“Badiri ba Lefoko” ba ba Itumetseng

“Lo amogele ka bonolo lefoko le le tlhomilweng, le le nonofileng go boloka mewa ya lona. Lo nne badiri ba lefoko, e seng bautlwi fela.”—JAKOBE 1:21, 22.

1. Temana ya rona ya ngwaga ya 1996 e tshwanetse ya tsewa jang?

“LO NNE BADIRI BA LEFOKO.” Mafoko ano a a tlhamaletseng a na le molaetsa o o nonofileng. A tserwe mo ‘Lokwalong lwa ga Jakobe’ mo Baebeleng, mme a tla bewa mo Diholong tsa Bogosi e le temana ya ngwaga ya Basupi ba ga Jehofa mo ngwageng otlhe wa 1996.

2, 3. Ke ka ntlha yang fa go ne go tshwanela gore Jakobe a kwale lokwalo lo lo bidiwang ka leina la gagwe?

² Jakobe e bong morwarraagwe Morena Jesu, o ne a itsiwe thata mo phuthegong ya bogologolo ya Bakeresete. Mo tiragalong nngwe fa Jesu a se na go tsosiwa, Morena wa rona o ne a tla kwa go Jakobe ka namana mme morago ga moo a ya kwa baaposetoloing botlhe. (1 Bakorinthe 15:7) Moragonyana, fa moaposetoloi Petere a se na go gololwa kwa kgolegelong ka tsela e e gakgamatsang, o ne a bolelela setlhopha sa Bakeresete ba ba neng ba phuthegile jaana: “Lo bolelele Jakobe le bakaulengwe.” (Ditiro 12:17) Le mororo Jakobe a ne a se moaposetoloi, go bonala a ne a okametse kwa pokanong ya setlhopha se se laolang kwa Jerusalema fa baaposetoloi le bagolwane ba ne ba dira tshwetso ya gore basokologi ba Baditšhaba ga ba tlhoke gore ba rupisiwe. Jakobe o ne a sobokanya dikgang, mme tshwetso e go neng go dumalanwe ka yone ka moya o o boitshepo e ne ya isiwa kwa diphuthegong tsotlhe.—Ditiro 15:1-29.

³ Ga go gakgamatse gore kakanyo ya ga Jakobe e e duleng diatla jaana e bo e le botlhokwa thata. Lefa go ntse jalo, o ne a dumela ka boikokobetso gore ene ka boene o ne a le “motlhanka [fela] wa Modimo le wa Morena Jesu Keresete.” (Jakobe 1:1) Lokwalo lwa gagwe lo lo tlhotlheleditsweng lo tshotse kgakololo e ntsi thata e e utlwalang e bile lo kgothatsa Bakeresete gompieno. Lo ne lwa wediwa dingwaga di ka nna nnè pele Roma e tlhasela Jerusalema la ntlha e eteletswe ke Molaodi Cestius Gallus, fa mafoko a a molemo a se na go rerwa ka botlalo mo “lobopo[ng] lotlhe tlase ga legodimo.” (Bakolosa 1:23) E ne e le metlha e e thata, mme batlhanka ba ga Jehofa ba ne ba lemoga sentle gore o ne a tla tloga a diragatsa katlholo ya Gagwe mo setšhabeng sa Bajuta.

4. Ke eng se se bontshang gore Bakeresete ba bogologolo ba ne ba ikanya Lefoko la Modimo thata?

⁴ Bakeresete bao ba ne ba setse ba na le Dikwalo tsa Sehebera tsotlhe le bontsi jwa Dikwalo tsa Segerika. Ga go belaetse gore bakwadi ba Baebele ba Bakeresete ba ne ba ikantse Lefoko la Modimo fela thata jaaka go bontshitswe ke ditshupiso di le dintsi tsa bone tsa mekwalo ya bogologolo. Ka mo go tshwanang, rona gompieno re tlhoka go ithuta Lefoko la Modimo ka tlhoafalo le go le dirisa mo matshelong a rona. Re tlhoka go nonofa le go kgothala semoyeng mo go tswang mo Dikwalong tse di Boitshepo e le gore re itshoke.—Pesalema 119:97; 1 Timotheo 4:13.

