O Lalediwa Dikopanong Tsa “Kagiso ya Bomodimo”

ABO mosupi mongwe le mongwe wa Mokeresete wa ga Jehofa o lebeletse pele dikopano tsa ngwaga e ngwaga tsa kgaolo ka tlhoafalo jang ne! Ga go na pelaelo kaga go bo e le tiragalo e e kgatlhisang ka mo go kgethegileng ya khalendara ya ngwaga mongwe le mongwe. Dipuo tse di molemo, metshameko ya Bibela, dibuka tse disha, botsalano​—ka dinako dingwe gape le ba le bantsi ba ba nnang gone—​di tswakana go dira gore dikokoano tseno e nne sengwe se se kgethegileng eleruri.

Ka sekai, a o ke o tlhokomele Dikopano tsa “Baboloka Bothokgami” tseo di neng di tshwerwe ngogola. Tse pedi tsa kwa Sao Paulo le Rio de Janeiro, Brazil, di nnile tlhora ya bao ba nnileng gone ya 249 351, le ba le 2 645 ba ba bontshitseng boineelo jwa bone go Jehofa Modimo ka kolobetso ya metsi. Kopano ya kwa Montreal, Canada, eo e neng e tsenetswe ke ba le 78 804, e ne e tlhomologile ka ntlha ya phaka ya yone ya dikharabene le ka ntlha ya go tshwarwa ga yone ka dipuo di le 11 tse di farologaneng. Bao ba nnileng gone kwa kopanong ya Zurich, Switzerland, ba begile gore ga ba ise ba ke ba tsamaye ba nne le sepe se se tshwanang le matlhagatlhaga le boipelo jo bogolo go gaisa tsa yone le ka motlha mo botshelong jotlhe jwa bone. Baemedi bao ba neng ba tsenetse e le nngwe ya dikopano tseno kana go feta tseo di neng di tshwaretswe kwa Poland le bone ba tlhagisitse maikutlo a a tshwanang.

Pego ya lefatshe ka bophara eo e sa felelang e bontsha gore go nnile le ba le 5 653 689 kwa Dikopanong tsa “Baboloka Bothokgami” di le 754, tseo di neng di na le Basupi ba le 75 202 bao ba kolobeditsweng. Abo Jehofa o segofaditse dikokoano tseno tsa batho ba gagwe ka mo go gakgamatsang jang ne!

Go farologana le polelo e e tlwaelegileng, mo go bao ba neng ba le gone kwa dikopanong tseno seo se diragetseng se ne se feta seo se neng se lebeletswe. Go ne ga dumalanwa mo e ka nnang ka pelo e le nngwe gore ya bofelo-felo e ne e le yone e e gaisang. Jalo Basupi ba ga Jehofa botlhe ba tla bo ba lebeletse Dikopano tsa Kgaolo tsa “Kagiso ya Bomodimo” ka tlhoafalo, tseo di tla tshwarwang lefatshe ka bophara​—tseo di le 130 tsa tsone di setseng di tshwerwe kwa United States.

Abo kopano ya rona ya kgaolo e na le setlhogo se se molemo jang ne: “Kagiso ya Bomodimo”! Gompieno mokgatlho wa batho o tlhasetswe ke ntwa. Ga se fela dintwa tsa mmatota tse ga jaanong di lowang go dikologa lefatshe mme gape go na le mefuta e mengwe ya go lwa: ntwa ya tsa itsholelo le ntwa magareng ga banyalani, gammogo le magareng ga batsadi le bana. Mme seo se farologaneng le seo gotlhelele, go na le kagiso mo gare ga batho ba ga Jehofa ba ba ineetseng. Kagiso ya bone ke ya bomodimo, e e tswang go Yo O nang le Bomodimo, ebong Jehofa Modimo, Modimo wa kagiso o o neelang kagiso. Ba mo kagisong le ene ka ntlha ya tumelo le ditiro, ka gone ba kgona go nna mo kagisong le ba bangwe, mo phuthegong le mo lelapeng.​—Bafilipi 4:7; Baroma 16:20.

Gape, go tshwanetswe ga lemogiwa gore kagiso eno ya bomodimo ga se go sa nne gone ga ntwa fela. Lefoko la kagiso ka Sehebera ke sha·lohmʹ, mme ga le kaye go nna mo kagisong fela mme pholo le go atlega. Ee, Basupi ba ga Jehofa ba ipelela katlego gammogo le go sa nne gone ga ntwa ka ntlha ya go bo ba le mo paradaiseng ya semoya. Kopano eno e tla kgonisa botlhe bao ba tla nnang gone gore ba amege ka kagiso ka mo go oketsegileng ba sa kgaotse le go amega ka go godisa kagiso, go ya bokgakaleng joo ba kgonang ka jone.​—Baroma 12:18.

