Wok Yet Long “Kisim Save Long God”

1. Wanem sampela samting em yumi ol man i nidim? (Matyu 5:3)

JEHOVA i bin wokim yumi ol man, olsem na em i save long ol samting yumi nidim. Olsem, bilong yumi ken stap laip yumi mas i gat kaikai, klos, na haus. Sapos yumi no gat ol dispela samting inap liklik haptaim, laip bilong yumi bai hatwok tru. Jehova i save olsem yumi nidim ol dispela samting, na tu, em i save olsem yumi mas kisim save long em na larim em i stiaim yumi. (Ritim Matyu 5:3.) Sapos yumi laik stap amamas tru, orait yumi mas luksave long dispela na mekim yet ol samting bilong Jehova i ken stiaim yumi.

2. Wanem insait bilong dispela tok “hangre long kisim save long God”? Stori long tok piksa.

² Wanem insait bilong dispela tok “hangre long kisim save long God”? Long tok Grik, dispela tok inap makim wanpela husat i laik tru long ol narapela i mas helpim em. Tingim wanpela man i stap rabis tru na i save slip long strit. Piksaim long tingting olsem ol klos bilong em i olpela na i bruk, na em i sindaun long kona bilong wanpela strit. Em i no gat strong bikos em i no kaikai, na ol narapela man i sakim em bikos long lukluk bilong em, na long olgeta de em i save pilim hat bilong san na pilim kol bilong nait. Em i save olsem em i mas kisim helpim na bai i stap bilong em i ken kamap gutpela. Olsem tasol, wanpela husat i hangre long kisim save long God, em i mas kisim helpim i kam long Jehova na bai em i ken stap gut long sait bilong bilip. Olsem na em i laik tru long kisim helpim long planti gutpela tok i olsem kaikai bilong strongim bilip em Jehova i givim long ol manmeri i laikim Em.

3. Yumi bai stori long wanem samting long dispela atikol?

³ Long dispela atikol, pastaim yumi bai stori long skul yumi inap kisim long meri Fonisia husat i askim strong Jisas long helpim em. Dispela stori i kamapim klia tripela pasin em ol man i hangre long kisim save long Jehova i mas kisim. Bihain, yumi bai stori long eksampel bilong aposel Pita na Pol na King Devit, em ol strongpela bilipman.

EM I GAT PASIN DAUN, I NO GIVAP, NA BILIP

4. Wanpela meri Fonisia i laik bai Jisas i mekim wanem bilong helpim em?

⁴ Wanpela taim, wanpela meri Fonisia i kam lukim Jisas. “Wanpela spirit nogut i stap long pikinini meri” bilong em. (Mat. 15:​21-28) Dispela meri i brukim skru long Jisas na em i askim strong Jisas long helpim em. Em i soim ol gutpela pasin taim em i toktok wantaim Jisas, na em ol pasin yumi tu i ken bihainim. Yumi ken stori long sampela bilong ol dispela pasin.

5. (a) Dispela meri Fonisia i gat wanem ol pasin? (b) Jisas i mekim wanem bilong helpim em? (Lukim tu piksa.)

⁵ Dispela meri Fonisia i gat pasin daun tru. Wai na yumi tok olsem? Bikos em i no bel hevi taim Jisas i yusim wanpela tok piksa we i makim olsem dispela meri i olsem ol liklik dok, ating em kain animal em ol famili em ol i no bilong lain Juda i save lukautim long ol haus bilong ol. Yu bai mekim wanem sapos Jisas i mekim kain tok olsem long yu? Yu bai bel hevi na givap long askim em long helpim yu? Dispela meri Fonisia i no bin mekim olsem. Em i mekim pasin daun, na tu, em i no givap. Yumi luksave long dispela bikos em i wok yet long askim Jisas long helpim em. Wanem samting i kirapim meri Fonisia long mekim olsem? Em i bilip long Jisas. Strongpela bilip bilong dispela meri i kirapim Jisas long helpim em. Maski Jisas i bin tokim em olsem God i salim em i kam bilong helpim “ol sipsip bilong lain Israel i lus pinis,” Jisas i rausim spirit nogut i stap long pikinini meri bilong dispela meri husat i no bilong lain Juda.

