Basupi ba ga Jehofa mo Lefatsheng Lotlhe—Puerto Rico
SETLHAKETLHAKE sa boboatsatsi, se se nang le ditlhare tse ditala, se se bidiwang Puerto Rico, se fa gare ga Lewatle la Caribbean le Lewatle la Atlantic. Christopher Columbus o ne a se gapa go nna karolo ya Spain ka 1493 mme a se bitsa San Juan Bautista go nna segopotso sa ga Johane Mokolobetsi. Toropo ya teng e kgolo mo go tsone tsotlhe e ne e sa bolo go bidiwa Puerto Rico kgotsa “Boemakepe jo bo Humileng.” Fa nako e ntse e tsamaya, leina le e ne ya nna la setlhaketlhake sotlhe, fa toropo yone e ne ya bidiwa San Juan.
Puerto Rico e itshupile e le boemakepe jo bo tlotlometseng e bile bo kgatlha thata ka ditsela tse dintsi. Gouta e ntsi e ne e romelwa go tswa mo go jone ka dikepe mo dingwageng tsa ntlha tsa puso ya Spain. Jaanong setlhaketlhake seno se rekisetsa dinaga tse dingwe letlhaka la sukiri, kofi, di-plantain le maungo a monamune lefa gone madirelo a dithoto le a go di baakanya e le one a dirang bontsi jwa madi gompieno. Lefa go ntse jalo, Puerto Rico e itshupile e le boemakepe jo bo tlotlometseng e bile bo kgatlha ka tsela e e botlhokwa go gaisa.
Mafoko a a molemo a Bogosi jwa Modimo a simolotse go rerwa fano ka bo1930. Gompieno go na le baboledi ba ba fetang 25 000 ba mafoko a a molemo mo Puerto Rico. Ka 1993, badiredi mo lekaleng leno la Mokgatlho wa Watch Tower ba ne ba oketsega go tswa go 23 go ya go ba ba fetang 100. Go ne go tlhokega gore ba okediwe jaana gore lekala le kgone go okamela go ranolelwa ga dibuka tsa Baebele mo Sepanisheng gore batho ba ba ka tshwarang 350 000 000 ba ba buang Sepanishe go dikologa lefatshe ba kgone go nna le dikgatiso tse di ntseng jalo.
Tshimo e Ntšha
Ofisi ya lekala e bega gape jaana: “Go bulegile tshimo e ntšha mo Puerto Rico ka gore re ntse re dira maiteko a go bolelela bosusu molaetsa wa Bogosi. Kgaitsadi yo mongwe o bolela boitemogelo jo bo latelang: ‘Ke ne ke bereka mo go bosusu mme ka etela mmè yo o neng a na le bana ba le babedi ba bannye. Fa a ne a lemoga gore ke Mosupi, o ne a nkaraba gone fela foo ka gore, monna wa gagwe, yo o neng a le susu, o ne a sa rate Basupi ba ga Jehofa.
“‘Dikgwedi di sekae moragonyana mmè ene yo o ne a etela tsala ya gagwe e e neng e ithuta Baebele le Basupi. O ne a kopanela mo thutong mme a e itumelela fela thata. Ke ne ka etela mmè yo gape, mme a bolela gape gore monna wa gagwe o ne a sa rate Basupi. Lefa go ntse jalo, o ne a batla go tlhaloganya Baebele mme o ne a lapisitswe ke kereke ya gagwe ka gore ba ne ba sa rute sepe. Re ne ra simolola go ithuta re dirisa pampitshana. Letsatsi lengwe o ne a nthaya a re ke tle ka Matlhatso ka gore monna wa gagwe o ne a tla bo a le teng. “Mme ga a re rate, a kere?” ke ne ka botsa jalo. O ne a fetola jaana: “O batla go itse gore tota lo ruta eng.”
“‘Ka letsatsi le le latelang ba ne ba kokota mo kgorong ya me boobabedi! Ka gore monna wa gagwe o ne a na le dipotso tse dintsi, ke ne ka ba laletsa go tla kwa dipokanong tsa rona tsa bosusu. O ne a tla pele ga me mme ga a ise a ko a tlhole a fosa pokano epe morago ga foo. O rerela bosusu ba bangwe, o setse a kile a ya kopanong mme o lebeletse pele go kolobediwa.’”
Pego ya lekala e tswelela jaana: “Kwa kopanong ya rona ya kgaolo monongwaga thulaganyo yotlhe e ne e neetswe ka puo ya diatla ka jalo bosusu ba bantsi le ba malapa a bone ba ne ba le teng. Go ne ga latela tiragalo e e neng e ama maikutlo thata fa go ne go neelwa puo ya bofelo fa sebui se ne se umaka tiro e e neng e dirwa ke bosusu mme le gore go ne go le teng ba le 70. Go ne ga opiwa mabogo thata, mme, jaaka sebui se ne sa lemoga, bosusu ba ne ba sa kgone go utlwa. Ka jalo o ne a kopa bosusu gore ba lebe bareetsi mme a boeletsa potso e e neng e re, ‘A lo itumeletse go bo lo na le bakaulengwe ba lona ba bosusu fano?’ mme a kopa bareetsi gore ba supe boitumelo ka go tsholetsa mabogo otlhe. Go ne go itumedisa go bona bakaulengwe le bokgaitsadi ba le 11 000 ba supa boitumelo ka go tsholetsa mabogo a bone. Bakaulengwe le bokgaitsadi ba rona ba bosusu ba ne ba itumetse fela thata e bile ba ikutlwa e le karolo ya bokaulengwe jo bogolo. Ba bantsi ba ne ba lela ke boitumelo.”
Jaaka Basupi ba ga Jehofa ba nna le seabe mo tirong ya go roba mo Puerto Rico, kwantle ga pelaelo e tla tswelela go nna boemakepe jo bo tlotlometseng e bile bo kgatlha thata. “Dinku” tsa Modimo, tse a di bitsang “dilo tse di eletsegang tsa merafe yotlhe,” di tla tswelela di tsena gore ntlo ya ga Jehofa e tladiwe ka kgalalelo.—Johane 10:16; Hagai 2:7.
[Lebokoso mo go tsebe 9]
DIPALO TSA NAGA EO
Ngwaga wa Tirelo wa 1994
TLHORA YA BA BA NENG BA NEELA BOSUPI: 25 428
KAROLELANO: Mosupi a le 1 mo bathong ba le 139
BA BA NNILENG TENG KWA SEGOPOTSONG: 60 252
PALOGARE YA BABOLEDI BA E LENG BABULATSELA: 2 329
PALOGARE YA DITHUTO TSA BAEBELE: 19 012
PALO YA BA BA KOLOBEDITSWENG: 919
PALO YA DIPHUTHEGO: 312
OFISI YA LEKALA: GUAYNABO