Dipotso tse di Tswang go Babadi

◼ Ke eng seo se tshwantshediwang ke “dinao le menwana” tsa “sechwanchō se segolo” sese tlhalosiwang go Daniele 2:31-45?

Boperofeti jono bo tlhotlheleditswe ke Mongwe yo “o senolañ tse di sa itsiweñ,” Morena wa Lobopo Jehofa Modimo ka boene, mme bo fitlhelela setlhoa sa jone mo “metlheñ ea bohèlō,” fa kganetsano ya bolaodi jwa lefatshe e tshwanetse go rarabololelwa ruri. (Daniele 2:28) Go tla go fitlha mo motlheng wa rona, go tloga mo tshimologong ya “metlha ea Badichaba” ka 607 B.C.E., go nnile le tlhatlhamano ya mebuso ya lefatshe, go simolola ka mmuso wa Babelona le go tswelela ka Media le Peresia, Gerika, Roma, le mmuso wa Engelane le Amerika. Eno e emelwa ke dikarolo tsa tshipi tsa setshwantsho seno.​—Luke 21:24.

Lefa go ntse jalo, kwa bofelong jwa Metlha ya Baditšhaba ka 1914, go tswakana ga dipuso tse di farologaneng tsa batho go ile ga tlhaga mono mo lefatsheng. (Mathaio 24:3-12) Batho fela ba ba tlwaelegileng (“losika lwa batho” lo lo dirilweng ka lerole la lefatshe) ba na le tlhotlheletso e kgolo mo dikgannyeng tsa mmuso. Mebuso ya bojammogo le ya puso ya batho ka batho e tlhageletse kwa pele, mmogo le mefuta ya mebuso e mengwe e e gatelelang ya sekatshipi. Di tshwana le “tshipi e tlhakanye le lecopa ye le loraga” tse di dirang dinao le menwana tsa setshwantsho seno.

Go bontshitswe dipono tse di farologaneng kaga “menwana” e e lesome eno. Mme ereka “shomè” gantsi a dirisiwa mo Bibeleng go supa go felela mabapi le dilo tse di mo lefatsheng, “menwana” e e lesome go lebega ka mo go utlwalang e emela tsamaiso yotlhe ya kgolokwe ya mebuso kwa bokhutlong jwa metlha. ‘Bogosi jwa Modimo bo tla’ kgatlhanong le dinao le menwana tsa setshwantsho seno, bo sila dikarolo tsa bofelo tsa puso ya batho. Abo re ka itumelela gore puso ya kagiso, le e e molemo ya Bogosi jwa ga Keresete e tla tlatsa lefatshe lotlhe ka nako eo jang!a​—Mathaio 6:9, 10; bapisa Isaia 11:1, 9.

Toro e nngwe ya ga Nebukadenesare e e tlhalositsweng go Daniele kgaolo 4 le yone e supela go ditiragalo tse di latelang morago ga bokhutlo jwa Metlha ya Baditšhaba. Kwa bokhutlong batho ba tshwanetse go “itse ha Mogodimo-dimo a busa mo bogosih yoa batho, me o tla a bo nee moñwe hèla eo o mo ratañ,” ke gore, go Kgosi, Jesu Keresete.​—Daniele 4:25; 7:13, 14.

[Ntlha e e kwa tlase]