Rispektim Ol Disisen Bilong Ol Narapela

1-2. Wai na sampela taim ol pesenel disisen bilong yumi bai i no wankain long ol disisen bilong ol narapela Kristen?

OLSEM WANEM? Yu pilim olsem wanpela i skelim yu long disisen yu bin mekim? Yu bin skelim wanpela wanbilip Kristen long disisen em i bin mekim? Em tru olsem planti bilong yumi bai tok yes long dispela tupela askim.

² Yumi no ken kirap nogut olsem sampela taim ol disisen bilong yumi bai i no wankain long ol disisen bilong ol narapela Kristen. Bilong wanem? Bikos yumi olgeta i no wankain. Yumi olgeta wan wan i gat narapela narapela tingting. Kalsa bilong yumi, famili bekgraun bilong yumi, na ol samting yumi ekspiriensim long laip i stiaim tingting bilong yumi. Maski tingting bilong yumi i no wankain, yumi no ken larim dispela i bagarapim bel isi na pasin wanbel insait long kongrigesen.—Efe. 4:3.

3. Wanem samting inap kirapim yumi long skelim disisen bilong wanpela wanbilip Kristen?

³ Taim wanpela wanbilip Kristen i mekim wanpela disisen em yumi no wanbel long en, yumi inap pilim olsem yumi mas kirapim em long senisim tingting bilong em o tokim ol narapela olsem disisen em i mekim i no stret. Ating yumi gat gutpela risen na yumi mekim olsem. Yumi laikim ol bratasista bilong yumi na yumi laik bai gutpela samting i painim ol. (Prov. 17:17) So yumi no laik lukim ol i mekim wanpela disisen em bihain ol i rigret long en o dispela i bagarapim ol long sait bilong bilip.

4-5. Yumi mas mekim wanem sapos wanpela wanbilip Kristen i laik mekim disisen em i no wankain long disisen yumi bai mekim?

⁴ Yu ting yumi mas tokim brata o sista bilong yumi sapos yumi no wanbel long disisen bilong em? I gat sampela samting inap makim olsem yumi bai tokim em long mekim olsem o nogat. Olsem, sapos yumi painimaut olsem em i tingting long mekim wanpela disisen i brukim wanpela lo bilong Baibel, orait pasin laikim bai kirapim yumi long helpim em long stretim tingting bilong em. (Prov. 27:​5, 6) Na yumi mas mekim wanem sapos em i laik mekim wanpela disisen we i no brukim wanpela lo bilong God, tasol disisen em i laik mekim i no wankain long disisen yumi bai mekim? Yumi kisim bekim bilong dispela askim long tim skripsa bilong yumi long dispela stadi. Yumi “no ken skelim pasin bilong em long skelim ol samting.”—Rom 14:1.

⁵ Yumi inap pilim hatwok yet long rispektim disisen bilong em. Long dispela atikol, yumi bai stori long wai na yumi mas rispektim ol disisen bilong ol narapela na hau yumi ken mekim olsem. Tasol pastaim yumi ken stori long sampela eksampel we ol narapela i mekim ol pesenel disisen bilong ol na dispela inap kirapim yumi long skelim ol brata o sista bilong yumi.

WAI NA YUMI INAP SKELIM PESENEL DISISEN BILONG OL NARAPELA?

6-7. Stori long ol eksampel we yumi inap skelim ol narapela long ol disisen ol i mekim.

⁶ Olsem yumi stori pinis, yumi inap ting olsem tingting bilong yumi i stret long sampela samting bikos long bekgraun o ekspiriens bilong yumi. Na yumi inap ting olsem ol narapela i holim wankain tingting olsem yumi, tasol dispela i no tru. Tingim sampela eksampel. Eksampel 1: Paslain long wanpela brata i kisim tok i tru, em i kamap bikpela wantaim papa husat i save dring planti alkohol. Long wanpela bung, em i lukim ol narapela Kristen i dring alkohol. Em i bel hevi na em i tokim ol olsem samting ol i mekim i no stret. Eksampel 2: Wanpela sista i bin kisim wanpela bikpela sik na em i kamap orait long dispela sik. Bihain, em i painimaut olsem narapela sista i kisim wankain sik olsem em i bin kisim. Dispela sista i laik helpim pren bilong em, so em i putim presa long em long kisim seim medikal tritmen em i bin kisim, ating em long rot bilong kisim sampela kain kaikai tasol, kisim ol marasin long haus sik, o kisim hebol marasin. Eksampel 3: Pastaim, wanpela brata i stap memba bilong wanpela lotu giaman. Em i heitim laip bilong em long pastaim. Taim em i kisim save olsem wanpela wanbilip Kristen i go long fiuneral i kamap long wanpela haus lotu, em i no amamas long dispela samting.a

