Go Direla Jaaka Badiri-Mmogo le Jehofa ba ba Ikanyegang

“O gu shupeditse se se molemō motho ke wèna: gapè Yehofa o lōpañ mo go wèna, ha e se gore u dihè ka tshiamō, le go rata boutlwelō botlhoko, le go sepela ka boikokobeco le Modimo oa gago?”—MIKA 6:8.

1. Ke go ya ka motheo ofe wa Dikwalo oo batlhanka botlhe ba ga Jehofa ba gompieno ba ka bidiwang ‘badiri-mmogo le ene’?

MOAPOSETOLOI wa Mokeresete Johane o ne a kwala a re: “Bōnañ kaha loratō lo nntseñ ka gōna, lo Rara o re ratileñ ka lōna, ha e bo ne ne hano re bidiwa bana ba Modimo: me re nntse hèla yalo.” (1 Yohane 3:1) Mme moaposetoloi Paulo o ne a ithaya ene le modiri-ka-ene Apolose a re: “Re badihi mmōgō le Modimo.” (1 Bakorintha 3:9) Dipolelo tseno tsoo pedi di ne tsa buiwa ke balatedi ba ga Jesu Keresete ba ba tloditsweng mme ebile di bolelwa kaga bone. Mme totatota di dira le mo batlhankeng botlhe ba boammaaruri ba Modimo. Jalo tseno di ka sobokanngwa ka go re: ‘Bonang lorato lo Rara a re ratileng ka lone fa e bo ne ne re le badiri-mmogo le Jehofa.’

2. Ke ka ntlhayang fa go ka kgonega gore batlhanka ba ga Jehofa ba nne badiri-mmogo le ene?

² Go ka kgonega jang gore batho ba ba bokoa, le ba ba sa itekanelang e nne badiri-mmogo le Mmopi yo mogolo, yo o nang le maatla a a sa feleng le botlhale, yo o tshiamiso e e itekanetseng, ebile e le mothofatso wa lorato? Seno se ka kgonega ka go bo batsadi ba rona ba ntlha ba ne ba dirilwe mo tshwanong le mo setshwanong sa Mmopi le modiri-mmogo le ene, Lefoko, kana Logos. (Genesise 1:26, 27; Yohane 1:1) Jalo batsadi ba rona ba ntlha ba ne ba fiwa selekanyo se se rileng sa botlhale, tshiamiso, maatla, le lorato. Ke sone se Jehofa a neng a ka raya batlhanka ba gagwe ba selefatshe ka moperofeti wa gagwe a re: “O gu shupeditse se se molemō motho ke wèna: gape Yehofa o lopañ mo go wèna, ha e se gore o dihè ka tshiamō, le go rata boutlwèlo botlhoko, le go sepela ka boikokobeco le Modimo oa gago?”—Mika 6:8.

3. Ke eng se se kaiwang ke Mika 6:8, mme ke eng se se tlhokafalang mo mothong pele ga a ka nna mongwe wa badiri-mmogo le Jehofa?

³ Fa re bala mafoko a a reng, “Yehofa o lopañ mo go wèna, ha e se . . . ?” go bonala fa seno se tlhalosa sentle boikarabelo jo ‘motho’ a nang le jone mo Modimong le mo bathong-ka-ene. Gore seno se bogolo jo bo kana kang se tla tlhalosiwa fa re ntse re tsweletse pele. Legale, ga se gore ke mongwe le mongwe fela yo o ka sepelang le Jehofa. Tshiamelo eno e beetswe fela ba go ka tweng ‘ba dumalanye le ene.’ (Amose 3:3) Jang? Ka go bo ba ile ba dira boineelo jo bo feletseng go Jehofa le go bo tshwantshetsa ka kolobetso ya metsing, jaaka fa go supilwe mo setlhogong se se fetileng. Ka jalo, Mika 6:8 e rayang mo bathong bano?

‘Go Dira ka Tshiamo’

4. Thatathata, ‘go bontsha tshiamiso’ go rayang?

⁴ Selo sa ntlha, go na le patlafalo ya go ‘dira ka tshiamo.’ Jaaka badiri-mmogo le Jehofa Modimo, re tshwanetse go nna le segakolodi se se molemo. Go ‘dira ka tshiamo’ totatota go raya go dira se se molemo, se se tlhokwang ke Modimo mo go rona. Seno se raya gore re tshwanetse go diragatsa maikarabelo a rona, mme segolo bogolo a go neela Jehofa kobamelo e e feletseng. (Nahume 1:2) Ga a rate go lepalepana le ope mo go seno. Tota re ka se direle barena ba le babedi.—1 Bakorintha 10:22; Mathaio 6:24.

