Obadia​—Ithute go Boifa Modimo

Obadia o ne a okametse ntlo ya ga Kgosi Ahabe yo o bosula, yo o neng a letleletse kobamelo ya ga Baale gore e aname kwa Iseraele. Le fa go ntse jalo, Obadia o ne a boifa Jehofa “go tloga a sa le mosha.” (1 Dikg. 18:1-13) Ka jalo, fa Kgosigadi Jesebele a ne a laela gore baporofeti botlhe ba ga Jehofa ba bolawe, Obadia o ne a itse gore o tshwanetse go nna pelokgale gore seo se se ka sa direga. Go fitlha moporofeti a le mongwe fela go ne go le kotsi tota, mme Obadia ene o ile a fitlha baporofeti ba le 100 a bo a ba isetsa dijo ka nako ya leuba le le maswe! Akanya gore go ne go le thata jang gore Obadia a dire jalo mme a le kelotlhoko gore baporofeti ba le bantsintsi ba maaka ba ba neng ba direla kgosi le kgosigadi ba se ka ba mmona.​—1 Dikg. 18:19.

Re ithuta eng mo monneng yono yo o neng a boifa Modimo? Le fa Obadia a ne a boifa Ahabe, o ne a boifa Jehofa thata. Seo se ile sa mo naya bopelokgale jwa go tsenya botshelo jwa gagwe mo kotsing gore a sireletse bomorwarraagwe. Le rona re ka tlhoka go boifa Jehofa thata, segolobogolo fa kobamelo ya rona e thibetswe. Poifo eno e ka re thusa go ema bakaulengwe le bokgaitsadi nôkeng ka dinako tsa mathata.