Obadia—Kisim Pasin Bilong Daun Tru Long God

Obadia em i bosman long haus king bilong King Ahap, em king nogut husat i larim ol manmeri long olgeta hap bilong Israel i lotuim god Bal. Tasol Obadia i gat pasin bilong daun long Jehova kirap long ‘taim em i yangpela yet.’ (1 Kin. 18:​1-13) So taim Kwin Jesebel i givim oda olsem ol i mas kilim i dai olgeta profet bilong Jehova, Obadia i save olsem em i mas strongim bel na mekim ol samting bilong lukautim laip bilong ol dispela profet na bai kwin i no ken kilim ol i dai. Tingim, laip bilong em inap lus sapos em i haitim wanpela profet tasol. Maski i olsem, Obadia i haitim 100 profet na givim kaikai long ol long taim bilong bikpela hangre tru! Ating i hatwok tru long em i haitim ol dispela profet, long wanem, em isi long planti handret profet giaman bilong king na kwin inap lukim dispela samting em i mekim.—1 Kin. 18:19.

Yumi inap kisim wanem skul long dispela man i save daun tru long God? Em tru olsem Obadia i pret long Ahap, tasol em i pret moa long God winim pasin bilong em long pret long Ahap. Na dispela i mekim na em i strongim bel na lukautim ol brata bilong em, maski em inap lusim laip bilong em yet long mekim olsem. Sapos ol i tambuim lotu i tru long hap yumi stap long en, orait yumi tu i ken kisim pasin bilong daun tru long God. Kain pasin bilong pret na daun tru long God bai strongim yumi long sambai long ol bratasista bilong yumi em ol i karim ol hevi.