5. Ke ka ntlha yang fa re tlhoka go kaelwa ka tsela e e kgethegileng gompieno, mme kaelo eo re ka e bona kae?

⁵ Gompieno batho ba gaufi thata le “sepitla se segolo . . . se se iseng se ke se nne, e sa le ka tshimologo ya lefatshe go tla nakong eno; nnyaa, le gone go se ketla go tlhola go nna jalo gope.” (Mathaio 24:21) Go tlhokega gore re kaelwe ke Modimo e le gore re bolokwe. Re ka bona seno jang? Ka go dira gore dipelo tsa rona di amogele dithuto tsa Lefoko la Modimo le le tlhotlheleditsweng ka moya. Seno se tla re dira gore re “nne badiri ba lefoko,” fela jaaka batlhanka ba ba neng ba ikanyega ba ga Jehofa ba mo metlheng ya bogologolo. Re tshwanetse go bala le go ithuta Lefoko la Modimo ka tlhoafalo re bo re le dirisa go baka Jehofa.—2 Timotheo 2:15; 3:16, 17.

Go Itshoka ka Boitumelo

6. Ke ka ntlha yang fa re tshwanetse go itumela fa re kopana le diteko?

⁶ Fa Jakobe a simolola lokwalo lwa gagwe, o umaka boitumelo, e leng leungo la bobedi la moya wa Modimo. O kwala jaana: “Bagaetsho, lo kaye fa e le boitumelo fela, mogang lo welang mo ditekong di le dintsi; lo ntse lo itse fa go lekwa ga tumelo ya lona go tle go tsose bopelotelele. Lo mme bopelotelele bo dire tiro ya jone e e tletseng, gore lo tle lo nne botlalo le boitekanelo, lo sa tlhaele mo go sepe.” (Jakobe 1:2-4; Bagalatia 5:22, 23) Ke jang go ka tweng ke “boitumelo fela” go itshokela diteko di le dintsi? Kana gone, tota le Jesu o ne a bolela jaana kwa Therong ya gagwe ya kwa Thabeng: “Lo a bo lo le sego fa batho ba lo kgoba, ba lo bogisa, ba lo pateletsa bosula bongwe le bongwe ka ntlha ya me. Itumeleng lo bo lo ipele thata; gonne tuelo ya lona e kgolo kwa legodimong.” (Mathaio 5:11, 12) Re kgotsofala ka boitumelo fa re bona Jehofa a segofatsa maiteko a rona fa re dira ka natla gore re bone mokgele wa botshelo jo bo sa khutleng.—Johane 17:3; 2 Timotheo 4:7, 8; Bahebere 11:8-10, 26, 35.

7. (a) Re ka thusiwa jang gore re itshoke? (b) Fela jaaka Jobe, re ka duelwa ka tsela efe?

⁷ Jesu ka boene o ne a itshoka ka ntlha ya “boitumelo jo [a] bo beetsweng pele.” (Bahebere 12:1, 2) Le rona re ka itshoka fa re ntse re etse tlhoko thata sekao sa ga Jesu se se bontshang bopelokgale! Jehofa o duela babolokabothokgami thata, fela jaaka Jakobe a umaka kwa bokhutlong jwa lokwalo lwa gagwe. Jakobe o bolela jaana: “Bonang, re a tle re re, go sego ba ba kileng ba nna ba itshoka; lo utlwile ka ga bopelotelele jwa ga Jobe, mme lo bonye bofelelo jwa Morena jaaka Morena a tletse bopelotlhomogi, a le boutlwelobotlhoko.” (Jakobe 5:11) Gakologelwa kafa bothokgami jwa ga Jobe bo neng jwa duelwa ka gone fa a se na go busediwa mo botsogong jo bo siameng le go tshela botshelo jo bo mosola, jo bo itumetseng le baratiwa ba gagwe. Go itshoka o ntse o boloka bothokgami go ka dira gore o itumele ka tsela e e tshwanang mo Paradaiseng e e solofeditsweng ya lefatshe le lesha la Modimo, e le tiragalo e e di fetang tsotlhe ya go itumelela go direla Jehofa gone jaanong.