6. Yumi kisim wanem skul long stori bilong meri Fonisia?

⁶ Bilong Jehova i ken stiaim yumi long rot bilong Baibel, yumi mas i gat ol wankain pasin em meri Fonisia i gat. Yumi mas i gat pasin daun, i no givap, na i gat strongpela bilip. Man i gat pasin daun, oltaim em bai askim God long helpim em. Yumi mas i gat strongpela bilip tu long Krais Jisas na trastim ol man em i yusim bilong stiaim ol disaipel bilong em. (Mat. 24:​45-47) Jehova na Pikinini bilong em i amamas tru long helpim na stiaim ol man em ol i gat pasin daun, ol i no givap, na ol i bilip. (Skelim Jems 1:​5-7.) Nau yumi bai skelim hau Jehova i givim yumi kaikai, klos, na ples hait bilong bilip. Yumi bai stori long hau yumi ken kisim ol dispela samting bilong helpim yumi long stap laip long rot bilong skelim eksampel bilong aposel Pita, aposel Pol, na King Devit.

OLSEM PITA, WOK YET LONG KISIM KAIKAI BILONG STRONGIM BILIP

7. (a) Jisas i givim wanem wok long Pita long mekim? (b) Pita i mas mekim wanem narapela wok? Stori long dispela. (Hibru 5:14–6:1)

⁷ Tingim eksampel bilong aposel Pita. Em i wanpela bilong ol fes Juda long luksave olsem Jisas em i Mesaia, em man Jehova i yusim long givim “ol tok . . . i bringim man i go long laip oltaim.” (Jon 6:​66-68) Paslain long Jisas i kirap bek na go long heven, em i tokim Pita olsem: “Givim kaikai long ol liklik sipsip bilong mi.” (Jon 21:17) Pita i stap gut long mekim wok Jisas i tokim em long mekim, na Jehova i yusim em long raitim tupela pas em bihain ol i kamap ol buk bilong Baibel. Tasol Pita i mas wok yet long kisim ol kaikai bilong strongim bilip bilong em yet. Olsem, em i stadi long ol pas em aposel Pol i bin raitim na ol i kamap hap bilong Baibel pinis. Pita i tokaut olsem i gat sampela tok em Pol i bin raitim we i “hatwok long kliagut long en.” (2 Pita 3:​15, 16) Tasol Pita i no givap, em i wok yet long stadi na bilip olsem Jehova bai helpim em long kliagut na bihainim ol dispela tok em “strongpela kaikai” bilong bilip em holi spirit i bin kirapim Pol long raitim long ol pas bilong em.—Ritim Hibru 5:14–6:1.

8. Pita i mekim wanem taim em i kisim nupela daireksen i kam long God long rot bilong wanpela ensel?

⁸ Pita i soim olsem em i bilip long Jehova long rot bilong bihainim daireksen em i kisim. Olsem, taim em i stap long Jopa em taun i gat haba long en, Pita i lukim visen we wanpela ensel bilong God i tokim em long kilim i dai na kaikai ol animal em Lo Bilong Moses i tok ol i no klin. Long ol Juda, kain daireksen bai mekim ol i kirap nogut tru. Pastaim, Pita i bekim tok olsem: “Bikpela, mi no inap tru long mekim. I no gat wanpela taim mi bin kaikai wanpela samting i doti na i no klin.” Tasol ensel i tokim em: “Ol samting God i mekim i kamap klin pinis, yu no ken tok ol i doti.” (Apo. 10:​9-15) Pita i kisim poin bilong tok em i mekim. Hau na yumi save long dispela? Bihain liklik long em i lukim dispela visen, tripela man em Kornilius—husat i no bilong lain Juda—i salim i kam lukim em na invaitim em i go lukim bosman bilong ol Kornilius. Paslain long em i lukim visen, Pita i no save go insait long haus bilong ol man em ol i no bilong lain Juda. Ol Juda i tingim ol man bilong ol arapela lain olsem ol man i no klin. (Apo. 10:​28, 29) Tasol kwiktaim Pita i bihainim nupela daireksen em Jehova i kamapim long em. (Prov. 4:18) Em i autim tok long Kornilius na ol wanhaus bilong em na em i amamas tru long lukim ol i bilip long tok i tru, kisim holi spirit, na kisim baptais.—Apo. 10:​44-48.

9. Long wanem tupela rot yumi inap kisim helpim taim yumi stadi long ol strongpela tok i tru bilong Baibel?

⁹ Olsem Pita, oltaim yumi mas stadi long ol bikpela tok i tru bilong Baibel. Na tu, yumi mas i gat laik long kliagut long ol strongpela tok i tru bilong Baibel, ating em ol tok i hatwok moa long kliagut long en. Yumi mas lusim haptaim na redi long mekim wok painimaut bilong kliagut moa long Tok Bilong God, tasol gutpela samting bai kamap long dispela. Wai na yumi tok olsem? Bikos yumi bai kisim helpim long tupela rot. Namba 1, yumi bai lainim sampela samting long Jehova we i strongim tru pasin laikim na pasin rispek yumi gat long em. Na namba 2, dispela bai kirapim yumi long tokim ol narapela long ol gutpela samting yumi kisim save long en long Papa bilong yumi long heven. (Rom 11:33; Rev. 4:11) Yumi kisim narapela skul tu long Pita: Taim yumi kisim ol nupela daireksen long save bilong yumi long Baibel, kwiktaim yumi mas senisim tingting na pasin bilong yumi. Long dispela rot, yumi bai wok yet long kisim gut ol kaikai bilong strongim bilip na Jehova bai wok yet long yusim yumi long mekim wok bilong em.

