Dithapelo Tseo Ruri Di Tla Arabiwang

GO NA le dithapelo tseo ruri di tlileng go arabiwa. Dintlha tsa tsone di akareditswe mo sekaong seo Jesu Keresete a neng a se naya barutwa ba gagwe fa a ne a bolela jaana: “Ke gōna lo rapèlè, lo re yana: lo re, Rra echo eo o kwa legodimoñ, Leina ya gago a le itshepisiwè. Bogosi yoa gago a bo tlè. Go rata ga gago a go dihwè mo lehatshiñ.”—Mathaio 6:9-13.

Mafoko ao a thapelo ya ga Jesu ya sekao a ile a nna a boaboelediwa makgetlo a le dimilione tse dintsi. Lemororo Keresete a ne a sa lebelela gore balatedi ba gagwe ba boammaaruri ba boaboeletse thapelo e e ntseng jalo, dikopo tsa bone tseo di nang ledikgopolo tse di tshwanang eleruri di tla arabiwa. (Mathaio 6:7, 8) Ka jalo, go kaya eng go itshepisa leina la Modimo? Ke ka ntlha yang fa go rapelelwa gore Bogosi jwa gagwe bo tle? Ebile ke ka ntlha yang fa go kopiwa gore go rata ga Modimo go dirwe?

“Leina ya Gago A Le Itshepisiwè”

Jehofa, ‘Mogodimodimo, yo o okameng lefatshe lotlhe,’ ke ene yoo Jesu a neng a mmitsa “Rra echo, eo o kwa legodimoñ.” (Pesalema 83:18) Modimo e ne e le ‘rraagwe’ Baiseraele ka go bo a ne a ba golotse mo botshwarong kwa Egepeto mme a dira kgolagano le bone. (Duteronome 32:6, 18; Ekesodo 4:22; Isaia 63:16) Gompieno, Bakeresete ba ba tloditsweng ba rata Jehofa jaaka Rraabone. (Baroma 8:15) Mme ditsala tsa bone tse di nang le tsholofelo ya go tshela mo lefatsheng, ka tsela e e tshwanang di rapela Jehofa Modimo jaaka Rraabone.—Yohane 10:16; Tshenolō 7:1-9.

Mme gone, ke ka ntlha yang fa go rapelelwa gore leina la Modimo le itshepisiwe? Ebu, fa esale batho ba ntlha ba babedi ba tsuologa kwa tshimong ya Edena, leina la Modimo le ile la kgobiwa thata. Fa a araba dithapelo tseo, Jehofa o tla tlosa kgobo yotlhe eo e kileng ya leriwa mo leineng la gagwe. (Pesalema 135:13) O tla dira seno ka go tlosa boikepo mo lefatsheng. Malebana le nako eo, Modimo o ne wa bolela jaana ka moperofeti Esekiele: “Me ke tla itlotlom[a]tsa, ke tla iitshepisa, ke tla itiha gore ke itsiwe mo matlhoñ a merahe e le mentsi; me ba tla itse ha ke le Yehofa.”—Esekiele 38:23.

Jehofa Modimo o boitshepo ebile o phepa. Ka gone leina la gagwe le tshwanetse la itshepisiwa, kana la tlhaolwa le le boitshepo. O tla supa gore o boitshepo ka go tsaya kgato go iitshepisa fa pele ga popo ya gagwe yotlhe. (Esekiele 36:23) Bao ba eletsang go amogelwa ke ene le ba ba batlang botshelo jo bo sa khutleng ba tshwanetse go boifa Jehofa le go itshepisa leina la gagwe ka go le tshola le tlhaolegile ebile le le kwa godimo ga a mangwe otlhe. (Lefitiko 22:32; Isaia 8:13; 29:23) Ka tsela e e tshwanelang, Jesu o ne a bolelela balatedi ba gagwe gore ba rapele jaana: “Leina ya gago a le itshepisiwè” kana “le tsewe le le boitshepo; le tsholwe le le boitshepo.” Re ka tlhomamisega gore Modimo o tla araba karolo eno ya thapelo ya ga Jesu.

“Bogosi yoa Gago A Bo Tlè”

Jesu o ne a bolelela balatedi ba gagwe gape gore ba rapele jaana: “Bogosi yoa gago a bo tlè.” Dithapelo tse di rapelelwang gore Bogosi jwa Modimo bo tle eleruri di tla arabiwa. Bogosi ke boloadi jwa puso ya ga Jehofa joo bo tla busang ka puso ya Bomesia ya selegodimo ya Morwawe, Jesu Keresete le ditsala tsa gagwe tsa “baitshepi.” (Daniele 7:13, 14, 18, 22, 27; Isaia 9:6, 7) Basupi ba ga Jehofa ga ba bolo go supa go tswa mo Dikwalong gore Jesu o ne a tlhomiwa jaaka Kgosi ya selegodimo ka ngwaga wa 1914. Ka gone he, ke ka ntlha yang fa motho ope fela a tshwanetse go rapelela gore Bogosi bo “tlè”?