Go Batla Botlhale

8. Re ka bona jang botlhale jwa boammaaruri, le jo bo mosola, mme thapelo e thusa jang mo go seno?

⁸ Fa re ithuta Lefoko la Modimo ka tlhoafalo, mmogo le go le dirisa, re tla nna le botlhale jwa bomodimo, jo bo tla re thusang gore re itshokele diteko tse di mo tsamaisong eno e e bosula e e nyelelang ya ga Satane. Re ka tlhomamisediwa jang gore re tla bona botlhale jo bo ntseng jalo? Jakobe o re bolelela jaana: “Fa mongwe wa lona a tlhoka botlhale, a a lope Modimo o o nayang botlhe ka bogolo, mme o sa kgobe; mme o tlaa bo newa. A a lope ka tumelo, a sa belaele sepe; gonne yo o belaelang o tshwana le makhubu a lewatle a a kgweediwang, a phailakwa ke phefo.” (Jakobe 1:5, 6) Re tshwanetse go rapela ka tlhoafalo, re na le tshepo e e sa reketleng ya gore Jehofa o tla reetsa mekokotlelo ya rona le gore o tla e araba ka nako ya gagwe e e tshwanetseng le ka tsela ya gagwe.

9. Jakobe o tlhalosa botlhale jwa bomodimo le go dirisiwa ga jone jang?

⁹ Botlhale jwa bomodimo ke mpho e e tswang kwa go Jehofa. Jakobe o tlhalosa dimpho tse di ntseng jalo jaana: “Neo nngwe le nngwe e e molemo, le se se molemo sengwe le sengwe se se tletseng, se tswa kwa godimo, se fologa kwa go Rra masedi, yo go sa ka keng ga nna phetogo mo go ene, le fa e le moriti o o bewang ke go menoga.” Moragonyana Jakobe mo lokwalong lwa gagwe o tlhalosa phelelo ya go bona botlhale jwa boammaaruri fa a bolela jaana: “Ke mang yo o botlhale, yo o nang le tlhaloganyo mo go lona? A a ke a supe ditiro tsa gagwe ka bonolo jwa botlhale, ka go tshela ga gagwe mo go molemo. . . . Botlhale jo bo tswang kwa godimo bo simologa bo le boitsheko, foo bo nne kagiso, bo bonolo, bo rapelesege ka bofefo, bo tletse boutlwelobotlhoko le maungo a a molemo, bo se na kakabalo, bo se na boitimokanyo.”—Jakobe 1:17; 3:13-17.

10. Bodumedi jwa maaka bo farologana jang le jwa boammaaruri?

¹⁰ Mo mmusong wa lefatshe wa bodumedi jwa maaka, e ka tswa e le mo go Labokeresete kana mo dinageng tse dingwe, gantsi baobamedi ba tlwaetse go opela difela dingwe, go reetsa dithapelo tse di boaboelediwang, mme gongwe ba bo ba reetsa polelo nngwe. Ga go kgothalediwe ope go bolela ka molaetsa wa tsholofelo, ka gonne ditumelo di le dintsi ga di na tebelelo e e phatsimang ka isagwe. Tsholofelo e e galalelang ya Bogosi jwa Modimo jwa ga Mesia e ka tswa e se ke e umakiwa kana e sa tlhaloganngwe gotlhelele. Jehofa o bolela jaana ka tsela ya boperofeti ka balatedi ba Labokeresete: “Batho ba me ba dirile masula a le mabedi; ba latlhile nna yo ke leng motswedi wa metsi a a tshedileng, mme ba ikgabetse madu, madu a a phunyegileng, a a sa kakeng a tshegetsa metsi ape.” (Jeremia 2:13) Ga ba na metsi a boammaaruri. Botlhale jwa selegodimo bo a tlhaela.