5. Jesu Keresete o ne a bontsha jang gore o ne a rata tshiamo mme a ila boikepo?

⁵ Mme gape, go ‘dira ka tshiamo,’ re tshwanetse ‘go rata molemo le go ila boikepo,’ fela jaaka Jesu Keresete a dirile. Ka go bo a ne a rata molemo, o ne a nna “a sena boleo, a sena leshwè, a lomologanye le baleohi.” (Pesalema 45:7; Bahebera 7:26) Mme ka go bo Jesu a ne a ila boikepo, ke sone se go neng go tshwanetse fa a ne a galefela baeteledi pele ba ba itimokanyang ba ba pelotshetlha ba motlha wa gagwe.—Mathaio 23:13-36; Yohane 8:44.

6. Ke ka ntlhayang fa re tlhoka go nna le se se fetang fela go dumela ka mogopolo gore re tshwanetse go tila se se ilediwang ka go bo se le bosula?

⁶ Jaaka go ka bonwa mo sekaong sa ga Jesu, ga go a lekana go rata tshiamo. Re tshwanetse gape go ila—ee, go bifela, go tlhoa, go ferogela sebete, go nna kgatlhanong thata le—se se bosula. Ereka jaana tshekamelo ya rona e le bosula go tloga fela kwa bonyaneng go ya pele dipelo tsa rona di tsietso, di boferefere, re tlhoka se se fetang fela go dumela ka mogopolo gore se se bosula ga se batlege. (Genesise 8:21; Yeremia 17:9) Fa e se fela re ka ganetsa thatathata ditshekamelo tsa boleo le dithaelo, re tla ineela mo diphepisong tsa tsone. Re tshwanetse go nna kgatlhanong thata le se se bosula ka tsela e e tshwanang le e e tserweng ke Finehase fa a ne a tlhaba ka motswi banyalani bao ba neng ba kopanetse mo kobamelong ya boitsholo jo bo sa siamang ya Baalepeora.—Dipalō 25:5-8.

7. Ke bosupi bofe jo re nang le jone jwa gore Jehofa ga a dirise batho ba ba boikepo jaaka badiri-mmogo le ene?

⁷ Jehofa ga a batle ebile ga a kitla a dirisa batho ba ba boikepo go nna badiri-mmogo le ene. Seno se phepafadiwa go Pesalema 50:16-18, koo re balang ka go re: “Wèna, u dihañ ka go bolèla melaō ea me, ha e bo ne ne hano u tsere kgōlaganō ea me mo molomoñ oa gago? Ka e le ha u ila thutō, le mahoko a me u a latlhèla kwa moragō ga gago. E rile u bōna legodu ua le dumèlèla me u nntse ua tlhakanèla tihō le baakahadi.”

8. Ke tiragalo efe e e fang bosupi jwa gore re ka lere kgobo fa re ka dira bosula bongwe?

⁸ Re ka nna ra tshwarega mo tirelong ya ga Jehofa, ra rera mafoko a a molemo a Bogosi jwa Modimo. Mme fa re sa itlhokomele go bontsha boikgapo, re ka nna ra leofa ka ntlha ya makoa a rona a nama mme ra tlisa kgobo mo leineng la ga Jehofa. Ka sekai, dingwaga di sekae tse di fetileng, mogolwane mongwe o ne a dira boaka le kgaitsadi mongwe wa semoya yo o neng a na le monna yo o sa dumeleng. Mo maitseboeng ao go neng ga itsisiwe gore mogolwane yoo jaanong o kgaotswe, monna wa gagwe yo o neng a tletse bogale o ne a gwantela mo Holong ya Bogosi a tshotse tlhobotswana mme a feta a thuntsha batho bao ba babedi ba ba neng ba le molato. Ga go ope wa bone yo o neng a swa, mme mo letsatsing je le latelang seno e ne ya nna dikgang tse dikgolo mo koranteng e e balwang thata mo United States! Ruri, go dira phoso go lere kgobo.—Diane 6:32.

