Dithuto go Tswa mo Dikwalong: Mika 1:1–7:20

Go Golediwa ga Tshiamiso ya ga Jehofa le Leina la Gagwe

MOPEROFETI Mika o ne a tshela mo lekgolong la borobedi la dingwaga B.C.E., ka nako ya kobamelo ya medimo ya disetwa le ya go tlhoka tshiamiso mo Iseraela le mo Juda. Maemo a a neng a le gone koo a tshwana sentle le a gompieno mo e leng gore molaetsa wa ga Mika le ditlhagiso tsa gagwe di tshwanela motlha wa rona. Mme mafoko a boammaaruri a le one a a re bolelelang a re naya tsholofelo mo lefatsheng leno le le busiwang ke Satane.—1 Yohane 5:19.

Molaetsa wa ga Mika o ka sobokanngwa ka dipolelwana tse tharo tseno tse di latelang: “Abo go latlhèga . . . ba ba dihañ boshula.” “Yehofa o lōpañ mo go wèna, ha e se gore u dihè ka tshiamō, le go rata boutlwelō botlhoko, le go sepela ka boikokobeco le Modimo oa gago?” “Rona re tla sepela ka leina ya ga Yehofa Modimo oa rona, ka . . . bosaeenkae.”—Mika 2:1; 6:8; 4:5.

Go Latofadiwa ga Kobamelo ya Medimo ya Disetwa

Jehofa ga a letlelele badira-bosula ka nako e telele. Kobamelo ya medimo ya disetwa le botsuolodi di tletse mo Iseraele le mo Juda. Ka gone, Jehofa ke mosupi kgatlhanong le bone. Ditshwantsho tsa bone di tla senngwa. Baobamedi ba medimo ya disetwa ba tla ‘tsuega moriri jaaka lenong’ mme ba tla nna ditshwarwa.—1:1-16.

Jehofa o itshupa e le Modimo wa tsholofelo mo go ba ba ikanyegang. Babusaesi ba ba logang maano ba latofadiwa jaaka magodu le dinokwane. Ba tla welwa ke tatlhego. Lefa go le jalo go solofediwa fa “masalèla a Iseraela” a tla tsosolosiwa. “Ke tla ba baea mmōgō yaka dinku tsa Bosera,” go bua jalo Jehofa.—2:1-13.

Jehofa o lebeletse gore ba ba nang le boikarabelo mo gare ga batho ba gagwe ba dire ka tshiamiso. Go ne ga buiwa jaana le baeteledipele ba Iseraele ba ba tsietsang: “A ga se tihō ea lona go itse katlholō? Ba lo ilañ molemō, lo rata boshula; ba lo ba khumolotsañ letlalō le nama mo marapoñ a bōnè.” Mika “ka mōea oa ga Yehofa, le katlholō, le bonatla,” o ba bolelela dikatlholo tsa Modimo kgatlhanong le bone. Baeteledipele ba ba sa siamang bao, jaaka a bolela, ba ntsha dikatlholo ka go newa pipa molomo, baperesiti bone ba neela kaelo ka tuelo, mme baperofeti bone ba dira botlhodi ka madi. Ka gone, Jerusalema “o tla nna mekoakoa hèla.”—3:1-12.

Molaetsa wa Tsholofelo

Kobamelo ya boammaaruri e tla dirwa lefatshe lotlhe. Mika o ne a bolelela pele gore “mo metlheñ ea moragō,” batho ba merafe e mentsi ba tla rutiwa ditsela tsa ga Jehofa. Modimo o tla tlisa katlholo, mme ga go kitla go tlhola go le ntwa. Baobamedi ba boammaaruri ba tla ‘sepela ka leina la ga Jehofa Modimo wa bone ka bosakhutleng.’ Go sa kgathalesege go falalediwa ga bone kwa merafeng le botlhoko, batho ba gagwe ba tla gololwa mo seatleng sa baba ba bone.—4:1-13.

Re ka nna le tsholofelo mo Mogoloding wa Modimo yo o solofeditsweng. Kgosi nngwe go tswa kwa Bethelehema e tla fudisa letsomane ka maatla a ga Jehofa. Go ne go boleletswe pele gore ba ne ba tla ‘gololwa mo Moasirieng.’ Masalela a baobamedi ba boammaaruri a ne a tla nna jaaka monyo o o tsiditsana le dipula tsa matsorotsoro, mme mefuta yotlhe ya kobamelo ya maaka le bodimona di ne di tla nyelediwa.—5:1-15.

