No Ken Larim Ol Samting i Pulim Nabaut Tingting Bilong Yu

1-2. Olsem wanem wanpela bikpela samting inap kamap olsem samting i pulim nabaut tingting?

WANEM laspela taim yu bin sakim wanpela samting i laik pulim nabaut tingting bilong yu? Ating wanpela samting i kamap na i pulim tingting bilong yu i go longwe long wanpela samting yu wok long mekim na yu mas makim wanem samting i bikpela samting moa. Olsem, piksaim long tingting olsem fon bilong yu i ring taim yu wok long draiv long rot. Ating em bikpela samting long yu kisim dispela fon kol, tasol long dispela taim stret em i kamap olsem samting bilong pulim tingting na inap kamapim hevi. Em i bikpela samting olsem yu mas putim tingting olgeta long draivim kar.

² Long laip bilong yumi, i gat planti samting em ol i bikpela samting. Tasol yumi save olsem em i bikpela samting moa long yumi mas givim bel tru long mekim ol wok lotua bilong yumi. (Mat. 6:33) Olsem ol gutpela draiva, ol lain bilong Jehova i save luksave long wanem ol samting inap pulim nabaut tingting bilong ol long ol bikpela samting.—Prov. 4:25; Mat. 6:22.

3. Olsem wanem dispela atikol bai helpim yumi long sakim ol samting i laik pulim nabaut tingting bilong yumi?

³ Yumi no laik bai wanpela samting i pulim nabaut tingting bilong yumi long ol wok lotu bilong yumi. Maski i olsem, i gat ol samting i save kamap na em isi long ol i pulim nabaut tingting bilong yumi. (Luk 21:​34-36) So bilong helpim yumi long putim tingting olgeta long ol wok bilong Jehova yumi mekim, yumi ken skelim (1) wanem ol samting i save pulim nabaut tingting bilong yumi, (2) hau Jisas i sakim ol samting i laik pulim nabaut tingting bilong em, na (3) hau yumi ken sakim ol samting i laik pulim nabaut tingting bilong yumi long nau.

WANEM OL SAMTING I SAVE PULIM NABAUT TINGTING BILONG YUMI?

4-6. Em i isi long wanem ol samting inap pulim nabaut tingting bilong yumi?

⁴ I gat planti samting long laip bilong yumi wan wan i save kisim bikpela haptaim na strong bilong yumi. Olsem, ating yumi gat hevi long sait bilong helt o sampela samting bilong yumi yet o bilong famili em yumi mas mekim. Em tru olsem ol i bikpela samting na yumi mas yusim taim na strong bilong yumi long mekim ol dispela samting. Tasol yu ting ol inap kamap olsem samting bilong pulim nabaut tingting? Dispela samting inap kamap sapos yumi tingting tumas long ol dispela samting na ol i kisim bikpela haptaim na strong bilong yumi.

⁵ Na tu, planti bilong yumi i stap long ol hap we i gat ol pait i kamap, hevi bilong mani, ol bikpela sik i kamap, na planti bikpela pait i olsem sain bilong dispela haptaim bilong nau. (2 Tim. 3:1) Taim ol dispela hevi i painim yumi, yumi inap wari nogut tru na oltaim yumi tingting planti long ol dispela samting.

⁶ Ating yumi save long ol manmeri em ol dispela samting i bin putim bikpela hevi tru long ol. I klia tru olsem ol i bel hevi tru long ol samting i painim ol. Jehova i no bin wokim yumi ol manmeri bilong karim ol kain hevi olsem. Olsem na sampela i pilim olsem laip bilong ol bai i no inap go bek long nomol gen bihain long ol dispela hevi ol i karim! Em as na sampela i traim long daunim ol dispela hevi bilong ol long rot bilong kisim ol amamas na mekim ol samting bilong rileks. Yumi ken mekim wanem sapos yumi bungim kain ol hevi olsem? Yumi ken stori long ol samting yumi ken lainim long Jisas na dispela bai helpim yumi long sakim ol samting i laik pulim nabaut tingting bilong yumi long lotuim Jehova.

HAU JISAS I SAKIM OL SAMTING I LAIK PULIM TINGTING BILONG EM?