Jaaka mo dingwageng tse di fetileng, dikopano tseno di tla simolola ka Labone thapama ka 1:10. Letsatsi lengwe le lengwe le na le setlhogo seo se amanang le kagiso, sa letsatsi la ntlha ke “Modimo O Tla Segofatsa Batho ba Gagwe ka Kagiso,” seo se tserweng mo go Pesalema 29:11. Go tla tlotliwa ka thapelo e e mosola, mme thulaganyo eno e tla fitlhisiwa kwa setlhoeng ke puo eo e malebana le ka moo Jehofa a tswelang pele go dira dilo tsotlhe sesha ka gone.

Ka Labotlhano puo ya setlhogo, “Kagiso ya Bomodimo mo go Bao ba Rutiwang ke Jehofa,” e tla totobatsa motswedi wa kagiso ya rona. Nngwe ya dikarolo tse dingwe tsa thulaganyo e tla nna motshameko wa Bibela o o itumedisang oo o nyalanyang metlha ya bogologolo le motlha wa rona.

Mo godimo ga puo ya kolobetso, thulaganyo ya Matlhatso mo mosong e tla otlelela maikarabelo a rona a Bokeresete mo go ba bangwe le ka moo go tlhokafalang ka gone gore re dire kgatelopele ka metlha jaaka Basupi ba Bakeresete ba ga Jehofa. Thapama, go tla nna le kgakololo e e molemo ya maloko a lelapa le balebedi ba ba tlhophilweng.

Motshameko wa motlha wa segompieno o o buang puo phaa ebile o na le matswela o tla tshamekiwa ka Sontaga mo mosong. Thapama, puo ya phatlalatsa e e maatla e e reng “Ga bo ga Tsamaya ga Nna le Kagiso!​—Fa Modimo a Bua” e tla nna nngwe ya ditiragalo tse di kgatlhisang ka mo go kgethegileng tsa kopano eno. Kwantle ga pelaelo botlhe ba ba tla nnang gone kwa kopanong eno ba tla tsamaya ba ikutlwa ba tlhomeletswe ka botlalo ke Modimo wa kagiso gore ba dire thato ya gagwe.

Ka gone, tlaang ka malatsi otlhe a le mane lo na le keletso e e molemo ya semoya, lo amegile ka botlalo ka seo lo se tlhokang semoyeng. (Mathaio 5:3) Rulaganya merero ya gago e le gore o nne gone ka nako mo pineng eo e simololang le thapelo letsatsi le letsatsi. Tla o itlhomeletse gore o kwale dintlha, gape, fa o kwala dintlha tsa konokono go tla go thusa gore o tlhome mogopolo mo go seo sebui se se bolelang. Go feta moo, dintlha tseo di tlhagisiwang di tla itsetsepela ka tlhomamo mo pelong le mo mogopolong wa gago.

Mme le ka motlha re seka ra tlodisa matlho ntlha ya gore kobamelo e e phepa ya ga Jehofa Modimo ga se kgang ya go amogela fela. Gape ke kgang ya go aba. Re batla go gakologelwa molao-motheo ono wa Bibela: “Eo o yalañ ka boñoma, o tla rōba ga boñoma: me eo o yalañ ka bogolo, o tla rōba ka bogolo.” (2 Bakorintha 9:6) Mo godimo ga seo, ereka Jesu a boletse gore “go aba, go lesegō bogolo go go amogèla,” a re boneng boipelo jo bogolo go gaisa joo bo ka kgonagalang kwa kopanong eno ka go aba go le gontsi ka mo re ka kgonang ka gone, re ithaopela ditirelo tsa rona ka tshosologo. (Ditihō 20:35) Eleruri, le ka motlha ga go a tshwanela go tlhokafala gore go dirwe dikopo tsa thuso ya boithaopo.

Go feta moo, a re tseyeng paakanyetso ya go nna le seabe mo bosuping jwa tshimo ka Labotlhano thapama ka masisi. Mme ekete re ka ntshetsa ditshono tsa bosupi jo bo sa ikaelelwang matlho dinameng ka malatsi otlhe a le mane. Seno se re gopotsa ka molao-motheo o mongwe wa Bibela: Moya o o pelotshweu o tla nontshiwa, mme yo o nosetsang o tla nosediwa. (Diane 11:25) Ee, a re laletseng botlhe bao re ka kgonang go ba laletsa gore ba ithute ka bobone ka moo Basupi ba ga Jehofa eleruri ba ipelelang kagiso ya bomodimo ka gone.