Go Rapela fa Pele ga ba Bangwe Ka Pelo e e Ikokobeditseng

E NE E le letsatsi le le itumedisang mo historing ya Baiseraela. Kgosi Dafide o ne a rulaganyeditse gore Araka ya ga Jehofa e tlisiwe mo motseng-mogolo o mosha, eleng Jerusalema. Ka boitumelo, o ne a baka Jehofa fa pele ga batho botlhe, a konela thapelo e e tswang pelong ka mafoko ano: “A go bakwè Yehofa, Modimo oa Iseraela, go cwa bosasimologeñ le go ea hèla bosakhutleñ.” Ka pelo yotlhe, bao ba reeditseng “ba re, Amen! me ba baka Yehofa.”​—1 Ditihalō 16:36.

Mo metlheng ya bogologolo, go ne go tlwaelegile gore motho yo o tshwanelegang mo gare ga batho ba Modimo a emele ba bangwe ka thapelo ka tsela eno. Mme batlhanka ba ga Jehofa gompieno ba na le mokgwa o o tshwanang. Dipokano tsa phuthego, dikopano, dinako tsa dijo tsa lelapa, le dithuto tsa magae tsa Bibela ke mangwe a makgetlo ao banna ba Bakeresete​—mme basadi ka dinako dingwe—​ba nnang le tshiamelo ya go emela ba bangwe ka thapelo one. (1 Bakorintha 11:4, 5) Diphelelo e nna dife? Jaaka mo motlheng wa ga Dafide, bao ba reeditseng ba bo ba re “Amen” ba agilwe ebile ba ikutlwa gore kamano ya bone le Jehofa e nonotshitswe.

Go emela ba bangwe ka thapelo ke boikarabelo jo bo boima. Motho yo o rapelang o tshwanetse go tlhagisa megopolo ka tshwanelo eo e bontshang seo se leng mo dipelong tsa bao ba reeditseng. Thapelo ya gagwe e ama bomoya jwa bone. Ka jalo, bao ba ipelelang tshiamelo eno ba tla bo ba dira sentle go etsa kopo ya ga Dafide: “A morapèlō oa me o rañwè ha pele ga gago yaka mashwalō.”​—Pesalema 141:2.

Re ka baakanyetsa dithapelo tsa rona jang gore di nne tseo di lonko lo monate jaaka maswalo fa pele ga ga Jehofa? Ka go akanya esale gale ka seo re tlileng go se bua go ya ka lesedi la kaelo leo Jehofa a ileng a baakanyetsa ka lone. Bibela e na le dithapelo tsa sekao gammogo le kgakololo e e molemo malebana le kgang ya thapelo. Go sekaseka tshedimosetso eno go tla re ruta melao-metheo e e botlhokwa eo e leng mosola segolo-bogolo fa re rapela re utlwiwa ke ba bangwe le mo boemong jwa bone.

Ka Pelo e e Ikokobeditseng

Mongwe wa melao-metheo eo ke gore Jehofa o utlwa dithapelo tseo di dirwang ke batho ba ba boikokobetso. (2 Ditihalō 7:13, 14) Mopesalema o re bolelela jaana: “Gonne, leha Yehofa a le godimo, leha go nntse yalo, o tsaeatsia bañotlegi: me baipegi o ba itsetse kgakala hèla.” (Pesalema 138:6) Jaaka sekao sa seno, tlhokomela boikokobetso jwa ga Kgosi Solomone mo thapelong ya gagwe fa pele ga batho fa go ne go kgakolwa tempele. O ne a sa tswa go fetsa go aga nngwe ya dikago tse dintle go gaisa tse di ka bonwang mo lefatsheng leno, mme seno ga se a ka sa mo dira gore a ikgodise. Go na le moo, o ne a rapela jaana: “Me a rure Modimo o ka aga le batho mo lehatshiñ? bōna, legodimo, le legodimo ya magodimo ga lea gu lekana; bogolo yañ ntlo e ke e agileñ!”​—2 Ditihalō 6:18.