7. Wanem samting inap pulim nabaut tingting bilong Jisas?

⁷ I gat planti samting inap pulim nabaut tingting bilong Jisas, olsem ol samting long i stap bilong ol manmeri na long ol wok politik. Long taim bilong em, planti manmeri i bin stap rabis na ol i gat sik. (Mat. 14:14; Mak 14:7) Ol i karim hevi bilong pasin i no stret long han bilong ol Rom na ol wanlain Juda. Taim ol manmeri i luksave olsem Jisas i gat strong na em i gat save long wokim ol mirakel, ol i laik mekim em i kamap king bilong ol. (Jon 6:​14, 15) Na tu, Satan i laik pulim Jisas long rot bilong traim em long sotkat na kamap king bilong graun olgeta. (Mat. 4:8, 9) Na aposel Pita, em wanpela bilong ol gutpela pren bilong Jisas, em i bin kirapim Jisas long isi long em yet, em i tok: “Bikpela, marimari long yu yet.”—Mat. 16:​21, 22.

8. Olsem wanem Jisas i sakim ol samting i laik pulim nabaut tingting bilong em?

⁸ Olsem wanem Jisas i sakim ol samting i laik pulim nabaut tingting bilong em? Em i mekim olsem long 3-pela rot. Namba 1, em i kisim wankain tingting olsem bilong Jehova. (Jon 8:28; 14:9) Namba 2, em i bisi tru long mekim ol wok lotu. (Mat. 9:35) Na namba 3, em i holim stretpela tingting long wanem samting i bikpela samting moa. (Jon 4:34) Em i sanap strong na sakim ol traim bilong Satan na em i luksave olsem maski Pita i traim long helpim em, tok bilong em i no stret wantaim laik bilong God. (Mat. 4:10; 16:23) Jisas i no larim tingting bilong ol manmeri, ol tok ol i mekim, o ol samting ol i mekim i pulim em i go longwe long inapim ol samting God i tingting pinis long mekim. Yumi inap bungim ol hevi we i no wankain long ol hevi i bin painim Jisas. Tasol taim yumi bihainim eksampel bilong Jisas long dispela 3-pela rot, yumi inap sakim ol samting i laik pulim nabaut tingting bilong yumi olsem Jisas i mekim.

HAU YUMI KEN SAKIM OL SAMTING I LAIK PULIM TINGTING BILONG YUMI?

9. Wanem insait bilong dispela tok “save gut long laik bilong Jehova”? (Efesus 5:17)

⁹ Lain long holim wankain tingting olsem bilong Jehova. Taim yu mekim olsem, dispela inap helpim yu long “save gut long laik bilong Jehova.” (Ritim Efesus 5:17.) Yumi ken lain long ol samting Jehova i amamas long en long rot bilong ritim Baibel na tingim tingim long bel ol tok bilong en. Yumi ken mekim olsem maski Baibel i no kolim stret ol hevi i wok long painim yumi. Hau yumi ken mekim olsem? Yumi ken mekim olsem long rot bilong kliagut long tingting bilong Jehova na redi long larim dispela i stiaim wokabaut bilong yumi.

10. Olsem wanem yumi ken kisim save long tingting bilong Jehova?

¹⁰ Yumi ken kisim save long tingting bilong Jehova long rot bilong stadi long Baibel na skelim ol pasin em i save mekim long ol manmeri. (Jer. 45:5) Taim yumi ritim ol stori long Baibel, yumi ken askim yumi yet olsem: ‘Dispela stori i givim wanem skul long mi long Jehova? Hau mi ken yusim dispela stori long stiaim tingting bilong mi?’ Em tru olsem ol tingting bilong em i antap moa long yumi ol manmeri. (Ais. 55:9) Olsem na i stret yumi askim em long skulim yumi long hau yumi ken mekim laik bilong em. (Sng. 143:10) Na yumi ken beten na askim em long helpim yumi long kliagut long tingting bilong em na long bihainim wankain tingting olsem bilong em.—1 Jon 5:14.

11. Jehova i laik bai yumi mas mekim wanem?

¹¹ Taim yumi lain long holim wankain tingting olsem bilong Jehova, yumi kliagut olsem em i laik bai yumi sakim ol samting i laik pulim nabaut tingting bilong yumi na bai yumi ken soim olsem yumi redi long pinis bilong dispela haptaim bilong nau. (Mat. 24:44) Em i no laik bai yumi tingting planti long ol samting na larim dispela i daunim yumi. (Mat. 6:​31, 32) So taim yumi tingting planti long helt bilong yumi, wok mani bilong yumi, haus bilong yumi, o sampela hevi bilong yumi yet na hevi bilong famili, Jehova i givim yumi ol gutpela edvais bilong helpim yumi. Em i tokim yumi long bilip na wetim em i givim yumi savetingting na strong bilong helpim yumi long karim ol hevi bilong yumi.—Sng. 55:22; Prov. 3:​5-7.