11, 12. (a) Botlhale jwa Modimo bo tshwanetse jwa re tlhotlheletsa jang? (b) Botlhale jwa Modimo bo re tlhagisa malebana le eng?

¹¹ A bo seo se farologane jang ne mo Basuping ba ga Jehofa gompieno! Ba anamisa mafoko a a molemo a Bogosi jwa Gagwe jo bo tlang ka maatla a magolo a a tswang kwa Modimong. Botlhale jo ba bo buang bo theilwe thatathata mo Lefokong la Modimo. (Bapisa Diane 1:20; Isaia 40:29-31.) Eleruri, ba sola molemo kitso ya boammaaruri le kutlwisiso mo go boleleng maikaelelo a magolo a Modimo le Mmopi wa rona. Re tshwanetse ra eletsa gore botlhe mo phuthegong ba “tladiwe ka kitso ya mo e leng go rata ga [Modimo], mo botlhaleng jotlhe jwa semowa, le mo tlhaloganyong.” (Bakolosa 1:9) Bannye le bagolo ba tla tlhotlheletsega gore ba “nne badiri ba lefoko” ka metlha fa ba na le motheo ono.

¹² “Botlhale jo bo tswang kwa godimo” bo re tlhagisa ka maleo a a ka dirang gore re se amogelwe ke Modimo. Jakobe o bolela jaana: “Mo, lo a go itse, bagaetsho ba ba rategang. A motho mongwe le mongwe a nne bonako go utlwa, le bonya go bua, le bonya go tlala bogale; gonne bogale jwa motho ga bo dire tshiamo ya Modimo.” Ee, re tshwanetse ra nna bonako go utlwa kgakololo ya Modimo le go e dirisa. Lefa go ntse jalo, re tshwanetse go itisa kgatlhanong le go dirisa “tokololo e potlana” e leng loleme ka tsela e e sa tshwanelang. Loleme lo ka tshuba “sekgwa se segolo” ka molelo ka tsela ya tshwantshetso ka go ipelafatsa, go seba mo go sa tshwanelang, kana fa motho a bua a gatelela maikutlo a gagwe. Ka gone re tlhoka gore fa re kopane mmogo rotlhe go nne monate e bile re bontshe boitshwaro.—Jakobe 1:19, 20; 3:5.

13. Ke ka ntlha yang fa go le botlhokwa gore re amogele “lefoko le le tlhomilweng”?

¹³ Jakobe o kwala jaana: “Ke gone ka re, latlhang bomaswe jotlhe, le go penologa ga boikepo, mme lo amogele ka bonolo lefoko le le tlhomilweng, le le nonofileng go boloka mewa ya lona.” (Jakobe 1:21) Lefatshe leno le le bohula, le le nang le mokgwa wa botshelo wa go ipaya kwa pele, o o mabela, wa go rata dithoto le o o se nang maitsholo, le tla tloga le feta. “Mme yo o dirang go rata ga Modimo o ntse ka bosakhutleng.” (1 Johane 2:15-17) A bo go le botlhokwa jang ne gore re amogele “lefoko le le tlhomilweng”! Botlhale jo bo tswang mo Lefokong la Modimo bo farologane thata le bosula jwa lefatshe leno le le nyelelang. Ga re batle bope jwa bosula joo. (1 Petere 2:1, 2) Re tlhoka gore re rate boammaaruri e bile re tlhome tumelo e e nonofileng mo dipelong tsa rona, e le gore re ititeye sehuba gore ga re kitla re fapoga mo ditseleng tse di siameng tsa ga Jehofa. A mme go lekane go utlwa fela Lefoko la Modimo?