OLSEM POL, KISIM OL NUPELA PASIN OLSEM KLOS

10. Olsem Kolosi 3:​8-10 i kamapim, yumi mas mekim wanem bilong amamasim Jehova?

¹⁰ Sapos yumi laik amamasim Jehova, orait yumi mas yusim gut narapela samting Jehova i givim bilong strongim bilip, em ol klos bilong bilip. Wanem insait bilong dispela tok? Aposel Pol i tok yumi mas “rausim olpela pasin” na werim “nupela pasin” olsem yumi werim klos. (Ritim Kolosi 3:​8-10.) Bilong werim nupela pasin olsem klos em samting i gat hatwok bilong en na yumi mas mekim long olgeta taim. Tingim eksampel bilong Pol. Taim em i yangpela yet, em i mekim ol samting bilong God i ken amamas long em. (Gal. 1:14; Fili. 3:​4, 5) Tasol em i no gat stretpela save long samting God i tingting pinis long mekim, olsem na em i stap nogut tru long sait bilong bilip. Em i sakim ol tok Krais i skulim ol man long en na em i gat pasin antap, olsem na em i kamap “man bilong mekim pasin bikhet.” Em i mekim ol pasin em God i no amamas long en.—1 Tim. 1:13.

11. Pol i mas wok strong long daunim wanem pasin kranki bilong em? Stori long dispela.

¹¹ Paslain long Pol i kamap Kristen, em i gat pasin bilong belhat hariap. Buk Aposel i stori olsem wanpela taim Pol i belhat nogut tru long ol disaipel bilong Jisas na em i mekim ol tok bilong “bagarapim ol . . . na kilim ol i dai.” (Apo. 9:1) Bihain long em i kamap wanpela Kristen, Pol i wok strong long rausim olpela pasin bilong em long belhat hariap. (Efe. 4:​22, 31) Maski i olsem, wanpela taim “bikpela kros i kamap namel” long Pol na Barnabas. (Apo. 15:​37-39) Pol i bel hevi long dispela, tasol dispela i no mekim em i givap. Em i wok yet long “paitim tru bodi bilong [em] yet,” olsem pait long daunim ol pasin kranki bilong em na bai em i ken amamasim yet Jehova.—1 Kor. 9:27.

12. Wanem samting i helpim Pol long rausim olpela pasin bilong em?

¹² Pol i winim pait bilong daunim olpela pasin bilong em na kisim nupela pasin bikos em i bilip long Jehova, na em i no bilip long strong bilong em yet. (Fili. 4:13) Olsem Pita, Pol inap long mekim olsem bikos “long strong God i givim em.” (1 Pita 4:11) Maski i olsem, sampela taim Pol i pilim olsem em i no gutpela man. Tasol taim em i pilim olsem em i laik givap, em i tingim ol gutpela samting Papa bilong em long heven i mekim long em, na dispela i strongim tingting bilong em long wok yet long mekim ol samting bilong amamasim Jehova.—Rom 7:​21-25.

13. Hau yumi ken bihainim pasin bilong Pol?

¹³ Yumi ken bihainim pasin bilong Pol taim yumi luksave olsem maski yumi mekim wok bilong Jehova inap hamas yia pinis, yumi mas wok yet long rausim olpela pasin na kisim nupela pasin olsem klos bilong bilip em Jehova i givim long yumi. Sapos yumi popaia, olsem yumi belhat hariap o yumi tok hat long narapela, orait yumi no ken ting olsem yumi no gutpela moa long ai bilong God, nogat. Yumi mas wok yet long winim mak yumi putim, em long senisim tingting na pasin bilong yumi. (Rom 12:​1, 2; Efe. 4:24) Taim yumi mekim olsem, yumi ken tingim olsem ol klos tru tru yumi werim i save fitim yumi gut, tasol long sait bilong bilip yumi mas mekim ol senis na bai yumi ken fit i go insait long ol dispela klos bilong bilip em Jehova i givim long yumi. I stret long yumi mekim ol senis na bai yumi ken bihainim gut ol lo bilong God.