Le rona re tshwanetse go nna boikokobetso, segolo-bogolo fa re rapela mo boemong jwa ba bangwe. Go ya bokgakaleng jo bo rileng, boi kokobetso bo bontshiwa ke modumo wa lentswe. Tota gone, Bakeresete ba tshwanetse go tila boikokobetso jwa maaka kana boitimokanyi. Mme dithapelo tsa boikokobetso ga di utlwale jaaka tse di itshemang. (Mathaio 6:5) Gape, boikokobetso bo bontshiwa, ka seo re se buang. Fa re rapela ka boikokobetso, ga re kitla re batla gore Jehofa a dire dilo tse di rileng. Go na le moo, re tla kopa gore a dumele go dira ka tsela e e rileng tumalanong le thato ya gagwe.​—Bapisa Pesalema 118:25.

Gape, boikokobetso bo tla re gogela mo go tileng go diriseng dithapelo go supa ntlha nngwe kana go neela kgakololo ya botho go batho ba ba rileng. Kwantle ga moo, re tla bo re bontsha moya oo o neng wa bontshiwa ke Mofarasai mo go sengwe sa ditshwantsho tsa ga Jesu. Jesu o ne a bua kaga Mofarasai mongwe le mokgethisi mongwe bao ba neng ba rapela ka nako e le nngwe mo tempeleng. Mofarasai yoo o ne a re: “Modimo, kea gu leboga ka go bo ke sa nna yaka batho ba bañwe, ba le boikgagapeledi, le basiamolodi, le ba boaka, kgotsa yaka mokgethisi eo. Ke tle ke ikitse go ya gabedi ka weke moñwe le moñwe; le sa boshomè sa cotlhe tse ke di bapalañ ke se ntshe.” Mme mokgethisi o ne a tswelapele a ititaya sehuba, a re: “Modimo, nkutlwèla botlhoko, nna eo ke leñ moleohi.” Phetso ya ga Jesu e ne ya nna efe? “Monna eo [mokgethisi], o hologetse kwa tluñ ea gagwè a siamisicwe bogolo go eo moñwe [Mofarasai].”​—Luke 18:9-14.

Batlhanka ba ga Jehofa bao ba leng boikokobetso ka boammaaruri le bone ba lemoga boemo jwa bone fa pele ga gagwe. Ba kwa tlase go feta baengele, mme Jehofa ene ke Molaodi wa lobopo yo o nnetseng ruri, yo mogolo go gaisa. (Pesalema 8:3-5, 9; 90:1-4) Fa batho ba ba rileng ba nna le sebaka sa go bua le dikgosi kana babusi ba lefatshe leno, gantsi ba dira jalo ka maitseo le ka tlotlo, ba anaanela tshiamelo eo thata. A re tshwanetse go sa nne le maitseo le kanaanelo e e tshwanang le eo fa re bua le “Modimo o o tshedileñ le Kgosi e e sa khutleñ”? (Yeremia 10:10) Tota ga go a nna jalo. Jalo, dipolelo tse di ntseng jaaka, “Dumela Yehofa” kana, “Re batla go bua le wena, Jehofa” ga di a siama fa re rapela, fela jaaka go ntse ka dikakgelo tsa puisano tse di ntseng jaaka, “Lo kae?” “Fetisetsa madume a rona go Jesu,” kana, “Tlhola sentle.”​—Bapisa Moreri 5:1, 2.

Lefa go ntse jalo, a moaposetoloi Paulo ga a ka a bolela gore re tshwanetse go atamela Jehofa ka “botlhōkapoihō”? (Bahebera 4:16; bapisa 1 Yohane 3:21, 22.) A seo ga se re neele kgololesego ya go bua ka moo re bonang go tshwanela ka teng? Tota eseng jalo. Polelo ya ga Paulo e ne e lebisa go lebaka la gore ka ntlha ya setlhabelo sa ga Jesu re ka atamela Jehofa go sa kgathalesege boemo jwa rona jwa boleo. Re ka mo atamela ka thapelo ka nako epe fela le ka kgang epe fela. Mme le fa re rapela ka botlhokapoifo, re tshwanetse go lemoga fa re se ba sepe ka boikokobetso. Ka gone, Jehofa o boletse jaana: “Me motho ke eo, eo ke tla lebañ kwa go èna, eboñ èna eo o humanegileñ, a le mōea o o ñomogileñ, me a roroma ka lehoko ya me.”​—Isaia 66:2.