Go Nna “Badiri ba Lefoko”

14. Re ka nna “bautlwi” le “badiri” ba Lefoko jang?

¹⁴ Re bala jaana mo go Jakobe 1:22: “Lo nne badiri ba lefoko, e seng bautlwi fela, lo iphora fela.” “Lo nne badiri ba lefoko”! Go tlotlilwe thata ka setlhogo seno mo lokwalong lwa ga Jakobe. Re tshwanetse go reetsa, morago ga moo re dire “fela jalo”! (Genesise 6:22) Batho ba le bantsi gompieno ba bolela gore go lekane go utlwa thero fela kana go nna teng nako nngwe kwa kobamelong e e leng seomodiro, mme ba sa dire sepe se se fetang seo. Ba ka nna ba akanya gore fa fela ba tshela ‘botshelo jo bo siameng’ go ya ka se bone ba bonang se siame, seo se tla bo se lekane. Lefa go ntse jalo Jesu Keresete o ne a bolela jaana: “Fa motho le fa e le mang a rata go ntshala morago, a a iitatole, mme a a tseye mokgoro wa gagwe a itse go ntshala morago.” (Mathaio 16:24) Go tlhokega thata gore Bakeresete ba boammaaruri ba bontshe mokgwa wa go intsha setlhabelo le go itshoka fa ba latela sekao sa ga Jesu sa go dira go rata ga Modimo. Bone ba tsaya go rata ga Modimo gompieno fela jaaka go ne go ntse mo lekgolong la ntlha la dingwaga fa Jesu yo o tsositsweng a ne a laela jaana: “Ke gone tsamayang, lo dire merafe yotlhe barutwa.” (Mathaio 28:19) O dira jang mo ntlheng eno?

15. (a) Jakobe o re neela setshwantsho sefe, se se bontshang gore re ka itumela re le “badiri ba lefoko”? (b) Ke ka ntlha yang fa go obamela fela mo e leng seomodiro go sa lekana?

¹⁵ Fa re nna re leba mo Lefokong la Modimo, le ka tshwana le seipone se se re senolang gore tota re batho ba mofuta ofe. Jakobe o bolela jaana: “Motho yo o lebang mo molaong o o itekanetseng, e bong molao wa kgololego, fa a tswelela jalo, motho yoo o tlaa segofala mo go direng ga gagwe, ka e se moutlwi yo o lebalang, mme e le modiri yo o dirang.” (Jakobe 1:23-25) Ee, o tla nna ‘modiri wa lefoko’ yo o itumetseng. Mo godimo ga moo, go botlhokwa go nna “modiri” mo botshelong jwa rona jotlhe jwa Bokeresete. Ga re a tshwanela go itsietsa ka go akanya gore go obamela fela mo go tlwaelegileng go lekane. Jakobe o re gakolola gore re dire dikarolo tse dingwe tsa kobamelo ya boammaaruri tse tota le bone Bakeresete ba ba tlhaga ba ka tswang ba di tlhokomologile. O kwala jaana: “Tumelo e e itshekileng, e e sa leswefalang fa pele ga Modimo le Rraetsho, ke e, go lekola masiela le basadi ba batlholagadi mo pitlaganong ya bone, le motho go ikilela gore a se mathwe gope ke lefatshe.”—Jakobe 1:27.