⁷ Tingim sampela moa eksampel. Eksampel 4: Wanpela brata i kamap bikpela long taim we planti manmeri i pilim olsem i no stret long ol man i gat mausgras o ol meri Kristen i werim longpela trausis long taim bilong miting na kibung samting. Maski dispela brata i save long nupela senis yumi kisim i no longtaim i go pinis, em i tokim ol narapela Kristen brata olsem ol i no ken i gat mausgras na ol sista i mas werim dres tasol taim ol i mekim ol wok lotu. Eksampel 5: Wanpela elda i save long wanpela brata husat i bin kisim sampela moa ediukesen na bihain em i lusim tok i tru. Nau wanpela yangpela brata long kongrigesen bilong dispela elda i tingting long kisim sampela moa ediukesen. Dispela elda i wari long dispela yangpela brata na em i traim long kirapim em na papamama bilong em long senisim tingting bilong ol.

8. (a) Wanem samting inap kirapim wanpela papa o mama long skelim ol narapela papamama? (b) Olsem wanem pasin bilong skelim skelim tumas ol narapela inap bagarapim kongrigesen?

⁸ Tingim samting inap kamap na i kirapim wanpela papamama long skelim ol narapela papamama. Eksampel 6: Olsem wanpela papa o mama, yu wok strong long mekim bikpela long ol pikinini bilong yu “na trenim ol olsem Jehova i makim, na putim tingting bilong em long bel bilong ol.” (Efe. 6:4) Tasol yu inap pilim olsem ol narapela papamama Kristen i larim ol pikinini bilong ol i mekim sampela samting em yu no larim pikinini bilong yu i mekim. Olsem, ol i larim ol pikinini i kam leit long haus, pilaim ol vidio gem i no gat pait long en, o i gat mobail fon taim ol i liklik yet. Olsem na pikinini bilong yu i pilim olsem yu strong tumas long sampela samting em i no ken mekim. Na em inap askim yu olsem: “Wai na yu no olsem papamama bilong pren bilong mi?” Dispela kain samting inap mekim na yu skelim ol narapela papamama. Em tru olsem ol pesenel disisen bilong ol narapela Kristen we i no wankain long ol disisen yumi mekim inap kamapim bel hevi namel long yumi. Olsem, yumi inap skelim hau em i save spendim mani bilong em, hamas taim em i save go long ol holide, o wanem ol amamas em i save kisim. Tasol yumi no ken larim ol samting yumi pilim i stap olsem bikpela samting na i brukim pasin wanbel insait long kongrigesen.

9. Yumi mas tingim wanem samting? (Lukim tu piksa.)

⁹ Ol disisen bilong wanpela Kristen bai i no wankain long ol disisen bilong narapela Kristen, tasol dispela i no makim olsem disisen bilong wanpela i stret na narapela i no stret, nogat. (Rom 14:5) Baibel i kirapim ol Kristen long “stap wanbel long tingting” taim ol i bihainim ol lo bilong Jehova, tasol dispela i no makim olsem yumi mas holim wankain tingting long olgeta pesenel samting bilong yumi. (2 Kor. 13:11) Yumi ken tok ol pesenel disisen bilong yumi i wankain olsem ol rot yumi makim bilong travel i go long wanpela ples. Planti taim, i gat narapela narapela rot yumi ken bihainim bilong i go kamap long wankain ples. Yumi save makim rot em yumi laikim na i stret long yumi bihainim bilong i go kamap long dispela ples. Wankain olsem, ol Kristen inap mekim narapela narapela disisen long ol pesenel samting bilong ol yet, tasol yumi olgeta i laik i go kamap long wankain hap: Yumi laik amamasim Jehova. So yumi no ken skelim ol narapela long ol pesenel disisen bilong ol yet.—Mat. 7:1; 1 Tes. 4:11.

