Oketsa Kagiso ya Gago Ka Kitso e e Tlhomameng

“Ka re, Tshegōhaco e nnè le lona, le.kagishō e lo totahalèlè mo kicoñ ea Modimo le ea ga Yesu Morèna oa rona.”​—2 PETERE 1:2.

1, 2. (a) Ke eng fa kamano e e kagiso le Modimo e ka tshwantshanngwa le lenyalo? (b) Re ka nonotsha jang kagiso ya rona le Modimo?

KAMANO e e kagiso e e dirilweng le Jehofa Modimo ka kolobetso ya gago, mo mabakeng mangwe, e tshwana le lenyalo. Lemororo letsatsi la moletlo le kgatlhisa, ke tshimologo fela ya kamano e e botlhokwatlhokwa. Ka boiteko, nako, le boitemogelo, kamano ya lenyalo e tla a gola le eleng go nna e e tlhokegang thata, e nna botshabelo mo dinakong tsa tlalelo. Ka gone, ka mo go tshwanang, ka boiteko le thuso ya ga Jehofa, o ka godisa kagiso ya gago le ene.

² Moaposetoloi Petere o ne a tlhalosa kafa bao ba “boneñ tumèlō” ba neng ba ka nonotsha kagiso ya bone le Modimo. O ne a kwala jaana: “Ka re, Tshegōhaco e nnè le lona, le kagishō e lo totahalèlè mo kicoñ ea Modimo le ea ga Yesu Morèna oa rona.”​—2 Petere 1:1, 2.

‘Kitso e e Tlhomameng ya Modimo’

3. Go nna le kitso e e tlhomameng kaga Jehofa le Jesu go rayang?

³ Lefoko la Segerika le le rayang ‘kitso e e tlhomameng’ (e·pi’gno·sis) le le dirisitsweng mo kgannyeng eno le raya kitso e e atamalaneng thata, e e boteng. Lediri leo le ka raya kitso e e bapalwang ka boitemogelo jwa botho mme le neelwa e le ‘go itse ka tlhomamo’ mo go Luke 1:4. Moithuti wa Mogerika Culverwel o tlhalosa gore mo go ene lefoko leo le raya go “tlwaelana botoka le selo se ke neng ke se itse pele; pono e e tlhomameng thata ya selo se ke se boneng bogologolo.” Go bapala ‘kitso e e tlhomameng’ e e ntseng jalo go kopanyeletsa go itse Jehofa le Jesu ka mo go atamalaneng jaaka batho, go tlwaelana botoka le dinonofo tsa bone.

4. Re ka godisa jang kitso kaga Modimo, mme ke eng fa seno se tokafatsa kagiso ya rona le ene?

⁴ Ditsela tse pedi tsa go bapala kitso eno ke ditlwaelo tse di molemo tsa thuto ya botho le go nna wa ka metlha mo dipokanong tsa batho ba Modimo. Ka ditsela tseno o tla a ithuta ka mo go phepafetseng thata ka moo Modimo a itsayang ka teng le se a se akanyang. O tla nna le kakanyo e e phepafetseng kaga botho jwa gagwe mo mogopolong wa gago. Mme go itse Modimo mo go atamalaneng go raya go etsa le go bontsha setshwano seno. Ka motlhala, Jehofa o ne a tlhalosa motho yo o bontshang go sa ikgagapelele ga bomodimo, mme go tloga foo o ne a re: “A e ne e se gōna go nkitse?” (Yeremia 22:15, 16; Baefesia 5:1) Go etsa Modimo ka mo go atamalaneng go godisa kagiso ya gago le ene ka ntlha ya gore o tokafatsa mo go apareng motho yo mosha, “eo o nntseñ a shahalediwa mo kicoñ kaha sechwanoñ sa eo o mo tlhodileñ.” O nna yo o ipedisang mo Modimong thata.​—Bakolosa 3:10.

5. (a) Kitso e e tlhomameng e thusitse jang mosadi mongwe wa Mokeresete? (b) Ke ka ditsela dife re ka etsang Jehofa mo go atamalaneng thata?