Kgakololo e e Tlhagisang

Jesu Keresete o ne a neela kgakololo e nngwe malebana le thapelo mo Therong ya gagwe ya mo Thabeng. Mo go yone o ne a tlhagisa gore fa re rapela ga re a tshwanela go “boaboèla hèla, yaka Badichaba ba tle ba dihe.” (Mathaio 6:7) Seno ga se bolele gore ga re a tshwanela go boaboelela go rapela kaga kgang e le nngwe (fa fela re tlhomamisega gore ke selo se se tshwanetseng go ka se rapelela). Re bolelelwa gore: “Lōpañ, me lo tla nèwa; batlañ, me lo tla bōna: kgwanyakgwanyañ, me lo tla bulèlwa.” (Mathaio 7:7) Go na le moo, tlhagiso ya ga Jesu e ne e kaya gore ga re a tshwanela go boaboeletsa dilo go ya bokgakaleng jwa gore di seka tsa tlhola di nna le bokao. Ka mafoko a mangwe, “Lo seka lwa boaboeletsa dilo tse di lolea.”​—Mathaio 6:7, mokwalo o o kwa tlase wa Ref. Bi.

Batho ba bangwe ba na le tlwaelo ya go boeletsa thapelo ya sekao kgapetsa kwantle ga go akanyetsa mafoko a yone ka gope. Ka dinako dingwe dithapelo tseo tsa sekao di ka puo eo motho yo o rapelang a sa e tlhaloganyeng. Ono ke mofuta o mongwe wa ‘dilo tse di lolea tse di boaboelediwang.’ Se sengwe ke seno: A o ke o akanye ka Mokeresete mongwe yoo ka ntlha ya botshwakga a welang mo mokgweng wa go dirisa mafoko a a tshwanang ka boene fela letsatsi le letsatsi fa a leboga Jehofa. Kgabagare, dipolelwana tseo di tlhoka bokao. Le eleng leina la Modimo, ebong Jehofa, le ka nna la dirisiwa ka tsela eno. Go boammaaruri gore, re kgothalediwa go bitsa leina la ga Jehofa (Pesalema 105:1) Mme fa re dirisa leina leo kwa bokhutlong jwa mo e ka nnang polelo nngwe le nngwe e e mo thapelong ya rona, jalo e nna jaaka pheteletso kana ‘poapoeletso e e lolea.’

Paulo o ne a ama molao-motheo o mongwe o o botlhokwa fa a ne a kwala jaana: “Ha ke rapèla ka chomi, mōea oa me oa rapèla, me tlhaloganyō ea me ga e na sepè. . . . Me ha u leboga ka mōea, eo o emeñ mo bonnoñ yoa eo o sa rutegan, o tla bua yañ, a re, Amen, mo go lebogeñ ga gago, ka a sa itse se u se buañ?” (1 Bakorintha 14:14-16) Ka motlha wa ga Paulo Bakeresete bangwe ba ne ba amogela mpho e e gakgamatsang ya dipuo, mme ka phepafalo bangwe mo gare ga bone ba ne ba rapela ka dipuo tseno mo pele ga phuthego. Mme jaaka Paulo a bontshitse, phuthego yotlhe e ne e sa di tlhaloganye.

Gompieno, ga re na mpho e e ntseng jalo e e gakgamatsang. Mme Bakeresete bao ba rapelang mo boemong jwa ba bangwe ba tshwanetse go rapela tsela eo e tla tlhaloganngwang. Ka sekai, fa puo ya phatlalatsa e simolola, re laletsa batho ba ba leng gone go kopanela le rona mo thapelong. Mo thapelong e e ntseng jalo, ka tlhomamo go a utlwala go tila kitso-mafoko kana kgang eo bao ba etileng ba tla nnang le bothata go e tlhaloganya.

Dithapelo di Tshwanetse go Nna Boleele Bokae?

Dithapelo tsa botho di ka nna ditelele ka moo re batlang di nna ka gone. Pele ga Jesu a tlhopha baaposetoloi ba gagwe ba ba 12, o ne a rapela bosigo jotlhe. (Luke 6:12) Lefa go ntse jalo, thapelo ya fa pele ga batho e tshwanetse go nna boleele jo bokae? Mme kana, pele ga a aba ditshwantshetso fa a ne a tlhoma Segopotso sa loso lwa gagwe, Jesu o ne a ‘segofatsa’ le go ‘leboga,’ ka phepafalo o ne a dira jalo ka dithapelo tse dikhutshwane (Mathaio 26:26-28) Kafa letlhakoreng le lengwe, thapelo ya ga Solomone fa tempele e ne e kgakolwa e ne e le telele tota. Thapelo ya ga Jesu ya bosigo jwa pele ga a swa le yone e ne e ntse jalo.​—2 Ditihalō 6:14-42; Yohane 17:1-26.

