Manain—Em i Putim Wok Lotu i Stap Nambawan

Manain em wanpela bilong ol brata husat i go pas long mekim wok long kongrigesen long Antiok long taim bilong ol aposel. Em i “bin kisim skul wantaim Herot, em hetman i bosim distrik.” (Apo. 13:1) Olsem na Manain i bin kisim gutpela ediukesen na ating em i kamap bikpela long famili i gat planti mani kago.

Maski Manain i gat gutpela sindaun na bikpela save, em i kamap wanpela Kristen na sapotim kongrigesen. Em i no yusim bikpela save bilong em o pasin pren bilong em wantaim ol man i gat namba bilong helpim em yet, nogat. Em i mekim ol wok bilong helpim ol brata.

Eksampel bilong Manain i soim olsem pasin bilong lotuim Jehova i mas i stap nambawan bikpela samting na i no biknem o mani kago bilong dispela graun. Olsem Manain, yumi mas putim ol wok lotu i stap nambawan samting na i no ol samting bilong dispela graun. (Mat. 6:33) Na tu, maski yumi tingim ediukesen olsem bikpela samting, yumi mas “skelim gut wanem ol samting i bikpela samting moa” na yumi no larim skul na wok mani samting i pulim nabaut tingting bilong yumi na yumi lusim pasin bilong lotuim Jehova.—Fili. 1:​9, 10.