WAI NA YUMI MAS RISPEKTIM PESENEL DISISEN BILONG OL NARAPELA?

10. Olsem Jems 4:12 i kamapim, yumi no gat rait long mekim wanem, na bilong wanem?

¹⁰ Baibel i kamapim sampela risen na yumi mas rispektim pesenel disisen bilong ol narapela. Skelim sampela bilong ol dispela risen. Yumi no gat rait long skelim ol narapela long ol pesenel samting bilong ol yet. (Ritim Jems 4:12.) Jehova em i Jas na Man Bilong Givim Lo. Em tasol i gat rait long putim ol lo em yumi ken bihainim long laip bilong yumi. So Jehova bai skelim ol bratasista bilong yumi long ol disisen ol i mekim na em i no wok bilong yumi long mekim. (Rom 14:10) Yumi no gat rait long skelim o sutim tok long ol disisen ol narapela i mekim sapos em i no stret wantaim ol lo o tingting bilong yumi yet.b

11. Yumi ken mekim wanem long strongim pasin wanbel insait long kongrigesen? (Lukim tu piksa.)

¹¹ Jehova i laik bai ol wokman bilong em i stap wanbel, tasol em i no ekspektim ol long mekim ol wankain samting. God bilong yumi i save laikim kain kain manmeri! Dispela i stap ples klia long ol samting em i wokim. Olsem, taim yumi lukim wanpela diwai, yumi luksave olsem ol lip bilong en i no wankain. Na tingim ol manmeri. Long winim 8 bilion manmeri i stap long graun, i no gat tupela man o meri i luk wankain stret long lukluk na pasin bilong ol. Jehova i wokim yumi i narapela narapela kain na yumi no wankain. Em i no laik bai yumi stap fotokopi bilong narapela narapela. Tasol em i laik bai yumi stap wanbel wantaim. So yumi no ken larim ol samting i no wankain long yumi i brukim lain namel long yumi, nogat. Yumi laik strongim pasin bilong stap bel isi namel long yumi. Yumi laik stap wanbel insait long kongrigesen na dispela i bikpela samting moa winim ol tingting bilong yumi yet na ol samting yumi laik mekim.—Rom 14:19.

RISPEKTIM TINGTING BILONG OL NARAPELA

12-13. Yumi mas tingim wanem samting sapos yumi pilim olsem wanpela i “kirap mekim samting i no stret”? (Galesia 6:1; lukim tu blok “Taim Yu No Wanbel.”)

¹² Taim ol narapela i mekim ol disisen long ol pesenel samting bilong ol. Askim yu yet, ‘Dispela brata o sista i “mekim samting i no stret” o disisen em i mekim i no wankain long disisen mi bai mekim?’ Sapos em i mekim samting i no stret na em inap brukim wanpela lo bilong Baibel, orait askim yu yet, ‘Mi wanpela strongpela Kristen na mi inap stretim em o i gat narapela long kongrigesen olsem wanpela elda inap mekim olsem?’ Sapos yu wanpela strongpela Kristen, na yu inap helpim em, orait traim long toktok gut long em long pasin isi. (Ritim Galesia 6:1.) Planti taim yu bai luksave olsem disisen em i mekim i no rong, tasol disisen bilong em i no wankain long disisen yu bai mekim. Sapos olsem, orait no ken i gat tupela tingting long em o mekim ol tok i no stret long disisen em i mekim. Rispektim rait bilong em long mekim disisen bilong em yet, na no ken skelim em.—Rom 14:​2-4.

¹³ Tingim dispela tok piksa: Sapos yu go long wanpela restron wantaim pren bilong yu, yu ting yu bai strong long em i odaim wankain kaikai olsem yu odaim? Nogat. Yu no inap mekim olsem. Yu bai rispektim rait bilong em long makim kaikai bilong em yet. Bikos wanem kaikai em i makim i no inap mekim wanpela samting long yu. Na sapos ol samting i senis, yu bai i no laik long pren bilong yu i makim kaikai bilong yu, yu yet bai laik makim kaikai yu laikim. Olsem tasol, yumi ken soim rispek long ol narapela taim yumi larim ol i mekim ol pesenel disisen bilong ol yet na yumi no traim long subim ol long bihainim tingting bilong yumi.