12. Wanem samting i ken helpim yumi long stap amamas yet taim yumi wari long ol hevi i kamap long dispela graun? (Matyu 5:3)

¹² Stap bisi yet long mekim ol wok lotu. Yumi olgeta i save wari na tingting planti long ol samting i kamap long dispela graun, em ol samting we yumi no inap kontrolim. Olsem na bilong helpim yumi long no ken larim ol dispela samting i pulim nabaut tingting bilong yumi, yumi putim tingting olgeta long ol wok lotu bilong yumi. Yumi ken stap amamas taim yumi wok strong long pas gut wantaim Jehova bikos em i wokim yumi bilong mekim olsem. (Ritim Matyu 5:3.) Yumi ken mekim olsem long rot bilong stadi long Baibel na kisim save long em, na wok strong long lotuim em na mekim wanem wanem wok bilong em yumi inap long mekim. Taim yumi mekim olsem, yumi bai amamasim Jehova, long wanem, yumi yusim gut taim bilong yumi.—Prov. 23:15.

13. Olsem wanem yumi ken “yusim gut taim” bilong yumi?

¹³ Yumi ol Kristen i tingting strong long “yusim gut taim” bilong yumi. (Efe. 5:​15, 16) Yumi luksave olsem tok Baibel i mekim long ol dispela ves i no makim tasol hau yumi yusim taim bilong yumi long olgeta wan wan de, nogat. Em i kirapim yumi long skelim gut hau yumi yusim gut taim bilong yumi paslain long Jehova i pinisim dispela haptaim nogut bilong nau. Hau yumi ken yusim gut taim bilong yumi? Sapos yumi lusim bikpela haptaim long watsim ol nius i stori long ol samting nogut i wok long kamap long graun, dispela inap pulim nabaut tingting bilong yumi na mekim yumi bel hevi, na yumi no givim bel olgeta long mekim wok bilong Jehova. So i gutpela yumi skelim gut na yumi no lusim bikpela haptaim tumas long watsim o ritim ol nius nogut! Long dispela rot, yumi no inap wari tumas long ol samting i kamap na yumi bai givim bel olgeta long mekim ol wok lotu. Na tu, yumi ken tingting long mekim bikpela wok moa bilong Jehova, olsem mekim planti moa gobek. Yumi save olsem em i bikpela samting long yumi painim olgeta kain rot bilong helpim ol manmeri long “kisim stretpela save long tok i tru” na bai God i ken kisim bek ol.—1 Tim. 2:4.

14. Taim yumi bisi long mekim ol wok lotu, dispela i helpim yumi olsem wanem? (Lukim tu piksa.)

¹⁴ Taim yumi bisi long mekim ol wok lotu, yumi bai holim stretpela tingting long dispela haptaim nau yumi stap long en. Taim yumi lukim ol pait i kamap long olgeta hap, hevi bilong mani, na ol bikpela sik i kamap, dispela i no pretim yumi. Yumi lukim ol dispela samting olsem sain i tokaut olsem tok profet bilong Baibel i wok long kamap tru. Ol dispela samting i no pretim yumi, nogat. Ol i strongim bilip bilong yumi olsem ol samting Jehova i tingting pinis long mekim long yumi long bihain, ol bai kamap tru. Yumi ken stap bel isi na wok yet long trastim Jehova long helpim yumi long karim ol dispela hevi.—Sng. 16:8; 112:​1, 6-8.

15. Taim yumi “bihainim gutpela tingting,” dispela bai helpim yumi olsem wanem? (1 Pita 4:7)

¹⁵ Save long wanem samting i bikpela samting moa. Long nau, planti manmeri long olgeta hap bilong graun i tingting oltaim long kisim amamas na ol i no tingim olsem pinis bilong dispela haptaim bilong nau i wok long i kam klostu. Tru, yumi ken mekim ol samting bilong kisim amamas, tasol yumi mas “bihainim gutpela tingting” na bai yumi abrusim tingting bilong dispela graun long sait bilong amamas. (Ritim 1 Pita 4:7.) Dispela i makim wanem samting? Dispela i makim olsem yumi mas skelim gut ol samting na bai yumi ken holim stretpela tingting long ol amamas yumi laik kisim na mekim ol gutpela disisen. Ol gutpela disisen yumi mekim bai soim olsem yumi laik holim wankain tingting olsem bilong Jehova na yumi kliagut long wanem ol samting i bikpela samting moa.—2 Tim. 1:7.

16. Jisas i putim tingting olgeta long wanem samting paslain long em i dai?

¹⁶ Jisas i holimpas pasin bilong tingim gut ol bikpela samting. Long ol laspela aua bilong em long graun paslain long em i dai, em i putim tingting olgeta long stap gut long God na inapim laik bilong Em. Olsem na em i beten strong tru. Jisas i was i stap, tasol ol disaipel bilong em ol i slip. Ol i slip bikos “bel hevi i pinisim strong bilong ol.”—Luk 22:​39-46; Jon 19:30.