9. Go ya ka Diane 4:23, ke eng se re tshwanetseng go se sireletsa, mme ka ntlhayang?

⁹ Ka jalo, re gakololwa jaana kafa tshwanelong: “Dibèla pelo ea gago ka tlhōahalō eotlhe: gonne macō a botshelō a cwa mo go eōna.” (Diane 4:23) Ee, re tshwanetse go itlhokomela thatathata mo go seo re dumelelang dipelo tsa rona tsa tshwantshetso go se akanya ka metlha yotlhe. Thelebishene, dimakasine, le ditsela tse dingwe tsa go anamisa dikgang di ntse di tsweletse pele ka go supa dilo tse di seng phepa, go akareletsa le mekwalo ya diaka. Ka jalo, re tshwanetse go kgetha thatathata se re se lebelelang, se re se reetsang, le se re se balang. Go laola megopolo ya rona go botlhokwatlhokwa! Ka motlhala, go ka nna ga nna motlhofo gore re itumedisiwe ke go nna re akantse ka menate ya tlhakanelo-dikobo, dilo tseo re ka se akanyeng le eseng gore re ka di dira mo botshelong jwa rona. (Mathaio 5:28) Mme gantsi mogopolo o o ntseng jalo o felela ka ditiro tse di bosula. Mo boemong jwa go nna re akantse ka dilo tse di ntseng jalo, he, a re supeng leungo la moya o o boitshepo la boikgapo mme re akanye ka dilo tse di rulagantsweng go Bafilipi 4:8.—Bagalatia 5:22, 23.

“Go Rata Bopelonomi”

10, 11. (a) Boikanngo le boikanyegi di ka farologanngwa jang? (b) Morwa Modimo o ne a bontsha boikanngo le boikanyegi jang?

¹⁰ Patlafalo ya bobedi e e umakiwang mo go Mika 6:8 ke gore re ‘rate bopelonomi.’ “Go rata boikanyegi” ke tsela eo The New English Bible e balegang ka yone fano. Mokwalo o o kwa tlase wa New World Translation Reference Bible o bontsha gore lefoko la Sehebera cheʹsedh, le le kwadilweng ka gore “bopelonomi,” le ka kwalwa gape ka gore “go rata bopelonomi” kana “lorato lwa boikanyegi.” Go ya ka badiri ba dibuka-mantswe, “boikanyegi bo kaya go gana gotlhelele thaelo lefa e ka nna efe go furalela sengwe kana go se raela.” “Boikanyegi bo feta boikanyego ka go nna le mogopolo wa go batla go tshegetsa le go lwela motho kana selo, le eleng fa go na le mathata a magolo.” Ka mo go kgatlhisang, mo Dikwalong re bona gape go na le pharologanyo e se kae mo tirisong ya mafoko ano. Ka sekai, lereo “boikanyegi” ga le ke le dirisediwa dilo tse di sa tsheleng. Mme Lefoko “boikanyego” gangwe le gape le dirisiwa jalo. Ka jalo, kgwedi e bidiwa “moshupi eo o ikanyègañ mo loapiñ.” (Pesalema 89:37) Mme gape, mafoko a Modimo go bolelwa a le boikanyego, ke go re, a ka ikanngwa.a (Tshenolō 21:5; 22:6) Lefa go ntse jalo, Jehofa Modimo ke ene fela yo o kaiwang a ikanyega gammogo le batlhanka ba gagwe ba a ba amogelang. Ka jalo, malebana le Jehofa, re bala jaana: “Mo go ba ba ikanyegang o tla itshupa boikanyegi.”—2 Samuele 22:26, NW.

¹¹ Morwa Modimo o ne a le boikanngo le boikanyegi go Jehofa mo legodimong. Mo lefatsheng, o ne a tlelwa ke diteko fa a ne a le motho Jesu Keresete mme a supa kutlo ya gagwe gore o ne a le boikanngo ebile e le motho yo o ikanyegang. Seno se supiwa ke Bahebera 5:7-9, koo re balang ka go re: “(Eboñ Yesu,) eo e rileñ mo metlheñ ea gagwè a le mo nameñ, a sena go isa merapèlō le mekokotlèlō e e nañ le selelō se se tona le dikeledi kwa go èna eo o nonohileñ go mo golola mo loshuñ, me ea re a sena go utlwiwa ka ntlha ea go boiha Modimo ga gagwè, Leha a le Ñwana, leha go nntse yalo, a ithuta kutlō ka dilō tse o di bogileñ; Me e rile a sena go dihwa boitekanèlō, a cwa mosimolodi oa poloka e e sa khutleñ mo go botlhe ba ba mo utlwañ.”

Diteko tsa Boikanyegi

12. Ka dinako tse dingwe, ke eng se se ka lekang boikanyegi jwa rona, mme bangwe ba ile ba arabela jang mo ditekong tse di ntseng jalo?

