A O Anaanela Phuthego ya ga Jehofa E E mo Lefatsheng?

A O KO o lebe taemane e ntle e e segilweng sentle, mme o bonang? Leje le lentle eleruri. Mme a o ko o tlhatlhobe taemane eo ka maekerosekopo, mme o bona eng? O tla bona e na le mangapo, e phatlogile, e na le diloka, kana diphoso tse dingwe.

A o ne o tla senya kana wa latlha taemane eo fela ka gonne e lebega ka tsela eo fa o e leba ka maekerosekopo? Nnyaa! Tloga fela mo maekerosekopong, mme o santse o tla itumelela bontle jwa yone le tsela e e tlhomologileng eo e phatsimang ka yone eo e e dirang gore e gaise maje a mangwe a mantle.

Jaaka taemane, phuthego ya ga Jehofa e e mo lefatsheng e tlhomologile ka ditsela tse dintsi. Ga go na phuthego epe e nngwe gape mo lefatsheng e e nang le kamano e e atamalaneng thata jaana le Mmopi. Fa a ne a kwalela Bakeresete ba ba tloditsweng, bao ba neng ba na le tsholofelo ya go ya kwa legodimong, moaposetoloi Petere o ne a umaka kamano eno e e kgethegileng. O ne a bolela jaana: “Me lona, lo losika lo lo itshenkecweñ, lo boperisito yoa segosi, morahe o o boitshèpō, lo chaba e e ruilweñ ke Modimo sebele.” (1 Petere 2:9) Gompieno boidiidi jo bogolo jwa “dinku di sele,” joo bo nang le tsholofelo ya go tshelela ruri mo lefatsheng, bo ile jwa kopana le ba ba setseng ba “morahe o o boitshèpō” oo mo go obameleng Modimo. (Yohane 10:16) Ditlhopha tse pedi tseno di dira phuthego e e tlhomologileng jaaka leje le lentle le le phatsimang ka tsela e e tlhomologileng.

Tila go Leba Ba Bangwe O Ba Tshwaya Diphoso

Mme re tshwanetse go lemoga gore phuthego eno ya lefatshe ka bophara e dirwa ke batho ba ba sa itekanelang. Ka jalo, go ne go tla diragala eng fa re ne re ka e leba ka maekerosekopo wa tshwantshetso? Ee, re ne re tla fitlhela batho ba e leng karolo ya yone ba sekametse mo go direng boleo ebile ba na le diphoso mo bothong jwa bone.—Baroma 3:23.

Moaposetoloi Paulo o ne a dumela gore o ne a na le diphoso tse di ntseng jalo. O ne a bolela jaana: “Go nna eo ke ratañ go diha molemō, boshula boo bo nntse bo le gōna.” (Baroma 7:21) Mokeresete mongwe le mongwe o ikutlwa ka ditsela tseo tse di sa tshwaneng. Botlhe ba dira diphoso. Mo godimo ga moo, go ise go e kae bontsi bo utlwisiwa botlhoko ke phoso ya yo mongwe. A re tshwanetse go kgobega marapo le go felelwa ke tumelo fa diphoso le go sa itekanelang ga Bakeresete ba bangwe go senolwa? A seo se tshwanetse sa fokotsa tsela eo re anaanelang phuthego ya ga Jehofa ka yone? Gotlhelele nnyaa! Go na le moo, re tshwanetse go tloga mo maekerosekopong, jaaka go ne go ka tualo, mme re tlogele go leba thata go sa itekanelang ga batho ba bangwe.

Dikwalo di na le lenaane la dinonofo tse re ka kgonang go tshwaya bao moya o o boitshepo o dirang mo go bone ka tsone. Dingwe tsa tsone ke “loratō, le boitumèlō, le kagishō, le bopelotelele, le bopelonomi, le molemō, le boikañō, Le boiñotlō, le boikgapō.” (Bagalatia 5:22, 23) Go farologana le seo, mekgatlho yotlhe ya lefatshe leno ya bodumedi, le bopolotiki, le ya kgwebo gantsi e supa seo Bibela e se bitsang ditiro tsa nama: “dikilanō, le kgañ, le mahuha, le dikgakalō, le ditomologanō, le dikgaoganō, le makoko, le dipelotshètlha, le matagō, le ditlhapèlō, le dilō tse di nntseñ yalo.” (Bagalatia 5:20, 21) Ka gone, jaaka taemane e e phatsimang mo gare ga maje fela a a tlwaelegileng, batho ba ga Jehofa ba tlhomologile tota mo gare ga lefatshe leno le le senyegileng semoyeng.—Mathaio 5:14-16.

“Mo Mogopoloñ O le Moñwe Hèla”

Karolo e nngwe e e tlhomologileng thata ya taemane eno ke go bo e le atomo e e tshwaraganeng e e kopaneng fela thata. Ka tsela e e tshwanang, phuthego ya ga Jehofa ya selefatshe e itshupa e utlwana ka dithuto le ka bokaulengwe go bile go sena epe e e tshwanang le yone. Bao e leng karolo ya phuthego eo ba dirisa kgakololo e e fitlhelwang mo Bibeleng mo go 1 Bakorintha 1:10 e e bolelang jaana: “Me yana, ba ga echo, kea lo rapèla, ka leina ya Morèna oa rona Yesu Keresete, gore lo nnè puō ñwe hèla lotlhe, le gore go se nne dikgaoganō mo go lona; me lo ko lo itekanèlè mmōgō, le mo mogopoloñ o le moñwe hèla, le mo tshekatshekoñ e le ñwe hèla.”