⁵ Mosadi mongwe wa Mokeresete yo o neng a bidiwa Lynn o ne a fitlhela go itshwarela go le bokete ka ntlha ya go tlhoka kutlwisisano le Mokeresete ka-ene. Mme thuto ya botho e e kelotlhoko ya ga Lynn e ne ya mo dira gore a tlhatlhobe boikutlo jwa gagwe. “Ke ne ka nagana ka mofuta wa Modimo o Jehofa a leng one, ka moo a sa bolokeng molato wa tsone ka gone,” o ne a dumela. “Ke ne ka akanya ka dilo tsotlhe tse di nnyennyane tse re di direlang Jehofa letsatsi le letsatsi, mme lefa go le jalo a sa tshwarelele mo go tsone. Kgang eno le kgaitsadi wa me wa Mokeresete e ne e le nnye thata fa e tshwantshanngwa le tseo. Ka gone nako le nako fa ke ne ke mmona, ke ne ke ipolelela jaana, ‘Jehofa o mo rata fela jaaka a nthata.’ Seno se ne sa nthusa go fenya bothata.” A o bona dikarolo tse le wena o tlhokang go etsa Jehofa ka moo go atamalaneng?​—Pesalema 18:35; 103:8, 9; Luke 6:36; Ditihō 10:34, 35; 1 Petere 1:15, 16.

Kitso e e Tlhomameng kaga Keresete

6. Jesu Keresete o bontshitse jang gore tiro ya go rera e ne e le botlhokwa thata mo go ene?

⁶ Go nna le kitso e e tlhomameng kaga Jesu go tlhokafala go nna le “mogopolō oa ga Keresete” le go mo etsa. (1 Bakorintha 2:16) Jesu e ne e le mmoledi yo o matlhagatlhaga wa boammaaruri (Yohane 18:37) Moya wa gagwe wa boefangele o o nonofileng o ne o sa koafadiwe ke dipono tse di sokameng tsa batho. Lemororo Bajuda ba bangwe ba ne ba tlhoile Basamaria, o ne a neela mosadi wa Mosamaria bosupi fa sedibeng. Mme kana le eleng go tshwara motlotlo o moleele mo phatlalatseng le mosadi mongwe le mongwe go ne go sa amogelesege!a Mme Jesu ga a ka a letlelela boikutlo jwa mo batho go emisa gore a neele bosupi. Tiro ya Modimo e ne e lapolosa. O ne a re: “Seyō sa me ke go diha go rata ga eo o nthomileñ le go wetsa tihō ea gagwè.” Boipelo jwa go bona batho ba arabela, jaaka mosadi wa Mosamaria le ba bantsi ba motse, go ne go nonotsha Jesu jaaka dijo.​—Yohane 4:4-42; 8:48.

7. (a) Kitso kaga Jesu e tshwanetse go re tlhotlheletsa go dira eng? (b) A Modimo o lebeletse gore batlhanka botlhe ba gagwe ba dire tiro e e lekanang ya go rera? Tlhalosa.

⁷ A o ikutlwa jaaka Jesu a ne a ikutlwa? Ke boammaaruri, go simolola motlotlo le motho yo ba sa mo itseng kaga Bibela go bokete mo bontsing ebile gantsi go nyadiwa ke ba bangwe ba ba agileng nabo. Lefa go le jalo, go nna le boikutlo jwa mogopolo jo bo tshwanang le joo Jesu, a neng a na le jone ga re kake ra tila ntlha eno: Re tshwanetse go neela bosupi. Legale, ga se gore botlhe ba ka rera ka go lekana. Seno se ikaegile go ya ka dikgono le maemo a rona. Ka gone o seka wa ikutlwa gore Modimo ga o nke o kgotsofadiwa ke tirelo ya gago e e boitshepo. Lefa go ntse jalo, kitso ya rona kaga Jesu e tshwanetse go re tlhotlheletsa go dira bojotlhe jo re ka bo kgonang. Jesu o ne a akgolela tirelo ya pelo yotlhe.​—Mathaio 13:18-23; 22:37.

Botlhokwa jwa go Tlhoa Boikepo

8, 9. Ke dilo dife tse Modimo o di tlhoileng, mme re ka bontsha jang letlhoo le le tshwanang?