¹² Boikanyegi go Jehofa Modimo bo tlhoka gore le rona re ikanyege mo batlhankeng ba gagwe mo lefatsheng, Bakeresete-ka-rona. Moaposetoloi Johane o phepafatsa seno fa a re gakolola ka go re: “Eo o sa rateñ mogagabō eo o mmōnañ ka matlhō, ga a kake a rata Modimo o a e señ a o bone.” (1 Yohane 4:20) Bosaitekanelang jwa ba bangwe bo ka leka boikanyegi jwa rona mo go seno. Ka motlhala, fa batho bangwe ba sena go kgopiwa, ba ile ba supa gore boikanyegi jwa bone mo phuthegong ya ga Jehofa bo bokoa ka go sa nne gone mo dipokanong tsa Bokeresete. Teko e nngwe ya boikanyego jwa rona mo bakaulengweng ba rona e nna gone fa bao Jehofa a ba dirisang go etelela pele ba dira phetso e e phoso. Nako le nako, diphoso tse di ntseng jalo di ile tsa dirisiwa ke bangwe jaaka seipato sa gore ba ngale mme ba ikgaoganye le phuthego e e bonalang ya ga Jehofa. A mme boitshwaro jwa bone ke jo bo seng phoso? Le eseng!

13. Ke ka ntlhayang fa go ikgaoganya le phuthego ya ga Jehofa go sa utlwale, mme ke dilo dife tse dingwe tse ba ba ntseng jalo ba ba sa ikanyegeng ba ka welang mo go tsone?

¹³ Ke ka ntlhayang fa batho bao e se ba ba senang molato ka go tlogela phuthego ya Modimo? Ke ka go bo Lefoko la gagwe le re tlhomamisetsa jaana: “Ba ba ratañ molaō oa gago ba na le kagishō e kgolo; me ga ba na go kgopiwa gopè.” (Pesalema 119:165) Mme gape, re laelwa gore ‘go ratana ga rona go tuke; gonne lorato lo tlo lo bipe bontsi jwa dibe.’ (1 Petere 4:8; Diane 10:12) Gape, a re re motho mongwe o ikgaoganya le batho ba ga Jehofa. O ka ya kae? A ga a lebagana le kgang e e neng ya thulana le baaposetoloi ba ga Jesu fa a ne a ba botsa gore a le bone ba ne ba batla go mo tlogela? Moaposetoloi Petere o ne a araba jaana kafa tshwanelong: “Morèna, ana re ka ea kwa go mañ? Wèna u na le mahoko a botshelō yo bo sa khutleñ.” (Yohane 6:68) Ga go na gope ko motho a ka yang teng fa e se go “Babelona o mogolo,” mmuso wa lefatshe lotlhe wa bodumedi jwa maaka, kana go tsena mo botshwarong jwa “sebatana” sa sepolotiki sa ga Satane. (Tshenolō 13:1; 18:1-5) Gantsi, ba ba sa ikanyegeng bao ba ileng ba tlogela phuthego e e bonalang ya ga Jehofa ke bao ba ileng ba itsalanya le batho ba ba mo go “Babelona o mogolo” yo o tlontlololang Modimo.

“Sepela ka Boingotlo le Modimo wa Gago”

14, 15. (a) Lefoko la Sekgoa “boingotlo” le kaya eng? (b) Ke tlhaloso efe ya “boingotlo” e re amegileng ka yone fano, mme ka mabaka afe? (c) Ke ka ntlhayang fa Bakeresete ba tshwanetse ‘go sa ikgopole thata ka ntlha ya dikgono tsa bone kana botlhokwa’ jwa bone?

¹⁴ Lefoko la Sekgoa “boingotlo” le kaya dilo di le mmalwa. Le ka raya go sa nneng boiketsiso, “go nna selekanyo se sebotlana, bogolo, kana bophara.” Kana le ka kaya boitsheko, “go tlhokomela bothakga jwa moaparo le boitshwaro.” (1 Timotheo 2:9) Se sengwe gape se re amegileng ka sone ke “boingotlo,” ke gore, motho go lemoga ditlhaelo tsa gagwe kana “a ikakanya sentle kaga dikgono tsa gagwe le botlhokwa jwa gagwe.” Re ka seke re nne mongwe wa badiri-mmogo le Jehofa fa re ne re itseela kwa godimo, re gapa tlhokomelo ya batho go na le go e lebisa kwa go Jehofa Modimo thata.