OLSEM DEVIT, STAP YET LONG PLES HAIT BILONG JEHOVA

14-15. Long wanem rot Jehova i stap olsem ples hait bilong lain bilong em? (Buk Song 27:5) (Lukim tu piksa.)

¹⁴ Bilong stap amamas tru, yumi mas i gat ol kaikai na klos bilong bilip, na i gat narapela samting moa yumi nidim. Yumi nidim haus o ples hait bilong bilip. Em wanem samting? Na hau yumi ken stap yet insait long dispela ples hait bilong bilip?

¹⁵ King Devit i tok long ples hait em Jehova i lukautim em long en. (Ritim Buk Song 27:5.) Jehova i save banisim lain bilong em long olgeta kain man na ol samting we inap bagarapim pasin bilong ol long bilip long Em. Long wanem ol rot Jehova i save lukautim lain bilong em long ol samting nogut i laik painim ol long nau? Em i tok promis olsem i no gat wanpela wepen em ol i wokim bilong pait long yumi inap bagarapim yumi. (Sng. 34:7; Ais. 54:17) Tru, Satan na ol spirit nogut i gat strong, tasol ol i no inap bagarapim yumi na pinisim yumi olgeta. Maski ol i kilim yumi i dai, Jehova bai kirapim bek yumi. (1 Kor. 15:​55-57; Rev. 21:​3, 4) Na tu, taim yumi tingting planti, Jehova i save mekim isi bel bilong yumi na bai yumi ken lotuim em yet. (Prov. 12:25; Mat. 6:​27-29) Na gutpela Papa bilong yumi i givim yumi bikpela lain famili bilong ol bratasista em ol i sapotim yumi na ol elda em ol i lukautim yumi. (Ais. 32:​1, 2) Taim yumi olgeta i bung wantaim, dispela i save helpim yumi long tingim ol rot em Jehova i save lukautim yumi.—Hib. 10:​24, 25.

16. Long wanem ol rot Jehova i lukautim Devit?

¹⁶ Taim Devit i bihainim tok bilong Jehova, em i abrusim ol hevi inap painim ol man em long laik bilong ol yet ol i mekim sin. (Skelim Provep 5:​1, 2.) Tasol taim Devit i sakim ol lo bilong God, Jehova i no banisim em long ol hevi i kamap long ol disisen em i bin mekim. (2 Sml. 12:​9, 10) Olsem wanem long ol taim we Devit i karim pen na hevi maski em i no bin mekim wanpela rong? Long kain taim olsem, Devit i beten na autim bel na tingting bilong em long Jehova, na Jehova i mekim isi bel bilong em long rot bilong tokim em olsem em i laikim em tru na em bai lukautim em.—Sng. 23:​1-6.

17. Long wanem rot yumi ken bihainim pasin bilong Devit?

¹⁷ Yumi ken bihainim pasin bilong Devit long rot bilong larim ol tok bilong Baibel i stiaim ol disisen yumi mekim. Na tu, yumi luksave olsem sampela taim, yumi karim pen na hevi bikos yumi mekim ol rong disisen na i no bikos Jehova i no banisim yumi. (Gal. 6:​7, 8) Na taim yumi karim hevi maski yumi no mekim rong, yumi beten na autim bel na tingting bilong yumi long Jehova, na yumi bilip tru olsem em bai lukautim bel na tingting bilong yumi.—Fili. 4:​6, 7.

WOK YET LONG MEKIM OL SAMTING BILONG STRONGIM BILIP BILONG YU

18. (a) Planti man long nau i gat wanem tingting long ol tok bilong Baibel? (b) Yumi ken mekim wanem na bai Jehova i wok yet long stiaim yumi? (Lukim tu ol piksa.)

¹⁸ Yiateks bilong 2026 i tok: “Ol man i hangre long kisim save long God, ol i ken amamas.” Dispela tok i stret long nau winim olgeta narapela taim bipo. Wai na yumi tok olsem? Bikos yumi stap namel long ol manmeri em ol i karim hevi na ol i no luksave olsem ol i nidim tok bilong Baibel long stiaim ol, na ol i larim ol lotu giaman o tingting bilong ol man bilong dispela graun i stiaim ol disisen ol i mekim. Yumi no ken bihainim pasin bilong ol. Hau yumi inap mekim olsem? Long rot bilong yusim gut ol samting Jehova i givim olsem kaikai bilong strongim bilip, werim nupela pasin olsem klos, na stap insait long ples hait bilong Jehova na larim em i lukautim yumi.