bai tokaut olsem “nau em i taim bilong bel isi na gutpela sindaun” bihain tasol long Bikpela Babilon i bagarap na pinis olgeta? Yumi ken ting olsem dispela samting inap kamap, tasol yumi no save tru tru.

Wanem samting bai kamap bihain long ol kantri i tokaut olsem “nau em i taim bilong bel isi na gutpela sindaun”? Pol i tok: “Orait bagarap bai kamap long ol wantu tasol.” (1 Tes. 5:3) Stadi nout bilong dispela ves i tok: “Tok bilong Pol long hia i soim olsem liklik haptaim tasol o kwiktaim tasol bihain long dispela tokaut bilong ‘bel isi na gutpela sindaun,’ bagarap bai painim ol man i mekim dispela tokaut. Dispela bagarap bai kamap wantu tasol na i no gat man bai abrusim dispela bagarap.” Sapos ol gavman bilong graun i mekim dispela tokaut olsem “nau em i taim bilong bel isi na gutpela sindaun” bihain long lotu giaman i bagarap na pinis olgeta, orait wantu tasol bagarap bai painim ol dispela gavman na ol bai pinis olgeta.

Lain bilong Jehova bai mekim wanem taim ol i lukim dispela tok profet i kamap tru? Pol i tok: “Yupela ol brata, yupela i no stap long tudak na bai yupela i kirap nogut long dispela de, olsem ol stilman i save kirap nogut long tulait i bruk.” (1 Tes. 5:4) Tingim dispela, sapos ol kantri i tokaut olsem “nau em i taim bilong bel isi na gutpela sindaun” bihain long ol lotu giaman i bagarap na pinis olgeta, orait lain bilong Jehova bai save olsem taim bilong ol kantri long kisim bagarap i kam klostu tru. Tasol long tingting bilong ol dispela kantri, ol bai kirap nogut olsem dispela bagarap bai kamap wantu tasol olsem stilman i kam na i no gat tok lukaut.

So yumi ken wetim wanem samting long kamap? Klostu nau, dispela “10-pela kom” na dispela wel animal i kisim olgeta strong bai bagarapim na pinisim lotu giaman. Dispela em bai kirap bilong traipela hevi tru. Yumi save tu olsem bihain long en ol kantri bai mekim tokaut olsem “nau em i taim bilong bel isi na gutpela sindaun!” Wanem taim ol bai mekim dispela tokaut? Yumi bin stori long tupela haptaim we dispela tokaut inap kamap. Namba 1: Ol inap mekim dispela tokaut paslain long lotu giaman i bagarap na pinis olgeta. Namba 2: Ol inap mekim dispela tokaut bihain long olgeta gavman bilong dispela graun i bagarapim na pinisim tru lotu giaman. Yumi bai wet na lukim wanem samting bai kamap. Planti taim yumi save kliagut moa long ol tok profet bilong Baibel taim truim bilong ol i kamap o bihain tasol long truim bilong ol i kamap pinis.—Skelim Jon 12:16.

Tasol long nau yet, bikpela samting tru yumi mas tingim em pasin bilong yumi long stap gut long God, na yumi no ken tingting tumas long wanem taim ol kantri bai mekim dispela tokaut olsem “nau em i taim bilong bel isi na gutpela sindaun!” “Yumi mas was i stap na holim stretpela tingting” na bai yumi ken stap redi long wanem ol samting i kamap.—1 Tes. 5:6.