¹⁵ ‘Go sa tseele dinonofo tsa rona le botlhokwa jwa rona kwa godimo thatathata’ ke sone se se kaiwang ke lefoko la Sehebera le le kwadilweng ka gore “boingotlo” go Mika 6:8. Seno se phepafadiwa ke tsela eo lefoko leno le dirisiwang ka yone moo le bonalang teng fela mo Dikwalong tsa Sehebera. Go Diane 11:2 ga le farologanngwe le boseng-phepa jwa kafa dikobong mme le boikgodiso, joo bo nnang gone ka ntlha ya go ikgopola thatathata. Re bala jaana moo: “E re ha boikgodishō bo tla, hoñ go tle ditlhoñ: me botlhale bo nna le eo o ikgōbalatsañ.” Go ingotla go tsamaisana mmogo le go boifa Jehofa, moo go kaiwang e le botlhale. (Pesalema 111:10) Motho yo o ingotlang o boifa Jehofa ka go bo a itemoga gore o farologana thatathata le Modimo, le tshiamo ya ga Jehofa le nonofo le go sa itekanelang ga gagwe le makoa. Ka gone, motho yo o ingotlang o itirela poloko ka poifo le ka thoromo.—Bafilipi 2:12.

16. Dingwe tsa dikwalo tseo di bontshang gore Bakeresete ba tshwanetse go ingotla ke dife?

¹⁶ Go na le mabaka a le mantsintsi a gore ke eng fa badiri-mmogo le Jehofa ba tshwanetse go ingotla! Go sa kgathalesege botlhale jo re ka neng re na najo, nonofo ya mmele eo re ka neng re na le yone, kana khumo ya dilo tse di bonalang eo re ka neng re na le yone, ga re na lebaka lepe la go ikgogomosa. (Yeremia 9:23) Ka ntlhayang? Ka ntlha ya molao-motheo o o tlhalositsweng go 1 Bakorintha 4:7: “Mañ eo o gu chwanolotseñ le eo moñwe? Me u na le eñ se u se kañ ua se nèwa hèla? me ha u se neilwe, u belahalèlañ, yaka ekete ga ua se nèwa?” Me ebile gape ga re na lebaka lepe la go ikgogomosa ka go bo re bona maungo mo bodiheding jwa rona, ka go bo ke eng se re se balang go 1 Bakorintha 3:6, 7? Koo Paulo o ne a re: “Nna ka yala, Apolose a nosa; me Modimo oa uñwisa. Yalo eo o yalañ e be e se sepè, leha e le eo o nosañ; ha e se Modimo hèla o o uñwisañ.” Mafoko a ga Jesu go Luke 17:10 le one a tshwanetse go re thusa gore re ingotlahatse, ka go bo o ne a re: “E tla re lo sena go diha dilō cotlhe tse re di laolecweñ, lo re, Re batlhanka ba re senañ molemō; re dihile se e neñ e le chwanèlō ea rona go se diha hèla.”

17. Ke ka ntlhayang fa go ingotla ruri e le tsela e e botlhale?

¹⁷ Go ingotlafatsa ruri ke tsela ya botlhale. Boingotlo bo re thusa go kgotsofalela gongwe le gongwe moo re filweng tshiamelo ya go direla gone. Fa re ingotlafatsa, ga re kitla re gagamalela go leka go itshupa mo bathong mme re tla kgotsofalela go ikaya jaaka “eo o leñ mmōtlana.” (Luke 9:48) Mme gape, re tla nna le boikutlo jwa mopesalema, yo o neng a bua a re: “Letsatsi le le leñwe hèla mo malwapeñ a gago, le gaisa malatsi a makgolo a leshomè. Ke rata ka nna molebedi oa kgōrō mo tluñ ea Modimo bogolo go go aga mo megopiñ ea boikèpō.” (Pesalema 84:10) Mme gape, fa re ingotlile, re tla nna le lorato loo lo tla re tlhotlheletsang go etelela pele mo go tlotleng ba bangwe.—Baroma 12:10.

Boingotlo bo a Tlhokafala mo Basheng

18. (a) Ke ka ntlhayang fa boingotlo bo tshwanela segolo bogolo mo basheng? (b) Go supa gore boingotlo bo a tlhokafala, ke ditiragalo dife tse di diragalelang basha ba motlha wa gompieno?