Go tla Rena Tshiamiso ya ga Jehofa

Jehofa o lebeletse gore batho ba gagwe ba ikobele ditekanyetso tsa gagwe tse di tekatekanyo le tse di siameng. Ke eng seo a se dirileng gore a tshwanelwe ke kobamelo e e nyatsegang? O diretse batho ba gagwe dilo tse di molemo, ‘Mme Jehofa o lopang mo go bone, fa e se gore ba dire ka tshiamo le go rata boutlwelobotlhoko, le go sepela ka boikokobetso le Modimo wa bone?” Fa ba tswelela pele ka bothubaki jwa bone jwa boikepo le go senya, ba ka lebelela katlholo e e botlhoko.—6:1-16.

Re tshwanetse go ikanya tshiamiso ya ga Jehofa le boutlwelobotlhoko jwa gagwe. Go tla nna bobaba le eleng gareng ga maloko a lelapa: “Ke tla leba kwa go Yehofa; ke tla lebèlèla Modimo oa polokō ea me: Modimo oa me o tla nkutlwa.” Moperofeti o ikanya tshiamiso ya ga Jehofa, ka a itse gore Modimo “ga o tshegetse bogale yoa ōna ka bosakhutleñ, ka o rata boutlwèlō botlhoko.”—7:1-20.

Seo re se ithutang go tswa mo go seno gompieno. Jehofa o lebeletse gore batho ba gagwe ba dire ka tshiamo. Malebana le ditiro tsa kgwebo, ebile tota Mokeresete o tshwanetse go ipotsa jaana: “A ke tla bo ke itshekile ke na le selekanyō sa pègō sa tshiamololō, le kgetse ea makete a dilekanyō tsa bokete tsa tsieco?” (6:11) Mo metlheng eno ya bofelo, batho botlhe ba ga Jehofa ba tshwanetse go nna le seabe mo kutlwanong ya phuthego ya gagwe ya mo lefatsheng mme ba amogele kaelo mo ditseleng tsa gagwe tsa kagiso. Re tshwanetse go dira sengwe le sengwe se se ka kgonegang go goletsa leina la ga Jehofa le go goletsa kobamelo ya boammaaruri.—2:12; 4:1-4.

[Lebokoso mo go tsebe 14]

DITEMANA TSE DI TLHATLHOBILWENG TSA BIBELA

○ 1:16—Mo Iseraele, go tsuega moriri go ne go amanngwa le go tlhomola pelo, selelo, le tlalelo. (Isaia 3:24-26; 15:2, 3; Yeremia 47:5) Merafe mengwe ya baheitane e ne e ipeola tlhogo fa e ne e hutsafalela mongwe yo o tlhokafetseng wa losika. Lefa go nna lefatla ka tlhago go ne go sa lejwe e le selo se se makgapha go ya ka Molao, Baiseraele ba ne ba sa tshwanela go ipeola tlhogo fa ba ne ba le khutsafalong ka go bo e ne e le “seshaba se se itshepileñ sa ga Yehofa.” (Duteronome 14:1, 2) Lefa go ntse jalo, Mika o ne a bolelela batho ba Iseraele le Juda go ipeola tlhogo ka ntlha ya tsela ya bone e e boikepo ya kobamelo ya medimo ya disetwa eo e neng e ba tshwanolola go nna batho ba ba boitshepo ba ga Jehofa mme e ba dira batho bao ba tshwanelwang ke go nna ditshwarwa gammogo le bana ba bone. Lefoko la Sehebera le le ranoletsweng fano jaaka ‘ntsu’ le ka nna la raya lenong. Lefa e se mofuta o le mongwe le ntsu, di tsewa e le tsa losika lo le longwe.

○ 2:12—Mafoko ano a diragadiwa mo motlheng wa segompieno mo Iseraeleng wa semoya. (Bagalatia 6:16) Tsela ya masalela ya go falola mo botshwarong jwa bodumedi jwa maaka jwa Babelona o Mogolo e ne ya nna ya sedimoga segolo bogolo go tloga ka 1919 go ya kwa pele. (Tshenolō 18:2) Jaaka Mika a ne a boleletse pele, ba ne ba phuthiwa jaaka “dinku tsa Bosera: yaka lecomane mo gare ga bohulō yoa yeōna.” Jaaka ba ile ba kopanngwa le “boidiidi yo bogolo” jwa “dinku di sele” go tloga ka 1935, eleruri ba ile ba “cosa modumō o mogolo ka ntlha ea bontsi yoa batho.”—Tshenolō 7:9; Yohane 10:16.