⁸ Gape kitso e e tlhomameng e re thusa go tlhaloganya gore ke dilo dife tse di tlhoilweng ke Jesu le Jehofa. (Bahebera 1:9; Isaia 61:8) “Go na le dilō di le thataro tse Yehofa o di ilañ; E, di shupa tse di mo hedisañ pelo: ke tse, Matlhō a a kadileñ, loleme lo lo akañ, le diatla tse di chololañ madi a a senañ molato; Pelo e e logañ ditlhatlhanyō tsa boikèpō, dinaō tse di boheho go sianèla kwa bosenyiñ: Moshupi oa kakō eo o bilolañ maaka, le eo o yalañ kgotlhañ mo baneñ ba monna.” (Diane 6:16-19) Maikutlo ano le maitshwaro a ‘makgapha mo go ene.’ Lefoko la Sehebera le le neetsweng ‘makgapha’ le tswa mo lefokong le le rayang “Go ferosa sebete, go tena,” “go nna kgatlhanong thata, jaaka se se kgatlhanong le boikutlo jotlhe; go leba go le makgapha, go ila ka tšhakgalo.” Ka gone go nna le kagiso le Modimo, re tshwanetse ra nna le kilo e e tshwanang.

⁹ Ka motlhala, tila le “matlhō a a kadileñ le go supa gope ga boikgodiso.” Morago ga kolobetso bangwe ba ne ba ikutlwa gore ga ba tlhole ba tlhoka go thusiwa ka metlha ke bao ba neng ba ba ruta. Mme Bakeresete ba basha ba tshwanetse go amogela ka boikokobetso thuso jaaka ba ntse ba itshetlela sentle mo boammaaruring (Bagalatia 6:6) Gape, tila go seba, mo go ka nnang ga tsosa “kgotlhañ mo baneñ ba monna.” Ka go anamisa magatwe a a sa siamang, dikgalo tse di senang boammaaruri, kana maaka, re ka nna ra tswa re sa ‘tsholole madi a a senang molato,’ mme ruri re ka senya leina le lentle la motho yo mongwe. Ga re kake ra nna le kagiso le Modimo fa re sena kagiso le bakaulengwe ba rona. (Diane 17:9; Mathaio 5:23, 24) Gape mo lefokong la gagwe Modimo a re “[o] ila tlhalō.” (Malaki 2:14, 16) Ka gone, a wena, fa e le gore o nyetse, o dira gore o boloke lenyalo la gago le nonoñle? A o tenwa ke go nna matlho-matlho le go iketla le molekane wa motho yo mongwe mo go sa go tshwanelang? A jaaka Jehofa, o ila boitsholo jo bo maswe jwa kafa dikobong? (Duteronome 28:17, 18) Go tlhoa ditiro tse di ntseng jalo ga go motlhofo, ereka tseno di ka nna tsa ikuela mo nameng e e tletseng boleo ya rona, mme ke tse di ratwang ke lefatshe.

10. Re ka tlhagolela jang letlhoo la boikepo?

¹⁰ Jaaka thuso ya go tlhagolela letlhoo la boikepo, tila go itlosa bodutu ka dibaesekopo, dithulaganyo tsa TV, kana dibuka tse di bontshang bodimona, boitsholo jo bo maswe, kana bothubaki (Duteronome 18:10-12; Pesalema 11:5) Ka go dira gore go dira bosula go nne ‘mo go seng maswe mo go kalo’ kana le eleng mo go tshegisang, boitloso-bodutu jwa go nna jalo bo senya maikutlo a go godisa letlhoo la bomodimo kgatlhanong le jone. Mo letlhakoreng le lengwe, go rapela ka tlhoafalo go tla a thusa, ereka Jesu a ne a re: “Lo tapèlè, gore lo se tsene mo thaeloñ: mōea ōna o tlhaga, me nama e bokōa.” (Mathaio 26:41) Mabapi le go lebagana le keletso ya nama e e maatla, Mokeresete mongwe o ne a re: “Ke ipateletsa go rapela. Ka dinako tse dingwe ke ikutlwa ke sa nonofa go atamela Jehofa, mme ka go ipateletsa gore ke rapele, ka go ikuela kwa go ene, ke bona maatla a ke a tlhokang.” O tla tlhaloganya botoka gore ke ka ntlha yang fa Jehofa a tlhoile go dira bosula fa mo pelong ya gago o akanya ka matswela a a botlhoko.​—2 Petere 2:12, 13.