16. Aberahame o ne a nna “tsala ya Modimo” ka ditsela dife, mme re ka nna ditsala tsa Gagwe jang?

¹⁶ Ga go a lekana fela go re, ‘Ke dumela mo Modimong,’ o bo o sa dire sepe ka gone. Fela jaaka Jakobe 2:19 e bontsha: “[O] dumela fa Modimo o le mongwe fela; o dira sentle; mewa e e maswe le yone e a dumela, mme e tsitsibane fela e rorome.” Jakobe o otlelela gore “tumelo, fa e se na ditiro e be e sule ka e yosi,” a bo a bolela ka Aberahame, a re: “Tumelo e pataganye le ditiro tsa gagwe, mme tumelo ya dirwa boitekanelo ka ditiro.” (Jakobe 2:17, 20-22) Ditiro tsa ga Aberahame di ne di akaretsa go thusa ba lesika, go amogela baeng, go baakanyetsa setlhabelo sa ga Isake le go ‘bolela phatlalatsa’ tumelo e e sa reketleng mo tsholofetsong ya Modimo ya “motse o e leng one o o nang le motheo tota,” e leng Bogosi jwa ga Mesia jo bo tlang. (Genesise 14:16; 18:1-5; 22:1-18; Bahebere 11:8-10, 13, 14; 13:2) Ka mo go tshwanetseng, Aberahame o ne “a bidiwa tsala ya Modimo.” (Jakobe 2:23) Le rona re ka tsewa re le ‘ditsala tsa Modimo’ fa re bolela ka botlhaga tumelo le tsholofelo ya rona mo Bogosing jwa gagwe jo bo tlang jo bo siameng.

17. (a) Ke ka ntlha yang fa Rahabe a ne a “siamisiwa,” mme o ne a bona maduo afe? (b) Ke lenaane lefe le letelele le le mo Baebeleng la batho ba ba neng ba ‘nna badiri ba lefoko’? (c) Jobe o ne a bona maduo jang, mme ka ntlha yang?

¹⁷ Batho ba ba “[nnang] badiri ba lefoko” tota ba “siamisiwa ka ditiro, e seng ka tumelo e le yosi.” (Jakobe 2:24) Rahabe ke mongwe yo o neng a oketsa tumelo ya gagwe ka ditiro mo ‘lefokong’ le a neng a le utlwa malebana le ditiro tse dikgolo tsa ga Jehofa. O ne a fitlha ditlhola tsa Iseraele a bo a di thusa go tshaba, mme morago ga moo o ne a phutha ba lelapa la ga rraagwe gore ba bolokwe. A bo a tla itumela jang ne fa a tsosiwa go itse gore tumelo ya gagwe, e e neng e patagane le ditiro, e ne ya mo dira gore a nne mogologolwane wa ga Mesia! (Jošua 2:11; 6:25; Mathaio 1:5) Bahebere kgaolo 11 e re neela lenaane le letelele la maina a ba bangwe ba ba neng ba ‘nna badiri’ mo go bontsheng tumelo ya bone, mme ba tla duelwa fela thata. Le gone ga re a tshwanela go lebala Jobe, yo o neng a bolela jaana fa a lekwa mo go setlhogo: “A go bakwe leina la ga Jehofa.” Jaaka re setse re bone, tumelo ya gagwe le ditiro di ne tsa dira gore a duelwe ka tsela e kgolo. (Jobe 1:21; 31:6; 42:10; Jakobe 5:11) Ka mo go tshwanang, go itshoka ga rona gompieno re le “badiri ba lefoko” go tla dira gore re amogelwe ke Jehofa.

18, 19. Bakaulengwe ba ba saleng ka ba gatelelwa ba ne ba “[nna] badiri ba lefoko” jang, mme tiro ya bone e ne ya ba leretse masego afe?

¹⁸ Bangwe ba batho ba ba neng ba itshoka thata mo dingwageng tse di fetileng ke bakaulengwe ba rona ba kwa Yuropa Botlhaba. E re ka jaanong dithibelo di le dintsi di tlositswe, eleruri bano ba ile ba “[nna] badiri ba lefoko” mo tikologong ya bone e ntšha. Barongwa le babulatsela ba ba tswang mo dinageng tse di gaufi ba ile ba fudugela koo gore ba thuse mo go ruteng le mo go rulaganyeng. Lekala la Finland le makala a mangwe a a gaufi a Mokgatlho wa Watch Tower a ile a romela badiri ba ba itseng go aga, mme bakaulengwe ba lefatshe lotlhe ba ba pelotshweu ba ile ba thusa ka madi fa go agiwa diofisi tsa makala le Diholo tsa Bogosi.—Bapisa 2 Bakorinthe 8:14, 15.