○ 3:1-3—Fano go na le pharologano e kgolo fa gare ga ga Jehofa, Modisa yo o pelotlhomogi, le baeteledipele ba ba setlhogo ba batho ba bogologolo ba motlha wa ga Mika. Bano ba ne ba palelwa ke go diragatsa thomo ya go disa letsomane ka go dira ka tshiamo. Ba ne ba gatelela dinku tseno tsa tshwantshetso ka bosetlhogo eseng fela ka go ja mo go tsone mme gape le ka go di “cwatolotsa letlalō”—jaaka diphiri. Badisa ba ba boikepo bao ba ne ba sa direle batho tshiamo, ba ne ba dira ‘ditiro tsa go tsholola madi’ mo go bone. (3:10) Batho bao ba neng ba sena gore ba ka iphemela jang ba ne ba tseelwa matlo a bone le dilo tse ba itshedisang ka tsone, ka dikatlholo tse di sokameng.—2:2; bapisa Esekiele 34:1-5.

○ 4:3—“Dichaba di le dintsi” le “merahe e e thata” ga di a tshwanela go supiwa gore ke merafe le dipuso tsa bopolotiki. Go na le moo, bano ke batho ba ba tswang mo merafeng yotlhe, batho bao ba tlogetseng bomorafe mme ba retologela kwa tirelong ya kutlwano kwa thabeng ya kobamelo ya boammaaruri ya ga Jehofa. (Isaia 2:2-4) Jehofa o tla ‘tlisa katlholo mme a tlhamalatse dilo’ ka tsela ya semoya mo badumeding bano ba ba emelang Bogosi jwa Modimo. Batho bano ba “boidiidi yo bogolo” ba dumalana le dikatlholo tsa bomodimo, ba thula ditšhaka tsa bone megoma mme ka jalo ba tshela ka kagiso le basupi-ka-bone ba ga Jehofa.

○ 5:2—Gongwe Bethelehema wa Eferatha o ne a bidiwa jalo ka go bo go ne go na le ditoropo tse dingwe tse pedi tse di neng di bidiwa Bethelehema. Mika o bua ka e e mo Juda, kafa borwa jwa Jerusalema. Toropo e nngwe e ne e le kwa bokone, kwa Sebulune. (Yoshue 19:10, 15) “Eferatha,” e ne e le leina la ntlha ntlha la Bethelehema wa Judea kana lefelo le le mo tikologong ya yone. (Genesise 48:7; Ruthe 4:11) Go supiwa ka botlalo go go ntseng jalo go otlelela go tlhomama ga ditsholofetso tsa dipolelelopele tsa Modimo mabapi le Mesia.

○ 6:8—Mika o ne a sa nyenyefatse botlhokwa jwa ditlhabelo tsa boitshwarelo jwa dibe mme o ne a tlotlomatsa seo eleruri se neng se le botlhokwa thata mo matlhong a ga Jehofa. (Bapisa Duteronome 10:12.) Gore Jehofa a amogele ditlhabelo, moleofi o ne a tshwanetse go bontsha dinonofo tse di jaaka tshiamiso, bopelotlhomogi, le boingotlo. Gompieno, Jehofa o lebeletse dilo tse di tshwanang mo tirelong ya rona.—1 Bakorintha 13:4-8.

○ 7:4—Mongana le legora la mitlwa ke ditlhare tse di ka nnang tsa tshwara diaparo mme tsa gagola letlalo. Mika fano o ne a tlhalosa go bola mo boitsholong ga morafe wa motlha wa gagwe. Go lebega a ne a raya gore le eleng yo o gaisang gare ga Baiseraele bao ba diganana o ne a hutsafatsa kana a utlwisa botlhoko jaaka mongana kana legora la mitlwa fa motho a ne a ka mo atamela thata.

[Setshwantsho mo go tsebe 15]

Mika o ne a bolelela pele lefelo leo Jesu a neng a tla tsholelwa kwa go lone