11. Ke dilo dife tse di ka re tshwenyang ka dinako dingwe?

¹¹ Go sa kgathalesege go nna le kagiso le Modimo, ka dinako tse dingwe o tla tsenngwa mo kotsing ke dikgatelelo tsa letsatsi le letsatsi le dithaelo mme le eleng makoa a gago. Gakologelwa, o itirile sekonopiwa se se kgethegileng sa ga Satane. O tlhabana le bao ba bolokang ditaelo tsa Modimo ebile e le Basupi ba ga Jehofa! (Tshenolō 12:17) He, o ka boloka kagiso ya gago e e mo teng jang?

Go Lwantsha Dipatikego tse di Kgoreletsang Kagiso

12. (a) Motheo wa Pesalema 34 ke eng? (b) Dikwalo di tlhalosa jang maikutlo a ga Dafide fa a ne a le mo boitemogelong jwa gagwe?

¹² “Dipatikègō tsa mosiami di dintsi,” go ne ga kwala Dafide mo go di Pesalema 34:19. Go ya ka mokwalo o o fa godimo wa Pesalema Pes 34:Maf eno, Dafide o ne a e kwala morago ga a sena go nna gaufi le loso. Fa a ne a tshaba Kgosi Saulo, Dafide o ne a batla botshabelo mo go Akishe, kgosi ya Bafilisitia ya Gatha. Batlhanka ba kgosi eo ba ne ba lemoga Dafide mme, fa ba gakologelwa ditiro tsa gagwe tse di fetileng tsa bosole a direla Iseraele, ba ne ba ngongorega kwa go kgosi Akishe. Fa tsebe ya ga Dafide e ne e utlwa seno, o ne a “boloka mahoko auō mo peduñ ea gagwè, me a boiha Akishe kgosi ea Gatha thata.” (1 Samuele 21:10-12) Kana ebile, ono e ne e le motse wa gagabo Goliathe, mme Dafide o ne a bolaile mogaka wa bone​—o ne a tshotse le eleng tšhaka ya mokaloba yoo! A jaanong ba ne ba tla a dirisa tšhaka e kgolo eno go kgaola tlhogo ya gagwe? Dafide o ne a ka dirang?​—1 Samuele 17:4; 21:9.

13. Dafide o ne a dira eng fa a ne a le mo tlalelong eno, mme re ka latela jang sekao sa gagwe?

¹³ Dafide o ne a kokotlela Modimo ka selelo se se botlhoko a kopa thuso. “Mohumanegi eo, o na a bitsa, me Yehofa a mo utlwa, a mo golola mo ditlaleloñ cotlhe tsa gagwè,” Dafide o ne a rialo. Gape o ne a bolela jaana: ‘A nkgolola mo ditlalelong tsotlhe tsa me.’ (Pesalema 34:4, 6, 15, 17) A le wena o ithutile go kokotlela Jehofa, o tsholola pelo ya gago mo metlheng ya tlalelo? (Baefesia 6:18; Pesalema 62:8) Lemororo ditlalelo tsa gago di ka seka tsa nna tse di maswe jaaka tsa ga Dafide, o santse o ka fitlhela gore Modimo o tla a go neela thuso ka nako e eleng yone. (Bahebera 4:16) Mme Dafide o ne a dira mo gontsi go na le go rapela.

14. Dafide o ne a dirisa jang ‘kgono ya go tlhaloganya,’ mme Modimo o tlametse ka eng go re thusa go dira se se tshwanang?

¹⁴ “[Dafide] a iphetola mokgwa ha pele ga bōnè, a ipaea botsenwa . . . Hoñ Akishe a raea batlhanka ba gagwè, a re, Bōnañ, loa bōna ha monna eo a tsènwa: me ka re, lo mo lerile kwa go nna go reñ?” (1 Samuele 21:13-15) Dafide o ne a akanya leano le a neng a ka falola ka lone. Jehofa o ne a segofatsa maiteko a gagwe. Ka mo go tshwanang, fa re kopana le mathata a a raraaneng, Jehofa o lebeletse mo go rona go dirisa dikgono tsa tlhaloganyo eseng go lebelela kwa go ene go re a rarabololela. O re neetse Lefoko la gagwe le le tlhotlheleditsweng le le tla ‘nayang ba ba sa tlhalehang botlhale, . . . kitso le kgono ya go akanya.’ (Diane 1:4; 2 Timotheo 3:16, 17) Gape Modimo o tlametse ka bagolwane ba phuthego, ba ba ka re thusang go itse ka mo re ka bolokang ditekanyetso tsa Modimo ka gone. (1 Bathesalonia 4:1, 2) Gangwe le gape, banna bano ba ka go thusa mo go batlisiseng mo dikgatisong tsa Watch Tower Society go batla thuso mo go direng phetso e e siameng kana go dirisana le bothata bongwe.