17. (a) Wai na planti lain i save yusim sosel midia? (b) Olsem wanem dispela inap pulim nabaut tingting bilong ol? (Lukim tu piksa.)

¹⁷ Wankain olsem ol disaipel bilong Jisas, sampela taim yumi inap pilim bel hevi na taiet tru. Ol samting i kamap long graun olsem mak bilong las de inap mekim na yumi tingting planti na wari. Planti manmeri i painim rot bilong stap amamas long rot bilong yusim sosel midia. Ol i yusim sosel midia long konek wantaim ol pren na ol famili bilong ol long graun olgeta na ol i serim ol nius, ol poto, na ol narapela samting. Na ol i yusim tu long watsim planti muvi, ol vidio, na long pilai gem. Tasol ol manmeri i yusim sosel midia inap pas tru long dispela samting, na lusim bikpela haptaim na strong bilong ol long watsim olgeta nupela samting. Bilong helpim yumi long holim stretpela tingting long sosel midia, yumi ken askim yumi yet olsem, ‘Pasin bilong mi long yusim sosel midia i givim nupela strong long mi, o em i pasim tingting bilong mi long tingim wanem ol samting i bikpela samting moa?’

18. Wai na yumi mas skelim gut ol amamas yumi laik kisim?

¹⁸ Pasin bilong skelim gut ol samting em i bikpela samting taim yumi laik watsim ol muvi, lukim ol TV siris, lukim ol sotpela vidio long Intenet, o pilaim ol vidio gem. Ol dispela samting inap givim amamas long yumi na inap helpim yumi long rileks. Tasol yumi mas skelim gut wanem ol amamas yumi laik kisim na inap long wanem mak. Planti taim ol vidio sevis i save kamapim ol nupela nupela sajesten long man i watsim samting na dispela inap kirapim em long lukim piksa bilong pait o pasin pamuk. Dispela samting i bin kamap long wanpela brata long Esia. Pastaim em i kirap long lukim priviu bilong ol muvi long wanpela websait. Taim em i wok long watsim ol vidio em dispela websait i sajestim, i no longtaim em i kirap long watsim ol piksa bilong pasin doti. Na bihain em i kirap long lukim ponografi. Gutpela tru olsem ol elda i helpim em na ol gutpela pren bilong em tu i helpim em, na nau em i mekim strongpela disisen long dilitim ol aplikesen em i save watsim muvi long en, na em i makim stret taim em bai yusim fon bilong em. Dispela ekspiriens i soim olsem em i bikpela samting long skelim gut wanem ol amamas yumi laik kisim.

19. Wanem samting inap kamap sapos yumi tingting oltaim long kisim amamas?

¹⁹ Em i gutpela long yumi skelim gut tu taim yumi laik kisim amamas na ol holide. Yumi olgeta i mas i gat taim bilong rileks na kisim malolo sampela taim, em i gutpela bilong helpim yumi na em i helpim tu helt bilong yumi. Tasol sapos yumi tingting tumas long kisim amamas, dispela inap mekim na yumi no balensim gut ol samting na yumi kisim haptaim we yumi mas lusim bilong mekim ol bikpela samting. (Fili. 1:10) Yumi wan wan yet i mas wokim disisen long wanem samting yumi laik mekim na hamas haptaim yumi mas lusim bilong mekim ol dispela samting. Taim yu laik mekim kain disisen olsem, askim yu yet olsem: ‘Haptaim mi lusim bilong kisim amamas na go long ol holide i soim olsem mi bihainim gutpela tingting? Mi soim olsem mi tingim samting i bikpela samting moa na mi redim mi yet long “pinis bilong olgeta samting”?’

20. Taim yumi sakim ol samting i laik pulim nabaut tingting bilong yumi, olsem wanem dispela i helpim yumi?

²⁰ Taim yumi sakim ol samting i laik pulim nabaut tingting bilong yumi long ol wok lotu bilong yu, dispela i helpim yumi. (Ais. 48:17) Jehova bai helpim yumi long karim ol hevi i painim yumi na winim ol dispela hevi. Ol samting i kamap long dispela graun i no inap pretim yumi. Na yumi bai sakim pasin bilong putim amamas i stap olsem namba wan samting long laip bilong yumi. So yumi ken tingting strong long holim wankain tingting olsem bilong Jehova, givim bel tru long mekim ol wok lotu, na tingim gut wanem ol samting i bikpela samting moa. Taim yumi mekim olsem, yumi bai sakim ol samting i laik pulim nabaut tingting bilong yumi na yumi bai “holim strong dispela laip em i laip tru.”—1 Tim. 6:19.