Jalo, ga go na molao ope wa gore thapelo ya fa pele ga batho e tshwanetse go nna boleele jo bo kae. Mme ga go na botlhokwa jo bo kgethegileng mo dithapelong tse ditelele. Tota, Jesu o ne a kgala bakwadi bao ba neng ba ‘suputsa matlo a basadi ba batlholagadi, mme ba ipate ka go dira merapelo e meleele.’ (Luke 20:46, 47) Dithapelo tsa mo boemong jwa ba bangwe di tshwanetse go umaka maemo kana ditlhokafalo tsa bone ka phepafalo mme di tshwanetse go nna le boleele joo bo tshwanelang tiragalo eo. Ga re a tshwanela go dira dithapelo tse di ditelele, tse di rathang sekgwa fela re akareletsa dintlha tse dintsi tseo di sa nyalaneng. Fa re lebogela dijo, thapelo e ka nna e khutshwane thata. Thapelo eo e bulang pokano ya Bokeresete le yone ga e a tshwanela go nna telele. Motho yo o emelang lelapa mo mosong kana mantsiboa, kana motho yo o konelang kopano ka thapelo, a ka rata go akareletsa dintlha tse di oketsegileng tseo di tshwanelang tiragalo eo.

Thapelo eo e dirwang mo boemong jwa ba bangwe e tla nna le matswela a a molemo fa e tswa mo pelong e e ikokobeditseng mme e rapelwa ka tekatekano e e tshwanetseng le kakanyetso. E tla aga bomoya jwa bao ba reeditseng mme e tla nonotsha kamano ya bone le Jehofa. Ka gone, jaaka bao ba neng ba na le seabe mo thapelong ele ya ga Dafide e e tswang pelong fa araka ya kgolagano e ne e tlisiwa kwa Jerusalema, botlhe bao ba reeditseng ba tla tlhotlhelediwa ‘go re “Amen” le go baka Jehofa.’​—1 Ditihalō 16:36.

[Lebokoso mo go tsebe 22]

A go tshwanetse gore bareetsi ba buele “Amen” kwa godimo kwa bokhutlong jwa thapelo ya fa pele ga batho?

Ee, fa ba eletsa kana ba ikutlwa ba patelesega go dira jalo. Paulo o ne a bua ka “Amen” eo e buiwang ke bao ba reeditseng thapelo, lemororo ka tlhamalalo a ne a sa bolele gore seno se buelwa kwa godimo, kana kwa tlase, mo dipelong tsa bone. (1 Bakorintha 14:16) Lefa go ntse jalo, kafa tlase ga Molao wa ga Moshe, go ne go na le lekgetlo lengwe leo ka lone Baiseraele ka tlhamalalo ba neng ba laelwa go buela “Amen” kwa godimo. (Duteronome 27:14-26) Jalo, fa motho yo o rapelang a supa bokhutlo jwa Thapelo ya gagwe ka gore “Amen,” go a tshwanela gore bareetsi ba re “Amen” mo dipelong tsa bone kana ba utlwala ka lentswe le le kwa tlase. Batsadi ba tshwenetse go ruta bana ba bone go bontsha kanaanelo e e tswanetseng ka tsela eo ba reng “Amen” yo o sa utlwaleng ka yone.

[Lebokoso mo go tsebe 23]

Fa ngwana a simolola go lela, mogala o lela, kana sekgoreletsi sengwe se sele se diragala ka nako ya thapelo ya phuthego, a ke go tlhoka maitseo gore moreetsi mongwe a tshware boemo joo jwa tshoganetso?

Nnyaa. Tota, go tla bo go bontsha lorato gore motlhanka mongwe wa bodihedi yo o abetsweng a tlogele phuthego e e rapelang ka tshitsibalo le go tshwara boemo joo jwa tshoganyetso ka tsela e e tshwanetseng. (1 Bakorintha 14:40) Ka gone, phuthego yotlhe e ka tswelela pele e rapela e sa tshwenngwe. Lefa e ka nna mang yo o tshwarang boemo joo jwa tshoganyetso gape a ka kopanela mo thapelong fa boemo joo jwa tshoganyetso bo fedile.