15. Ke eng fa Pesalema 34:18 e gomotsa?

¹⁵ Le eleng fa re utlwa botlhoko mo dipelong ka ntlha ya makoa a rona kana go palelwa ga rona, fa re na le boikutlo jo bo siameng, re ka boloka kagiso ya rona le Modimo. Dafide o ne a kwala mo go Pesalema 34:18 jaana: “Yehofa o gauhi le ba ba pelo e phatlogileñ, o boloka ba ba mōea o o ñomogileñ.” Fa re kopa maitshwarelo mme re tsaya dikgato tse di tlhokafalang go baakanya mabaka (segolo-bogolo mo dikgetsi tsa boleo jo bo masisi), Jehofa o tla a nna gaufi le rona, a re tshegetsa mo boikutlong.​—Diane 28:13; Isaia 55:7; 2 Bakorintha 7:9-11.

Kitso ya Botho e Neela Kagiso

16. (a) Re bapala kitso e e tlhomameng ya Modimo ka tsela efe e nngwe? (b) Tlhalosa mafoko a ga Dafide: “A lo ko lo lekeñ lo bōnè ha Yehofa a le molemō.”

¹⁶ Tsela e nngwe e re ka bapalang kitso e e tlhomameng ya Modimo ka yone, kwantle ga go nna le boikitsiso jwa semoya, ke ka go itemogelela thuso ya gagwe e e lorato. (Pesalema 41:10, 11) Go gololwa mo ditlalelong ga se ka nako tsotlhe go rayang go khutlisiwa ga bothata ka bofefo kana ka mo go feletseng; o ka nna wa tshwanelwa ke go tswelela o go itshokela. (1 Bakorintha 10:13) Lemororo botshelo jwa ga Daiide bo ne jwa sirelediwa kwa Gatha, o ne a tswelela e le motshabi ka dingwaga tse dintsinyana, a lebana le bothata morago ga jo bongwe. Go ralala gotlhe moo, Dafide o ne a itemogelela tshireletso ya ga Jehofa le tshegetso. O ne a lateletse le go bona kagiso le Modimo, gape a ithuta gore bao ba dirang jalo “ga ba ketla ba tlhōka sepè se se molemō.” Ka go lemoga ka boitemogelo jwa botho ka moo Jehofa a ileng a mo tshegetsa ka gone mo tlalelong, Dafide o ne a ka bolela jaana: “A lo ko lo lekeñ lo bōnè ha Yehofa a le molemō; go segō monna eo o mo ikanyañ.”​—Pesalema 34:8-10, 14, 15.

17. Ka nako ya tlalelo, ke phelelo efe e go ikanya Jehofa ga lelapa lengwe le neng la nna le yone?

¹⁷ Go ikanya Jehofa mo mathateng go tla a go kgonisa le wena go ‘leka gore o bone fa Yehofa a le molemo.’ Ka ntlha ya kotsi, Mokeresete mongwe mo botlhaba-bogare jwa United States o ne a latlhegelwa ke tiro e e duelang sentle eo a neng a na le yone ka dingwaga di le 14. Ereka ba ne ba sena madi, Ene le lelapa la gagwe ba ne ba kokotlela Modimo. Lemororo, ka nako e e tshwanang ba ne ba fokotsa ditshenyegelo, ba ronopa mo tshimong e e gautshwane, le go tshwara ditlhapi. Ka thuso ya bangwe mo phuthegong le ka go dira tiro ya nakwana fa e le teng, lelapa leno la ba bane le ne la tshela. Ngwaga morago ga kotsi mmè, o ne a gakologelwa jaana: “Re ka nna ra itsietsa ka go akanya gore re ikantse Jehofa, fa tota re ikantse dikgono tsa rona, molekane wa rona, kana tiro ya rona. Lefa go le jalo, rona re ithutile go mo ikanya tota. Dilo tseno di ka nna tsa tsewa, mme Jehofa ga a kitla a re tlogela​—le eleng ka motsotso. Lemororo re na le tse re di tlhokang fela, kamano ya rona le Jehofa jaaka lelapa e atamalane thata.”