¹⁹ A bo bakaulengwe bao ba ba saleng ka ba bogisiwa ba ile ba dira mo tshimong ka botlhaga jang ne! Ba ‘a dira e bile ba leka ka natla’ go duelela sebaka, jaaka go ka tualo, se se neng se seyo “ka nako ya matshwenyego.” (1 Timotheo 4:10; 2 Timotheo 4:2, NW) Ka sekai, mo kgweding ya April e e sa tswang go feta kwa Albania, koo go neng go na le kgatelelo e e setlhogo gone, go ne ga anamisiwa pampitshana yotlhe ya Dikgang tsa Bogosi e e nang le setlhogo se se reng “Ke Eng fa Botshelo bo Tletse ka Mathata Jaana?” mo malatsing a le mararo fela. Go anamisiwa ga yone go ne ga dirwa morago ga Segopotso sa loso lwa ga Jesu, se kwa go sone go neng go tlile batho ba le 3 491—ba le bantsi thata go feta baboledi ba bone ba ba tlhagafetseng ba le 538.

20. Dipalo tsa batho ba ba neng ba le teng kwa Segopotsong tsa bosheng jaana di supa eng, mme batho ba le bantsi ba ka thusiwa jang?

²⁰ Dinaga tse dingwe le tsone di ile tsa nna le seabe se se botlhokwa thata mo bathong ba ba nnileng gone kwa Segopotsong, ba ba oketsegileng mo dingwageng tsa bosheng jaana ka batho ba ba fetang 10 000 000. Mo mafelong a le mantsi batho ba ba sa tswang go kopanela, ba tumelo ya bone e nonotshitsweng ke go nna gone kwa Segopotsong le go se keteka, ba ‘nna badiri ba lefoko.’ A re ka kgothatsa bontsi jwa batho ba ba sa tswang go kopanela gore ba tshwanele tshiamelo eo?

21. Go dumalana le temana ya rona ya ngwaga, ke tsela efe e re tshwanetseng ra e sala morago, mme re na le mokgele ofe?

²¹ A re ititeyeng sehuba fela jaaka Bakeresete bale ba ba neng ba tlhoafetse mo lekgolong la ntlha la dingwaga, le jaaka ba le bantsi fa e sa le ka nako eo gore re leke ka natla go ya “kwa [mokgeleng, NW]” wa botshelo jo bo sa khutleng, e ka tswa e le mo Bogosing jwa selegodimo kana mo lefatsheng le le busiwang ke jone. (Bafilipi 3:12-14) Go tlhoka boiteko jwa rona jotlhe gore re bone mokgele oo. Ga se nako ya gore re boele kwa morago re nna bautlwi fela, mme ke nako e e botlhokwa go di feta tsotlhe ya go ‘nna thata le go dira.’ (Hagai 2:4; Bahebere 6:11, 12) E kete re ka ‘nna badiri ba lefoko ba ba itumetseng’ gone jaanong le ka bosakhutleng e re ka re ‘amogetse lefoko le le tlhomilweng.’

O Ne o Tla Araba Jang?

◻ Re ka itshoka re itumetse jang?

◻ “Botlhale jo bo tswang kwa godimo” ke eng, mme re ka bo sala morago jang?

◻ Ke ka ntlha yang fa re tshwanetse go “[nna] badiri ba lefoko, e seng bautlwi fela”?

◻ Ke dipego dife tse di tshwanetseng go re tlhotlheletsa go nna “badiri ba lefoko”?

[Setshwantsho mo go tsebe 17]

E kete le rona re ka amogela thuto ya bomodimo

[Setshwantsho mo go tsebe 18]

Bothokgami jwa ga Jobe bo ne jwa duelwa ka gore a busediwe mo botshelong jo bo mosola, jo bo itumedisang le baratiwa ba gagwe