¹⁸ Mme ebile go tshwanela segolo bogolo gore basha ba Bakeresete ba ikgabise ka seaparo sa boingotlo. Abo Elihu a ile a ba fa sekao se se molemo jang ne! Lemororo a ne a na le dikarabo tse di tshwanetseng, o ne a ikemiseditse go letela ka tlotlo go fitlhelela banna bagolo ba bua pele. (Yobe 32:6, 7) Gantsi, basha ba lemaletse go itshepa thatathata, go sa itemoge gore baa tlhaela. Ka go bo ba na le nonofo ya mmele mme ebile ba bapetse kitso nngwe, ba ka nna ba nna le go lebela bagolo ba bone kwa tlase. Mme ga se gore kitso e tshwana le botlhale, joo e leng tiriso ya kitso. Se se hutsafatsang ke seemo seo basha ba segompieno ba itshwarang ka sone mo United States. Koo, 63 lekgolong ya ba ba tshwarelwang bokebekwa jo bo boitshegang ke basha ba ba ka fitlhang dingwageng tse 24, mme 30 lekgolong ya ba ba tshwarwang e le ba ba leng kafa tlase ga dingwaga tse 18. Ebile go begwa gore “Maamerika a dingwaga tse 15 go ya go 24 ke bao thata ba bolawang ke go kgweetsa ba tagilwe kana ba fapaantswe tlhaloganyo ke diokobatsi.” Mo lefatsheng leo, “manyalo a batho ba basha ke ao a ntseng a felela ka tlhalano,” lemororo go begwa gore “ke gantsi manyalo a ka itshwarelela fa e le gore monyadwi le monyadi ba na le dingwaga di le dintsinyana tsa botlhale fa ba tlhatlogela kwa aletareng.”

19. Ke kgakololo efe ya Dikwalo e basha ba tla bong ba dira sentle go e gakologelwa?

¹⁹ Abo kgakololo ya Lefoko he e le ka tsela e e botlhale jang ne! Kafa tshwanelong, e laela basha go tlotla borraabo le bommaabo, ba ba utlwa mo go sengwe le sengwe. (Baefesia 6:1-3; Bakolosa 3:20) Mme ebile segolo basha ba tshwanetse go tlhokomela kgakololo e e botlhale e e reng: “U ikanyè Yehofa ka pelo eotlhe ea gago, me u se ka ua ikaèga tlhaloganyō ea gago hèla: Mo ditseleñ cotlhe tsa gago u ipolèlè èna, me o tla siamisa ditselana tsa gago.”—Diane 3:5, 6.

20. Ke dituelo dife tseo batho botlhe ba ba ineetseng le go kolobediwa ba tshwanetseng go di lebelela fa ba reetsa Mika 6:8?

²⁰ Ke dituelo dife tse rotlhe re ka di lebelelang fa, morago ga go supa gore re ikantse mo go Jehofa ka boineelo le kolobetso ya mo metsing, re ‘bontsha tshiamiso, re supa lorato lwa boikanyegi, mme re ingotlile mo go sepeleng le Modimo’? Se se di fetang tsotlhe, re tla amogelwa ke Jehofa ka ntlha ya go bo re fitlhelela dipatlafalo tsa gagwe mme ka gone re tla ipedisa pelo ya gagwe ka go tlhakanela mo go itshepiseng leina la gagwe le legolo le le le boitshegang. (Diane 27:11) Mme gape, re tla lemoga boammaaruri jono jwa molao-motheo o o reng “poihōmodimo e molemō kaga dilō cotlhe, ka e na le choloheco kaga botshelō yoa gompiyeno, le kaga yōna yo bo tla tlañ.”—1 Timotheo 4:8.

[Ntlha e e kwa tlase]

O Araba Jang?

◻ Tumalanong le Mika 6:8, ke eng se se tlhokafalang go ‘bontsha tshiamiso’?

◻ Boikanyego jwa rona mo go Jehofa bo ama Bakeresete ka rona jang?

◻ Ke ka ntlhayang fa re tshwanetse go ‘ingotla mo go sepeleng le Modimo’?

◻ Ke ka ntlhayang fa boingotlo segolo bogolo bo tshwanela mo Bakereseteng ba basha?

[Setshwantsho mo go tsebe 17]

A o sireletsa pelo ya gago ka go kgetha se o se lebelelang, se o se reetsang, le se o se balang?

[Setshwantsho mo go tsebe 18]

Petere o ne a itse gore go ne go sena gope ko motho a ka yang teng ka go bo Jesu o ne a na le “mahoko a botshelō yo bo sa khutleñ.” A le wena o ikemiseditse go ikanyega fela mo phuthegong ya ga Jehofa?