14. Olsem wanem yu ken strongim pasin wanbel taim yu mekim ol pesenel disisen bilong yu? (1 Korin 8:​12, 13)

¹⁴ Taim yu mekim ol disisen long ol pesenel samting bilong yu yet. Yu ken strongim pasin wanbel taim yu mekim ol samting we i no bagarapim bel bilong ol narapela o mekim na ol i gat tok long yu. (Ritim 1 Korin 8:​12, 13.) Sampela taim yu save olsem disisen yu laik mekim em “i orait” na i no gat rong long mekim olsem. Tasol sapos dispela bai bagarapim bel bilong wanbilip bilong yu, yu ting i gutpela long mekim dispela disisen?c (1 Kor. 10:​23, 24) Long kain taim olsem, i gutpela long tingim hau ol narapela i pilim na daunim laik bilong yu, maski yu gat rait long mekim disisen bilong yu yet. (Rom 15:1) Tasol yumi bin stori olsem ol narapela i mas rispektim ol disisen yumi mekim long ol pesenel samting bilong yumi yet. Na em tru. Ol i mas rispektim ol disisen bilong yumi wankain olsem yumi rispektim ol disisen bilong ol. Tasol yumi mas tingim tu tok Baibel i mekim long Rom 12:​18, em i tok: “Yupela i mas mekim olgeta samting yupela inap mekim bilong i stap wanbel wantaim olgeta man.” Olsem na yumi laik wok strong long strongim bel isi namel long yumi na ol narapela na yumi no laik mekim ol samting i bagarapim bel bilong ol.

15. Olsem wanem ol elda inap strongim pasin wanbel insait long kongrigesen? (1 Korin 4:6)

¹⁵ Ol elda i save rispektim disisen bilong ol narapela. Ol elda i strongim pasin wanbel insait long kongrigesen taim ol i no kamapim ol lo bilong ol yet long ol pesenel samting bilong ol narapela na ol i no “kalapim ol tok i stap long” Baibel. (Ritim 1 Korin 4:6.) Dispela i makim tu olsem ol i no surikim sampela moa tok antap long ol tok i stap pinis long ol pablikesen bilong yumi em Baibel i as bilong en. Na tu, taim wanpela wanbilip Kristen i askim ol elda long kisim helpim, ol elda i was gut na ol i no larim ol ekspiriens bilong ol yet i stiaim ol edvais ol i givim long em. Ol i kisim ol tok i kam long Baibel bilong givim ol edvais long em.—Ais. 48:​17, 18.

16. Olsem wanem wanpela elda inap soim rispek long ol disisen em lain elda i mekim?

¹⁶ Wanpela elda inap soim rispek tu long ol disisen em lain elda i bung wantaim na mekim. Taim lain elda i beten pinis long God i ken givim holi spirit long ol bilong stiaim ol na ol i mekim riviu na bihainim daireksen i stap long Baibel na mekim wanpela disisen, olgeta wan wan elda insait long lain elda i mas sapotim dispela disisen, maski wanpela elda i gat narapela tingting. (Efe. 5:17) Na tu, ol elda i was gut na bai ol i no kamapim tingting bilong ol yet antap long ol tiokratik daireksen i stap pinis. Olsem, wanpela elda i no inap senisim ol tok i stap pinis long ol pablikesen bilong yumi na bai em i stret wantaim tingting em i gat, nogat.

17. Taim yumi rispektim ol disisen bilong ol narapela, olsem wanem dispela i helpim yumi?

¹⁷ Olsem yumi lainim pinis, yumi olgeta i no wankain. Yumi olgeta wan wan i gat tingting bilong yumi yet na ol samting yumi laik mekim i no wankain. Tasol dispela em i gutpela samting! Yumi gat narapela narapela bekgraun na ol pasin, dispela i mekim na kongrigesen em naispela ples em yumi ken bung wantaim na stap long en. So yumi no laik bai ol samting i no wankain long yumi i brukim lain namel long yumi. Yumi laik strongim bel isi. Yumi laik was gut na bai yumi no bagarapim bel bilong ol narapela. Yumi rispektim ol disisen bilong ol narapela long ol pesenel samting bilong ol. Taim yumi mekim olsem, God bai blesim hatwok bilong yumi. Yumi bai stap amamas, na kongrigesen bai stap wanbel.—Sng. 133:1; Mat. 5:9.