18. Ke eng se se tla a go kgonisang go itshokela le eleng mathata a lobaka lo loleele?

¹⁸ Ee, bothata jwa madi bo ka nna jwa nnela ruri. Kana mongwe o ka nna a tlhaselwa ke bolwetse jwa mmele jo bo sa foleng, go sa utlwaneng ga botho le yo mongwe, go kgoberega ga boikutlo, jaaka khutsafalo; kana sengwe se se nang le mathata a mangwe. Lefa go le jalo, ka go itse Modimo, ka boammaaruri o tla a nna le tumelo mo tshegetsong ya gagwe. (Isaia 43:10) Ikanyo eno e e sa senyegeng e tla a go thusa go itshoka le go nna le “kagishō ea Modimo e e hetañ tlhaloganyō eotlhe.”​—Bafilipi 4:7.

19. Re itse jang gore Jehofa ga a tlodise dipogisego tsa rona matlho?

¹⁹ Fa o raletse boitemogelo jo bo bokete, le ka motlha o seka wa lebala gore Jehofa o itse gore o a bogisega. Mo Pesalemeng nngwe e le yone e neng e dirilwe fa a ne a gakologelwa boitemogelo jwa gagwe kwa Gatha, Dafide o ne a kopa Jehofa jaana: A u ko u tsenyè dikeledi tsa me cotlhe mo modutwaneñ oa gago; a ga di mo lokwaloñ loa gago?” (Pesalema 56:8) Kwantle le pelaelo, Modimo o ne a reetsa kopo ya ga Dafide. Abo go gomotsa jang ne go itse gore Modimo o ne a tla a kgobokanya dikeledi tsa go nna jalo tse di dirilweng ke tlalelo le ditlhodiego mme a di tsenya, jaaka go ka tualo, mo sepakong sa gagwe sa letlalo, jaaka mongwe a ne a ka tshela bojalwa jo bo botlhokwa, kana metse a a nowang mo sengweng se se ntseng jalo! Dikeledi tsa go nna jalo di ne di tla a gakologelwa ka metlha, ee, di kwadilwe mo bukeng ya Modimo. Abo Jehofa a le kakanyetso jang ne mo ntlheng eno!

20. Re ka godisa jang kagiso ya rona le Modimo?

²⁰ Ka gone kolobetso ya gago ke tshimologo fela ya kamano e e kagiso le Modimo. Ka go tlwaelana botoka le dinonofo tsa botho tsa Modimo le Jesu, le go itemogela ka botho tshegetso ya ga Jehofa mo ditekong, o tla godisa kagiso ya gago le Modimo. Ga o kitla fela o nna le kamano le Jehofa eo e tla nnang botshabelo jwa polokesego jaanong mme gape o tla a nna le tsholofelo e e botlhokwa ya go tshelela ruri mo paradaiseng, kwa o tla a bonang ‘boipelo jo bogolo mo letlotlong la kagiso.’​—Pesalema 37:11, 29.

A O A Gakologelwa?

◻ Re ka bapala kitso e e tlhomameng kaga Modimo le Jesu ka ditsela dife?

◻ Go etsa Modimo le Jesu go tla a re dira gore re dire eng?

◻ Re etsa go tlhoa bosula ga Modimo jang?

◻ Re ka bontsha kagiso jang go sa kgathalesege mathata?

[Ntlha e kwa tlase]

[Setshwantsho mo go tsebe 17]

Jesu ne a gana go letlelela dipono tsa batho go kgoreletsa go neela bosupi ga gagwe. A o etsa tlhagafalo ya gagwe ya go rera?

[Setshwantsho mo go tsebe 18]

Fa a ne a lebagane le bothata jo bo masisi, Dafide o ne a kokotlelela Jehofa . . . mme a itira ekete ga a tseye sentle go loga leano la go falola Jehofa o ne a utlwa thapelo ya ga Dafide