Go rapelela gore Bogosi bo tle totatota go raya go kopa gore bo tle go senya baganetsi botlhe ba puso ya Modimo ba ba mo lefatsheng. Go ise go e kae “bogosi [jwa Modimo] . . . bo tla thubaganya bo nyèlètsa magosi auō aotlhe [a lefatshe], me bo tla èma ka bosakhutleñ.” (Daniele 2:44) Tiragalo eno e tla dira gore leina la ga Jehofa le le boitshepo le itshepisiwe.

“Go Rata ga Gago A go Dihwè”

Jesu o ne a bolelela balatedi ba gagwe gape gore ba rapele jaana: “Go rata ga gago a go dihwè mo lehatshiñ yaka kwa legodimoñ.” Kopo eno ke ya gore Jehofa a tseye kgato go dumalana le kafa a batlang go nna ka teng mo lefatsheng. Go tshwana fela le kafa mopesalema a neng a bolela ka teng a re: “Señwe le señwe se Yehofa o se ratileñ o dihile shōna hèla, kwa legodimoñ, le mo lehatshiñ, mo mawatleñ le mo maheloñ a a boteñ aotlhe hèla. O tla a tlhatlose mouane kwa dikhutloñ tsa lehatshe; a dihèle pula dikgadima; a ntshe phehō mo dibolokeloñ tsa gagwè. Ke eo o na a itaea matsalwa pele a Egepeto, a motho le a kgomo. O na a baea dichupō le dikgakgamacō mo gare ga gago, Egepeto, mo go Farwe, le mo batlhankeñ ba gagwè botlhe hèla. Eo o na a itaea merahe e le mentsi, a bolaea dikgosi tse di thata.”—Pesalema 135:6-10.

Go rapelela gore thato ya ga Jehofa e diragale mo lefatsheng leno ke go kopa gore a dire boikaelelo jwa gagwe ka kgolokwe eno. Seno se akaretsa go tlosetsa baganetsi ba gagwe ruri, fela jaaka a ne a ntse a ba tlosa ka selekanyo se sennye mo metlheng ya bogologolo. (Pesalema 83:9-18; Tshenolō 19:19-21) Dithapelo tse di rapelwang gore thato ya ga Jehofa e dirwe mo lefatsheng lotlhe le mo lobopong lotlhe eleruri di tla arabiwa.

Fa Bogosi bo Busa

Mo boemong jwa boikepo jo bo tletseng mo bathong gompieno, re ka lebelela gore go tla nna jang fa Bogosi jwa Modimo bo busa le fa thato ya gagwe e tla bo e direga mo lefatsheng jaaka kwa legodimong? Go ya ka moaposetoloi Petere, “rona, kaha poleloñ ea ōna ea choloheco, re lebeletse magodimo a masha, le lehatshe ye lesha, a go tla agañ tshiamō mo go aōna.” (2 Petere 3:13) “Magodimo a masha” ke puso e e siameng ya semoya e e nang le thata—Jesu Keresete le babusi mmogo nae ba ba 144 000 mo Bogosing jwa selegodimo. (Baroma 8:16, 17; Tshenolō 14:1-5; 20:4-6) “Lehatshe ye lesha” ga se kgolokwe e nngwe ya lefatshe. Go na le moo, ke setlhopha sa batho ba ba siameng ba ba tshelang mo lefatsheng.—Bapisa Pesalema 96:1.

Mo pusong ya Bogosi joo, lefatshe le tla fetolwa go nna kgolokwe ya paradaise. (Luke 23:43) Batho ba ba kutlo ba tla ipelela kagiso ya boammaaruri le kgatelopele. (Pesalema 72:1-15; Tshenolō 21:1-5) O ka nna gareng ga boidiidi jo bo itumetseng joo fa e le gore o itsise ka boikanyego puso ya Bomesia mo bathong botlhe ba ba kutlo ba ba mo lefatsheng. Ba ba itsiseng puso eo ba rapela ka tlhoafalo gore leina la ga Jehofa le itshepisiwe, gore Bogosi jwa gagwe bo tle, le gore thato ya gagwe e dirwe. Dithapelo tsa bone tse di rapelwang go tswa mo pelong eleruri di tla arabiwa.