Basupi ba ga Jehofa gape ba kgonne go fenya go tlhaolana ka mmala le go ikgogomosa ka lotso. Ereka ba na le “botlhale yo bo cwañ kwa godimo,” ga ba na “kakabalō.” (Yakobe 3:17) Re galaletsa Jehofa ka seo a se fitlheletseng mo kgannyeng eno mo phuthegong ya gagwe e e dirilweng ka batho ba ba sa itekanelang.

Go farologana le seo, fa makasine wa The Christian Century, o ne o bua ka ngwaga wa 1990, o ne wa bolela gore “lefatshe le ne le lebega le kgaogantswe thata ke ditlhopha tsa bodumedi le ke maikutlo a ditso le bomorafe ao a neng a amana thata le ditumelo tsa bodumedi. Go tloga kwa India go ya kwa Yuropa go tloga kwa Botlhabagare go ya kwa Pacific, bodumedi bo tswakilwe le go kgomarela ditso le bomorafe—gantsi bo felela ka dintwa tsa bopolotiki.” Go phepafetse he gore bao ba batlang go direla Modimo ba ka ya mo phuthegong e e leng yone fela e nang le moya wa ga Jehofa le e a e segofatsang.

“Ke Thatafaditse Phatla ya Gago Jaaka Taemane”

Taemane ke letlapa le le thata go a gaisa otlhe le motho a le itseng. Bibela e umaka go dirisiwa ga taemane go ngapa kana go kwala dilo tse di thata. (Yeremia 17:1) Tlhokomela gape, mafoko ano a Jehofa a neng a a bolelela Esekiele: “Bona! Ke thatafadise sefatlhego sa gago fela jaaka difatlhego tsa bone le phatla ya gago ke e thatafaditse fela jaaka diphatla tsa bone. Ke thatafaditse phatla ya gago jaaka taemane go feta lentswetshipi.” (Esekiele 3:8, 9, NW) Jehofa o ne a dira gore Esekiele a nne thata jaaka taemane mo maikaelelong a gagwe mme seo se ne sa mo thusa go perofesetsa batho ba ba bogoma bao.—Esekiele 2:6.

Ka tsela e e tshwanang gompieno, Jehofa o dirile batho ba gagwe gore ba nne thata jaaka taemane fa ba lebane le pogiso e kgolo. Basupi ba ga Jehofa ba ile ba itshokela go thibelwa ka molao, go tlhaselwa ke digopa tsa batho, go bolawa ke digopa, go itewa, go tsenngwa mo kgolegelong ba ne ba sa tshwanela, go bogisiwa le gone go bolawa. Lefa go le jalo, ba ile ba supa gore tumelo ya bone ga se e e ka senngwang.

“Batlhanka ba Me Ba Tla Itumèla”

Bibela e ne ya bolelela pele nako ya fa batho e tla bo e le “ba ba chotseñ sechwanchō hèla sa poihōmodimo” mme “thata ea eōna ba e latotse.” (2 Timotheo 3:1, 5) Lokwalodikgang longwe lo bega gore “Baporotesetanta, Baroma Katoliki le Bajuda ba amegile thata ka go wela tlase gono ga dipalo tsa batho” mo dikerekeng le mo disinagogeng tsa bone. Kafa letlhakoreng le lengwe Basupi ba ga Jehofa bone ke baithuti ba ba tlhoafetseng ba Bibela. Ba ya kwa dipokanong tsa bone ka makgetlo a le mmalwa ka beke ka dipalo tse di oketsegang, e le bannye le bagolo, banna le basadi. Lokwalo lo lo neng lo rometswe kwa lokwalodikgang longwe lo ne lwa bolela ka bone gore “bodumedi jwa gone ke selo se se tlhwatlhwakgolo thata se ba nang naso, mme seo ba tshwenyegileng ka sone fela ke go bolelela ba bangwe ka jone.”

Boikutlo jo bo ntseng jalo bo dira gore phuthego ya ga Jehofa e tlhomologe jaaka taemane e e tlhwatlhwakgolo. Mme tlotlo e isiwa kwa go Yoo a nonotshang le go kaela batho ba ba sa itekanelang bano ka moya wa gagwe o o boitshepo.

Moperofeti Isaia o ne a bolelela pele jaana: “Ke gōna go bua Yehofa Modimo yana, a re, Bōnañ, batlhanka ba me ba tla ja . . . bōnañ, batlhanka ba me ba tla nwa, . . . bōnañ, batlhanka ba me ba tla itumèla, . . . Bōnañ, batlhanka ba me ba tla ōpèla ka go thama ga pelo.”—Isaia 65:13, 14.

Re bona boperofeti joo bo diragadiwa gompieno. Modimo o tlhokomela batho ba gagwe ka tsela e e tlhomologileng thata! Ka gone, fa e le gore o kopanela le bone, se letle go akanya ka tsela e e sa siamang go go dira gore o se ka wa itumela. Leba seno jaaka se ntse mme o gakologelwe gore: Ga go na phuthego epe mo lefatsheng e e itumelelang go tlhokomelwa ke Modimo ka tsela e e kgethegileng jalo le go sirelediwa ke ene jaaka eno. Le ka motlha o se ka wa lesa go tseela kwa godimo tshiamelo ya go nna karolo ya yone.